1 Coríntios 9

Rí jaꞌyoo mbáa tsí waxúngua̱a̱ꞌ neꞌne Jesús

1 Tsáa lá irikheꞌ rí ma̱ne̱ rí nandoꞌ rá. Ikhúúnꞌ ñajunꞌ mbáa tsí waxúngua̱a̱ꞌ, ndi̱yo̱o̱lo̱ꞌ Tátiálóꞌ Jesús, jamí ikháanꞌlaꞌ nanimba̱ꞌlaꞌ ju̱ya̱á Táta̱ ga̱jma̱á numuꞌ ikhúúnꞌ. 2 Maske máꞌ ra̱ꞌkháa tsí waxúngua̱a̱ꞌ ñajunꞌ iyáá tsí i̱ꞌwíin, xómáꞌ ikháanꞌlaꞌ ndu̱ya̱álaꞌ rí ikhaa ñajunꞌlo̱ꞌ. Numuu rí ikháanꞌlaꞌ juwalaꞌ ga̱jma̱á nindxu̱u̱ Táta̱, rúꞌkhue̱n isngájma rí mbáa tsí waxúngua̱a̱ꞌ ñajunꞌlo̱ꞌ.

3 Xáꞌnii i̱riꞌñúúlo̱ꞌ tsí nuthan numuꞌlo̱ꞌ: 4 Á ra̱jáꞌyaxo̱ꞌ mu̱peꞌtsoxo̱ꞌ jamí mu̱wánxo̱ꞌ iya ikháanꞌxo̱ꞌ rá dxe̱ꞌ. 5 Á ra̱jáꞌyaxo̱ꞌ rí ma̱ngriga̱ꞌ gajmiáxo̱ꞌ dxájwalóꞌ tsí a̱ꞌgia̱ꞌxo̱ꞌ mangáanꞌxo̱ꞌ xómá ngrigu̱ún i̱ꞌwíin tsí waxúngui̱inꞌ rá dxe̱ꞌ, xómá ngrigu̱ún dxíyo̱o̱ Táta̱ jamí Pédro̱.*9.5 «Pedro» ñajuun ajngáa griégo̱ jamí «Cefas» ñajuun ajngáa araméo̱. 6 Á i̱ndo̱ó máꞌ ikhúúnꞌ ga̱jmi̱ꞌ Bernabé jaꞌyaxo̱ꞌ rí mu̱ñajunxo̱ꞌ rí mbu̱ꞌyá mbiꞌyaxo̱ꞌ rá dxe̱ꞌ.

7 Nimbáa xa̱bo̱ tsí kuatuun ajwa̱nꞌ tsíꞌne-numa-mine̱e̱ꞌ máꞌ ikhaa̱. Xómáꞌ tsí naꞌdu ajmu̱u̱ úba̱ ná mbayuu, naꞌkhui̱i̱ xndúu ne̱ ído̱ najma̱a̱. Xúꞌkhue̱n máꞌ tsí na̱ña̱wu̱ún xu̱kú, naꞌña̱a̱ yaꞌdú ído̱ naríye̱e̱ꞌ ne̱. 8 Ma̱xáju̱ma̱ꞌlaꞌ rí i̱ndo̱ó máꞌ ju̱mu̱ú xa̱bo̱ numbaa ñajuun ríge̱ꞌ. Á ra̱ꞌkhá xkuaꞌnii máꞌ iꞌthán xtángawoo Moisés mangaa rá dxe̱ꞌ. 9 Xáꞌnii ka̱ma naꞌthán ná xtángoo drígo̱o̱ Moisés: «Ma̱xáta̱xu̱ꞌdáa ama rawuun xede̱ tsí nañajun».*9.9 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 25.4. Á rúꞌkhue̱n iꞌthán rí naxná-gamiéjuun Ana̱ꞌlóꞌ ene̱ xede̱ rá dxe̱ꞌ. Na̱nguá, 10 ikháánꞌlóꞌ naxná-gamiéjuu̱n e̱ꞌne̱lóꞌ. Ga̱jma̱á numalóꞌ ikháánꞌlóꞌ waꞌtháán ríge̱ꞌ. Tsí nañajuun ju̱ba̱ꞌ jamí tsí naꞌne-jaꞌwu̱u rí nijma̱a̱, ga̱jma̱á mbá jañii a̱kuíi̱n guáꞌthíi̱n rí ma̱janúu̱ tháan mangii̱n rí nijma̱a̱. 11 Xí ikháanꞌxo̱ꞌ ni̱dúxo̱ꞌ ajngóo Ana̱ꞌlóꞌ ná awúun a̱kia̱nꞌlaꞌ, á phú ra̱jáꞌyoo rí mu̱drígúxo̱ꞌ tháan rí guáꞌdáálaꞌ ma̱juwaxo̱ꞌ ga̱jma̱á rá dxe̱ꞌ. 12 Xí jaꞌñúú tsí i̱ꞌwíin rí mu̱drígú rí guáꞌdáálaꞌ, á ra̱ꞌkhá i̱tha̱án jaꞌyaxo̱ꞌ ikháanꞌxo̱ꞌ rá dxe̱ꞌ.

Xómáꞌ ikháanꞌxo̱ꞌ túnda̱ꞌa̱xo̱ꞌ rí ikháanꞌlaꞌ mu̱xna̱ꞌxo̱ꞌ rí jaꞌyaxo̱ꞌ, maske máꞌ phú jaꞌyaxo̱ꞌ ne̱. Mbá xúgíí máꞌ nu̱xpígaa a̱kia̱nꞌxo̱ꞌ kajngó nda̱a̱ rí gáwe̱je̱-ꞌthu̱u̱n rí mi̱ꞌthán-raꞌa ajngáa máján ga̱jma̱á numuu Krísto̱. 13 Ndu̱ya̱álaꞌ máꞌ rí xa̱bo̱ tsí nu̱ñajun ná guꞌwá dxákuun, ikhín máꞌ napiꞌtsii̱, jamí tsí nu̱ñajun ná nakha-ráma tsi̱gi̱jña̱ꞌ, ikhaa máꞌ xuwi tsi̱gi̱jña̱ꞌ rúꞌkhue̱n naꞌphi̱i̱ mangii̱n. 14 Xkuaꞌnii máꞌ nixná-ñájun Táta̱ ga̱jma̱á numúú tsí nuthan-raꞌa ajngáa máján mangaa, rí mbuye̱e̱ mbiꞌñúu̱ máꞌ ga̱jma̱á numuu ajngáa máján.

15 Xómáꞌ ikhúúnꞌ, nimbá rí jaꞌyoꞌ tánda̱ꞌa̱ ná inalaꞌ, ni máꞌ tsítháánlo̱ꞌ ríge̱ꞌ kajngó mu̱xnu̱ꞌlaꞌ rí jaꞌyalaꞌ mu̱xnu̱ꞌlaꞌ. I̱wa̱á máꞌ máján xí ma̱ja̱ñúꞌ xó rí mbáa marígú-jáꞌyúꞌ rí nadxu a̱kui̱nꞌ e̱ne̱lo̱ꞌ numuu rí tsíru̱malo̱ꞌ. 16 Ído̱ na̱tha̱n-ráꞌalo̱ꞌ ajngáa máján, nda̱a̱ numuu rí ma̱ku̱xí-mina̱ꞌlo̱ꞌ, numuu rí wéje̱ inuꞌ rí ma̱ne̱lo̱ꞌ ñajun rúꞌkhue̱n. ¡Á tháán mingínúú xí tsítha̱n-ráꞌalo̱ꞌ ajngáa máján! 17 Ikhaa jngó, ra̱gúꞌthu̱u̱n rí ma̱da̱a̱ꞌ numuꞌ ga̱jma̱á numuu ñajun rí na̱ne̱lo̱ꞌ, numuu rí ra̱ꞌkhá ikhúúnꞌ ni̱ꞌgí-mina̱ꞌ rí ma̱ne̱ ne̱, rí ni̱ge̱ꞌe̱ inuꞌ rí ma̱ne̱lo̱ꞌ ne̱. 18 Dí lá gájanúꞌ rí na̱ne̱ ñajun ríge̱ꞌ xúꞌkhue̱n rá. Najanúꞌ rí gagi a̱kui̱nꞌ ga̱jma̱á numuu rí tsíru̱malo̱ꞌ nitháan ído̱ na̱tha̱n-ráꞌalo̱ꞌ ajngáa máján ga̱jma̱á numuu Krísto̱, ni máꞌ tsígruígúlo̱ꞌ nitháan rí jaꞌyoꞌ ma̱gruígúlo̱ꞌ ga̱jma̱á numuu ajngáa máján.

19 Maske máꞌ nimbáa xa̱bo̱ tsíxná-ñájwinꞌ rí ma̱ne̱lo̱ꞌ rí nandoo, ikhúúnꞌ ne̱ne̱-mina̱ꞌlo̱ꞌ yumbáá drígu̱ún mbá xúgíin xa̱bo̱ kajngó ma̱goo ma̱mbáñúu̱ mbaꞌii̱n rí ma̱jáwíi̱n. 20 Ído̱ xtáá ga̱jma̱á nindxu̱ún xa̱bo̱ judío̱, na̱ne̱-mina̱ꞌ xómá xa̱bo̱ judío̱, kajngó ma̱mbáñúu̱ rí ma̱jáwíi̱n. Ído̱ xtáá ga̱jma̱á nindxu̱ún tsí nune̱-mbáníí xtángawoo Moisés, na̱ne̱-mbánuu xtángoo mangúúnꞌ kajngó ma̱mbáñúu̱ rí ma̱jáwíi̱n, maske máꞌ ra̱wéje̱ inuꞌ rí ma̱ne̱-mbánuulo̱ꞌ xtángoo. 21 Ído̱ xtáá ga̱jma̱á nindxu̱ún xa̱bo̱ tsí tsíꞌyóo máꞌ rí mune̱-mbáníí xtángoo, na̱ne̱-mina̱ꞌ asndo xómá rí tsíꞌyóo máꞌ rí ma̱ne̱-mbánuu xtángoo mangúúnꞌ kajngó ma̱mbáñúu̱ rí ma̱jáwíi̱n. I̱ndo̱ó máꞌ numuu rí na̱ne̱-mbánuu máꞌ rí xtángawoo Ana̱ꞌlóꞌ, numuu rí wéje̱ inuꞌ rí ma̱ne̱-mbánuu xtángawoo Krísto̱. 22 Ne̱ne̱-waba-mina̱ꞌ ná inúú tsí wabiin kajngó ma̱mbáñúu̱ rí ma̱jáwíi̱n. Mbá xúgíí ne̱ne̱-mina̱ꞌlo̱ꞌ ná inúú mbá xúgíin xa̱bo̱, kajngó ma̱mbáñúu̱ rí ma̱jáwíi̱n maske asndo mbá tikhuun. 23 Mbá xúgíí ríge̱ꞌ na̱ne̱lo̱ꞌ ga̱jma̱á numuu ajngáa máján, kajngó ma̱gruígúu tháan mangúúnꞌ rí máján najma̱a̱ eꞌne ne̱.

24 Ndu̱ya̱álaꞌ máꞌ rí xa̱bo̱ tsí nune̱ gitsín rí nagáñúú xa̱bo̱, mbá xúgíi̱n nagáñúu̱ rí ma̱ꞌngúu̱n, i̱ndo̱ó máꞌ numuu rí mbáwíi tsí na̱ꞌngo̱o̱ na̱grui̱gú gamaku. Ikhaa jngó, u̱ga̱yálaꞌ rí ma̱ꞌnga̱ꞌlaꞌ kajngó mu̱drígúlaꞌ rí jaꞌyoo ma̱janálaꞌ. 25 Jámba̱a̱ xa̱bo̱ tsí naꞌtsín naꞌnii̱ gakhe̱ a̱kuii̱n inuu mbá xúgíí. Ikhii̱n nune̱-ngíná-mijnée̱ rí mu̱dríguíi̱ mbá rí tsígajyúu. Xómáꞌ ikháánꞌlóꞌ nu̱ꞌne̱-ngíná-mijnálóꞌ rí mu̱drígúlóꞌ mbá rí nagajyúu jámuu. 26 Ikhaa jngó, ikhúúnꞌ na̱ga̱yúꞌ xáꞌnii, ra̱ꞌkhá xómá xa̱bo̱ tsí tsíꞌyoo náá numuu igáyuu. Ikhúúnꞌ na̱xna̱-mína̱ꞌ xáꞌnii, tsíxi̱díí ski̱yu̱ꞌ ná inuu gíñá. 27 A̱ꞌkhue̱n gakon, na̱ne̱-ngínáa xuyuꞌ jamí na̱xu̱ꞌdáa ne̱ rí mañajun ne̱, ra̱ꞌkhá ma̱ꞌne rí jmínu̱úꞌ máꞌ ikhúúnꞌ, tsúún ni̱tha̱n-múꞌúún i̱ꞌwíin xa̱bo̱, ma̱xáꞌngo̱ꞌ gáꞌne.