1 Xa̱bo̱ Korínto̱ 8

Tsi̱gi̱jña̱ꞌ rí kixnáxe̱ inúú tsí ra̱ꞌkháa Ana̱ꞌlóꞌ ñajúún

1 Xúge̱ꞌ rí nandoꞌ ma̱tha̱nꞌlaꞌ ga̱jma̱á numuu tsi̱gi̱jña̱ꞌ rí kixnáxe̱ inúú tsí ra̱ꞌkháa Ana̱ꞌlóꞌ ñajúún. Gakon máꞌ rí «mbá xúgiáanꞌlóꞌ na̱ma̱ñalóꞌ ga̱jma̱á numuu rúꞌkhue̱n». Rí na̱ma̱ñalóꞌ naꞌne rí mu̱xu̱xí-mijnálóꞌ, xómáꞌ rí nandalóꞌ juꞌñúú a̱ngia̱nꞌlóꞌ rá, naꞌne rí ma̱gajii̱n. 2 Xí mbáa na̱ju̱mu̱u̱ rí na̱ma̱ñuu guéño, asndo xóó máꞌ tsíma̱ñuu̱ nitháan rí jaꞌyoo ma̱ma̱ñuu̱. 3 Xí mbáa nandoo jaꞌyoo Ana̱ꞌlóꞌ, na̱gu̱ma-nuwii̱n máꞌ eꞌne Ana̱ꞌlóꞌ.

4 Ikhaa jngó, á ma̱goo mu̱ꞌpholóꞌ rí kixnáxe̱ ná inúú tsí ra̱ꞌkháa Ana̱ꞌlóꞌ ñajúún rá. Nduꞌyáálóꞌ máꞌ rí nda̱a̱ rí gíꞌdoo numúú tsí ra̱ꞌkháa Ana̱ꞌlóꞌ ñajúún ná numbaa ríge̱ꞌ, jamí mbáwíi máꞌ tsí ñajuun Ana̱ꞌlóꞌ xtáa. 5 Maske máꞌ júwa̱ꞌ mbaꞌiin tsí nithúún «ana̱ꞌlóꞌ» o «táta̱» ene̱ xa̱bo̱ ná mikhuíí jamí ná numbaa ríge̱ꞌ, 6 xómáꞌ ikháánꞌlóꞌ nduꞌyáálóꞌ rí mbáwíi máꞌ Ana̱ꞌlóꞌ Mikhuíí xtáa̱. Ikhaa̱ neꞌne-ku̱maa̱ mbá xúgíí rí ríga̱, jamí ikháánꞌlóꞌ juwalóꞌ rí mu̱ꞌne̱lóꞌ ñajuu̱n. Xúꞌkhue̱n máꞌ mbáwíi tsí ñajuun Táta̱ xtáa̱, ikhaa ñajuun Jesukrísto̱. Ga̱jma̱á majñu̱u̱ ikhaa̱ ni̱gu̱ma-ku̱maa mbá xúgíí rí ríga̱, jamí ga̱jma̱á numuu̱ máꞌ ikhaa̱ juwalóꞌ.

7 I̱ndo̱ó máꞌ numuu rí ra̱ꞌkhá mbá xúgíin nduyáá rí xkuaꞌnii. Nákhí rí ginii mbá tikhuáanꞌlaꞌ naguꞌwanlaꞌ máꞌ rí nu̱ne̱-mbi̱inlaꞌ tsí ra̱ꞌkháa Ana̱ꞌlóꞌ ñajúún, ikhaa jngó ído̱ rí napholaꞌ xuwi rúꞌkhue̱n, na̱ju̱ma̱ꞌlaꞌ rí ra̱máján e̱ne̱laꞌ ga̱jma̱á numuu rí a̱jma̱ a̱kia̱nꞌlaꞌ. 8 Ra̱ꞌkhá rí napholóꞌ naꞌne rí ma̱ni̱gu̱u̱ꞌ Ana̱ꞌlóꞌ jaꞌyalóꞌ. Ra̱ꞌkhá numuu rí napholóꞌ i̱tha̱án májáanꞌlóꞌ, o numuu rí tsípholóꞌ i̱tha̱án ra̱májáanꞌlóꞌ mbo̱ꞌ.

9 Gia̱wa̱n gúne̱laꞌ, ra̱ꞌkhá rí máján nandoo mu̱ne̱ ikháanꞌlaꞌ ma̱ꞌne-ñawúún i̱ꞌwíin tsí tsíma̱ñúú mújúún xóó. 10 Xí mbáa tsí a̱jma̱ a̱kui̱in ndaꞌyaaꞌ ikháánꞌ, tsáánꞌ na̱ma̱ñaaꞌ májáanꞌ, rí natseꞌtso ná na̱gu̱ma-mbi̱in tsí ra̱ꞌkháa Ana̱ꞌlóꞌ ñajúún, ngamí ma̱wa̱ꞌa̱ a̱kuii̱n mi̱khui̱i̱ mangaa̱ rí waxnáxe̱ ná inúú tsúꞌkhue̱n, maske máꞌ na̱ju̱mu̱u̱ rí ra̱máján mi̱khui̱i̱ ne̱. 11 A̱ꞌkhue̱n ga̱jma̱á numuu rí na̱ma̱ñaaꞌ ikháánꞌ, ma̱ngra̱ꞌaa dxájwalóꞌ tsí tsíma̱ñuu mújúun, maske máꞌ nijáñuu Krísto̱ ga̱jma̱á numuu̱. 12 Ído̱ nathane̱ rí ma̱ꞌne aꞌkhán dxájwaaꞌ tsí na̱nguá xóó jañii a̱kui̱in, numuu nathane̱ rí ma̱ꞌnii̱ rí ra̱máján iꞌyoo̱ ikhaa̱, nataxúda-mina̱ꞌ aꞌkhán ná inuu Krísto̱. 13 Ikhaa jngó, xí ga̱jma̱á numuu rí nakholo̱ꞌ ma̱ꞌne a̱jma̱ a̱kui̱in dxájuꞌ, ni miꞌtsú náxéꞌkholo̱ꞌ xuwi, ra̱ꞌkhá ma̱ꞌnii̱ aꞌkhán gáne̱lo̱ꞌ.