1 Bambu Sapanga ampwagila Musa, "Nkwela kitombi nhika kwangu, wehapa na Aloni na Nadabu na Abiu pamu na Aseja sabini buku Izilaeli nng'ungamalia koni mmbii kutali. 2 Wa Musa kajika jaku ndi we wiinhegalia lakini bangi biika pambipi. Na Aizilaeli biikwela kitombi pamu na wehapa."

3 Ndienu Musa jwajenda kwaapwagi bandu boti malobi na malagalaki gajunndagalakia Bambu Sapanga. Bandu boti bajibua kwa sauti jimu, "Majambu goti ga jupwagiki Bambu Sapanga mbaka tugahenge." 4 Ndienu, Musa jwagaandika malagalaki goti ga jwalagalakia Bambu Sapanga. Ndi jwajumuka lukela ngani, jwasenga pandu pukupiiki litambiku pai jikitombi nukujemeka ipanda komi ni ibeli kulengana na esabu ja makabila komi na gabeli guku Izilaeli. 5 Ndi jwaatuma akakombu ba Aizilaeli bumpiikia Bambu Sapanga matambiku gukutini nukusinza na matambiku gulukwali na matambiku ga ng'ombi. 6 Musa jajukua nusu ja mwai ji inyama hei nukugubeka mu libakuu na nusu jengi jujisembalia pandu pukupiiki litambiku pala. 7 Ndi jwajukua kitabu si lilaganu laka Bambu Sapanga nu kukisoma kwa sauti palongi ja bandu na bombi bapwaaga, "Goti jupwagiki Bambu Sapanga haga twiitenda kugahenga nu kugakamu." 8 Musa jwajukua mwai gola na kwaamisi bandu koni jupwaaga, "Gongo ndi mwai gogulangi mwanganya mulijetaki lilaganu lejutei Bambu Sapanga pamu na mwanganya kulengana na malobi goti haga."

9 Ndienu Musa na Aloni na Nadabu na Abiu na aseja sabini buku Izilaeli bakwela kukitombi.

10 Bummbona Bambu Sapanga jwa Aizilaeli. Pai ja magolu gaki kwabia na sindu ngati akilimi sementi ja malibu gabagakema johali ga langi ja samawati, jejing'anya ngati kunani. 11 Na Bambu Sapanga ngase jwaaumisi aka atumisi ba bandu buku Izilaeli. Bummbona Bambu Sapanga ndi bakula na kunywa.

12 Bambu Sapanga ampwagila Musa, "Kwela kunani ji kitombi koni guika kwangu nepani, gunendaliya. Nepani nagupekia ibau ibeli ya malibu yeibi na malagalaki ni miilu ye nhandiki ili Aizilaeli alibola." 13 Ndi Musa jwaboka pamu nu Joshua jojabii ntumisi waki kujenda ku kitombi saka Bambu Sapanga. 14 Musa jwaapwagila aseja bala, "Tulendalia pamba mbaka pa twiikelabuka. Aloni na Uli abi pamu na mwanganya, jokapi jojwiibia ni ligambu jwaajendila bombi." 15 Ndi Musa jwajenda ku kitombi ni liundi likiyekalia kitombi. 16 Unang'anu waka Bambu Sapanga watola panani jikitombi suku Sinai ni liundi likiyekalia kitombi kwa masoba sita. Lisoba la saba Bambu Sapanga ankema Musa kuhuma pikilanda ji liundi lela. 17 Unang'anu waka Bambu Sapanga wabonikana palongi ja mihu ga bandu buku Izilaeli ngati mwotu gogunyaka panani ji kitombi. 18 Musa jwajingala nkati ji liundi lela, nukukwela kitombi. Jwatama kola kwa masoba alubaini mui ni ikilu.