1 Musa ampwagila Bambu Sapanga, "Kwibia boo, ana Aizilaeli ngaanhobale wala kunyogwanela au kwiibia boo ana biipwaga, ‘Wewa Bambu Sapanga ngase wambitalile’?" 2 Ndi Bambu Sapanga anndalukia Musa, "Gukamwi kii mu maboku gako?" Musa jwajibwa, "Ndonga." 3 Bambu Sapanga ampwagila, "Jilekala pai." Musa jujilekala ndonga pai, najombi jang'anambuka kuba lijoka! Najombi Musa jwatenda kujitila. 4 Ndienu Bambu Sapanga ampwagila Musa, "Nyosha kuboku kwaku, ulikamula nkela!" Musa jwanyosha kuboku kwaki nukulikamu, lijoka lang'anambuka kabe kuba ndonga mukuboku kwaki. 5 Bambu Sapanga ampwagila, "Kahenga hela palongi ja Aaizilaeli awesa kunhobale nepani Bambu Sapanga, Bambu Sapanga wa atati babu, Bambu Sapanga waka Ibulahimu, Bambu Sapanga waka Isaka, Bambu Sapanga waka Yakobu, ndei kugupiti."

6 Kabee Bambu Sapanga ampwagila Musa, "Jingia kuboku kwaku mu ingobu mu kigamba saku." Musa jwahenga helahela na pajugupia kunza gwabia gubi nu ugonzu ukuleleka, wabia nhuu ngati seluji. 7 Ndienu Bambu Sapanga ampwagila, "Beka kabe kuboku kwaku mu ingobu pikigamba saku!" Musa jwabeka kabee kuboku kwaki mu ingobu pi kigamba. Pajugupia kabe kunza jalama nakuba ngati pamwandi ngati hejabii pandu pangi ja nhyega jaki. 8 Bambu Sapanga ampwagila Musa, "Ana ngabuguhobale mu ndonduke ju utumbuli baguhobaliya kupete ndonduke ja pili. 9 Lakini ana ngabuguhobale hata ndonduke ibeli hei, au nga biijowane malobi gaku, wiiteka masi ga losi lwa Naili nukugajiti panani ja ndema nzomu. Masi haga giing'anambuka kuba mwai panani ja nndema."

10 Lakini Musa ampwagila Bambu Sapanga, "Mwaa Bambu wangu nandi ngase nyojwiki kulonge toka mwandi, hata sajenu enonge na wehapa nuntumisi waku, nonge mbolimboli nu lulimi lwangu lutopiki ngamaa!" 11 Hapa Bambu Sapanga annndalukia, "Jojubombiki nndomu waka mundu nyane? Au nya jojunhengiki mundu kuba kimumuta au jwanga kujowana au kulinga au jwanga kulinga? Boo nga nepani Bambu Sapanga? 12 Henu ujendaje! Nepani namweti nagujangatia guwesa kulonge nukukubola namuna jukupwaga."

13 Lakini Musa jwapwaga, "Mwaa Bambu wangu, pepa koku nuguloba, untuma mundu jongi." 14 Ndi inyela yaka Bambu Sapanga yunhikila Musa, ampwagila, "Boo, si jubii nndongu waku Aloni Nndawi? Manyiki jombi juwesa kulonge sapi. Kabe juika kuketangana na wehapa na pajwagubona pee jwiitogulia mmoju waki. 15 Wehapa wiilongila naku nukumpwagi goka gamwiijenda kupwaga. Nepani namweti niitenda kunzangati nukummbola mwaanganya mwaabeli sukuhenga nukupwaga. 16 Aloni jwilongila na Aizilaeli badala jaku wehapa. Nawehapa wiibia ngati Bambu Sapanga kwaki. 17 Totula ndonga aje mu kuboku jaku wajitumia kuhenga ndonduke."

18 Ndienu Musa jwajenda kwaka Yetulo akohanu baki, nakwaapwagi, "Pepa koku na gunekake muja ku Misili kwaalongu bangu nakaabona ana abii bomi." Yetulo ampwagila, "Gujenda ku lukwali."

19 Bambu Sapanga ampwagila Musa kipindi pajabii ku Midiani, "Gubuja ku Misili ndaba bandu babapala kukukoma boti awile." 20 Ndienu, Musa anzukua nhwanu waki na bana baki na kwaakwea mu liponda nu kutumbuli sapwali jukubuja ku Misili. Mu kuboku jaki jwabia jujukwi ndonga ngati Bambu Sapanga eandagalakiya jitotula.

21 Bambu Sapanga ampwagila Musa, "Pawiika ku Misili uhakikisa gutei ndonduke yoti yenugupeki uwesu ukuhenga palongi jaka Falau. Lakini nepani naguhenga moju waka Falau kuba gogunonwipi najombi nga jwaalekake Aizilaeli aboka. 22 Nawehapa wampwagila Falau, Bambu Sapanga jupwaga ana, ‘Izilaeli ndi kibeleku sangu ju utumbuli mwanalomi! 23 Nugupwagi unndekakia mwana wangu jujenda ili juka ngungamalia nepani, lakini gutenda kukana. Linga, henu nyenda kukoma mwana waku mwanalomi ju utumbuli.’"

24 Musa pajwabii mwiindela kubuja ku Misili, jabiya panyumba jukugone ageni, Bambu Sapanga jwaketangana na Musa na jwapala kunkoma. 25 Ndipala, Zipola nhwanu waka Musa jwajukua lilibu lelitemiki nyatanyata, nukunseku jandu mwana waki mwanalomi, nukujuku ngosi jela nukunngusa naku Musa mu magolu koni jwakapwaga, "Wehapa gunndomi wangu kwa mwai." 26 Ndienu, Bambu Sapanga ngaseankomiki Musa. Zipola jwapwaaga, "Gunndomi wangu kwa mwai," ndaba jukuseku jandu.

27 Bambu Sapanga ampwagila Aloni, "Jenda kulukoba ukumpengana Musa." Ndienu Aloni jwaboka na jwaketangana na Musa pi kitombi saka Bambu Sapanga nukunzobate. 28 Ndi Musa ampwagila Aloni kila sindu seanndagalakia Bambu Sapanga kuhenga na ndonduke na nginyuli yeampwagila jwiitenda kuhenga. 29 Ndi Musa na Aloni bajenda na baakema aseja boti ba Aizilaeli pamu. 30 Aloni jwaapwagila kila sindu Bambu Sapanga sejabiya anndagalaki Musa, na jahenga ndonduke yoti palongi ja bandu boti. 31 Bandu batenda kunhobale. Na pabajowania Bambu Sapanga jwaahiki na kwaajangati Aizilaeli nu kubanga jwagabweni mang'aliku gabu, boti bapega magoti nu kunngungamali Bambu Sapanga.