1 Ikhúúnꞌ ñajunꞌ Páblo̱, xa̱bo̱ tsí waxúngua̱a̱ꞌ neꞌne Jesukrísto̱, numuu rí xkuaꞌnii niꞌthán-ñájun Ana̱ꞌlóꞌ tsí naꞌne-jríñáaꞌlóꞌ jamí Táta̱ Jesukrísto̱ tsí guáꞌthi̱ínlóꞌ ga̱jma̱á mbá jañii a̱kia̱nꞌlóꞌ ná inuu.

2 Na̱xu̱ꞌmá i̱yi̱i̱ꞌ ríge̱ꞌ inaaꞌ, Timotéo̱, tsáán gakon rí xómá a̱ꞌdéꞌ ñajwaanꞌ numuu rí mbóó xó rí nanimba̱ꞌlóꞌ juꞌyáá Ana̱ꞌlóꞌ. Ikhúúnꞌ na̱ndo̱ꞌo̱o̱ Ana̱ꞌlóꞌ Mikhuíí jamí Tátiálóꞌ Jesukrísto̱ rí mune̱-tsakun-rámáa̱, ma̱ñáwíin a̱kuíi̱n juyaa̱ꞌ, jamí muni̱i̱ rí ma̱ra̱xtaa tsímáá.

3 Nákhí nigájnuꞌ nika ná numbaa Masedónia̱, ni̱tha̱n-jáñaaꞌ rí ma̱nguanáaꞌ ná xuajen Éfe̱so̱, kajngó ma̱ra̱xna̱-ñájúún xa̱bo̱ tsí nusngáá rí mi̱nduwa rí náxúsngáa̱ rúꞌkhue̱n, 4 xúꞌkhue̱n máꞌ rí náxúꞌgíi̱ idxúu̱n ajngáa xkáꞌtsa rí ra̱gákon, ni máꞌ ajngáa rí tsíyámuu rí nuthee̱n ga̱jma̱á numúú táta̱-xi̱ꞌñúu̱. Ajngáa rúꞌkhue̱n i̱ndo̱ó máꞌ najmaa ne̱ rí ma̱tsa̱ñúu̱ numuu, jamí tsímbáñúu̱ ne̱ rí mune̱-nuwii̱n rí nandoo Ana̱ꞌlóꞌ. Rí nambáyálóꞌ ñajuun rí ma̱nimba̱ꞌlóꞌ juꞌyáá Ana̱ꞌlóꞌ.

5 Ni̱tha̱a̱nꞌ rí ma̱ra̱xna̱-ñájun rúꞌkhue̱n kajngó mbá xúgiáanꞌlóꞌ ma̱ga̱jnúu ná awúun a̱kia̱nꞌlóꞌ jaꞌwu rí ma̱galóꞌ juꞌya-mijnálóꞌ, xúꞌkhue̱n máꞌ ma̱ꞌne jañii a̱kia̱nꞌlóꞌ rí tsíꞌne̱lóꞌ rí xkawe̱ꞌ, jamí gakon rí wéje̱ a̱kia̱nꞌlóꞌ ná Ana̱ꞌlóꞌ. 6 Mbá tikhuun xa̱bo̱ ni̱ni̱ꞌñáá rí nune̱ rúꞌkhue̱n, jamí nune̱-ngra̱ꞌa-mijnée̱ ga̱jma̱á ajngáa rí nda̱a̱ mbá jayu numuu. 7 Nandúu̱n gánindxúu̱n tsí phú na̱ma̱ñúú nusngáá xtángawoo Ana̱ꞌlóꞌ, i̱ndo̱ó numuu rí tsífruꞌúu̱n rí nuthee̱n, ni máꞌ tsíyáa̱ mújúu̱n rí nusngáa̱, maske máꞌ na̱ju̱múu̱ ikhii̱n rí phú gakon ne̱.

8 Mbá xúgiáanꞌlóꞌ nduꞌyáá rí máján xtángoo, xí numuu rí najmalóꞌ ne̱ xó phú gíꞌmaa ma̱jmalóꞌ. 9 Mangaa máꞌ nduꞌyáálóꞌ ríge̱ꞌ, rí xtángoo tágu̱ma ne̱ ga̱jma̱á numúú tsí nune̱ rí máján. Ni̱gu̱ma ne̱ ga̱jma̱á numúú tsí tsíne̱-mbáníí ne̱ jamí tsí najñaguun, ga̱jma̱á numúú tsí ra̱májíin jamí xa̱bo̱ aꞌkhán, ga̱jma̱á numúú tsí nda̱a̱ gamakúún jamí tsí na̱nguá iya-makuíí Ana̱ꞌlóꞌ, ga̱jma̱á numúú tsí nu̱radíin anu̱ú jamí tsí nu̱radíin ru̱dúún, xúꞌkhue̱n máꞌ ga̱jma̱á numúú tsí nu̱radíin xa̱bo̱. 10 Ni̱gu̱ma ne̱ mangaa ga̱jma̱á numúú tsí nubúún gajmíí xa̱bo̱ tsí túya̱a̱, ga̱jma̱á numúú xa̱bekha tsí nubúún gajmíí xa̱bekha, ga̱jma̱á numúú tsí nune̱-ku̱ꞌwíin xa̱bo̱, ga̱jma̱á numúú tsí mixtutiin jamí tsí tsíne̱-mbáníí rí nu̱xu̱da̱ꞌ-mijná, xúꞌkhue̱n máꞌ ga̱jma̱á numuu jámba̱a̱ xa̱bo̱ tsí na̱we̱je̱-ꞌthu̱u̱n gisngáá rí máján. 11 Gisngáá rúꞌkhue̱n na̱ꞌkho̱-mina̱aꞌ ne̱ ga̱jma̱á rí phú wáá ñajuun ajngáa máján drígo̱o̱ Ana̱ꞌlóꞌ tsí phú májáan. Ikhaa ajngáa máján rúꞌkhue̱n waꞌxnángawoꞌ ikhúúnꞌ rí ma̱tha̱n-ráꞌalo̱ꞌ ne̱.

12 Na̱rígu̱u gamaku ná inuu Tátiálóꞌ Krísto̱ Jesús, tsí nixníꞌ tsiakhe̱. Numuu rí ikhaa̱ nikhiamúu̱ rí ma̱ne̱-mbánuu ñajuu̱n, rúꞌkhue̱n kajngó niꞌgiúu̱n rí ma̱ne̱ ne̱. 13 Numuu rí nákhí wapha ikhúúnꞌ ni̱tha̱n-xkawiu̱u̱ꞌ Jesús, xúꞌkhue̱n máꞌ ni̱xkúún jamí nikhuáa ni̱ñu̱ú tsí nanimbu̱únꞌ juyáa̱. Maske máꞌ xkuaꞌnii jaꞌñúú nákhí xúꞌkhue̱n, Ana̱ꞌlóꞌ niñáwíin a̱kuii̱n jaꞌyeꞌ, numuu rí ne̱ne̱ rúꞌkhue̱n nákhí xóó júgoo inuꞌ jamí xóó tsínimbo̱ꞌ ja̱yo̱o̱. 14 Ninújngoo mba̱a̱ rí máján rí ra̱jáꞌyoꞌ nixníꞌ Tátiálóꞌ, numuu niꞌnii̱ rí ma̱we̱je̱ a̱kui̱nꞌ ná inuu Ana̱ꞌlóꞌ jamí rí ma̱goꞌ ja̱ñu̱ú xa̱bo̱ numuu rí xtáa Krísto̱ Jesús ga̱jma̱á nindxu̱ꞌ.

15 Ajngáa rí gakon ñajuun ríge̱ꞌ jamí ga̱náꞌyoo ma̱nimbu̱únꞌ ne̱ mbá xúgíin xa̱bo̱: Krísto̱ Jesús ni̱ꞌkha̱ ná numbaa rí ma̱ꞌne-jáwíin xa̱bo̱ aꞌkhán. Rí mbá xúgíin xa̱bo̱ aꞌkhán, ikhúúnꞌ ñajun tsí i̱tha̱án xa̱bo̱ aꞌkhán ñajunꞌ. 16 I̱ndo̱ó máꞌ numuu rí ikhaa numuu rúꞌkhue̱n Ana̱ꞌlóꞌ niñáwíin a̱kui̱in jaꞌyeꞌ, kajngó Jesukrísto̱ masngájma ga̱jma̱á nindxu̱ꞌ ginúú wátha̱ mba̱a̱ a̱kuii̱n. Ikhúúnꞌ nanindxu̱ꞌ xkri̱da rí mbuyáá xa̱bo̱ tsí ma̱nimbu̱únꞌ juyáá Ana̱ꞌlóꞌ kajngó ma̱goo ma̱ju̱wée̱ꞌ mbá jámuu. 17 Ikhaa jngó, a̱gu̱ma-mba̱a̱ mbá jámuu jamí gi̱tia-makuíí Thúngaa tsí naꞌthán-ñájun mbá jámuu. Mbáwíi̱ ikhaa̱ ñajuu̱n Ana̱ꞌlóꞌ tsí nimiꞌtsú tsíjáñuu, tsí tsíkujmaa mbu̱ꞌyáálóꞌ, jamí tsí phú ju̱ma̱a̱ ñajuu̱n. Xkuaꞌnii gáꞌne.

18 A̱ꞌdéꞌ Timotéo̱, ikhaa ñajun ríge̱ꞌ na̱xna̱ngáwaaꞌ ikháánꞌ, ikhaa jngó araxná-mina̱ꞌ tsiakhe̱ rí ma̱ꞌnga̱a̱ꞌ inuu rí ra̱máján, xómá nithan tsí ni̱rawíjnga̱a ajngáa ga̱jma̱á numaaꞌ ikháánꞌ nákhí wapha. 19 Ma̱xáta̱tsi̱ꞌñáá-ranimba̱a̱ꞌ rí nanimba̱ꞌlóꞌ, xúꞌkhue̱n máꞌ ma̱xáta̱tsi̱ꞌñáá rí nathane̱ rí máján. Numuu rí júwa̱ꞌ mbá tikhuun tsí ni̱ni̱ꞌñáá-rune̱ rí máján, ikhaa jngó ni̱ni̱ꞌñáa̱-ranimbúu̱n rí nanimba̱ꞌlóꞌ. 20 Mbáa tsí neꞌne rúꞌkhue̱n ñajuun Imenéo̱, jamí i̱mba̱a̱ꞌ ñajuun Alejándro̱. Ikhúúnꞌ ni̱xna̱xíin tsúꞌkhue̱n ná inuu Satanás kajngó ma̱ma̱ñúu̱ rí mu̱xúthan xkawíi̱ꞌ Ana̱ꞌlóꞌ.