1 Ajngáa rí gakon ñajuun ríge̱ꞌ: xí mbáa nandoo ma̱nindxu̱u̱ xa̱bo̱ tsí jayá ikhúún tsí nanimbu̱únꞌ juyáá Jesús, mbá ñajun rí máján nandoo̱ gáꞌnii̱. 2 Ikhaa jngó tsí ñajuun xa̱bo̱ ede̱, jaꞌyoo rí ma̱nindxu̱u̱ mbáa xa̱bo̱ tsí nda̱a̱ rí ra̱máján mi̱ꞌthán numuu̱. Gíꞌmaa rí ma̱nindxu̱u̱ xa̱bo̱ tsí mbáwíi a̱ꞌgui̱i, xúꞌkhue̱n máꞌ nandxaꞌwá-mina̱ꞌ mújúun rí ma̱ꞌne, tsianii̱, gamakuii̱, na̱grui̱gúu̱n xa̱bo̱ ná guꞌwóo̱ jamí na̱ma̱ñuu̱ naꞌsngáa̱ mújúu̱n. 3 Ra̱jáꞌyoo ma̱nindxu̱u̱ mbá xa̱bo̱ najnga̱a̱, ni máꞌ ma̱xáꞌne mika idxu̱u̱, xúꞌkhue̱n máꞌ ma̱xáni̱gu̱u̱ꞌ madaa̱ mbúkha̱a̱ ga̱jma̱á majñu̱u̱ rí mi̱nduwa.* A̱ꞌkhue̱n gakon ga̱nindxu̱u̱ xa̱bo̱ tsí májáan a̱kui̱in jamí mba̱a̱ xo̱xto̱o̱, xúꞌkhue̱n máꞌ ma̱xáríguii̱ a̱kuii̱n ná inuu mbúkha̱a̱. 4 Ga̱nindxu̱u̱ xa̱bo̱ tsí máján naꞌthán-ñájúún xa̱bo̱ guꞌwóo, numuu rí nune̱-mbáníí i̱jii̱n rí naꞌthúu̱n jamí máján nduya̱-makuíi̱ anúu̱. 5 Tsí tsíma̱ñuu gáꞌthán-ñájúún xa̱bo̱ guꞌwóo, xáne lá gáma̱ñuu̱ rí mbayée̱ ikhúún tsí nanimbu̱únꞌ juyáá Ana̱ꞌlóꞌ xúꞌkhue̱n rá. 6 Ikhaa jngó ra̱jáꞌyoo ma̱grui̱gú ñajun ríge̱ꞌ mbáa xa̱bo̱ tsí níkhú jayu ninimbo̱o̱ꞌ jaꞌyoo Ana̱ꞌlóꞌ, ra̱ꞌkhá makúxe̱-mine̱e̱ꞌ guéño jamí ma̱xpátuáꞌáa̱n ná ma̱ꞌne-numaa̱ aꞌkhúu̱n xómá rí ma̱gíꞌnuu gixa̱a̱. 7 Mangaa máꞌ ndaꞌyóo rí xa̱bo̱ tsí tsínimbu̱únꞌ juyáá Jesús máján gúthan ga̱jma̱á numuu̱, kajngó nda̱a̱ rí ra̱máján mi̱ꞌthán ga̱jma̱á numuu̱, jamí ma̱xárákaa̱ ná katsáꞌkhán rí naꞌgí gixa̱a̱.

8 Xúꞌkhue̱n máꞌ xa̱bo̱ tsí nu̱mbáyí-jmáá ná ñajuun Ana̱ꞌlóꞌ: ga̱nindxúu̱n xa̱bo̱ tsí nitiamakúún, ma̱xáꞌne a̱jma̱ ajngúu̱n, ma̱xájngii̱n, ni máꞌ ma̱xáni̱gúu̱nꞌ rí mudaa̱ mbúkha̱a̱ ga̱jma̱á majñu̱u̱ rí mi̱nduwa. 9 Gíꞌmaa rí mune̱-mbáníi̱ gisngáá rí nanimba̱ꞌlóꞌ, awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, xúꞌkhue̱n máꞌ mu̱xúni̱i̱ rí xkawe̱ꞌ. 10 Jamí ikhiin tsíge̱ꞌ, jaꞌyoo rí mbi̱ꞌyáá ginii xí máján ini̱i̱. Nda̱wa̱á, xí waꞌyáá rí nda̱a̱ rí ra̱máján mi̱ꞌthán numúu̱, a̱ꞌkhue̱n rí ma̱goo mu̱mbáyí-jmáa̱ ná ñajuun Ana̱ꞌlóꞌ. 11 Xúꞌkhue̱n máꞌ go̱ꞌo̱ mangiin, ga̱nindxúu̱n xa̱bo̱ tsí nitiamakúún, mu̱xúthee̱n ajngáa tsixtutaa ga̱jma̱á numúú xa̱bo̱, rí gu̱ndxa̱ꞌwa̱-mi̱jnée̱ mújúu̱n rí muni̱i̱ jamí ga̱nindxúu̱n go̱ꞌo̱ tsí nune̱-mbáníí mbá xúgíí. 12 Tsí nu̱mbáyí-jmáá ná ñajuun Ana̱ꞌlóꞌ gíꞌmaa rí ma̱nindxúu̱n xa̱bo̱ tsí mbáwíi a̱ꞌgui̱i, xúꞌkhue̱n máꞌ nuthan-ñajúu̱n mújúu̱n i̱jíi̱n jamí xa̱bo̱ guꞌwúu̱n. 13 Numuu rí xa̱bo̱ tsí máján nu̱mbáyí-jmáá ná ñajuun Ana̱ꞌlóꞌ, ma̱goo mi̱tiamakúu̱n gúne̱ xa̱bo̱ jamí ma̱goo muthee̱n ga̱jma̱á mbá jañii a̱kuíi̱n rí nanimba̱ꞌlóꞌ juꞌyáá ga̱jma̱á numuu Krísto̱ Jesús.

14 Timotéo̱, na̱tháán i̱yi̱i̱ꞌ ríge̱ꞌ ma̱ꞌga inaaꞌ, maske máꞌ gúꞌthu̱u̱n rí ma̱ꞌgá máꞌ wapha gáya̱a̱ꞌlo̱ꞌ. 15 Xí nagajyúꞌ xóó rá, i̱yi̱i̱ꞌ ríge̱ꞌ mambáyúu rí ma̱tha̱ya̱á xáne jaꞌyoo ma̱juwalóꞌ ná majñu̱ú xa̱bo̱ guꞌwóo Ana̱ꞌlóꞌ. Ikháanꞌlóꞌ tsáanꞌ nanimba̱ꞌlóꞌ juꞌyáá Jesús ñajwanlóꞌ xa̱bi̱i Ana̱ꞌlóꞌ tsí xtáa ndaꞌya, ñajwanlóꞌ xó mbá xe̱go̱ rí gído̱o̱ꞌ rí gakon jamí nu̱ña̱wa̱ánlóꞌ ne̱. 16 Gakon máꞌ rí maphú mba̱a̱ rí nisngájmalóꞌ Ana̱ꞌlóꞌ rí ma̱nimba̱ꞌlóꞌ juꞌyáá:

Ana̱ꞌlóꞌ nisngájma-mina̱ꞌ xómá mbáa xa̱bo̱ numbaa jayu.

Xu̱u̱ꞌ máꞌ ikhaa̱ niꞌthán rí kuwii̱n,

jamí ndiyáá ánje̱l rí ikhaa̱.

Waꞌthán-raꞌa ajngóo̱ ná inúú xa̱bo̱ tsí ra̱ꞌkhá judío̱ ñajúún,

jamí xa̱bo̱ ninimbu̱únꞌ juyáa̱ ná numbaa.

Ni̱ka̱ jiꞌyáa̱ mikhuíí ga̱jma̱á gamaku.