1 Gíꞌmaa máꞌ rí ma̱tha̱ya̱á ríge̱ꞌ mangaa: rí awúun mbiꞌi rí na̱ka̱-rayámba̱ numbaa, maphú gakhe̱ gáꞌne. 2 Numuu rí ma̱ju̱wá xa̱bo̱ tsí naxná-gajmiéjúún juya-mijná i̱ndo̱ó máꞌ ikhiin, tsí na̱ni̱gu̱ún mu̱guaꞌdáá mi̱ndaꞌkho, tsí nune̱-tsiꞌyá, tsí nu̱xu̱xí-mijná, tsí nuthan xkawe̱ꞌ numuu Ana̱ꞌlóꞌ, tsí najñaguun inuu anu̱ú, tsí tsíthan núma̱aꞌ la, tsí tsíne̱-mba̱a̱ Ana̱ꞌlóꞌ, 3 tsí na̱nguá iñáwíin a̱kui̱ín ene̱ xa̱bo̱, tsí na̱nguá ene̱ mba̱a̱ a̱kui̱ín, tsí nune̱-xuxtaa ga̱jma̱á numúú xa̱bo̱, tsí tsíyoo gúni̱ꞌñáá rí nune̱ rí xkawe̱ꞌ, tsí nune̱ rí mu̱míni̱í xa̱bo̱, tsí na̱nguá i̱ni̱gu̱ún rí máján. 4 Ma̱ju̱wá xa̱bo̱ tsí mu̱xna̱xíin a̱ngui̱ín, tsí na̱nguá i̱ndxa̱ꞌwa̱-mijná rí mune̱, tsí na̱ju̱mu̱ú rí phú gíꞌdoo numúú, tsí i̱tha̱án máꞌ na̱ni̱gu̱ún mune̱ rí nandúún ikhiin xó rí nandoo Ana̱ꞌlóꞌ. 5 Muthee̱n rí nune̱-mba̱a̱ Ana̱ꞌlóꞌ, xómáꞌ rí nuni̱i̱ masngájma rí na̱nguá gakon rí nuthee̱n. Ikhaa jngó ma̱xámbáxa̱a̱ꞌ gajmiáaꞌ xa̱bo̱ tsí xkuaꞌnii jaꞌñúú.

6 Numuu rí a̱ngui̱ín tsíge̱ꞌ ñajúún tsí na̱tu̱ꞌu̱ún mbámbá guꞌwá kajngó mune̱-nduwii̱n go̱ꞌo̱ tsí wabiin jamí gatíí aꞌkhán rí nune̱, tsí na̱gu̱ma-rájíin ga̱jma̱á mbá xúgíí inii rí na̱ni̱gu̱u̱ꞌ xuñúú. 7 Go̱ꞌo̱ tsíge̱ꞌ jámba̱ miꞌtsú na̱ka̱-ra̱ma̱ñúu̱, jamí ni miꞌtsú tsíꞌngúu̱n gájráꞌíi̱n rí ma̱ma̱ñúu̱ rí gakon. 8 Jamí xómá neꞌne Jáne̱s ga̱jma̱á Jámbre̱s rí niwajún-ꞌthíi̱n ajngóo Moisés, xkuaꞌnii máꞌ ene̱ xa̱bo̱ tsíge̱ꞌ mangiin rí nawajún-ꞌthíi̱n rí mi̱ꞌthán-raꞌa rí gakon. Xa̱bo̱ tsí niꞌchúu mbá jayu idxu̱ún ñajúu̱n, jamí ra̱ꞌkhá xa̱bo̱ tsí wéje̱ a̱kui̱ín ná inuu Ana̱ꞌlóꞌ ñajúu̱n. 9 I̱ndo̱ó máꞌ numuu rí ma̱xágaja̱a̱ rí nuni̱i̱, numuu rí mbá xúgíin máꞌ xa̱bo̱ mbuyáá rí namijñúu̱, xómá rí tágaja̱a̱ rí nene̱ nájmi̱i̱ tsí ndiñúú gáwajún-ꞌthi̱ín Moisés.

10 Xómáꞌ ikháánꞌ rá Timotéo̱, nathayáá májáanꞌ máꞌ xáne i̱sngáálo̱ꞌ, xáne xtáálo̱ꞌ, náá numuu xtáálo̱ꞌ, rí wéje̱ a̱kui̱nꞌ ná inuu Ana̱ꞌlóꞌ, rí phú mba̱a̱ a̱kui̱nꞌ, rí nandoꞌ ja̱ñu̱ú xa̱bo̱. Mangaa máꞌ nathayáá májáanꞌ rí na̱ꞌngo̱o̱ a̱kui̱nꞌ inuu mbá xúgíí. 11 Nathayáá máꞌ mangaa wátha̱ ni̱gu̱ma-ngínúú jamí ni̱mínu̱u̱ꞌ ná xuajen Antiokía̱, Ikónio̱ jamí Lístra̱. Xómáꞌ Táta̱ neꞌne-jríñúu̱ inuu mbá xúgíí rúꞌkhue̱n. 12 Xkuaꞌnii máꞌ mangaa ma̱gu̱ma-ngíníi mbá xúgíin tsí nandúún ma̱ju̱wá xómá rí nandoo Krísto̱ Jesús. 13 Xómáꞌ xa̱bo̱ tsí xkawi̱i̱ꞌ a̱kui̱ín jamí tsí nune̱-nduwa rá, i̱tha̱án máꞌ xkawe̱ꞌ gúni̱i̱. Mune̱-nduwii̱n xa̱bo̱ jamí ikhii̱n máꞌ ma̱gu̱ma-nduwii̱n gúne̱ i̱ꞌwíin xa̱bo̱. 14 Xómáꞌ ikháánꞌ rá, ma̱xáta̱tsi̱ꞌñáá rí ni̱ma̱ñaaꞌ máꞌ jamí nithayáá májáanꞌ máꞌ rí gakon ne̱, numuu rí nathayáá máꞌ tsáa niꞌsngáaꞌ ne̱. 15 Asndo nákhí máꞌ lájwíín na̱ma̱ñaaꞌ i̱yi̱i̱ꞌ ajngóo Ana̱ꞌlóꞌ, rí ma̱goo ma̱ꞌne rí ma̱nindxa̱a̱ꞌ xa̱bo̱ tsí na̱ma̱ñuu, kajngó ma̱jríñáaꞌ ga̱jma̱á majñu̱u̱ rí wéje̱ a̱kia̱anꞌ ná inuu Krísto̱ Jesús. 16 Mbá xúgíí i̱yi̱i̱ꞌ ajngóo Ana̱ꞌlóꞌ, jmína̱a̱ꞌ máꞌ niꞌthán-múꞌúu̱n xa̱bo̱ tsí nitháán ne̱. Ikhaa jngó, mbá xúgíí ne̱ najmaa rí mi̱ꞌsngúún xa̱bo̱, rí mi̱ꞌthán-múꞌúún xa̱bo̱, rí mi̱xprígúún xa̱bo̱, rí mi̱ꞌsngúún xa̱bo̱ mune̱ rí máján, 17 kajngó ma̱ꞌne káxi̱i̱ tsí ñajuun yumbée Ana̱ꞌlóꞌ, jamí ma̱xtáa̱ na̱ma̱ñuu̱ rí ma̱ꞌnii̱ mbá xúgíí inii rí máján.