Arca de noé

13 A̱ꞌkhue̱n rí Ana̱ꞌlóꞌ niꞌthúun Noé: «Ni̱ꞌgí-mina̱ꞌ rí ma̱ne̱ gámbi̱i̱n xúgíin xa̱bo̱, numuu rí gajni̱í ná inuu ju̱ba̱ꞌ rí xkujndu ga̱jma̱á numúu̱ ikhii̱n. Jamí xúge̱ꞌ rá, ma̱ne̱ gámbi̱i̱n ikhii̱n xúꞌkhue̱n máꞌ ju̱ba̱ꞌ mangaa. 14 Athane̱ mbá guꞌwá rguwa ixe̱ gofér rí ma̱rada̱ꞌ, jamí xúꞌkhue̱n ma̱tha̱ne̱ xtóo ne̱ ná awúún, jamí ma̱ta̱xta̱jma̱á wájia awúun jamí tsu̱du̱u̱ ne̱. 15 Xáꞌnii jaꞌnii khiáwan ne̱ ma̱tha̱ne̱: rí ꞌmba̱ꞌ ma̱ꞌne mbá atsú siénto̱ (300) iduu itso̱ rí na̱gia̱wan ñawúun xa̱bo̱,* rí ma̱jia̱nꞌ ma̱ꞌne a̱jma̱ skíñú gu̱wa̱ꞌ (50) iduu itso̱,* jamí rí tsída̱ꞌ ma̱ꞌne mbá skíñú gu̱wa̱ꞌ (30) iduu itso̱.* 16 Ná mijngi dámba̱wóo rí ri̱jma̱á, ma̱ta̱tsi̱ꞌñáá mbá iduu rguwa ja̱ma̱ꞌtha mbá iduu itso̱. Xúꞌkhue̱n máꞌ ma̱ta̱gíꞌma mbá xkrugua ná níjiúu rguwa. Athane̱ mbá atsú xtóo ne̱ rí ka̱jngro̱xe̱ ná awúun ne̱.

Naꞌne ruꞌwa a̱pha̱

1 A̱ꞌkhue̱n rí Ana̱ꞌlóꞌ Mikhuíí niꞌthúun Noé: «A̱ta̱ꞌa̱a̱ꞌ ná awúun guꞌwá rguwa ikháán jamí mbá xúgíin xa̱bia̱a̱ꞌ, numuu rí i̱ndo̱ó ikháán nda̱yo̱o̱ rí gamakuíín xóo rí iꞌwíin xa̱bo̱.

7 Ga̱jma̱á numuu ruꞌwa a̱pha̱, ni̱to̱ꞌo̱o̱ Noé ná awúun guꞌwá rguwa gajmíi̱ i̱ji̱i̱n, a̱ꞌgui̱i̱ jamí gu̱ꞌgíi̱n. 8 Xkuaꞌnii máꞌ xu̱kú tsí khaꞌuun, xu̱kú tsí ra̱kháꞌuun, xúꞌkhue̱n máꞌ ño̱ꞌo̱n, jamí xúgíin tsí nu̱xma̱tha-mi̱jna̱ ná inuu ju̱ba̱ꞌ, 9 a̱jmi̱i̱ jamí a̱jmi̱i̱ ni̱tu̱ꞌúu̱n gajmíi̱ Noé ná awúun rguwa, a̱jmba jamí iꞌgú, mbá xó rí ni̱gi̱ꞌmaa̱ rí ma̱ꞌne-mbánuu̱ neꞌne Ana̱ꞌlóꞌ. 10 Ído̱ ni̱ga̱nú mbiꞌi tijuan, a̱ꞌkhue̱n rí ni̱gi̱ꞌdu̱u̱n ni̱ꞌkha̱ ruꞌwa a̱pha̱ ná inuu ju̱ba̱ꞌ.

16 Jamí mbá xúgíin xu̱kú tsí niguwá, jmba̱ꞌo̱ jamí iꞌgú niguwá, mbá xóo rí waꞌxná-ñájuíín Noé neꞌne Ana̱ꞌlóꞌ. A̱ꞌkhue̱n rí Ana̱ꞌlóꞌ Mikhuíí nirugua̱a̱ xkrugua.

17 A̱ꞌkhue̱n rí nixnúu ruꞌwa a̱pha̱ ná inuu ju̱ba̱ꞌ a̱jma̱ skíñú mbiꞌi. Ído̱ nijudáán-mina̱ꞌ iya, a̱ꞌkhue̱n rí ni̱tu̱xu̱u̱ jiꞌyá rguwa. 18 Xómáꞌ iya na̱ka̱-rajni̱í guéño jamí najudáán-mina̱ꞌ ne̱ ná inuu ju̱ba̱ꞌ, xúꞌkhue̱n máꞌ rguwa ni̱tu̱xu̱u̱ ngrámuu ná inuu iya.

23 Xúꞌkhue̱n jaꞌnii wámba̱-ri̱gi̱i̱n xúgíin tsí nijúwa̱ꞌ ná inuu ju̱ba̱ꞌ, asndo xa̱bo̱ jamí xu̱kú kiraꞌda, xúꞌkhue̱n máꞌ tsí nu̱xma̱tha-mi̱jna̱, jamí ño̱ꞌo̱n. Xkuaꞌnii wámba̱-ri̱gi̱i̱n ná inuu ju̱ba̱ꞌ. I̱mba̱wíi Noé niwanúu, gajmíí tsí gatiin ná rguwa.

3 Mañuu máꞌ xúꞌkhue̱n, ni̱ka̱-ragu̱uꞌ iya ná inuu ju̱ba̱ꞌ. Ído̱ neꞌne mbá juan skíñú gu̱wa̱ꞌ (150) mbiꞌi nigu̱uꞌ máꞌ iya. 4 Rí mbiꞌi gu̱wa̱ꞌ-nítsu i̱jma̱ (17), rí go̱nꞌ tijuan, ni̱tri̱ga̱a̱ rguwa ná júba̱ rí wájun ná mbaa Ararát.

6 Ninújngoo máꞌ a̱jma̱ skíñú mbiꞌi, a̱ꞌkhue̱n nirmáꞌtha̱a̱ Noé iduu rguwa rí neꞌne-mújúu̱n. 7 A̱ꞌkhue̱n nixuꞌmaa̱ mbáa yu̱wa̱ꞌ, tsí nigájnuu ningrigo̱o̱ máꞌ xúꞌkhue̱n asndo náá nijndo̱o̱ꞌ iya inuu ju̱ba̱ꞌ. 8 Mangaa nixuꞌmaa̱ mbáa rigu, jngó mba̱ꞌyoo̱ xí nigu̱uꞌ iya ná inuu ju̱ba̱ꞌ. 9 Jamí na̱nguá nixkamaa̱ ná ma̱ri̱guii̱, jngó nitanga̱a̱ ná rguwa, numuu rí iya xóó ri̱ga̱ mbá xúgíí inuu ju̱ba̱ꞌ. A̱ꞌkhue̱n Noé nitsriya̱ꞌ ñawúun rí ni̱grui̱guíi̱ rigu, ni̱ta̱ꞌa̱a̱ ná rguwa. 10 Ni̱gi̱ꞌthu̱u̱n i̱mba̱á juan mbiꞌi, jamí a̱ꞌkhue̱n nixuꞌmaa̱ mbu̱jú rigu, nigájnuu ná rguwa ni̱ka̱. 11 Xómáꞌ rigu nitanga̱a̱ inuu̱ wakhíí, jayée̱ mbá inúu ixe̱ olíbo̱ ná rawuu̱n. A̱ꞌkhue̱n nifroꞌo̱o̱ Noé rí nigu̱uꞌ máꞌ iya ná inuu ju̱ba̱ꞌ. 12 Ni̱gi̱ꞌthu̱u̱n i̱mba̱á juan mbiꞌi xóó, níkhú nixuꞌmaa̱ rigu ni̱ka̱, a̱ꞌkhue̱n rí nánguá máꞌ nitanga̱a̱.

13 Ído̱ nirámuu majuun siénto̱ i̱mba̱ (601) tsiguu Noé, rí go̱nꞌ timbá, rí mbiꞌi timbá ñajuun go̱nꞌ, a̱ꞌkhue̱n nijndo̱o̱ꞌ-maꞌáa̱n máꞌ iya inuu ju̱ba̱ꞌ. A̱ꞌkhue̱n nirígúu̱ Noé rí jógoo ná tsu̱du̱u̱ rguwa, jamí ndiꞌyoo̱ rí nijndo̱o̱ꞌ inuu ju̱ba̱ꞌ.

15 A̱ꞌkhue̱n Ana̱ꞌlóꞌ niꞌthúun Noé: 16 «Adxájna̱a̱ꞌ ná awúun rguwa ikháán ga̱jma̱a̱ꞌ a̱ꞌgia̱a̱ꞌ, i̱jia̱a̱nꞌ jamí gu̱ꞌwi̱ín i̱jia̱a̱nꞌ. 17 Arawíi̱n xúgíin xu̱kú tsí gatiin ga̱jma̱á nindxa̱a̱ꞌ: xúgíin ño̱ꞌo̱n jamí xu̱kú kiraꞌda jamí mbá xúgíin tsí nu̱xma̱tha-mi̱jna̱ ná inuu ju̱ba̱ꞌ. Agóo̱ mbá xúgíí inuu ju̱ba̱ꞌ, jamí a̱ga̱mi̱diúu̱n ná inuu numbaa».

8 Xóó niꞌthán Ana̱ꞌlóꞌ, niꞌthúun Noé gajmíí i̱ji̱i̱n: 9 «Ikhúúnꞌ na̱ꞌgí mbá awan ga̱jma̱á nindxa̱ꞌlaꞌ xúꞌkhue̱n máꞌ ga̱jma̱á nindxu̱ún xa̱bia̱ꞌlaꞌ tsí ma̱ju̱wá nda̱wa̱á, 10 xúꞌkhue̱n máꞌ ga̱jma̱á nindxu̱ún mbá xúgíin tsí nduya júwa̱ꞌ ga̱jma̱á nindxa̱ꞌlaꞌ: ño̱ꞌo̱n, xu̱kú-xáná jamí xu̱kú kiraꞌdiin, mbá xúgíin tsí nigájna̱á ná awúun rguwa asndo xúgíin xu̱kú tsí júwa̱ꞌ ná ju̱ba̱ꞌ. 11 Awan ríge̱ꞌ nagúꞌdo̱ꞌ ga̱jma̱á nindxa̱ꞌlaꞌ: ni̱mi̱ꞌtsu̱n ná-ma̱xáne̱ gámbi̱i̱n xa̱bo̱ ga̱jma̱á ruꞌwa a̱pha̱, ni̱mi̱ꞌtsu̱n ná-ma̱xáꞌne ruꞌwa a̱pha̱ rí ma̱ꞌne gámba̱a̱ ju̱ba̱ꞌ».

13 Ni̱tsijii to̱ka̱ye̱ꞌ ná du̱u̱n, rí ma̱ꞌne tsinuu awan rí na̱gúꞌdo̱ꞌlo̱ꞌ ga̱jma̱á numbaa.

7 Ga̱jma̱á numuu rí ni̱we̱je̱ a̱kui̱in Noé ná inuu Ana̱ꞌlóꞌ, nákhí waꞌtháa̱n rí ma̱ri̱gá mbá rí ni miꞌtsú xóó táríga̱, ndiya-makuu̱ Ana̱ꞌlóꞌ jamí ga̱jma̱á ngamí niꞌnii̱ mbá guꞌwá-rguwa ná ma̱jáwíin xa̱bii̱. Ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ, ni̱dri̱gú jamínu̱ꞌ xa̱bo̱ numbaa, jamí ninindxu̱u̱ xa̱bo̱ tsí nánda̱a̱ aꞌkhúun ga̱jma̱á majñu̱u̱ rí ni̱we̱je̱ a̱kuii̱n ná inuu Ana̱ꞌlóꞌ.

20 Ikhiin máꞌ xa̱bo̱ tsúꞌkhue̱n ñajúún tsí ra̱khúún gánimbu̱únꞌ juyáá Ana̱ꞌlóꞌ nákhí mbiꞌi rí nixtáa Noé. Phú mba̱yo̱ꞌ ni̱gi̱ꞌthu̱u̱n Ana̱ꞌlóꞌ rí ma̱thanga̱a a̱kuíi̱n, awúun mbiꞌi rí Noé xtáa naꞌne-mújúun guꞌwá-rguwa ná nijáwíin i̱ndo̱ó máꞌ mbá migiñuu xa̱bo̱ ga̱jma̱á majñu̱u̱ iya. 21 Iya rúꞌkhue̱n naꞌne xtiꞌkhuu iya ná nixúdu-maꞌáanꞌlóꞌ rí xúge̱ꞌ, rí naꞌne-jríñáaꞌlóꞌ ga̱jma̱á numuu rí ndiyáa mbiꞌyuu Jesukrísto̱. Nixúdu-maꞌáanꞌlóꞌ ná awúun iya, ra̱ꞌkhá numuu rí ndaꞌyóo ma̱gata̱a smboo xuyalóꞌ, rí numuu ndaꞌyóo rí ma̱ꞌne-jaꞌwu̱u a̱kia̱nꞌlóꞌ ná inuu Ana̱ꞌlóꞌ. 22 Numuu rí Jesukrísto̱ ni̱ka̱a mikhuíí jamí ni̱gi̱ꞌi̱i̱ ná ñawún mújúun Ana̱ꞌlóꞌ. Ikhaa̱ naꞌthán-ñájúu̱n mbá xúgíin ánje̱l, mbá xúgíí inii tsiakhe̱ jamí mbá xúgíí inii gíñá ꞌguéen.