1 Ndienu, Bambu Sapanga ampwagila Musa ana, "Henu miti gubona senanhenga Falau na bandu baki. Nanndasimisa kwaalekake bandu bangu aboka. Ndaba kwa makili gangu naanhenga jwaabenga bandu bangu aboka mu nndema jaki."

2 Bambu Sapanga ampwagila Musa, "Nepani ndi Bambu Sapanga. 3 Numpitila Ibulaimu na Isaka na Yakobu namanyikana ngati Bambu Sapanga jojubi na Makili ila ngasenamanyakini kwabu kubanga nepani liina langu ndi Bambu Sapanga. 4 Kabee nahenga lilaganu na bombi kupwaga naapekia nndema juku Kaanani, nndema gobabia atama ngati ageni. 5 Henu, nyogwini kilelu sa Aizilaeli babang'aliswa na Amisili sukuhengeswa lihengu lu utumwa, naamua kulikomboka lilaganu langu. 6 Henu, waapwagila Aizilaeli ana, ‘Nepani na Bambu Sapanga! Nepani naaboa mu migoji ye bumbeki Amisili, nanhokua mu utumwa. Niinyosha kuboku kwangu kokubii na makili na kwaalapu ngamaa Amisili nu kunhoko mwanganya. 7 Nanhenga mmbia mwabandu bangu nanepani niibia ndi Bambu Sapanga wino. Mwanganya mwimanya kubanga nepani ndi Bambu Sapanga, Bambu Sapanga wino, nenuhokwi mu lihengu lu utumwa mu nndema uku Misili. 8 Nanepani nanndeta ku ndema jenalagila kumpeke Ibulaimu na Isaka na Yakobu. Nampekia nndema heji jibia jino. Nepani ndi Bambu Sapanga.’" 9 Musa jwaalandila Aizilaeli malobi gala. Lakini ndaba bombi bawii moju ngase bunzowani ndaba ji lihengu lelinonwipi lu utumwa lebabia atenda kuhenga. 10 Ndienu, Bambu Sapanga ampwagila Musa, 11 "Gujenda kwaka Falau, umpwagila jwaaleka Aizilaeli aboka mu ndema jake." 12 Lakini Musa ampwagila Bambu Sapanga ana, "Ana Aizilaeli ngase anyowane nepani, jwiiwesa boo kunyowane nepani Falau? Ndaba nepanije ndopi kulonge." 13 Hapa Bambu Sapanga jwalongila na Musa na Aloni kuhusu Aizilaeli na Falau, najombi jaalagalakia baaboa Aizilaeli kuhuma ku Misili.

14 Yenze ndi ibeleku yu lukolu lwa Aizilaeli, bana baka Lubeni, ntumbuli jukusaliwa kwaka Izilaeli babiya Enoki na Palu na Eziloni na Kalimi. Haba babia lukolu lwaka Lubeni. 15 Bana baka Simoni akanalomi babia, Yemueli na Yamini na Ohadi na Yakini na Soali na Shauli, Shauli jwamwisu jonzoni jwabia mwana wuku mmbomba juku Kaanani. Haba babia bu lukolu lwaka Simoni. 16 Maina ga bana baka Lawi ni kibeleku saki ndi, Gelishoni na Koati na Melali. Lawi jwatemi yaka mia jimu na selasini na saba. 17 Bana baka Gelishoni babia, Libini na Shimei, haga ndi mahina gu lukolu lwabu. 18 Bana baka Koati babia, Amulamu na Ishali na Ebuloni na Uzieli. Koati jwatemi yaka mia jimu na selasini na tatu nakuwa. 19 Bana baka Melali babia, Maili na Mushi. Haba ndi lukolu lwaka Lawi ni ibeleku yabu.

20 Amulamu anzukwi Yokobeli anyenga baki, najombi ambelakia bana abeli, Aloni na Musa. Amulamu jwatemi yaka mia moja na selasini na saba. 21 Na bana akanalomi baka Ishali babia, Kola na Nefegi na Zikili. 22 Bana akanalomi baka Uzieli babia Mishaeli Elishafani na Sitili.

23 Aloni anzukwi Elisheba kuba nhwanu waki, kamwali waka Aminadabu, najombi Elisheba jabii nndombu waka Nashoni, najombi ambelaki babaakema maina gabu Nadabu na Abiu na Eleazili na Itamali. 24 Na bana akanalomi baka Kola babia Asili na Elikana na Abiasafu, babube babia akakilongosi bu lukolu lwaka Kola. 25 Eliasali, mwana waka Aloni anzukwi jumu wa akakamwali baka Putieli, najombi ambelaki Fineasi. Haba babia akakilongosi bu lukolu lwaka Lawi, kulengana nu lukolu lwabu.

26 Aloni na Musa ndi bababia Bambu Sapanga jwaapwagi, "Mwaaboa bandu baka Izilaeli kuhuma ku ndema juku Misili kulengana na makundi gabu." 27 Ndi aka Musa na Aloni haba babalongila na Falau, ili jwaaleka Aizilaeli aboka ku nndema uku Misili.

28 Lisoba lela Bambu Sapanga pajwalongila na Musa ku Misili, 29 ampwagila, "Nepani ndi Bambu Sapanga. Ukumpwagila, Falau malobi goti ganugupwagi." 30 Lakiani Musa anzibua Bambu Sapanga, "Nepani ngase nhwesa kulonge sape, Falau jwiinyogwana bole?"