1 Ganga ndi maina ga bana akanalomi baka Izilaeli babapiti ku Misili, kila jumu pamu na Yakobu na alongu baki, 2 Lubeni na Simoni na Lawi na Yuda, 3 Isakali na Zebuluni na Benjamini, 4 Dani na Nafutali na Gadi na Asheli. 5 Ibeleku yoti yaka Yakobu yabia babia bandu sabini. Kipindi sehesi Josepu jwabia julonguli kutama ku Misili. 6 Monikatai, Josepu na alongu baki ni kibeleku sela soti batei kuwa. 7 Lakini ibeleku yuku Izilaeli yajonzukika ngamaa, babia bingi na babii na makili ngamaa, baenii mu nndema gwoti uku Misili.

8 Ndienu, jwapitila Falau jongi kulongosa mu nndema uku Misili jwanga kummanya Josepu. 9 Najombi jwaapwagila bandu baki, "Linga Aizilaeli heabi bingi na baabi na makili kupeta twepani mbaka butuhenga tubiya nu lujogopu. 10 Kupalika tutaputa indela ja sapi kwaapungusa, ananga kuhenga hela ana jipitii ngondu biijongana na aka abaja bitu nukukomana na twepani nu kututila mu ndema jenze." 11 Ndienu, Amisili baahagula aka atumisi baakwaalongo na kwaang'alisa Aizilaeli kwa kwaapeke mahengu gaganonwipi. Aizilaeli baenga lihengu lukunsenge Falao misi jukubeke akiba ji ilebi, misi jeheji ndi Pitomu na Lamesesi. 12 Lakini namuna ebaendilia kung'aliswa ndienu Aizilaeli hebaendaliya kujonzukeka nu kuenea mu ndema. Hela ndi Amisili baajogwipi ngamaa Aizilaeli. 13 Ndi Amisili baahengisa mahengu Aizilaeli sanga kwaabone ikia. 14 Baahenga kutama jabu kubia kokunonwipi kwa mahengu gaganonwipi gukulenganake chokaa nu kukembesa matipwali, na mahengu goti guku migonda. Amisili bahengisa Aizilaeli mahengu sanga kwaabone ikia.

15 Ndienu, Falau, jwaapwagila aka sing'anga Shipula na Pua, babube babia babajangati akambomba biki Ebulania kipindi suku kubeleleka, 16 "Pamwaaudumi akambomba biki Ebulania kipindi sukubeleka, ana mwana jusaliwi mwanalomi, mwaankoma. Lakini ana jusaliwi mmbomba, munndeka jutama." 17 Lakini aka singanga bala babajangati akammbomba kipindi sukubeleka, babiya babunndumbali Bambu Sapanga, ngasebahenga ngati hebalagalakiwi na Falau. Ila baaleka bana akanalomi buku Izilaeli aendalia kutama. 18 Ndipala, Falau jwaakema bandu babajangati akammbomba kipindi paabeleka na kwaalaluki, "Boo, ndaba jakii ntei hela? Mbona mwaalei bana akanalomi aendalia kutama."

19 Bombi bunzibwa Falau, "Akambomba biki Ebulania ngaseabii ngati aka mbomba buku Misili, kwa ndaba bombi abii na makili na abeleka kabula jukuhika jojajangati kubeleka."

20 Ndienu, Bambu Sapanga jahengila majambu ga sapi akasinganga babajangati bandu kubeleka, na Aizilaeli baendalia kujonzukeka na kuba na makili ngamaa. 21 Na kwa ndaba babia babundumbalii Bambu Sapanga, Bambu Sapanga jwaawesisa aendaliya kujonzukeka sukubelikana. 22 Ndipala, Falau jwaalagalakia bandu baki boti ana, "Kila mwana mwanalomi jojwiisaliwa kukummbomba jiki Ebulania munndekala mu losi luku Naili. Lakini kila mwana mmbomba munndeka juendalia kutama."