1 "Nnzukua Aloni nndongu waku joanndeta kwaku kuhuma nkati ja Aizilaeli pamu na bana baki Nadabu na Abihu na Eleazali na Itamali, ili antumakiya mu lihengu lu ugolu. 2 Wansonila nndongu waku Aloni ingobu ya sapi ili yumpekiya ukolongu ni isima. 3 Walagalakiya akapundi boti babube naapeki umanyi bunndenganakiya Aloni ingobu ili bunzemika kwa ndaba ji lihengu lu ugolu heli pee. 4 Wapwagila anndenganakiya indu yenze, kapuku kukuwata pikigamba ni kizibau na kanzu na lingobu lelinyambiki, kilemba nu nsalu. Aloni mmbeli waku pamu na bana baki akanalomi biiwata ili andumakiya mu lihengu lu ugolu. 5 Aka pundi behaba ngiti atumia litonzi la langi ja buluu na zambalau na ngeli na nyusi ya zahabu pamu ni kitambaa kinhuu kupukupu sealokiki."

6 "Alenganakiya kizibau saka nngolu kwi ingobu nhuu kupukupu jealokiki kwa nyusi ya zahabu na langi ja buluu na zambalau na ngeli na kitambaa seabei mapambo sukulokale. 7 Kwibiya ni migoji mibeli jukukonge mumabega yeasoniki mu lupeta yaki ibeli. 8 Mkanda ukukamulaki gwilenganakiya kwa ingobu nhuu kupukupu goalokiki. Kwa nyusi ya zahabu na buluu na zambalau na ngeli nu kubekwa pamu ni kizibau sealokiki. 9 Ndipala wijukua malibu mabeli ga Saludoniki gaguge ahandiki panani jaki mahina kumi na ibeli ga bana buku Izilaeli. 10 Mahina sita mu lilibu lu utumbuli, na mahina sita gagahigali mu lilibu la pili mahina gapwatana kulengana nukusaliwa. 11 Andika maina ga bana banalomi baka Izilaeli ngati pundi sonala hejuhongule mihuli. Ndienu gugabeka malibu gehaga mu ikamulaki ya zahabu. 12 Jukua malibu mabeli haga na ugabeka mwi ikamulaki ya malibu heyi sonila kizibau mu mabega ili kugakomboka makabili komi na mabeli guku Izilaeli. Henu Aloni jiiwata mahina haga mu mabega gaki palongi jangu nepani, Bambu Sapanga. 13 Lenganakia ikamulaki yukukamulaki malibu ibeli ya zahabu, 14 ni mikupu mibeli ja zahabu ja sapi jealokiki ngati nngoji. Na ujikonga mikupu heji mwi ikamulaki ya malibu hei.

15 "Wilenganakiya kipuku sukuwata pikigamba su kutemuli, kilenganikiwa kuupundi waasapi ngati ekilenganakiki kizibau kwa nyusi ya langi ja zahabu na buluu na langi ngeli ni kitambaa sasapi sealokiki sela. 16 Kipuku hesi atulana pandi ibeli nu ulasu waki nu upana waki ilengana kwa sentimita ishilini ni ibeli. 17 Kipuku sehesi beka misitali nnsesi ja malibu ga bei ngolongu. Malibu ga madini ga akiki na madini ga topazi na alumasi ngeli, 18 nstali ja pili jibiya ja malibu ga zumalidi na malibu johali ja langi ja samawati na alumasi, 19 nsitali wa tatu wibiya wa malibu ga yasito na malibu ga akiki ngeli na Ametisito, 20 nu nsitali gu nsesi wibiya wa zabalajadi na malibu ga shohamu na malibu ga yasipi. Malibu haga goti giibekwa mwi tubati twa zahabu nu kubekwa mu kizibau. 21 Henu pibiya na malibu komi na mabeli gaasoliki mahina ga bana baka Yakobu. Kila lihina libiya ngati muhuli, ili kulonguke makabila komi na mabeli. 22 Kwa ndaba ji kipuku si pikigamba sehesi, wilenganakiya mikupu ja zahabu ja sapi jealokiki ngati nngoji. 23 Ahelahe wilenganakiya peti ibeli ya zahabu ndaba ji kipuku sukuwata pikigamba nu kujege mu lupeta ibeli yi kipuku sehesi, 24 gujikonga mi mikupu mibeli ja zahabu mu peti yela mu kipuku si pikigamba. 25 Ipeta ibeli yu mkupu wa zahabu waijelangana mu ikobake ili ikamulana ni kipandi sumumabega gi kizibau upandi wa palongi. 26 Kabee wilenganakiya peti jengi ibeli ya zahabu nukuibeka mu lupeta ibeli lwa pai upandi unkati uku kipuku sukuwata pikigamba pambipi ni kizibau. 27 Ndienu wilenganakiya peti yengi ibeli ya zahabu nukuijege palongi mu lupeta ya pai upandi ikizibau, pandu papuje palombana nu nkanda goalokiki sapi ngani. 28 Kipuku si pikigamba siikongwa mu kizibau sukukonganake peti yaki ku migoji ja langi ja buluu, ili kipuku hesi si pikigamba silegaleka ila kitamila nkanda gola goalokiki sapi ngani."

29 "Kipindi sokapi, Aloni ejujingi pandu pa sapi ili kulonge na Bambu Sapanga, jubiya juwata kipuku sukuwata pikigamba sekibii na mahina ga makabila ga bana buku Izilaeli panani ja kipiku sela, kwa ndaba heji nepani Bambu Sapanga ngananzewi mwanganya. 30 Ndienu mukipuku hesi beka hindu ibeli yebiikema sumimu na ulimu yeatumii akaagolu kulaluki sindu sejupala Sapanga. Ibiya panani ja mwoju waka Aloni kila kipindi pajujingii palongi jaka Bambu Sapanga. Henu masoba goti Aloni jibiya nu uwesu ukutemula kwa ndaba ja bana buku Izilaeli palongi jaka Bambu Sapanga."

31 "Wisona kanzu jukuwati kizibau kwi kitambaa sa langi ja buluu pena. 32 Jibiya na napwasi jukupetesa umutu pikilanda, napwasi je heji jikulaliya ili ijenduka. 33 Mu lupeta lwa pai kuyongolota pandi yoti, wilenganakiya ngati matunda ga makomamanga ga nyusi ya langi ja bluu na langi ja zambalau na za langi kuyongolota lupeta lwa langi ngeli nukuyongolota lupeta lwa ingobu heji, nugubeka kabeti ikengeli ya zahabu kati ja makomamanga haga. 34 Henu ikengeli ya zahabu na makomamanga itenda kujepana kuyongolota lupeta lu likanzu. 35 Aloni jiiwata kanzu jeheji kuhenga lihengu laki lu ugolu na sauti jaki jijoanika kipindi pajijingala Pandu pa Sapi palongi jangu ni kipindi sejubiya jutenda kuboka ikengeli yehei itenda kujoanika, najombi ngajikomeke."

36 "Ndipala, wilenganakiya kibati sa zahabu sapi nu kusola panani jaki ngati mundu ejusola muhuli, ‘Joammboiki kwaka Bambu Sapanga.’ 37 Kibati sehesi wikonga palongi ja mbumbu kuukanda sa langi ja buluu. 38 Aloni jiiwata kibati sehesi pikibongi saki, ili nepani Bambu Sapanga nagajetakiya matambiku goti gaambiiki Aizilaeli hata ngati ahengiki makosa mukumbiki."

39 Wandenganakiya Aloni kanzu nasu na mbumbu jaki su kutumii kitambaa kihuu seking'anya, na wanndenganakiya nkanda gojupambiki mundu jojumanyiki kupamba.

40 Walenganakiya bana baka Aloni kanzu, nkanda na mbumbu ili abonikana akolongu na baanyambiki. 41 Wawantika Aloni na bana baki ingobu heyi, ndienu waajitaliya mahuta gi mizeituni na kwaabekee maboku ili andumakiya mu lihengu lu ugolu. 42 Ahelahe wasonila kibundu sikitambaa kinhuu kupukupu tumbuka mu kibunu mbaka mu miungu ili biibonikana eabii. 43 Aloni na bana baki biiwata ibundu heyi kila ejingii mu lihema la sapi au baahegale palongi ji litambiku, kuhenga lihengu li kigolu Pandu pa Sapi. Kwi indela heji ngajilangi namuna heabii na kuba hatali jukukomeka. "Haga gabiya malagalaki ga masoba goti kwaka Aloni ni ibeleku yaki."