1 Ndienu Bambu Sapanga ampwagila Musa, "Jenda kwaka Falau ukumpwagila, ‘Nepani Bambu Sapanga, Sapanga wa Ahebulania, mbala waaleka bandu bangu aboka ili akanumbaliya. 2 Ana guendale kukana kwaalekake aboka na ana guendali kwaakamulaki, 3 niitondabiya kuboku kwangu nu kugulete magonzu giliyaa ngamaa mu mipugu jii joha jejibii mu matui ginu, ng'ombi na falasi na maponda na ngamia na imbui na makondoo. 4 Lakini niibaganisa mipugu ja Aizilaeli ni mipugu ja Amisili ili kinyama hata simu sa Aizilaeli siikuwa.’"

5 Kabee Bambu Sapanga jwabeka muda waasapi jwakapwaga, "Kilabu nepani Bambu Sapanga niihenga lijambu lela mu nndema gongo."

6 Kilabu jaki Bambu Sapanga jwahenga ngati hejwapwaga. Mipugu joka ja Amisili jatenda kuwa, lakini nga kinyama hata simu sa Ahizilaeli sesawi. 7 Bambu nkolongo jwatuma bandu kulaluki majambu gagahengiki na jasangia ndaba nga mpugu hata gumu gwa Aizilaeli goguwii. Hata hela Falau jwaigali kuba na mwoju gogunonwipi, wala ngase jwaalekaki Aizilaeli kuboka.

8 Ndienu, Bambu Sapanga ampwagila Musa na Aloni, "Nzukua kila jumu mbonda ji iliu la pahinza, alapu Musa jugahua panani palongi jaka Falau. 9 Maliu gehaga gibiya ngati luhombi panani ja ndema joka juku Misili, nukuleta maputi gagiipojuka nakuba ilonda kwa bandu ni inyama kila pandu ku nndema uku Misili." 10 Ndi bajukua maliu kuhuma pahinza nukunzende Falau, Musa jugajembaliya kunani maliu na maputi makolongu gapitila mu nhyega ja bandu ni mipugu. 11 Aganga bala ngase bawesa kupiti palongi jaka Musa na Aloni ndaba ja maputi gagabi mu nhyega jabu ngati hegabia gaapatiki Amisili bangi boka. 12 Lakini Bambu Sapanga anhenga Falau jubia na mwoju gogunonwipi na ngasejwaajowani ngati Bambu Sapanga heampwagila Musa.

13 Ndienu, Bambu Sapanga ampwagila Musa, "Kilabu gujumuka lukela ngani ukaketangana na Falau mweni ukumpwagila, Bambu Sapanga jwa Ahebulania jupwaaga ana, ‘Waaleka bandu bangu aboka ili ajenda bakanumbalije. 14 Ndaba sapwali jenze, wamweti na aka atumisi baku na bandu baku mwiiketangana na malapuli makolongu. Na wiimanya nga jokapi punndema pani poti jojubii ngati nepani. 15 Kwa ndaba mbaka sajenu nakabia nugunyosi kuboku kwangu nukugulapu wehapa na bandu baku mwakabia nhwii nukuhobana punndema pani. 16 Lakini nunndekiki mwabomi ili nunndangia makili gango. Henu liina langu liendalia kumanyikana pu nndema poti. 17 Lakini wakona gulangi moju gogunonwipi kwa bandu bangu, ngase waalekake aboka. 18 Joania, kilabu muda ngati gongo niileta iyula ngolongu ji indobi jejuje ngasejiwaiki kupiti pa ndema ja Misili pane, tumbuka kubombwa kunndema mbaka lelenu. 19 Henu lagalakia mipugu jaku na sokapi sekibi mu migonda mmbeka pandu pa asapi ndaba iyula ji indobi jankunila kila mundu nu mpugu gogubii kunngonda na janga kuba kunyumba yoti biitenda kuwa.’ "

20 Aka atumisi bangi babunzangati Falau bajogupa ndaba ja sejupwagiki Bambu Sapanga, ndi bajukua atumwa babu ni mipugu jabu kwaabeka nnkati. 21 Lakini bangi bala banga kujowane malobi gaka Bambu Sapanga gala, bijileka mipugu jabu na atumwa babu mu migonda.

22 Ndi Bambu Sapanga ampwagila Musa, "Nyosha kuboku kwaku kunani, ili iyula ja malibu jikuna kila mundu punndema juku Misili. Junkunila mundu ni mipugu na kila mmea mu migonda." 23 Ndi Musa jwalangia ndonga jaki kulangi kunani. Najombi Bambu Sapanga jwaleta iyula ji indobi jejahika nu kulundumi nu lumulimuli lwi kitobi mu ndema guku Misili jela, 24 iyula ngolongu ji indobi jakuna ni kitobi satenda kumulika poti. Gwapitila nhwai gogujogoo, jejuje ngasejiwaiki kupitii mu nndema uku Misili, tumbuka bandu ebatumbuliya kutama mu nndema hogu. 25 Iyula ngolongu ji indobi jeheji jahalabana kila sindu mu migonda na kila pandu pa ndema juku Misili, inyama na bandu. Indobi yela yaalabana mimea joti na kila nkongu mu migonda. 26 Pandu pakajika papasindiki kukuna iyula ji indobi pabia pe pamusi uku Gosheni kobabia atama Aizilaeli.

27 Ndi Falao jwaakema Musa na Aloni, jwaapwagila, "Sapwali jenze nhengiki mahakau. Bambu Sapanga ngasejuhengiki likosa nepani na bandu bangu tutei likosa. 28 Munndoba Bambu Sapanga ili iyula jikotuka ndaba kutuluma hako ni iyula ji indobi kutei kujonzukeka. Nepani nanndeka mmboka wala ngamwitami kabee nakanopi." 29 Musa anzibua Falao, "Heniipita pe kunza ja musi niitondabia maboku gangu nukunndoba Bambu Sapanga. Kutulama kwiitenda kukotoka na ngakwiikubi kabe ni iyula ji indobi ili gumanya kubanga nndema goni woti ndi waka Bambu Sapanga. 30 Lakini manyiki wehapa na aka atumisi baku mwakona ngase munzogopa Bambu Sapanga."

31 Mimea jejitumika kulenganake ingobu ni mimea ja shayili jejilengana ni inganu yatei kuhalabika, ndaba shayili yabia ikomiki ni mimea yela yukulenganake ingobu yabia ipiiki mauwa. 32 Lakini inganu ni mimea jengi jejilengana ni inganu ngaseyaalabiki ndaba jabia jakona misoku.

33 Ndi Musa jwaboka kunyumba jaka Falau, nukupita kunza ja musi. Ndi jwatondabia maboku gaki kunndoba Bambu Sapanga. Kutulami ni iyula ji indobi jatenda kukotoka, iyula jakotuka kukuna punndema. 34 Lakini Falau pajwabona iyula ni iyula ji indobi nu kutulami kukotwiki, jwakelabukia mahakau gaki kabete, jombi na aka atumisi baki babiya na mioju jejinonwipi kabee. 35 Henu mwoju waka Falau wabiya ni ing'omu, wala ngasejaalekaki Aizilaeli ajenda ngati Bambu Sapanga ejabiya jupwagiki kupete Musa.