1 Mbá xúgíin tsí ñajúún yumbáá tsí waꞌtsi̱in, jámba̱ miꞌtsú jaꞌñúu̱ rí mbuya̱-makúu̱n ña̱ꞌñíi̱, kajngó ma̱xíꞌthán xkawe̱ꞌ ga̱jma̱á numuu Ana̱ꞌlóꞌ ni máꞌ gisngáá drígo̱o̱. 2 Jamí yumbáá waꞌtsi̱in tsí guáꞌdiin ña̱ꞌñíí tsí nanimbu̱únꞌ juyáá Jesús, mu̱xúni̱ꞌñáa̱ rí nduya-makúu̱n. A̱ꞌkhue̱n gakon i̱wa̱á máján jaꞌyoo rí mune̱-mba̱ꞌwuu̱n, numuu rí xa̱bo̱ máꞌ tsí phú nandúu̱n juñúu̱ nune̱-mba̱ꞌwuu̱n, jamí xa̱bo̱ tsúꞌkhue̱n nanimbúu̱n máꞌ juyáa̱ Jesús mangii̱n. Ikhaa rúꞌkhue̱n gára̱sngúu̱n jamí arathán-múꞌúu̱n rí mune̱-mbáníi̱ ne̱.

3 Xí mbáa xa̱bo̱ naꞌsngáá rí mbrúthun jayu, xúꞌkhue̱n máꞌ ra̱jáꞌnii ne̱ xómá rí gakon niꞌsngáá Tátiálóꞌ Jesukrísto̱, jamí tsíꞌsngálóꞌ ne̱ xáne ma̱juwalóꞌ rí mu̱ꞌne̱ rí nandoo Ana̱ꞌlóꞌ, 4 ikhaa xa̱bo̱ tsúꞌkhue̱n nakúxe̱-mina̱ꞌ jamí tsíma̱ñuu̱ nitháan. Na̱ni̱gu̱u̱ꞌ ma̱tsa̱ñu̱u̱ꞌ ga̱jma̱á numuu ajngáa rí nda̱a̱ numuu, rí i̱ndo̱ó máꞌ naꞌne ne̱ rí ma̱jma̱a̱ xkujndu. Jamí ikhín ríga̱ tsixígu̱, xkujndu, ajngáa xkawe̱ꞌ, tsíya̱-maku-mijná xa̱bo̱, 5 jamí tsíni̱ꞌñáa̱ rí na̱tsa̱ñúu̱ꞌ. Xa̱bo̱ tsúꞌkhue̱n guáꞌdáá ju̱ma̱ rí xkawe̱ꞌ jamí tsíne̱-nuwii̱n rí gakon, xúꞌkhue̱n máꞌ na̱ju̱múu̱ rí mudaa̱ mbúkha̱a̱ ga̱jma̱á majñu̱u̱ rí na̱gu̱ma-mba̱a̱ Ana̱ꞌlóꞌ. Athane̱-níjníí-mina̱ꞌ inúú xa̱bo̱ tsí xkuaꞌnii jaꞌñúú.* 6 Gakon máꞌ rí phú mba̱a̱ mambáyálóꞌ rí mu̱ꞌne̱lóꞌ rí nandoo Ana̱ꞌlóꞌ, xí numuu rí gagi a̱kia̱nꞌlóꞌ ga̱jma̱á numuu rí guáꞌdáálóꞌ. 7 Numuu rí nda̱a̱ mbá jayu rí juꞌyálóꞌ nákhí ni̱gu̱máálóꞌ ná numbaa ríge̱ꞌ, xúꞌkhue̱n máꞌ nda̱a̱ rí ma̱goo mbu̱ꞌyálóꞌ mu̱ꞌgua̱aꞌlóꞌ ído̱ rí ma̱ja̱ñálóꞌ. 8 Ikhaa jngó, xí guaꞌdáálóꞌ rí napholóꞌ jamí guaꞌdáálóꞌ xtíin rí nu̱ju̱ꞌwánlóꞌ, gu̱ꞌyáálóꞌ rí mbájndi máꞌ rúꞌkhue̱n. 9 Xómáꞌ xa̱bo̱ tsí phú nandúún rí mu̱guaꞌdáá, na̱rákii̱n ná awúun katsáꞌkhúun rí tsirájá. A̱ꞌkhue̱n na̱wa̱ꞌa̱ mi̱ndaꞌkho a̱kuíi̱n rí mu̱guaꞌdáa̱ rí nda̱a̱ numuu jamí rí ma̱ꞌne-ngíníi̱. Ikhaa rúꞌkhue̱n naꞌne-gámbi̱in jamí naꞌne-mbáti̱gi̱in xa̱bo̱. 10 Numuu ído̱ rí xa̱bo̱ nandoo jaꞌyoo mbúkha̱a̱, ikhín na̱ꞌkha̱ mbá xúgíí inii rí ra̱máján. Júwa̱ꞌ mbá tikhuun xa̱bo̱ tsí nandúún mune̱-matíí mbúkha̱a̱, ikhiin tsúꞌkhue̱n ni̱ni̱ꞌñáá-ranimbu̱únꞌ rí nanimba̱ꞌlóꞌ, jamí nagíꞌníi̱ mbaꞌa inii gaꞌkho̱.

11 Xómáꞌ ikháánꞌ rá, Timotéo̱, tsáán xa̱bi̱i Ana̱ꞌlóꞌ ñajwaanꞌ, athane̱-tsíngua̱ꞌ-mina̱ꞌ inuu mbá xúgíí tsirájá rúꞌkhue̱n. Araxná-mina̱ꞌ tsiakhe̱ ma̱tha̱ne̱ rí máján, athane̱ rí nandoo Ana̱ꞌlóꞌ, jamí ma̱xáta̱tsi̱ꞌñáá-ranimba̱a̱ꞌ rí nanimba̱ꞌlóꞌ. Ga̱gaaꞌ xtañúú xa̱bo̱, ga̱ꞌngo̱o̱ a̱kia̱anꞌ jamí gamakuíín gáꞌne. 12 Araxná-mina̱ꞌ tsiakhe̱ rí ma̱tia̱wa̱án gisngáá rí nanimba̱ꞌlóꞌ juꞌyáá, kajngó ma̱janáaꞌ rí ma̱ra̱xtaa jámuu. Ikhaa numuu rúꞌkhue̱n nindxaꞌwáaꞌ Ana̱ꞌlóꞌ, nákhí nirathán mbá jaꞌwu ná inúú mbaꞌiin xa̱bo̱ rí nanimba̱a̱ꞌ xtayáa̱. 13 Ná inuu Ana̱ꞌlóꞌ tsí neꞌne-ku̱maa mbá xúgíí rí ríga̱, jamí ná inuu Jesukrísto̱, tsí mbá jaꞌwu niꞌthán ná inuu Pónsio̱ Piláto̱, na̱xna̱-ñájwaanꞌ ríge̱ꞌ. 14 Athane̱-mbáníí mbá xúgíí rí na̱tha̱a̱nꞌ ge̱jyoꞌ, kajngó nda̱a̱ nimbá rí ra̱máján mi̱ꞌthán ga̱jma̱á numaaꞌ. Athane̱ rúꞌkhue̱n asndo gáꞌkha̱a Tátiálóꞌ Jesukrísto̱. 15 I̱ndo̱ó Ana̱ꞌlóꞌ ma̱ꞌne rí ma̱ga̱nú mbiꞌi tsímáá rúꞌkhue̱n. Ana̱ꞌlóꞌ ñajuun tsí naꞌthán-ñájuun mbá xúgíí numbaa, mangaa máꞌ ñajuu̱n Thúngaa tsí naꞌthán-ñájúún mbá xúgíin thúngaa, jamí Xa̱bo̱ Ede̱ tsí naꞌthán-ñájúún mbá xúgíin xa̱bo̱ ede̱. 16 Mbáwíi máꞌ Ana̱ꞌlóꞌ xtáa mbá jámuu, jamí xtáa̱ ná rí nambiꞌi-taꞌa gakhe̱ agu, rí narikhoo ma̱tu̱malóꞌ ikhín. Nimbáa xa̱bo̱ táꞌyoo inuu̱, ni máꞌ ma̱xáꞌngo̱o̱ mba̱ꞌyoo̱. I̱ndo̱ó máꞌ ikhaa̱ jaꞌyoo rí mi̱tiamakuíi̱, jamí mbáwíi̱ máꞌ ikhaa̱ phú gíꞌdoo̱ tsiakhe̱ asndo jámuu mbiꞌi. Xkuaꞌnii gáꞌne.

17 Arathúún xa̱bo̱ tsí guáꞌdáá guéño ná numbaa ríge̱ꞌ, rí mu̱xúxu̱xí-mijnée̱ ni máꞌ mu̱xútsijii̱ a̱kuíi̱n ná inuu rí guáꞌdáa̱ guéño, numuu rí tsígajyúu ne̱. A̱ꞌkhue̱n gakon, gu̱tsijii̱ a̱kuíi̱n ná inuu Ana̱ꞌlóꞌ tsí nanújngo-rámuu naxnálóꞌ mbá xúgíí rí ndaꞌyálóꞌ kajngó ma̱ꞌdxu a̱kia̱nꞌlóꞌ ga̱jma̱á numuu ne̱. 18 Arathúu̱n rí muni̱i̱ rí máján mbámbá mbiꞌi, kajngó ma̱tíí rí máján nuni̱i̱. Gagi a̱kuíi̱n gúxnee̱ rí guáꞌdáa̱, xúꞌkhue̱n máꞌ gagi a̱kuíi̱n gúxpi̱ꞌtha̱a̱ ne̱. 19 Xkuaꞌnii gúni̱i̱ kajngó mu̱ꞌgíi̱ nakhúu rí mu̱guaꞌdáa̱ ná mbiꞌi rí ma̱ꞌkha̱ nda̱wa̱á, jamí ma̱janúu̱ rí ma̱ju̱wée̱ꞌ jámuu.

20 Ikháánꞌ Timotéo̱, athane̱-mbáníí rí waꞌxnángawaaꞌ ma̱tha̱ne̱. Ma̱xátha̱ꞌgíi idxa̱a̱ꞌ ma̱ta̱dxawíín ajngáa nda̱a̱ gamakuu rí nda̱a̱ nitháan numuu, ni máꞌ ma̱xátha̱ꞌgíi idxa̱a̱ꞌ ma̱ta̱dxawíín ajngáa rí nuthan xa̱bo̱ tsí na̱ju̱mu̱ú rí na̱ma̱ñúú guéño. 21 Numuu rí júwa̱ꞌ mbá tikhuun tsí nu̱ꞌgíi idxu̱ún ajngáa rúꞌkhue̱n, ikhaa jngó ni̱ni̱ꞌñáa̱-ranimbúu̱n rí nanimba̱ꞌlóꞌ.

Ana̱ꞌlóꞌ gáꞌne-tsakun-rámááꞌ.* Xkuaꞌnii gáꞌne.*