1 Musa jaakema bandu boti buku Izilaeli ahika pamu nakwaapwagi, "Haga ndi majambu gajunndagalaki mwanganya Bambu nhenga. 2 Masoba sita mwiihenga mahengu lakini lisoba la saba libiya Lukupomule ili munndumbaliya Bambu Sapanga. Mundu jokapi jojwiihenga lihengu lokapi lisoba heli kupalika kunkoma. 3 Mwiipambaki hata mwotu mu manyumba gino Lisoba Lukupomule heli."

4 Musa jaapwagila bandu buku Izilaeli, "Heli ndi lijambu lejulagalaki Bambu Sapanga mulihenga. 5 Mpia mu mali ginu nhupi yukumpeke Bambu Sapanga. Kila mundu jojubii na mwoju waamboni andetila Bambu Sapanga, zahabu na madini gabagakema feza na shaba, 6 usi wa langi ja buluu na wa zambalau na langi ngeli ni kitambaa kihuu kupukupu na mangoma gi imbui, 7 ngosi ja makondoo makambaku yeapaki langi ngeli na ngosi yi inyama yu mmasi ni imbau yu nkongu mshita, 8 mahuta gi mizeituni kukutumii ntaa, iungu ya mahuta gukupaki na kwa ndaba ju ubani gogubii gu luumba lwa sapi, 9 malibu gabagakema shohamu na malibu gangi ga bei ngolongu yukubeka mwikizibau saka nngolu na kapuku kukuwata pikigamba.

10 "Kila mundu jojubii nu upundi pikilanda jinu jihika kuhenga hindu yoti yejulagalaki Bambu Sapanga, 11 kulenganake Lihema la Sapi ni kipuniku saki ni ikobake yaki na mapanda gaki ni itamiku yaki. 12 Lisanduku li lilaganu pamu na mapanda gaki gukutotule ni kipuniku si lisanduku li lilaganu ni lipazia la Pandu pa Sapi ngani, 13 mesa na mapanda gukutotule pamu na yombu yaki yoti na mabumunda gaabeka palongi jaka Bambu Sapanga, 14 kabee na sindu sukubeke taa pamu na yombu yaki yoti ya taa na mahuta gaki, 15 lisanduku lukupogale litambiku lu ubani na mapanda gaki gukutotule na mahuta gakwaajakani akagolu nu ubani gogubii nu ulumba wa sapi ni lipazia lu nndyangu ulihema la sapi, 16 lisanduku lukupiiki litambiku lu kutini pamu na wapu wa shaba na mapanda gaki gukutotule pamu na yombu yaki yoti na bakuli ngolongu ja shaba ni kitami saki, 17 lipazia la ua jaki ni itamiku yaki ni lipazia lu nndyangu wa ua, 18 ipanda i Lihema la Sapi na ua pamu ni migoji jaki, 19 ingobu yealokiki sapi ngani kwa ndaba jukuwata Aloni pandu pa sapi pamu na bana baki, kwa ndaba jukutumi kwa mahengu gabu gikigolu."

20 Ndienu bandu buku Izilaeli baboka palongi jaka Musa, 21 na kila mundu jojupala kuboa sanga kuntutua jaleta sindu sehesi nukumpiki Bambu Sapanga nhupi yaki kwa ndaba ji lihengu li Lihema la Sapi kwa ndaba ji lihengu laki ni ingobu yaki ya Sapi. 22 Boti bababii na mwoju wa amboni ukupia, akanalomi na akammbomba, bahika kuleta indu ya zahabu na ya kila namuna, peti jukuwata pi imbulu na peti na mapambu. Boti bapia zahabu yabu ngati litambiku labu kwaka Bambu Sapanga. 23 Kila mundu jaleta sokapi sejabii naku ngati nyusi ya langi ja buluu na langi ja zambalau na langi ngeli, au kitambaa kihuu kupukupu au mangoma gi kinyama su mmasi au ngosi ja makondoo jebijipaki langi ngeli. 24 Babapiiki madini ga feza au shaba baleta kwaka Bambu Sapanga ibiya nhupi yabu. Kabee mundu jokapi jojabii ni imbau yu nkongu mshita jatenda kuleta. 25 Kila mmbomba jojabii jumanyiki kuloka baleta indu yealokiki kwa nyusi ya langi ja buluu na zambalau na ngeli ni kitambaa kihuu kupukupu sealokiki. 26 Akammbomba boti bababii nu umanyi baloka ingobu yumangoma gi imbui. 27 Aka atumisi baleta malibu ga sapi gabakema shohamu na malibu gangi kwa ndaba ji izibau na kapuku kipikigamba, 28 baleta kabee iungu na mahuta gi mizeituni ga taa na mahuta gakwajakani babapiiki kwaka Bambu Sapanga nu ubani gogubii nu ulumba wa sapi. 29 Bandu boti buku Izilaeli akanalomi na akammbomba, kukupala beni baleta hindu heyi ngati nhupi palongi jaka Bambu Sapanga kwa ndaba ji lihengu loti laka Bambu Sapanga lejabiya anndagalaki Musa.

30 Ndienu, Musa jaapwagila bandu buku Izilaeli. "Nndinga, Bambu Sapanga anhagwi Bezaleli mwana waka Uli msoko waka Huli u likabila la Yuda, 31 najombi antwelaki Loho jaki, ampeki umanyi na malangu nu upundi wa kila namuna, 32 juhumbula misolu ju upundi nu kuhenga lihengu lu kuhugati zahabu na madini ga feza na shaba, 33 jubasa malibu gukupambi ni imbau kwa ndaba ji lihengu lengi lu upundi. 34 Kabee ampeki umanyi jombi na Oholiabu mwana waka Ahisamaki juli kabila la Dani awesa kwaabola bangi. 35 Jaapeki umanyi ukuhenga kila lihengu lu upundi au jeahenga bandu baababii nu umanyi. Akapundi bukusona kwa nyusi ya langi ja buluu na zambalau na ngeli ni kitambaa kihuu kupukupu sealokiki sapi sukutumii upundi woti.