1 Ma̱xáta̱xpríguíí mbáa táta̱-xi̱ꞌñú, a̱ꞌkhue̱n gakon, arathán-máꞌáa̱n asndo xómá ana̱a̱ꞌ. Xómáꞌ tsí jñáma rá, athañúu̱ asndo xómá dxíya̱a̱ꞌ. 2 Xúꞌkhue̱n máꞌ gáthañu̱ú tsí nána̱-xíñu asndo xómá ru̱dáaꞌ. Xómáꞌ tsí i̱jín-go̱ꞌo̱ rá, atiamakúu̱n asndo xómá jñágiáaꞌ, ga̱ꞌne jaꞌwu a̱kia̱anꞌ ga̱jma̱á nindxúu̱n.

3 Atambáñúú go̱ꞌóxuáꞌa tsí gakon rí ndawi̱in a̱ngui̱ín. 4 I̱ndo̱ó máꞌ numuu rí, xí mbáa a̱ꞌgóxuáꞌa gíꞌdiin i̱ji̱in o i̱jín-xíñii mbo̱ꞌ, ginuu̱ ikhii̱n jaꞌñúu̱ rí muxnáa̱ rí ndaꞌyóo̱. Gu̱mbáñúu̱ xa̱bo̱ guꞌwúu̱n, kajngó xkuaꞌnii gúra̱khuáa̱ ñawúún anúu̱ rí watambáñúu̱ mangii̱n. Numuu rí rúꞌkhue̱n máján jamí na̱ni̱gu̱u̱ꞌ Ana̱ꞌlóꞌ rí ma̱gu̱ma. 5 Mbáa tsí gakon rí a̱ꞌgóxuáꞌa ñajuun jamí ninguanúu mbáwíi, gíꞌthu̱u̱n rí mi̱tambáyíi̱ gáꞌne Ana̱ꞌlóꞌ, xúꞌkhue̱n máꞌ mbiꞌíí mbruꞌwíín naꞌthán-jáñuu̱ jamí na̱ndo̱ꞌo̱o̱ rí mambáyúu̱. 6 Xómáꞌ a̱ꞌgóxuáꞌa tsí naꞌne i̱ndo̱ó máꞌ rí na̱ni̱gu̱u̱ꞌ xuyuu, asndo xó nijáñuu̱ máꞌ jaꞌnii, maske máꞌ xtáa̱ ndaꞌyee̱ xóó. 7 Ikhaa jngó, arathán-ñájúu̱n mbá xúgíí rí na̱tha̱a̱nꞌ ge̱jyoꞌ, kajngó ma̱nindxúu̱n xa̱bo̱ tsí nda̱a̱ rí ra̱máján mi̱ꞌthán ga̱jma̱á numúú. 8 Xí mbáa tsíxná-gamiéjuun rí mambáñúú xa̱bo̱ tsí mijngi jaꞌñúú, jamí i̱tha̱án máꞌ tsí ñajúún xa̱bo̱ guꞌwóo̱, xa̱bo̱ tsúꞌkhue̱n niniñuu-ranimbo̱o̱ꞌ rí nanimba̱ꞌlóꞌ juꞌyáá, jamí i̱tha̱án máꞌ ra̱máján naꞌnii̱ ikhaa̱ xó rí mbáa tsí tsínimbo̱o̱ꞌ jaꞌyoo Ana̱ꞌlóꞌ.

9 A̱gi̱ꞌma mbiꞌyuu rí mi̱tambáyíí i̱ndo̱ó máꞌ a̱ꞌgóxuáꞌa tsí gíꞌdoo máꞌ atsú skíñú (60) tsiguu, tsí mbáwíi má a̱jmba̱a ni̱gi̱ꞌdaa. 10 Xúꞌkhue̱n nuthan xa̱bo̱ rí niꞌnii̱ rí máján: neꞌne-mbajii̱n mújúu̱n i̱jii̱n, máján ni̱grui̱gúu̱n ná guꞌwóo̱ xa̱bo̱ tsí naguwá i̱mba̱ janíí, nixrígú-mine̱e̱ꞌ rí nimbáñúu̱ xa̱bi̱i Ana̱ꞌlóꞌ, jamí nimbáñúu̱ tsí júwa̱ꞌ awúun gaꞌkho̱. Xí mbá xúgíí rúꞌkhue̱n máján niꞌnii̱, jaꞌyoo̱ rí ma̱gi̱ꞌma mbiꞌyuu̱ rí mi̱tambáyíi̱.

11 Xómáꞌ go̱ꞌóxuáꞌa tsí xóó máꞌ nána̱ tikhu ñajúún, ma̱xíya̱ máꞌ mbiꞌñúu̱ ikhii̱n. Numuu rí ído̱ na̱ni̱gúu̱nꞌ muni̱i̱ rí na̱nda̱ꞌa̱ xuñúu̱, a̱ꞌkhue̱n nandúu̱n mu̱nu̱jwíi̱n mbu̱júꞌ, jamí nune̱-tsíngua̱ꞌ-mijnée̱ inuu Krísto̱. 12 Rí xkuaꞌnii ini̱i̱, mbuye̱e̱ xkuíya̱ gáꞌne Ana̱ꞌlóꞌ, numuu rí tsíne̱-mbáníi̱ rí ginii ni̱xu̱da̱ꞌ-mi̱jnée̱ rí muni̱i̱. 13 Mangaa máꞌ naguꞌúu̱n rí ma̱nindxúu̱n go̱ꞌo̱ tsí naskúún, jamí nagóo̱-rangruꞌúu̱n mbámbá guꞌwúún xa̱bo̱. Jamí ra̱ꞌkhá máꞌ i̱ndo̱ó naskúu̱n, rí mangaa máꞌ nangrigúu̱n judúu̱n tsixuxtaa ga̱jma̱á numúú xa̱bo̱. Xúꞌkhue̱n máꞌ nu̱xu̱da̱ꞌ-mi̱jne̱e̱ ná ra̱jáꞌñúu̱ jamí nuthee̱n rí ra̱gíꞌmaa muthee̱n. 14 Ikhaa numuu rúꞌkhue̱n, nandoꞌ rí mu̱nu̱ju̱nꞌ go̱ꞌóxuáꞌa tsí xóó nána̱ tikhu ñajúún. Gune̱-mbajii̱n i̱jíi̱n, xúꞌkhue̱n máꞌ gune̱-mba̱ꞌwuu̱n xa̱bo̱ guꞌwúu̱n. A̱ꞌkhue̱n rí tsí gíꞌdáanꞌlóꞌ sia̱nꞌ ma̱xáxóo maꞌthée̱n nimbá rí xkawe̱ꞌ ga̱jma̱á numalóꞌ. 15 Numuu rí mbá tikhuun go̱ꞌóxuáꞌa ni̱ni̱ñáa̱ máꞌ rí nanimbúu̱n juyáa̱ Ana̱ꞌlóꞌ jamí nagóo̱ máꞌ tsu̱du̱u̱ Satanás.

16 Xí mbáa tsí nanimbo̱o̱ꞌ jaꞌyoo Jesús júwa̱ꞌ go̱ꞌóxuáꞌa ná guꞌwóo̱, ikhaa̱ máꞌ gíꞌmaa rí mambáñúu̱. A̱ꞌkhue̱n ma̱xáꞌyóo máꞌ rí mi̱tambáñúu̱ gúne̱ tsí nanimbu̱únꞌ juyáá Jesús, xkuaꞌnii kajngó ma̱ri̱gá rí mi̱tambáñúú ga̱jma̱á tsí gakon rí go̱ꞌóxuáꞌa ñajúún.

17 Xómáꞌ xa̱bo̱ buanuu tsí máján nune̱-mbáníí ñajun drígu̱ún, jaꞌyoo rí mi̱tiamakúu̱n i̱tha̱án xóó. Jamí i̱tha̱án máꞌ tsí nuthan-raꞌa jamí nusngáá. 18 Numuu rí ná i̱yi̱i̱ꞌ ajngóo Ana̱ꞌlóꞌ ka̱ma naꞌthán: «Ma̱xáta̱xu̱ꞌdáa ama rawuun xede̱ ído̱ rí nathrígú ixí iña».* Jamí ka̱ma naꞌthán mangaa: «Xa̱bo̱ tsí nañajun jaꞌyoo rí madaa̱ numuu̱».*

19 Ma̱xánimba̱a̱ꞌ ído̱ rí nuni̱i̱ aꞌkhúun mbáa xa̱bo̱ nikhi̱i̱ ede̱. I̱ndo̱ó máꞌ xí júwa̱ꞌ a̱jmi̱i atsúun tsí naꞌne inúú rí niꞌnii̱, a̱ꞌkhue̱n rí ma̱nimba̱a̱ꞌ. 20 Xómáꞌ tsí tsíni̱ꞌñáá rí nune̱ aꞌkhán, ataxprígúu̱n inúú mbá xúgíin tsí nanimbu̱únꞌ juyáá Jesús, kajngó tsí i̱ꞌwíin ma̱mi̱ꞌñúú mangiin.

21 Ná inuu Ana̱ꞌlóꞌ xúꞌkhue̱n máꞌ ná inuu Tátiálóꞌ Jesukrísto̱, jamí ná inúú ánje̱l tsí niraꞌwíin Ana̱ꞌlóꞌ, phú na̱xna̱ngáwaaꞌ rí ma̱tha̱ne̱-mbáníí rí na̱tha̱a̱nꞌ ge̱jyoꞌ. Ma̱xátraꞌwíi nimbáa tsí ma̱tha̱ñi̱í rí májáan, jamí mbéꞌtháán awan gájmaaꞌ ga̱jma̱á numúu̱ mbá xúgíi̱n. 22 Ma̱xáꞌcha̱a̱ꞌ guéño rí ma̱ta̱xkráma idxu̱u̱ asndo nimbáa rí ma̱nindxu̱u̱ xa̱bo̱ ede̱, ni máꞌ ma̱xátha̱ne̱ mangáánꞌ aꞌkhán rí nune̱ i̱ꞌwíin. I̱wa̱á máján rí ga̱ꞌne máꞌ xúꞌkhue̱n jaꞌwu a̱kia̱anꞌ.

23 Ga̱jma̱á numuu rí phú wa̱yi̱í ndayóo nandii awáanꞌ, náxígíin i̱ndo̱ó máꞌ yaꞌsi. Añi̱i̱ tháan iyoo úba̱ rí ni̱ga̱yu̱u̱ꞌ mangaa kajngó mambáyúu ne̱ awáanꞌ.

24 Júwa̱ꞌ mbá tikhuun xa̱bo̱ tsí wapha máꞌ nakujma aꞌkhúún, maske máꞌ asndo xóó tsígu̱ma-mbáníí ga̱jma̱á numúu̱. Xómáꞌ i̱ꞌwíin xa̱bo̱ asndo nda̱wa̱á na̱ma̱ꞌtha-ri̱ya̱ꞌ aꞌkhúu̱n. 25 Xúꞌkhue̱n máꞌ mangaa, nakujma jaꞌwu rí máján nune̱ xa̱bo̱. Jamí rí máján nune̱ xa̱bo̱ rí tsíkujma rá, ma̱ga̱nú tsiakhe̱ mbiꞌi rí ma̱kujma ne̱.