1 Bezaleli na Oliabu na ajaki bunsonila nngolu ingobu sukutumi nyusi ya langi ja buluu, ja zambalau na ngeli basona ingobu yeilengana yukuwata kipindi sukuhenga lihengu pandu pa sapi. Ingobu ye heyi ya sapi ngati Bambu Sapanga eandagalakiya Musa. 2 Bunsonila kizibau sa zahabu, kwa nyusi ya langi ja buluu na langi ja zambalau na langi ngeli ni kitambaa kihuu kupukupu sealokiki. 3 Bahugatiya nukuponda kwa nyondu zahabu nu kujiseku na kuba ipandi ipandi ipepandau ili kwiiloka pamu na nyusi ja langi ja buluu na zambalau na ngeli ni kitambaa kihuu kupukupu sealokiki ku upundi. 4 Jalenganakiya ipandi yu mu mabega iki kizibau, yeikamulaki mu lupeta lubeli ili kupungi kizibau. 5 Nkanda goalokiki ku upundi nkolongu panani jaki ukukonge wabii sindu simu na ingobu jukuyeka pikigamba, nagwombi gwabia alenganaki kwi ingobu ngeli nakanopi na goalokiki kwa nyusi ya langi ja buluu na zambalau na ngeli, ahelahe ngati Bambu Sapanga eandagalakiya Musa. 6 Ndipala baandia malibu ga madini gabagakema shohamu yebabei mu ikobake ya madini ga zahabu, nayombi yaandikwi mahina komi na mabeli ga bana baka Yakobu gagaandikwi ngati muhuli heahandika. 7 Ndienu, jiipungila ipandi mu mabega gi kizibau kuba malibu gu kukombuke kwa makabila ga bana baka Izilaeli ngati Bambu Sapanga eanndagalakiya Musa.

8 Akapundi balenganakiya kipuku ngati ebalenganakiya kizibau, kwa zahabu na kwa sufi ja langi ja buluu na langi ja zambalau na langi ngeli ni kitambaa kihuu sealokiki. 9 Kipuku sehesi batenda kutulana na sabiya nu upandi nnsesi gogulengana ulasu nu upana sentimita ishilini ni ibeli nasombi satenda kutulanwa. 10 Kipuku se hesi sapambikwi ku misitali nsesi ga malibu ga bei ngolongu, nsitali gu utumbuli wabiya wa malibu ga madini ga akiki na madini ga topazi na madini ga alumasi ngeli, 11 nsitali gwa pili wabiya wa madini ga zumalidi na madini ga johali ga langi ja samawati na almasi. 12 Nsitali wa tatu wabiya wa madini ga yasito na madini akiki ngeli na madini ametiso, 13 Nsitali gunsesi wabiya wa madini ga zabajaladi na madini ga shohamu na madini ga Yasipi. Madini goti gabekwa mwi ibati ya zahabu. 14 Ndienu pakabii na malibu komi na mabeli gaandiki mahina komi na mabeli ga bana baka Yakobu. Gakabii aandiki ngati eaandika mihuli, kila limu aandiki liina limu kulangi mabila komi na mabeli. 15 Kwa ndaba ji kipuku sipikigamba jalenganakia mikupu ja zahabu ja sapi. Gogulokiki ngati ikobake. 16 Balenganakiya ibati ibeli ya zahabu sapi na peti ibeli ya zahabu, nukubeka peti yeheyi mu lupeta ibeli ya panani ji kipuku sehesi. 17 Mikupu mibeli ja zahabu heji bijikonga mu peti heyi ikipuku sukuwata pikigamba. 18 Mipeta ibeli yela i mikupu ja zahabu biibeka mwi ibati ibeli biikamulakiya na ipandi ibeli iki kizibau mumabega, upandi ukulongi. 19 Balenganakii peti ibeli kwa madini ga zahabu, biibeka mu lupeta lwa pai ju upandi gunkati ukipuku sehesi si pikigamba pambipi ni kizibau. 20 Balenganakiya kabe peti yengu ibeli ya zahabu nukuiibeka palongi mu lupeta lwa pai lwi ipandi ikizibau, pandu pakilombana nu nkanda gola goalokiki ku upundi waamboni. 21 Bakongiki kipuku si pikigamba mu kizibau sukukonganake peti yaki ni izibau kwi migoji ja langi ja buluu ili kipuku hesi silegaleka ila kitamila nkanda goalokiki ku upundi nkolongu ngati Bambu Sapanga eandagalakiya Musa.

22 Jalenganakiya kanzu jukuwata nkati ji kizibau ja langi ja buluu. 23 Likanzu le heli labii na napwasi jukupetesa umutu pikilanda, najombi bayongaliti lenda yealokiki ili lijenduka. 24 Mulupeta lwa pai lwa kanzu balokiki mapambu ga matunda ga makomamanga ga langi ja buluu na ga zambalau na ngeli ni kitambaa kihuu kupukupu sealokiki. 25 Ndenu, balenganakiya kengeli ya zahabu na kila palibii likomamanga babeka kengeli kuyongalota kanzu. 26 Ndienu njuga na komamanga yalongana kuguyongalota lupeta lwa kanzu je heji, ngati Bambu Sapanga eandagalakiya Musa. 27 Ndipala baalokila Aloni na bana baki kizibau ikitambaa kihuu, 28 mbumbu jikitambaa kihuu kupukupu ni kimbundu siki kitambaa kihuu kupukupu, 29 ni mikanda jikitambaa kihuu kupukupu sealenganaki kwa sufi ja langi ja buluu na zambalau na ngeli nubeka mapambu gukusone ngati Bambu Sapanga eanndagalakiya Musa. 30 Ndipala balenganakiya lipambu la zahabu sapi na kwa ndaba jukubeka pikilemba nalombi basola mihuli malobu ganga. "Bumpiiki kwaka Bambu Sapanga." 31 Bilipunga palongi jikitambaa su ukanda wa langi ja buluu ngati Bambu Sapanga eandagalakiya Musa.

32 Ndienu mahengu goti gilihema lukuketangane latenda kujomoka. Aizilaeli bahenga goti ngati Bambu Sapanga eanndagalakiya Musa. 33 Bunndetila Musa lihema la sapi pamu na yombu yaki yoti, ipungi yaki ni imbau yaki ni mapanda gaki ni mipengu jaki ni itami yaki, 34 na kipuniku sa ngosi ji likondoo likambaku nangosi yi inyama yumumasi yebapakii langi ngeli ni lipazia la pandu pa sapi, 35 na Lisanduku li Lilaganu na mikongu ni kipuniku saki, 36 na mesa na yombu yaki yoti, mabumunda gaabei palongi jaka Bambu Sapanga, 37 sindu sa zahabu sukubee taa, taa yaki na yombu yaki yoti pamu na mahuta zeituni kwa ndaba ja taa heyi, 38 ni lisanduku la zaabu, na mahuta gakwajakani babapiiki kwa Bambu Sapanga nu ubani gogubii nu unungi wa sapi na lipazia lu nndyangu ulihema, 39 ni lisanduku la shaba lukupiki litambiku na wapu waki wa shaba na mapanda gaki gukutotule na yombu yaki yoti yani bakuli ngolongu ni kitami saki, 40 lipazia ja ua na mipengu jaki na itami yaki ni lipazia lu nndyangu wa ua migoji jaki joti ni ipanda jaki na yombu yoti yetakiwa mu lihengu li lihema la sapi, yani lihema lu kuketangane na Bambu Sapanga, 41 ni ingobu yoti yebalokiki sapi ngani kwa ndaba ja lihengu la pandu pa sapi, yani ingobu ya sapi yaka Aloni na bana baki kwa ndaba ji lihengu likigolu. 42 Aizilaeli bahenga kila sindu ngati Bambu Sapanga eanndagalakiya Musa. 43 Musa jakagula kila sindu na jwabona ahengiki sapi ndaba babiya ahengiki kila sindu ngati Bambu Sapanga eanndagalakiya. Ndienu Musa jatenda kwaapenge.