1 Mu masoba haga jwabii mundu jumu ju likabila laka Lawi jojuwe joazukwi mmbomba ju likabila alelale laka Lawi. 2 Ndienu, mmbomba hoju jwapata kitumbu, jwabelika mwana mwanalomi. Pajwabona kana kakeki kala kanyambiki, jwaamua kukahia kwa miei mitatu. 3 Lakini ndaba ngasejwawesa kunhia ngani muda woti, jwajukua kitonga sealenganakii na mateti, jikipakia kikia sindu sekilengana na lami nu kummbeka mwana jola momu. Ndienu jukibeka kitonga sehesi pulutengu ja losi lwa Naili mu manyai. 4 Nnndombu waka mwana hoju jwabia julihia pambipi na pandu pala kunndendale ili jubona sesampitila nnuna waki.

5 Ndienu, kamwali waka Falau jwajenda kulosi kuoga, na atumisi baki babia ajendajenda pulutengu ja losi. Ndi kamwali jola jukibona kitonga sela mu manyai, antuma ntumisi waki jukakijukua. 6 Pajukiogula kitonga sela, ambona mwana nkeki jola, jutenda kulela. Ndi ammbonila ikia, jwapwaaga, "Jonzo ndi jumu jwa bana bi Kiebulania."

7 Apalapa nndombu waka mwana jola jwapitila, nukumpwagi kamwali waka Falau, "Boo, nyenda nukugutaputia mmbomba jwi Kiebulania ili antunza nukunzongesa mwana hajo badala jako?" 8 Kamwali waka Falau ampwagila, "Hena jendaje." Ndi mmbomba jola jwajenda, jwaakema amabu baka mwana jola. 9 Kamwali waka Falau jwaapwagila amabu bala, "Unzukua mwana jonzo unyangatia kuntunza badala jangu na nagulepa nsahala." Ndi amabu bala anzukua mwana jola nukuntunza.

10 Mwana pajabia jukoi, amabu bala bumpelika kwaka kamwali waka Falau, najombi anzukua nukunhenga ngati mwana waki ndienu nukumpeke liina Musa. Kamwali waka Falau jwapwaga, "Kwa ndaba nugupiiki mu masi."

11 Musa pajwabia nkolongu, lisoba limu jajenda kwaabona Aebulania ajaki na jaabona namuna heapata mang'aliku. Ndienu ambona mundu jumu juku Misili anndapu jumu kati ja Ahebulania. 12 Musa jwalinga koni na koni, pajwabona ngasejubii mundu pambipi, akoma Mmisili jola nukunyelale munsangi. 13 Kilabu jaki, Musa jwaboka kabe, jwabona Aebulania abeli atenda kukomana. Ndi anndalukia jojukosi jola, "Boo, ndaba ja kii unndapu nzako?" 14 Najombi jwajibua, "Boo, nya jojugubei weapa gubia kilongosi na jukutuamuli? Boo, gupala kungoma lee kungoma ngati heunkoma Mmisili jola?" Ndi Musa jwajogupa nukuwasali, "Sakaka lijambu leheli lenahengiki limanyikini!" 15 Najombi Falau pajwajogwana majambu gagapiti jwapanga kunkoma Musa. Lakini Musa antila Falau nukujenda kutama ku ndema juku Midiani.

Lisoba limu Musa jwabia jutemi pulutengu ji kiliba sa masi. 16 Henu, aka kamwali saba baka nngolu jumu juku Midiani bahika kuteka masi nukubeka mu lukoi lukukenge mipugu ja atati babu, 17 Alimi bangi bahika na kwaabenga haka akamwali bala. Lakini Musa jajema na kwaajangatia akakamwali bala na kwiikenga mipugu jabu. 18 Pabaakelubukia atati babu Leueli, najombi jwaalalukia, "Boo, Mbona lelenu nkelabwiki kanyata anana?" 19 Nabombi bunzibua, "Mmisili jumu jutukombula mu maboku ga alimi bala jombi jututekila masi nu kutupeke nu kujikenga mipugu jitu." 20 Atati babu baalalukia aka kamwali baki bala, "Boo, jubii kwako?" Ndaba jakii mundei hoko? Munkema juhika kula posu.

21 Musa jwajetakia kutama kwaka Mundu hoju. Ndi mundu jola ampekia Musa kamwali waki jobunkema Zipola ili jubia nhwanu waki. 22 Zipola ambelaki Musa mwana mwanalomi. Musa jwapwaga, "Ndili ku ndema jikigeni," henu ampekia mwana jola lihina Gelishomu.

23 Yaka hingi eyapeta Falau jwatenda kuwa. Aizilaeli balela nu kunyenyeteka ku usungu kwa ndaba ja mahengu gabahengisa, kwa ndaba babi bakoli mu utumwa enu kilelu sabu sunhikila Bambu Sapanga kunani. 24 Bambu Sapanga jwajogwana kunyenyeteka kwabu, najombi jwakombuka lilaganu lejwatei na Ibulaimu ni Isaka na Yakobu. 25 Bambu Sapanga jwaalingalia Aizilaeli namuna ebabiya atenda kung`aliswa, najombi jwabona jwaajangatii.