1 Ndienu, Musa na Aloni bunzendila Falau, nukumpwagi, "Bambu Sapanga, Bambu Sapanga waka Aizilaeli jupwaga ana, ‘Waalekakia bandu bangu aboka, bakanhengila tipati kulukoba.’" 2 Lakini Falau jwaalalukia, "Bambu Sapanga hoju ndi nya mbaka nunzowania nakwaalekake Aizilaeli abokaje? Nepani ngasenummanyi Bambu Sapanga hoju wala nganaalekake Aizilaeli kuboka." 3 Musa na Aloni bunzibua, "Bambu Sapanga wa Aebulania jutupiti twepani. Tuguloba utulekakakia tujenda kulukoba sapwali ja masoba matatu tukumpiikia matambiku Bambu Sapanga witu. Ana ngatuhengi hela jwatukoma kwa magonzu mabaja au kwa ngondu." 4 Lakini Falau jwajibwa, "Mwaka Musa na Aloni ndaba jaki nndenga kwaaboa bandu mu mahengu gabo? Mwakapwagila ajendaninya mu mahengu gabu." 5 Kabe Falau jwapwaga, "Bandu bii haba bingi kupeta benei, mpala aleka kuhenga mahengu!"

6 Lisoba halelale Falau jwaalagalakia akolongu baka atumisi baatumwa biki Misili na babaajemale Aizilaeli, kupwaga, 7 "Toka lelenu nkotuka kwaapeke bandu haba manyai majomu gukulenganake matipwali ngati enhengika pu utumbuli. Ajenda bakataputa beni manyai gee. 8 Lakini esabu ja matipwali gagalenganakewa kila lisoba jibia ajelajela, wala liipungu litipwali hata limu, ndaba bandu haba abii ni kitondu kwa ndaba ambege keleli, ‘Tuleka tujenda tukumpikia Bambu Sapanga witu matambiku.’ 9 Mwaajonzukia bandu haba mahengu gaganonwipi ili akasana kuhenga mahengu na akotuka kujoane malobi gi isoli kuhuma kwa akakilongosi babu."

10 Ndi aka atumisi na babaajemale atumwa bapita na kwaapwagi bandu, "Falau jupwaga ana, ‘Ngaendale kumpeke manyai. 11 Nzenda mwabe mkataputa pokapi pamwiiwesa kupata, lakini esabu ja matipwali ngajipungua hata kasokopi.’ " 12 Ndienu, bandu boka batawanyiki kila pandu ku ndema ja Misili kutaputa manyoi gukulenganake matipwali. 13 Nabombi babaajemale atumwa balasimisa koni bakapwaga, "Nkembesa matipwali kila lisoba ngati agalaga gankembisa pa mwandi henkubika bunndete manyai." 14 Akakilongosi ba atumwa buku Misili baalapula babaajemale Aizilaeli babaaguliwi kujemale lihengu koni baka pwaga, "Ndaba ja kii ngasenhenga lihengu lii nukuhikisa esabu ja matipwali ajelajela ngati mwandi?"

15 Ndi babaajemale Aizilaeli bunzendila Falau, nukundele koni baka pwaga, "Ndaba ja kii ututenda hela twaatumisi bako? 16 Ngasebutupeke kabee manyai gokapi lakini butulasimisa kukembesa matipwali. Kabee twepani twaatumisi butulapu kila lisoba koni likosa lee la bandu baku." 17 Lakini Falau jwapwaga, "Mwanganya mbii ni kitondo, ngasempala kuhenga mahengo! Ndi ndaba mmbwagi nepani, ‘Tulekakiya tujenda tukumpiikiya Bambu Sapanga witu matambiku.’ 18 Nzenda mwakahenga lihengo, ndaba ngampati manyoi, na mwiipyatula esabu ajelajela ja matipwali." 19 Ndi babaajemale Aizilaeli henu bilibona abii mu mang'aliku, ndaba babia baapwagi apalika kupia esabu ajelajela ja matipwali masoba goha ngati hebabia alenganake mwandi.

20 Pababoka kwaka Falau, baketangana na Musa pamu na Aloni bababia atenda kwaalendale. 21 Ndienu baapwagila Musa na Aloni, "Bambu Sapanga juntemula mwanganya ndaba mutuhengiki twepani kuba twaabaja palongi jaka Falau na kwa aka atumisi baki, mwanganya mwaapeki sababu jukutukoma."

22 Ndienu Musa anng'anambukia kabee Bambu Sapanga nukumpwagi, "Mwaa Bambu ndaba jakii waahenge bandu haba ubaja? Boo, ndaba jakii watenda kunduma? 23 Toka panajenda kulonge na Falau gawanduma gala, Falau jujonzuki kwaahenge ubaja ngani bandu baku. Wehapa ngaseguhengiki lijambu lokapi ili kwaakombo bandu haba mu utumwa."