1 Ikhaa jngó, ikháánꞌ táa, araxná-mina̱ꞌ tsiakhe̱ ga̱jma̱á numuu rí máján nijanálóꞌ ga̱jma̱á majñu̱u̱ Krísto̱ Jesús. 2 Rí nitadxawíín rí ni̱sngáá ná inúú mbaꞌiin xa̱bo̱, ikhaa máꞌ rúꞌkhue̱n gára̱sngúún xa̱bo̱ tsí jmbiin, tsí ma̱goo musngúún i̱ꞌwíin xa̱bo̱ mangaa. 3 Ikháánꞌ ga̱ꞌngo̱o̱ a̱kia̱anꞌ rí ma̱ta̱míni̱í ga̱jma̱á nindxu̱ꞌ, numuu rí ikháánꞌ ñajwaanꞌ xómá mbáa xa̱bo̱ tsí kuatuun ajwa̱nꞌ tsí máján naꞌne ñajun drígo̱o̱ Jesukrísto̱. 4 Nimbáa xa̱bo̱ tsí nawatuun ajwa̱nꞌ tsíxuda-mine̱e̱ꞌ rí ma̱ꞌnii̱ i̱ꞌwá ñajun, kajngó ma̱ꞌnii̱ rí tsí nithán-ñájwíi̱n eꞌne ma̱ni̱gu̱u̱ꞌ jaꞌyoo̱. 5 Xúꞌkhue̱n máꞌ xa̱bo̱ tsí nagáyuu mangaa, nda̱a̱ rí gájanáa̱ xí tsíya-makuu̱ xtángoo xó rí nagáñúú xa̱bo̱. 6 Xúꞌkhue̱n máꞌ xa̱bo̱ tsí nañajun gakhe̱ xanáá mangaa, ikhaa̱ ginii̱ jaꞌyoo̱ maguu̱ rí nijma̱a̱ rí jaꞌyoo̱. 7 Atandxaꞌwá-mina̱ꞌ rí na̱tha̱a̱nꞌ ge̱jyoꞌ, jamí Táta̱ ma̱ꞌne rí ma̱fraꞌa̱a̱ꞌ ne̱ mbá xúgíí.

8 Ga̱rmáꞌáan a̱kia̱anꞌ xtayáá Jesukrísto̱. Ikhaa̱ ñajuu̱n a̱ꞌdá-xíñu-egoo Dabíd, jamí ndiyáa̱ mbiꞌyuu̱, xómá iꞌthán ajngáa máján rí na̱sngáálo̱ꞌ. 9 Ga̱jma̱á numuu ajngáa rúꞌkhue̱n na̱mínu̱u̱ꞌ mi̱ndaꞌkho, asndo xtuꞌwá-ti̱gu̱ún ga̱jma̱á ñuu ajwa̱nꞌ xómá mbáa xa̱bo̱ tsí ra̱máján eꞌne. Xómáꞌ ajngáa rawuun Ana̱ꞌlóꞌ na̱nguá xtuꞌwá-ti̱go̱o̱ ne̱. 10 Ikhaa jngó, na̱ꞌngo̱o̱ a̱kui̱nꞌ rí na̱mínu̱u̱ꞌ mbá xúgíí ga̱jma̱á numúú tsí niraꞌwíin Ana̱ꞌlóꞌ, kajngó ma̱jáwíi̱n mangii̱n ga̱jma̱á majñu̱u̱ Krísto̱ Jesús jamí jámuu ma̱ju̱wée̱ꞌ tsímáá.

11 Maphú gakon ajngáa ríge̱ꞌ:

Xí nijáñalóꞌ ga̱jma̱á nindxu̱u̱ ikhaa̱,

mbu̱ꞌyalóꞌ ga̱jma̱á nindxu̱u̱ ikhaa̱ mangaa.

12 Xí nu̱míni̱ílóꞌ ga̱jma̱á numuu̱ ikhaa̱,

mu̱ꞌthán-ñájunlóꞌ ga̱jma̱á nindxu̱u̱ ikhaa̱ mangaa.

Xí nuꞌthánlóꞌ rí tsíꞌne̱-nuwii̱nlóꞌ,

maꞌthée̱n rí tsíꞌne-nuwáanꞌlóꞌ mangaa̱.

13 Xí ikháánꞌlóꞌ tsíꞌne̱-mbáníílóꞌ ajngálóꞌ,

ikhaa̱ tsíniñuu̱ rí naꞌne-mbánuu̱ ajngóo̱,

numuu rí ikhaa̱ tsíyoo ma̱ꞌne-nduwee̱ rí ñajuu̱n.

14 Arathúu̱n mbu̱jwáaꞌ ríge̱ꞌ kajngó ma̱rmáꞌáan a̱kuíi̱n, jamí arathán-múꞌúu̱n ná inuu Táta̱ rí ma̱xátsa̱ñúu̱ gajmíi̱ xa̱bo̱ ga̱jma̱á numuu ajngáa. Numuu rí nda̱a̱ rí imbáyúu rúꞌkhue̱n, rí i̱ndo̱ó máꞌ nambáyúu ne̱ rí ma̱ꞌne-gámbi̱in ne̱ tsí nu̱dxawíín ne̱. 15 Athane̱-tsiakhe̱-mina̱ꞌ rí maꞌthán Ana̱ꞌlóꞌ rí máján nithane̱ ído̱ gáta̱xna̱xí-mina̱ꞌ ná inuu̱, xómá mbáa yumbáá tsí nda̱a̱ numuu rí ma̱ti̱yu̱u̱ꞌ, numuu rí najmuu mújúun ajngáa rí gakon. 16 Athane̱-tsíngua̱ꞌ-mina̱ꞌ inuu ajngáa rí nda̱a̱ gamakuu jamí ajngáa tsíjmaa rí nune̱ xa̱bo̱, numuu rí ajngáa rúꞌkhue̱n naꞌne rí mune̱-tsíngua̱ꞌ-mijná mbá jayu xa̱bo̱ ná inuu Ana̱ꞌlóꞌ. 17 Jamí ajngáa rúꞌkhue̱n ma̱ꞌga-raꞌne-gámbi̱in xa̱bo̱ xómá nandii rí naꞌga xuyuu xa̱bo̱. Xa̱bo̱ tsí nuthan ajngáa rúꞌkhue̱n ñajúún Imenéo̱ ga̱jma̱á Filéto̱, 18 tsí nene̱-tsíngua̱ꞌ-mijná ná inuu rí gakon. Ikhii̱n ngrigúu̱n nuthee̱n rí ndiya̱a máꞌ mbiꞌñúú xa̱bo̱ tsí nijáñúú, jamí nune̱-ngra̱ꞌii̱n mbá tikhuun tsí nanimbu̱únꞌ juyáá Ana̱ꞌlóꞌ. 19 Xómáꞌ nakhúu rí niꞌgí Ana̱ꞌlóꞌ ꞌgí xa̱ꞌ ne̱. Ikhín ka̱ma naꞌthán ríge̱ꞌ: «Táta̱ naꞌne-nuwiin tsí ñajúún xa̱bi̱i». Jamí ka̱ma naꞌthán ríge̱ꞌ mangaa: «Tsí naꞌthán rí xa̱bi̱i Krísto̱ ñajuun, ga̱ꞌne-janíí-mine̱e̱ꞌ inuu rí xkawe̱ꞌ».

20 Ná awúun guꞌwóo mbáa xa̱bo̱ tsí phú gíꞌdoo numuu, ra̱ꞌkhá máꞌ i̱ndo̱ó xúba̱ ajwa̱nꞌ mo̱jmo̱ꞌ jamí xúba̱ ajwa̱nꞌ miꞌxá ríga̱, rí ríga̱ máꞌ xúba̱ ixe̱ jamí xúba̱ ju̱ba̱ꞌ mangaa. Mbá tikhu xúba̱ rúꞌkhue̱n najmaa ná na̱gu̱ma ñajun rí phú gíꞌdoo numuu, jamí i̱ꞌwá ne̱ najmaa ná na̱gu̱ma ñajun rí na̱nguá máꞌ gíꞌdoo guéño numuu. 21 Xkuaꞌnii máꞌ ná guꞌwóo Táta̱ mangaa. Xí mbáa naꞌne-jaꞌwu-mina̱aꞌ máꞌ xúꞌkhue̱n, ma̱nindxu̱u̱ xómá xúba̱ rí najmaa ná na̱gu̱ma ñajun rí phú gíꞌdoo numuu, rí najmuu i̱ndo̱ó máꞌ Ana̱ꞌlóꞌ, jamí xtáa̱ máꞌ na̱ma̱ñuu̱ rí ma̱ꞌnii̱ mbá xúgíí inii rí máján.

22 Atagáyaaꞌ inuu mbá xúgíí rí xkawe̱ꞌ na̱wa̱ꞌwa̱ a̱kui̱ín mu̱ne̱ jñáma jamí i̱jín-go̱ꞌo̱. Araxná-mina̱ꞌ tsiakhe̱ rí ma̱tha̱ne̱ rí máján, rí ma̱we̱je̱ a̱kia̱anꞌ ná inuu Ana̱ꞌlóꞌ, rí ma̱gaaꞌ xtañúú xa̱bo̱ jamí rí ma̱ra̱xtaa tsímáá. Athane̱ rúꞌkhue̱n mbá ꞌnduꞌ gajmiáaꞌ mbá xúgíin tsí jaꞌwu a̱kui̱ín nu̱xríga̱á mbiꞌyuu Táta̱. 23 Ma̱xáta̱dxawúún xa̱bo̱ tsí na̱tsa̱ñu̱ú ga̱jma̱á ajngáa rí nda̱a̱ mbá jayu numuu, numuu rí nathayáá máꞌ rí rúꞌkhue̱n naꞌne rí ma̱tsa̱ñu̱ú xa̱bo̱. 24 Mbáa tsí ñajuun yumbée Táta̱ ra̱gíꞌmaa rí ma̱tsa̱ñu̱u̱ꞌ gajmíi̱ xa̱bo̱, rí gíꞌmaa rí ma̱ꞌne gamakuii̱ inúú mbá xúgíin xa̱bo̱, ma̱ma̱ñuu̱ maꞌsngáa̱ jamí ma̱ꞌngo̱o̱ a̱kuii̱n jaꞌñúu̱ mbá xúgíin xa̱bo̱. 25 Xkuaꞌnii kajngó maxrígú-mine̱e̱ꞌ rí maꞌsngúu̱n rí gakon tsí tsíñúú gúdxawíín rí naꞌthée̱n. Á gáꞌne xí Ana̱ꞌlóꞌ ma̱ꞌne rí ma̱thanga̱a a̱kuíi̱n jamí mune̱-nuwii̱n rí gakon, 26 a̱ꞌkhue̱n rí ma̱jáwíi̱n inuu mi̱nduwa rí nanimbúu̱n neꞌne gixa̱a̱, tsí nirugua-raꞌii̱n kajngó muni̱i̱ rí nandoo.