1 Bezaleli jalenganakia mesa jukupiki litambiku gukutini kwi imbau yu nkongu mshita. Mesa jukupiki litambiku leheli labiya lu nndaba wa mita ibeli na lobu kwa mita ibeli na lobu nu ulasu waki kujenda kunani mita jimu na lobu. 2 Kila kona ji litambiku heli jalenganakiya linyelu labia sindu simu ni lisanduku heli. Lisanduku heli loti bapakia shaba. 3 Jalenganakia kabee yombu yoti kwa ndaba ji lisanduku lukupiki litambiku, ibega naa sepetu na bakuli ni isahani yukutotule mwotu. Yombu yaki yoti jiilenganakiya kwa shaba. 4 Jalenganakia wapu wa shaba kubia pai ja papi ji lisanduku iliguhoika nusu ju ulasu ukujenda kunani jilisanduku lukupiiki matambiku. 5 Kabee jabeka peti nnsesi ya shaba mu nkona nnsesi za wapu wa shaba. 6 Jalenganakiya mikongu jukutotule kuhuma ku nkongu mshita nukujipaki shaba. 7 Jajukua mikongu jela nukujibeka peti yeyabii mulutengu ji litambiku ili kujitotule. Litambiku leheli lebalenganaki kwi imbau labiya na kwii jaki kwabiya ngasekuyekaliwi.

8 Ndipala Bezaleli jalenganakiya bakuli ngolongu ja shaba ni kitami saki sa shaba, bakuli jeheji balenganakiya kukutumii maloli ga shaba gaka mmbomba baahengika lihengu pi litanga lilihema la Sapi.

9 Ndienu Bezalela jayongulakiya ua pi lihema la Sapi na Bambu Sapanga. Lipazia la ua ju upandi uku kusini lalenganakiwi ni kitambaa kihuu kupukupu nu ulasu wa mita alubaini nu nsesi, 10 gakamulakini pamu na mipengu ishilini ni itamiku ya shaba ishilini ni ikobake na waya yukukamulaki yabia ya madini ga feza. 11 Upandi uku Kasikazini ulasu ulipazia wabii meta alobaini nu nsesi lakini ikobake yaki na waya yaki yabia ya madini ga feza. 12 Upandi uku magalibi wabii ulasu wa mita ishilini ni ibeli ni mipengu jaki jabii komi ni itami yaki komi. Ikobake yaki na waya yaki na mapanda gaki gabia ga madini ga feza. 13 Upandi kolipiti lyoba kwabii nndyangu gogubii nu upana wa mita ishilini ni ibeli. 14 Pazia ja kila upandi ulitanga labii nu upana wa mita sita na nusu, pamu ni mipengu mitatu ni itami itatu. 15 Upandi gongi ahelahela wabii ni lipazia lelibii nu upana wa mita sita na nusu pamu ni mipengu mitatu ni itami yaki itatu. 16 Mapazia goa kuyongolota ua gakabii ni kitambaa kihuu kupuku sealokiki sapi. 17 Itami yoti imipengu yabii ya shaba, lakini ikobake na waya waki ni mipengu je heji yabia ja madini ga feza, na ndela yaki yayekaliwi na madini ga feza. Henu mipengu joti ya ua yabia ni ikobake ya madini ga feza. 18 Pazia lilitanga la ua lalenganikiwa kwi kitambaa kihuu kupukupu sealokiki sapi sukutumi langi ja buluu na zambalau na ngeli nukusone mapambu, nalombi labii nu ulasu wa mita tisa nu ulasu waki kujenda kunani mita ibeli, kulengana ni lipazia la ua. 19 Kabee mipengu jaki nsesi ni itami yaki nsesi yabia ya shaba. Ikobake yaki yabiya ya madini ga feza, hata mipengu jaki ni ikobake yaki yabiya ya madini ga feza. 20 Ipanda yoti ilihema na ya ua pulutengu ji lihema yabia ya shaba.

21 Hindu yeitumiki kusenge lihema la Sapi. Momuje babei ibau ya malibu yeaandiki amuli jaka Musa, Alawi ndi babahenga lihengu kwa malagalaki gaka Musa ku ulongosi wa Itamali mwana waka Aloni. 22 Bezaleli mwana waka Uli msoko waka Huli ju likabila laka Yuda, jahenga kila sindu sesuse Bambu Sapanga anndagalakiya Musa. 23 Jajangatiwa na Oholiabu mwana waka Ahisamaki julikabila la Dani, mundu hoju jabii pundi jwa sapi kuloka itambaa ihuu nukubeka mapambu, kuhenga misolu nukubeka mapambu sukuloka nyusi ja langi ja buluu, zambalau na ngeli. 24 Zahabu yoti yebumpiki Bambu Sapanga kwa ndaba ju kusenge lihema la sapi labiya na kilu mia nani sabini na saba na gilamu mia tatu kulengana ni ipemu yumu Lihema la Sapi. 25 Madini ga feza gabasangiki bandu gabiya kilu elpu itatu na kumi na saba na gilamu mia saba hamsini kulengana ni ipemu i Lihema la Sapi. 26 Kila mundu jojabia ambalingi tumbuka pajabii na umuli wa yaka ishilini na jimu na japia nsangu waki wa madini ga feza gilamu nhwanu, na akanalomi boti babalangiwa babii laki sita ni itatu mia nhwanu na hamsini nu nhwanu. 27 Kilu elpu itatu na mia nsesi ya madini ga feza yatumika kulenganake itami mia jimu ilihema la sapi ni lipazia, yani kilu selasini kila kitami. 28 Kilu komi na saba yela na gilamu sabini nu nhwanu yeyaigali yela yatumika kulenganake ikobake imipengu nu kupaki imutu imipengu nukulenganake waya yi mipengu heji. 29 Nsangu wa madini ga shaba ga bandu buku Izilaelii gabumpikia Bambu Sapanga gabii na kilu elpu ibeli mia jimu ishilini nu nsesi. 30 Bezaleli jatumia shaba heyi kulenganake itami imipengu i litanga li Lihema la Sapi, lisanduku la shaba lukupiki litambiku pamu na waya waki wa shaba, na hindu yoti yi lisanduku lukupiki litambiku, 31 itami ya ua gowiliyongaliti Lihema la Sapi yu pu litanga la ua, ni ipanda yoti i lihema la sapi ni ipanda yoti yukuyongolota ua joti.