1 "Waapwagi bandu majambu gi isoli. Wanzangati mundu mmbaja kwaalandi bandu majambu gi isoli. 2 Wiijongana na bandu kuhenga majambu mabaja. Wiijongana na bandu pasengu kulonge isoli ili kung'anambu usakaka. 3 Wampendale mundu kapuku mu magambu gaki.

4 "Ana ujiketani ng'ombi au liponda luku mmbaja waku litei kuhoba, ulijukuwa nukulikelabu kwaka mweni. 5 Ana ulibweni liponda laka mundu jojukusuki juhabwiki nu nsigu waki, nzangatia mundu hoju kulijemeka liponda laki, wala wanndeka n ukuyetuana.

6 "Wiikotoka kumpeke mundu kapuku sejupalika kupata mu magambu gaki. 7 Gujepana na magambu giisoli wala waakoma banga na makosa au bandu baamboni ndaba nepani nga na nndekake mahakau mundu mmbaja. 8 Wiijopa sindu kwa sili ili kuhalabana usakaka, kuhenga hela kwahenga bandu abia bangalinga mu kutemu ngati hekupalika kutemu.

9 "Waantende ubaja nngeni, mwabeti mmanyi namuna nngeni hejukuba ndaba mwanganya mwabii mwageni mu nndema juku Misili.

10 "Kwi kipindi sa yaka sita wiipanda imbeju mu matui gaku nu kuusa ilebi yaki. 11 Lakini pa saka sa saba waguleka nngonda waku sanga kulema wala kupanda imbeju ili bandu aka kapuku kwaku nabombi apata posu ni ilebi yeyaigali momu ni inyama yumwikioli iwesa kula. Wiihenga ahelaela mu litui laku li mizabibu ni limizeituni.

12 "Wiihenga mahengu gaku masoba sita, lakini lisoba la saba wiitenda kupomulela, ili atumwa baku na atumisi ageni awesa kulijeka na ng'ombi yaku na maponda gaku gawesa kupomulela. 13 Gahengila lihengu ganugupwagi. Wiiloba kwa maina giisapanga yengi wala giijowananika mu milomujaku. Wagalogo hata kasokopi mahina gi isapanga yengi, haga giijogwanika mu makutu jaku.

14 "Mwiihenga matola mala patatu kila saka ili kundende isima. 15 Mwiihenga matola ga mabumunda ganga kujege amila kwa masoba saba ngati henunndagalaki, mwiikula mabumunda ganga kubeka amila kwa masoba saba muda wo wapangiwi mu mwei wa Abibu mana jaki mwei gu nsesi ndaba mu mwei hogu mwa huma ku Misili. Mundu jokapi jwiika palongi jangu maboku matopu. 16 Mwiihenga guku ukuhusa ilebi yu utumbuli yilihengu linu na yiilebi yu mulitui linu.

"Mwiihenga matola gukukusanya ilebi. Pamwisu ja mwaka pankusanya ilebi yi lihengu linu. 17 Akanalomi boti biikusanyika palongi jangu nepani Bambu Sapanga mala pa tatu kwa kila saka kunumbali nepani."

18 "Pagusinza kinyama silitambiku wiipia pamu na mabumunda gaajegi amila. Wagaleka mahuta gi kinyama silitambiku kupalika ugajosa giigali mbaka pulukela."

19 "Wiileta ilebi yuutumbuli kuhuma mu litui laku wagaleta kunyumba jangu nepani Bambu Sapanga, Sapanga waku."

Wiiteleka mwana likondoo au imbui kukutumi masiba gaka amabaki.

20 "Linga nepani nuntuma ntumi wangu jukunani junndongulia mu sapwali ili juntunza nukunhikisa mu nndema go nummbeki. 21 Munzogwana na kukijetake sejwampwagila, wala mwiitenda ing'omu, ndaba jombi ngase jwaalekake bandu baabi na mwoju gogunonwipi ndaba nuntumiki nepani. 22 Lakini ana munzowani sapi malobi gaki nu kugahenga goti ganunndagalaki, nepani niikomana na abaja binu na kwaapenga babumpenga mwanganya. 23 Ntumi wangu jukunani pa jwanndongua nu kunhikisa mu ndema ja Aamoli na Ahiti na ja Apelezi na ja Akaanani na ja Ahivi na ja Ayebusi nane naakoma boti, 24 mwajijinami isapanga jabu wala kujilumbali wala kuitumaki wala kujiga majambu gabu. Ila mwaakoma nu kutunutunu ipandi ipandi ipanda yabu. 25 Mwiinumbalia nepani Bambu Sapanga winu, nanepani niitenda kumpenge posu na masi nu kugaboa magonzu kwinu. 26 Ngakwikubi nu mmbomba jokapi kwinu jojwiiboa kitumbu wala kuba tasa mu nndema jino. Nanepani nampekia nanhenga ntama yaka ingi pani punndema."

27 Naahenga abaja baku akujogupa na kwaalabana bandu malagngu abaja bii bamwaalapu. Naahenga aka abaja bii ang'anumbuka nukutila. 28 Niipelika manyigu kwaabaja baku. Naabenga Ahivi na Akaanani na Ahiti aboka palongi jaku. 29 Nga naaboi bandu haba saka simu ili nndema wiigali sanga bandu ni inyama yu mwikiholi biijonzukeka nu kunsumbu. 30 Lakini nammboa kidogu mbaka pa mwiijonzukika nukugujuku nndema kuba gwiino. 31 Mipaka ju nndema wiinu jiibia kuhuma mu nndema uku Shamu mbaka mu nhanga uku Mediteleniani nu kuhuma kulukoba mbaka mu losi juku Eufulati. Ndaba nampekia makili ga kwaawesa nanamu mwaabenga aboka. 32 Mwiihenga malaganu gokapi pamu nabu, wala pamu ni isapanga yabu. 33 Mwaajetake kutama mu nndema jinu ili banhenga ntendila mahakau ndaba ana wailumbalia isapanga yabu, sakaka hogu wiibia ntaba gukunkamu.