1 Ndienu, Bambu Sapanga apwagila Musa, "Naguhenga gubia ngati Bambu Sapanga kwaka Falau, najombi nndongu waku Aloni jwiibia nndota waku. 2 Wampwagila mmbeli waku Aloni majambu goha ganagulagalakia, najombi nndongu waku Aloni ampwagila Falau jwaaleka Aizilaeli aboka mu nndema jaki. 3 Lakini naguhenga moju waka Falau gubia nikibuli. Henu niijonzukia nginyuli na ndonduke yangu mu nndema uku Misili, 4 lakini Falau ngajagujowanele. Ndienu pannyosha kuboku kwangu kokubii na makili na kwaalapu namangani bandu bu nndema we hogu, na kwaapia bandu bangu yani Aizilaeli kuhuma mu nndema uku Misili. 5 Panajinyosa kuboku kwangu kokubii na makili kwa Amisili na kwaapia Aizilaeli nkati jabu, ndi Amisili biimanya nepani ndi Bambu Sapanga." 6 Ndienu Musa na Aloni bahenga ngati Bambu Sapanga hejwaalagalaki. 7 Musa jwabia na yaka semanini, na Aloni jwabia na yaka semanini na tatu pabalongila na Falau.

8 Bambu Sapanga ampwagila Musa na Aloni, 9 "Ana Falau jumpwagi nndangia sukuhenga ndonduke ana sakaka jutei kuntuma, wehapa wampwagila Aloni jujukua nndonga jaki, jujilekala palongi jaka Falau, najombi jing'alambuka kuba lijoka." 10 Ndienu Musa na Aloni bunzendila Falau nukuhenga ngati hebalagalakiwa na Bambu Sapanga. Aloni jujilekala ndonga jaki palongi jaka Falau na aka atumisi baki, najombi jing'anambuka kuba lijoka. 11 Lakini Falau jwaakema baabi na Malangu baki na ahabi buku Misilli, nukupete uhabi wabu ahenga ngati bombi kupete uhabi wabu. 12 Kila jumu jujilekala ndonga jaki pai najombi jayoka lijoka. Lakini ndonga jaka Aloni jamila ndonga yoti. 13 Hata hela moju waka Falau wabia wakona nnzomu, wala ngase jwaajogwani Musa na Aloni, ngati hejwapwaaga Bambu Sapanga.

14 Ndienu Bambu Sapanga ampwagila Musa, "Moju waka Falau guendalii kuba gogunonwipi ngamaa. Jukana kwaaleka Aizilaeli aboka. 15 Henu jenda ukaketangana naku kilabu lukela, pajwiibia jujenda ku losi ja Naili. Unndendalia pulutengu ja losi. Jukua pukuboku jaku nndonga jela jejang'anambwiki kuba lijoka. 16 Ndienu umpwagila ana, ‘Bambu Sapanga jwa Ahebulania, jundumiki kwaku jupwaga ana, waaleka bandu bangu ajenda akandumaki kulukoba, lakini mbaka sajenu wehapa ngasegupala kujetake. 17 Ndienu, Bambu Sapanga jupwaga henu kupete hela wammanya jombi ndi Bambu Sapanga. Linga naagalapula masi ga losi Naili kwa ndonga jenze, na masi goka giing'anambuka kuba mwai. 18 Homba yeibi mu losi lwa Naili yiitenda kuha, masi goka giitenda kununga na Amisili biisukia kunywa masi gaki.’"

19 Bambu Sapanga ampwagila Musa, "Mpwagila Aloni jujukua nndonga jaki nukulangi panani ja masi guku Misili na panani ja losi yoka na panani ji mikolule joka na mabomba ga masi goha na iliba yoti nayombi yiibia mwai. Kwiibia na mwai pa nndema joti, na hata mu yombu yoti yealenganaki kwi mikongu au ku lutopi."

20 Musa na Aloni bahenga ngati Bambu Sapanga hejwaalagalakia. Aloni jwatondabia ndonga jaki panani palongi jaka Falau aka atumisi baki, jwalapula masi ga losi lwa Naili na masi goha gang'anambuka kuba mwai kila pandu. 21 Homba yatenda kuwa na masi ga losi lwa Naili ganunga ngamaa hata Amisili ngasebawesa kunywa masi gaki. Ndema joka jatwelila mwai kila pandu. 22 Lakini ahabi buku Misili sukutumi uhabi wabu bahenga ahelahela. Henu moju waka Falau waigala kuba nnzomu, najombi ngase jwaajowani Musa na aloni, ngati Bambu Sapanga hejwaapwagila. 23 Ndi Falau jwabuja kunyumba jaki, na hata gagapitila gala ngase jwagapwatali mwoju jaki. 24 Amisili boha bahembahemba iliba mulutengu ja losi lwa Naili ili apata masi ga kunywa, ndaba ngasebawesa kunywa masi ga losi holu.

25 Gapeta masoba saba baada jaka Bambu Sapanga kugalapu masi ga losi lwa Naili.