1 Bandu pababona ana Musa juseliwi ngamaa kukelabuka kuhuma ku kitombi, bakusanyika palongi jaka Aloni nukumpwagi, "Ena! Tulenganakiya kimong`umong`u ili kibiya sapanga witu sesatulongusa ndaba ngasetumanyiki sesumpatiki Musa jojutuboa kunndema uku Misili." 2 Aloni jajibua, "Nnzukua ndolosa ya zahabu mu makutu ginu na gaka ahanu binu, na gabana binu na akakamwali binu, nnetila." 3 Ndienu, bandu boti baboa ndolosa ya zahabu mu makutu gabu, bunndetila Aloni. 4 Najombi Aloni jajukua ndolosa heyi nukuyeyusha, nukulenganake kimong'umong'u sa ng'ombi nzoku.

Bandu bajamaliya kwa sauti, "Mwaa Izilaeli ajoo ndi sapanga winu jojumboiki kuhuma kunndema uku Misili."

5 Ndipala Aloni jikisengila pandu pukupiiki litambiku kimong'ung'u sela, na jatangasa sukupwaga, "Kilabu kwibiya lisoba lukutogule kwinu palongi jaka Bambu Sapanga." 6 Kilabu jaki bandu bajumuka pulukela ngani bapia matambiku gukutini, na matambiku gu lukwali. Bandu batama pai kula na kunywa, ndipala bajema nukuhina liya.

7 Bambu Sapanga ampwagila Musa, "Helala pai kanyata ndaba bandu baku bawaaletiki kuhuma ku nndema uku Misili ahenga kihakau ngamaa nukungana nepeni. 8 Bijilei indela jenalagalakiya, nukulilenganake kimong'umong'u si litoli kuyeyusha zahabu. Atei kujilumbalii nukujipiiki litambiku koni apwaaga, jonzo ndi sapanga witu jojutuboa ku nndema uku Misili." 9 "Bambu Sapanga ampwagila kabee Musa, naamanyiki bandu haba, bombi abii ni ing'omu. 10 Henu wiilenga kumbengale. Neka naakomaje kwi inyela yangu ingali, ndienu kupete wehapa naguhenga wehapa ni ibeleku yaku mmbiya mwa bingi."

11 Lakini Musa anndoba Bambu Sapanga, Bambu Sapanga waki kupwaga, "Mwaa Bambu Sapanga, boo, ndaba jakii inyela yaku inyaka ngani kupete bandu baku bawapiiki ku Misili ku uwesu nkolongu nu kuboku kwana makili? 12 Anaguhengiki hela, sakaka Amisili biipwaga, ‘Jaapia kwa nia jiliya ili kwaakome ku kitombi na kwaahoa ngani.’ Mwaa Bambu Sapanga, tulisa inyela yaku ingali nukulileka lijambu heli liliya lewapangi kuhenga bandu baku. 13 Wakombuka atumisi baku, Ibulaimu ni Isaka na Jakobu, babube waalagila kwi liina sukupwaaga, ‘Naijonzukiya ibeleku inu nabombi bibiya ngati ndondu yu kunani na nndema woti gongo naalagila kwaapeke jibiya jinu masoba goti ganga na mwisu.’ " 14 Ndienu, Bambu Sapanga jakotuka kwaahenge bandu baki lijambu liliya lejabiya jupwagiki.

15 Ndipala Musa jahuluka kuhuma ku kitombi koni jubii ni ibau ibeli ya malibu mu kuboku jaki, yeiandikwi amuli yaka Bambu Sapanga pandi yoa. 16 Ibau heyi yabia lihengu laka mweni Bambu Sapanga na maandisi haga jaandika mweni.

17 Joshua pajajoa keleli ya bandu ampwagila Musa, "Ibii keleli ya ngondu mu libweni."

18 Lakini Musa japwaaga, "Heyi nga keleli jukuwesa wala kusindwa ila keleli yeniijoa ndi keleli ja bandu baajemba."

19 Apalapa pe Musa pajahegaliya libweni lela nukukibona kimong'umong'u sa ng'ombi nzoku sela na bandu bakahina, hapa inyela jaka Musa janyaka ngati mwotu, jalekala pai na yatenda kukajuka pi kitombi pala. 20 Ndienu, jajukua kimong'umong'u si litoli sela nukuyeyusha pa mwotu, jilipola kuba ngati uwembi, jakolologa uwembi we hogu mmasi na kwaalasimisa Aizilaeli akunywa. 21 Musa anndalukiya Aloni, "Aguhenga kyane bandu haba mbaka waaleka kuhenga mahakau makolongu ngati haga?"

22 Aloni jajibua, "Nuguloba wa bambu wangu wiyomela nepani ntumisi waku. Waamanyiki bandu haba namuna eapai kuhenga mahengu gikihakau. 23 Bandu haba bahika nukumbwagi, ‘Utuhengila kisapanga sesatulongua ndaba Musa jutupiiki ku nndema uku Misili ngasetumanyiki sesumpatiki.’ 24 Nanepani nuapwagila, kila jumu jojubii na hindu ya zahabu juleta. Ndienu batenda kunete, nepani nanywandua pamwotu na hapa kimong'umong'u si litoli nnzoku satenda kupitii."

25 Ndienu, Musa pajabona Aloni jalekalaki bandu akotuka kunzoane Bambu Sapanga na anhenga gaapala beni, henu bililetila iyoni kwa abaja babu. 26 Musa jajema palongi ji litanga likolongu lilibweni nukulaluki, "Boo, nya jojubii upandi waka Bambu Sapanga? Juhika kwangu." Hapa Alawi boti bunhegali pamu Musa. 27 Jaapwagila, "Bambu Sapanga jwa Aizilaeli, jupwaaga ana, ‘Kila mundu julikonga upanga waki mu kibunu, juyonguluta kila pandu mu libweni, kuhuma mu litanga limu mbaka litanga lengi na kila jumu ankoma nndongu waki nu nkosi waki na wapambipi jaki.’" 28 Bandu baka Lawi bahenga ngati Musa ejalagalakiya. Lisoba heli bakomika bandu ahegale elpu itatu. 29 Musa jaapwaga Alawi, "Lelenu mulihimiki kwa ndaba jaka Bambu Sapanga, ndaba ngasenzogipi hata kwaakoma bana binu au alongu binu, henu Bambu Sapanga jumpekiya mbengale lelenu."

30 Kilabu jaki Musa jaapwagila bandu, "Nhengiki mahakau makolongu! Henu ngiti nunzende Bambu Sapanga panani ji kitombi, pangi nunndoba Sapanga junndekakiya mahakau ginu." 31 Henu Musa jajenda kwaka Bambu Sapanga, nukumpwagi, "Mwoju wa gumina ngamaa! Bandu haba atei mahakau makolongu, alihengi beni kisapanga sa zahabu nu kukilumbali. 32 Lakini henu nuguloba gwaalekakiya mahakau gabu. Ana kubii ngawalekake, nuguloba gumbuta nepani mwi kitabu saku sewaandiki mahina ga bandu baku." 33 Lakini Bambu Sapanga ampwagila Musa, "Namputa mundu jokapi jojuhengiki mahakau mu kitabu sangu. 34 Henu gujenda wakalongua bandu mbaka pandu jenugupwagila. Linga ntumisi wa jukunani jiitenda kugulongulela, hata hela lisoba lenahikila naalapula kwa ndaba ja mahakau gabu." 35 Bambu Sapanga jaapelakiya ugonzu uliya, kwa ndaba bunndoba Aloni jalenganakiya kimong'umong'u si litoli la zahabu lela nu kulilumbalila.