1 Bambu Sapanga ampwagila Musa, 2 "Mmekila palongi jangu asaliwa bu utumbuli banalomi, ndaba asaliwa boti bu utumbuli banalomi boti buku Izilaeli na kila azaliwa bu utumbuli biinyama boti ndi bangu."

3 Musa jwaapwagila bandu, "Mulikombuka lisoba lende, lisoba leamboiki ku nndema uku Misili komwabii mwaatumwa. Kwandaba ndi lisoba le jummboa Bambu Sapanga kupete kuboku kwaki kokubii na makili. Mulisoba lende mwiikula libumunda leajegi amila. 4 Mwanganya mmboka lelenu mu nndema uku Misili lisoba lukutumbuli lamwei gobugukema Abibu. 5 Bambu Sapanga pajwaanhikisa ku nndema ye atama Akaanani na Ahiti na Ahamoli na Ahivi na Ayebusi, ndi nndema jejuje Bambu Sapanga jwaalagila aka hoku bii kupwaga jwampekia mwanganya. Nndema jejibii na luombi wa sapi kukulema nu kupugii mipugu. Nzendania mwakahenga tipati kila saka pauhika mwei ngati gongo. 6 Ku kipindi sa masoba saba nkula mabumunda ganga kujege amila ni lisoba la saba, mwihenga tipati ju kuntende isima Bambu Sapanga. 7 Kwa masoba saba haga mwiikulaa mabumunda ganga kujege amila. Giikubaa mabumunda ganga kujege amila, wala amila jiibonikana kati jinu mu nndema wi woa. 8 Lisoba le heli mwaapwagila bana binu ana, ‘Nhenga hela ndaba ji lijambu lejunhengi Bambu Sapanga pamwaboka ku nndema uku Misili.’ 9 Tipati je heji jiibia ngati sindu sukulikonga mu kuboku kwaku au pamiu, janzangatia kuendale kunkombosa kulongale nu kulibola malagisu gaka Bambu Sapanga masoba goa, ndaba Bambu Sapanga jummboa mu nndema uku Misili ku uwesu waki nkolongu. 10 Kupalika nhenga tipati heji kila saka kipindi sealagalaki."

11 Musa jwaendalia kwaapwagi bandu, "Bambu Sapanga pajwanhikisa ku ndema wa Akaanani nu kumpeke gubia mali gii ngati hejunndapila mwanganya na aka hoku bii, 12 mumpekia Bambu Sapanga kila mwana mwanalomi jojutumbuli kusaliwa il jubia litambiku. 13 Kila liponda lu utumbuli lelitumbuli kusaliwa wiitenda kuligombo kukulepa likondoo, lakini ana ngase gupai kulikombo walitunula hingu jaki. Kabee wankombula mwana ju kutumbuli kusaliwa mu bana baku wiitenda kwaagombo. 14 Ana mweni katai mwana waku jugulaluki, ‘Mana ji lijambu leheli,’ wampwagila, ‘Kwa makili makolongu gaka Bambu Sapanga jutuboha ku nndema juku Misili kotwabi twaatumwa. 15 Falau kupete ing'omu jwakaniki kutulekake kuboka, ndi Bambu Sapanga ankoma kila nsaliwa ju utumbuli mu nndema juku Misili, nsaliwanu ju utumbuli jwaka mundu na jwi mipugu. Henu nepani numpiiki matambiku Bambu Sapanga kila nsaliwanu mwanalomi ju utumbuli jwi mipugu jangu, lakini kila nsaliwa ju utumbuli jwa bana bangu niitenda kungombo. 16 Lijambu heli liikuba ngati nginyuli mu kuboku kwaku au nginyuli pikibongi saku, ili kukomboka namuna Bambu Sapanga ejummboa kuhuma ku Misili kupete makili gaki makolongu.’"

17 Kipindi Falau pajwaalekakia Aizilaeli ajenda, Bambu Sapanga ngasejwaapetisa mu nndema ja Afilisiti, hatangati indela jeheji jabia japambipi. Bambu Sapanga jwapwaga, "Ana bandu haba biiketangana na ngondu biikelabukia ku Misili." 18 Badala jaki Bambu Sapanga jwaapetisa Aizilaeli mwiindela jukuyongolota kupete kulukoba, kujenda ku nhanga uku Shamu. Aizilaeli baboka ku nndema uku Misili koni aliandi kuhenga ngondu. 19 Musa jwatotwi mahupa gaka Josepu ngati Josepu hejwalagalaki kabula ja kuwa kwaki. Jwabia jwaalapi Aizilaeli kupwaga, "Sapanga hejwanzangatia mwanganya mpita mu nndema uku Misili. Pagiihengika majambu haga mwiijukua mahupa gangu nu kuboka nagu." 20 Ndienu, Aizilaeli baboka ku Sukoti, bapomulia ku Etamu mulutengu ju lukoba. 21 Muhi Bambu Sapanga jwaalongusa kupete lupendi lu maundi ili kwaalangi indela, ni ikilu jwaalongusa kupete lupendi lwa mwotu ili kwaanang'anaki. 22 Lupendi lu liundi muhi nu lupendi lwa mwotu ikilu ngaseyakotwiki kwaalongule Aizilaeli hata kidogu.