1 Bambu Sapanga ampwagila Musa, 2 "Waapwagila Aizilaeli ambekia nhupi na wehapa gujopa badala jangu. Wiijopa kwa mundu jokapi jo jwiipia kwa mwoju ukupala. 3 Nhupi heyi ibiya dhahabu na madini ga feza na shaba, 4 nyusi ya langi ja buluu na ja zambalau na ngeli ni ingobu nhuu kupukupu ni ingobu yeasoniki kwa mangoma gi imbui, 5 na ngosi ja makondoo mapongu jeajegi langi ngeli na ngosi yi inyama yumu nhanga yebikikema pomboo ni imbau yu nkongu gobugukema mshita, 6 na mahuta ga zeituni kwa ndaba taa ni iungu yukulenganake mauta gukunzakanaki mundu pabumbeka palongi jaka Bambu Sapanga na kwa ndaba ju ubani gogunungi sapi, 7 na malibu ga bei ngolongu gabagakema shohamu na malibu gangi ga bei ngolongu gukubeke mapambu mwiingobu yukuliyekale mwikigamba ni kipuku suku nngolu. 8 Kabee waapwagila Aizilaeli alenganakia lihema la sapi kwa ndaba jangu ili nhwesa kutama pikilanda jabu. 9 Wiilenganakia lihema heli ni yombu yaki kulengana ni lilenganu le nagulangia."

10 "Aizilaeli alenganakia lisanduku li imbau yu mshita lelibii nu ulasu wa sentimeta mia jimu na komi nu ulasu sentimita sitini na sita nu ulasu waki sentimeta sitini na sita. 11 Walipakia lisanduku leheli zahabu ja sapi kunza nu nkati nu kuyongalake nkanda wa zahabu kila upandi. 12 Ndi wiilenganakia peti nsesi nu kuuibeka pai jaki kila kugolu peti jimu. 13 Wiibasa mikongu ji mishita nu kujipaka zahabu. 14 Mipanda heji wajipetisa mu peti yeibii upandi woti ubeli ulisanduku ili kutotule lisanduku heli. 15 Mipanda heji jiigalia muda woti mu peti na wala biipia muda wokapi gola. 16 Nkati ji lisanduku heli wiibeka ibau ibeli ya malibu gagaandikwi miilu komi jenagukupekia."

17 "Ndienu wiilenganakia kipuniku kwa zahabu ja sapi, ulasu waki setimita mia jimu na komi na upana waki sentimeta sitini na sita. 18 Kabe wiilenganakia kwa zahabu iumbi ibeli yeibii na mapapati yebiikema makelubi sukuhugati yoma, uhibeka ihumbi hei upandi ago na ago panani jikipuniko, 19 kiumbi simu kitama mwisu wi kipuniku ni kiumbi sengi kitama mwisu kipuniku upandi gongi. Beka iumbi hei pandu ja mwisu ji kipuniku hesi ibia ilombini pamu ni kipuniku hesi. 20 Iumbi hei yiitenda kulingalani mapapati gaki gibia gayekuliki kuyekale kipuniku si lisanduku heli. Kila kiumbi pamiu jabu piilingalia kipuniku sehesi. 21 Nkati ji lisanduku wiibeka ibau ibeli ya malibu nu kukibeka kipuniku sehese panani jaki. 22 Nepani niiketangana na wehapa papu nu kulonge na wehapa kuhuma pandu je hapa pikilanda ji iumbi ibeli hei yeibii panani ji kipuniku wi lisanduku li lilaganu, hapa ndi panagupekiya malagalaki goha ndaba ja Aizilaeli."

23 Wiilenganakia mesa sukutumii imbau yu nkongu gu mshita jejibii nu ulasu wa sentimeta semanini na nani nu upana sentimeta alubaini nu nsesi nu ulasu waki kujenda kunani sentimeta sitini na sita. 24 Mesa heji wajipakia zaabu ja sapi nu kujiyongulate ukengu wa zahabu upandi woti. 25 Ndi wajiyongulatia upandi woti ubau gogubii nu upana wa sentimeta sitini na sita. 26 Wiilenganakia peti nsesi ya zaabu nukubeka mu kona yoti ya magolu gaki. 27 Peti hei yiibia pambipi nu upegu gukujiyongalota mesa na yiibia yuku jikamulakia mikongu jukutotule mesa heji. 28 Wiilenganakia mipanda ji mishita nu kujipaki zaabu, mipanda heji jibiya jukutotule mesa heji. 29 Wiilenganakia saani ni ikombi yukubeke ubani pamesa kabee ligilasi na bakuli jukujakani matambiku ga hindu ya kunywa. Yombu yoti wuilenganakia kwa zaabu ja sapi. 30 Mesa heji wajibeka palongi ji lisanduku li lilaganu na panani ja mesa heji wiibeka mabumunda, mabumunda gukubekwa palongi jangu masoba goti.

31 Wiilenganakia su kutumii zahabu ja sapi sindu sukubeke taa. Kitamiku saki nu mkongu waki ni ikombi yaki na mahundu gaki na maua gaki yoka ilenganakia pamu. 32 Giipitila mambandi sita upandi wo nkongu waki, makundi matatu upandi gumu na makundi matatu upandi gongi. 33 Mu kila limbandi libiya ni ikombi itatu yeilengana na maua gu mlozi na kila lindambi limu ni liua laki ni liundu laki. 34 Mu kipanda saki kwiibia ni ikombi nsesi yeilengana na maua gu nkongu gu mlozi pamu na maundu gaki na maua gaki. 35 Pandu pa papiti kila mambandi mabeli kati ja mambandi sita gala jaki kwiibia ni liundu limu. 36 Maundu haga na mambandi gaki giibia sindu simu na sindu sukubeke taa hesi na soti siilenganakiwa kwa zaabu ja sapi. 37 Wiilenganakia kabee taa saba ndaba ja sindu sukubeke taa hesi nu kuibeka panani jaki ili inang'ana upandi ukulongi. 38 Gulenganakia kwa zahabu mikasi yukusapisi utambi pamu ni isaani yaki. 39 Wiitumia kilu selasini na tanu ya zaabu ja sapi kulenganake sindu sukubeke taa hesi pamu na yombu yaki. 40 Gulilingalakia ili gulenganaki kwa malenganu gala gabugulangia kukitombi kola.