1 Bambu Sapanga ampwagila Musa. 2 Mulisoba lu kutumbuli la mwei gu kutumbuli, wiijemika Lihema la Sapi. 3 Nkati ji Lihema leheli wiibekwa Lisanduku li Lilaganu, ndienu wiibeka lipazia palongi jaki. 4 Wijingisa mesa nukupanga yombu yaki panani. Wijingisa na sindu sukubeke taa na taa yaki panani jaki. 5 Lisanduku la zahabu lukupogale ubani wiibeka palongi ji Lisanduku li Lilaganu, ndipala wiibeka lipazia munndyangu u Lihema la Sapi. 6 Beka lisanduku lukupiki matambiku na matambiku gukutinii wiibeka palongi ju nndyangu wi Lihema la Sapi. 7 Bakuli ngolongu jukusambi wiibeka pikilanda ji lihema la Sapi na mesa jukupiki litambiku nu kutwelake masi. 8 Wisenga ua nukubeka lipazia punndyangu jaki. 9 Ndienu walibeka palongi jaka Bambu Sapanga lihema pamu na yombu yaki yoti sukujakani mahuta, nalombi libia la sapi nu kujetakeka palongi jaka Bambu Sapanga. 10 Kabee, waikabisa kwaka Bambu Sapanga Lisanduku lukupiki litambiku ju kutinii matambiku na yombu yaki yoti sukujege mahuta, nayombi ibiya ya sapi palongi jaka Bambu Sapanga. 11 Ahelahe bakuli ngolongu jukusambi ni itami yaki kabee wainhimika kwaka Bambu Sapanga sukuhenga. 12 Mwanndeta Aloni na bana baki ahika mundyangu u Lihema la Sapi laka Bambu Sapanga, ndipala wasambisa kwa ngati ekupalika. 13 Wanhwatika Aloni ingobu yaki ya sapi yu ugolu, kunzakani mahuta sukuhenga hela wibiya gutenda kunhimika ili jutumika ngati nngolu waka Bambu Sapanga. 14 Waleta na bana baki na kwaawatika kanzu yela. 15 Ndipala waajakaninya mahuta bana haba ngati ewajakania atati babu, ili nabombi kabee anndumakiya nepani mu lihengu lu ugolu. Kwajakani mahuta hoku kwaahenga abiya agolu babiendaliya kwi ibeleku yabu yoti. 16 Ndipala Musa jahenga kila sindu ngati Bambu Sapanga ejalagalakiya. 17 Lisoba lu kutumbuli la mwei gu kutumbuli saka sa pili toka pabahuma ku nndema uku Misili, lihema la Sapi laka Bambu Sapanga latenda kunhimikwa. 18 Musa jabeka itami i Lihema la Sapi jatondabiya pelemu yaki, jalombana mipanda jaki nukujemeka mipengu jaki. 19 Jahatambuliya lipazia panani ji Lihema la Sapi, nukubeka kipuniku panani ji lihema, ngati eandagalakiya Bambu Sapanga. 20 Ndienu jajukua malibu mabeli gagaandikwi miilu nukuibeka mu Lisanduku li Lilaganu. Japetisa mipanda jela jukutotule mu peti yi lisanduku nukuibeka mu kipuniku panani ji lisanduku hele. 21 Ndipala Musa jabeka Lisanduku li Lilaganu mu lihema la Sapi laka Bambu Sapanga nukukobeka lipazia ili kuliibalaki lisanduku heli ngati Bambu Sapanga eanndagalakiya. 22 Jabeka mesa nkati ji lihema la Sapi, upandi uku kasikazini, pandu pa kunza jilipazia, 23 na panani jaki japanga mabumunda gaapiiki kwaka Bambu Sapanga ngati Bambu Sapanga eanndagalakiya. 24 Jabeka sindu sukubeke taa nkati ji lihema la sapi, upandi uku kusini kulingalani na mesa. 25 Na homu jwiibeka taa palongi jaka Bambu Sapanga, ngati eanndagalakiya Bambu Sapanga. 26 Musa jijibeka Lisanduku la zahabu lukupogale matambiku gu ubani mu Lihema palongi ji lipazia, 27 nukupogale ubani gogubii nu unungi wa sapi panani jaki, ngati eanndagalakiya Bambu Sapanga. 28 Jakobika lipazia mu nndyangu u Lihema la Sapi, 29 Musa jabeka Lisanduku li matambiku gukutinii palongi ju nndyangu ji lihema la Sapi. Na panani jaki jaboa matambiku gukutinii na matambiku gu uwembi ngati Bambu Sapanga eanndagalakiya. 30 Jabeka bakuli ngolongu jukusambi pikilanda lihema lukuketangane na mesa jukupiki litambiku nukujege masi gukusamba. 31 Musa na Aloni na bana baki boti basamba masi maboku na magolu gabu mu libakuli heli, 32 kila pabajingala nkati ji Lihema la Sapi au pabajenda ku Lisanduku la matambiku gukutinii kwapalika asamba ngati Bambu Sapanga eanndagalakiya Musa. 33 Musa jasenga ua kuyongolota lihema la sapi ni Lisanduku la matambiku gukutinii nukubeka pazia mu nndyangu wa ua. Ndienu Musa jajomula lihengu loti.

34 Ndipala likongobu lela layekaliya lihema lela lukuketangane nu unang'anu gogulangi kuba kwaka Bambu Sapanga watwelakiya Lihema la Sapi. 35 Musa jasindwa kujingii nkati ji lihema kwa ndaba ji likongobu latama panani jaki, nu ukolongu waka Bambu Sapanga watwelala momu. 36 Musapwali yabu yoti Aizilaeli ngaseatumbuli sapwali hata kulenga ila pe likongobu palabiya litondabewa kunani ji Lihema la Sapi atendika kuboka. 37 Ana likongobu leheli ngaselitondabiki bombi ngaseatumbuliya sapwali alendaliya mbaka kipindi palitondabeka. 38 Musapwali yabu yoti, Aizilaeli bawesa kulibona likongobu lela laka Bambu Sapanga panani ji Lihema la Sapi kipindi sa liyoba mutu na mwotu gola wanyaka panani ji Lihema la Sapi kipindi si ikilu.