1 Ikhaa numuu rúꞌkhue̱n, na̱ra̱xe̱lo̱ꞌ: Á neꞌne-janíí-mina̱ꞌ Ana̱ꞌlóꞌ inúú xa̱bo̱ xuajñuu rá. ¡Na̱nguá mbá jayu! Numuu rí mangúúnꞌ máꞌ ñajunꞌ xa̱bo̱ Israél. A̱ꞌdá-xíñu-egoo Abraám, jamí xa̱bo̱ ri̱jyu̱u̱ꞌ Benjamín ñajunꞌlo̱ꞌ. 2 Tániñúú Ana̱ꞌlóꞌ xa̱bo̱ xuajen Israél, xuajñuu̱ rí niraꞌwíi̱ asndo nákhí ginii jayu. Á tsíya̱álaꞌ rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ ga̱jma̱á numuu Elía̱s dxe̱ꞌ, rí neꞌne xkujndii̱ ná inuu Ana̱ꞌlóꞌ ga̱jma̱á numuu rí nune̱ xa̱bo̱ Israél. Xáꞌnii niꞌthée̱n: 3 «Táta̱, ni̱radíi̱n xa̱bia̱aꞌ tsí nu̱rawíjnga̱a ajngáaꞌ, jamí ni̱rngáxi̱i̱ itsí ja̱rngo̱xe̱ dríga̱a̱ꞌ ná nakha tsi̱gi̱jña̱ꞌ. I̱ndo̱ó máꞌ ikhúúnꞌ xóó xtáá nda̱ya̱lo̱ꞌ, jamí nandúu̱n gúxíñúu̱ mangúúnꞌ».* 4 Jamí xáne niriꞌña Ana̱ꞌlóꞌ rá. Xáꞌnii niꞌthán Ana̱ꞌlóꞌ, niꞌthúu̱n Elía̱s: «Xóó máꞌ gúꞌdiin mbá juwan míl (7 000) xa̱bekha tsí túsmáti̱gu̱ún ná inuu Ba̱ál».* 5 Xkuaꞌnii máꞌ xúge̱ꞌ mangaa, xóó júwa̱ꞌ mbá tikhuun tsí niraꞌwíin Ana̱ꞌlóꞌ ga̱jma̱á numuu rí phú májáan a̱kuii̱n jaꞌñúu̱. 6 Xí Ana̱ꞌlóꞌ niraꞌwíin tsíge̱ꞌ ga̱jma̱á numuu rí phú májáan a̱kuii̱n jaꞌñúu̱, ra̱ꞌkhá máꞌ ga̱jma̱á numuu ñajun rí nuni̱i̱ xúꞌkhue̱n rá. Jamí xí watraꞌwíi̱n ga̱jma̱á numuu ñajun rí nuni̱i̱, ra̱ꞌkhá máꞌ numuu rí májáan a̱kui̱in Ana̱ꞌlóꞌ jaꞌñúu̱ xúꞌkhue̱n rá.

7 Dí gúꞌthánlóꞌ xúꞌkhue̱n rá. Rí xa̱bo̱ Israél túxkamaa̱ rí nduꞌyée̱. Xómáꞌ tsí niraꞌwíin Ana̱ꞌlóꞌ rá, ni̱xkamaa̱ ne̱. Jamí tsí i̱ꞌwíin rá, ni̱gu̱ma-gúkú a̱kuíi̱n. 8 Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ana̱ꞌlóꞌ neꞌne gúkú a̱kuíi̱n kajngó ma̱xáju̱múu̱,

jamí xkuaꞌnii jaꞌñúu̱ asndo xúge̱ꞌ.

Ana̱ꞌlóꞌ nirogoo idúu̱n jamí nirogoo ñaꞌwúu̱n

kajngó ma̱xáfrigúu̱n, ni máꞌ mu̱xúdxawíi̱n».*

9 Jamí thúngaa Dabíd mangaa niꞌthán:

«Ga̱ꞌni̱i xómá géjwa̱nꞌ jamí tsáꞌkhán ndxa̱a̱ rí nuni̱i̱.

Ga̱duáꞌíi̱n ikhín jamí gu̱dríguíi̱ jamínu̱ꞌ rí jaꞌñúu̱.

10 Ga̱ju̱góo idúu̱n kajngó ma̱xáfrigúu̱n,

jamí ga̱ꞌne nde̱tse̱ tsu̱dúu̱n jámba̱ miꞌtsú».*

11 Kajngó na̱ra̱xe̱lo̱ꞌ: Á nixpátri̱gi̱in xa̱bo̱ Israél rí asndo náxáwáxúu̱nꞌ rá. ¡Na̱nguá mbá jayu! A̱ꞌkhue̱n gakon, ga̱jma̱á numuu rí ikhii̱n nijñaguu̱n, a̱ꞌkhue̱n ndiyoo nijáwíin xa̱bo̱ tsí ra̱ꞌkháa judío̱ ñajúún. Rúꞌkhue̱n ma̱ꞌne rí ma̱xígu̱únꞌ xa̱bo̱ Israél juñúu̱. 12 Xí ga̱jma̱á numuu rí nijñaguu̱n phú mba̱a̱ ni̱gu̱ma-tsakun-rámii xa̱bi̱i numbaa, jamí xí ga̱jma̱á numuu rí ni̱ngra̱ꞌii̱n phú mba̱a̱ nimbáñúú xa̱bo̱ tsí ra̱ꞌkháa judío̱ ñajúún, á ra̱ꞌkhá phú i̱tha̱án mba̱a̱ ma̱gu̱ma-tsakun-rámii xa̱bi̱i numbaa ído̱ rí xa̱bo̱ judío̱ ma̱ꞌne jañii a̱kui̱ín mbu̱júꞌ juyáá Ana̱ꞌlóꞌ rá.

13 Ikháanꞌlaꞌ i̱tha̱nꞌlaꞌ, tsáanꞌ ra̱ꞌkháa xa̱bo̱ judío̱ ñajwanlaꞌ. Numuu rí ikhúúnꞌ ñajunꞌ tsí waxúngua̱a̱ꞌ ná júwa̱ꞌ xa̱bo̱ tsí ra̱ꞌkháa judío̱ ñajúún, ikhaa jngó ikhúúnꞌ nda̱yo̱o̱ rí phú gíꞌdoo numuu ñajun rí na̱ne̱lo̱ꞌ. 14 Á gáꞌne xí ga̱jma̱á numuu ríge̱ꞌ, ma̱ne̱ rí ma̱xígu̱únꞌ xa̱bo̱ xuajñuꞌ, jamí ma̱goo ma̱jáwíi̱n mbá tikhuu̱n. 15 Xí ga̱jma̱á numuu rí ninguanúú janíí xa̱bo̱ Israél, a̱ꞌkhue̱n nimbáxi̱iꞌ Ana̱ꞌlóꞌ ga̱jma̱á nindxu̱ún xa̱bo̱ tsí ra̱ꞌkháa judío̱ ñajúún, dí gáríga̱ ído̱ rí Ana̱ꞌlóꞌ ma̱grui̱gúu̱n xúꞌkhue̱n rá. Tsí júwa̱ꞌ asndo xó rí nijáñúú xúge̱ꞌ, ma̱ju̱wée̱ꞌ jámuu. 16 Xí ñu̱u̱ rí na̱gu̱ma guma ginii kixnáxe̱ ná inuu Ana̱ꞌlóꞌ, mangaa máꞌ kixnáxe̱ ná inuu̱ mbá xúgíí ñu̱u̱. Xí ajmu̱u̱ ixe̱ kixnáxe̱ ná inuu Ana̱ꞌlóꞌ, mangaa máꞌ kixnáxe̱ ná inuu̱ ñawúun ne̱.

17 Gakon máꞌ rí nithon-ri̱ya̱ꞌ mbá tikhu ñawúun ixe̱ olíbo̱ máján, rí ñajúún xa̱bo̱ judío̱. A̱ꞌkhue̱n rí ikháánꞌ tsáánꞌ ra̱ꞌkháa xa̱bo̱ judío̱ ñajwaanꞌ jamí xómá ixe̱ olíbo̱ xáná jaꞌníí, nikhuáꞌáánꞌ ná nithon-ri̱ya̱ꞌ ne̱. Kajngó xúge̱ꞌ rá, ndayá mbiꞌyaaꞌ ga̱jma̱á ski̱yu̱u̱ꞌ ajmu̱u̱ ixe̱ olíbo̱ rí máján. 18 I̱ndo̱ó máꞌ numuu rí ma̱xáju̱ma̱a̱ꞌ lá rí ikháánꞌ phú i̱tha̱án gíꞌdoo numaaꞌ xó rí ñawúun ixe̱ olíbo̱ máján. Xí natakúxe̱-mina̱ꞌ, athayáá lá rí ra̱ꞌkhá ga̱jma̱á numaaꞌ ikháánꞌ ndaꞌya ajmu̱u̱ ixe̱ olíbo̱ rí máján, rí ga̱jma̱á numuu ne̱ ikhaa xtaa nathaya ikháánꞌ.

19 Á gáꞌne xí ma̱ra̱tha̱n: «Nithon-ri̱ya̱ꞌ mbá tikhu ñawúun ne̱ kajngó ma̱khúꞌwúún ikhúúnꞌ ná ixe̱». 20 Gakon máꞌ rí xkuaꞌnii. I̱ndo̱ó máꞌ numuu rí ikhii̱n nithon-ri̱ñii̱ꞌ ga̱jma̱á numuu rí táwe̱je̱ a̱kuíi̱n ná inuu Ana̱ꞌlóꞌ. Xómáꞌ ikháánꞌ, nikhuáꞌáánꞌ ná ixe̱ ga̱jma̱á numuu rí wéje̱ a̱kia̱anꞌ ná inuu Ana̱ꞌlóꞌ. Ikhaa jngó, ma̱xáta̱ku̱xí-mina̱ꞌ, rí xawi lá gátha̱ne̱. 21 Xí Ana̱ꞌlóꞌ táꞌne mba̱a̱ a̱kui̱in jaꞌyoo ñawúun ixe̱ rí phú ikhaa, ma̱xáꞌne mba̱a̱ a̱kuii̱n máꞌ jaꞌyaa̱ꞌ ikháánꞌ mangaa.

22 Atiaxe̱ ma̱tha̱ya̱á rí phú májáan a̱kui̱in Ana̱ꞌlóꞌ, jamí phú mikoo ajngóo̱ mangaa. Phú mikoo ajngóo̱ jaꞌñúu̱ tsí nimbumúú juyáa̱. Xómáꞌ ikháánꞌ rá, phú májáan a̱kuii̱n jaꞌyaa̱ꞌ. I̱ndo̱ó máꞌ numuu rí ndaꞌyóo rí ma̱riajún gúkuáaꞌ. Jamí xí na̱nguá rá, ma̱ro̱thon-ri̱ñáa̱ꞌ mangáánꞌ. 23 Asndo mangii̱n máꞌ ma̱khuáꞌíi̱n mbu̱júꞌ ná ixe̱ olíbo̱, xí numuu rí nanimbúu̱n juyáa̱ Jesús. Numuu rí Ana̱ꞌlóꞌ gíꞌdoo tsiakhe̱ rí masngujmii̱ mbu̱júꞌ ná timii̱ máꞌ nákhí ginii. 24 Xí ikháánꞌ tsáánꞌ ñawúun ixe̱ olíbo̱ xáná ñajwaanꞌ, nithon-ri̱ñáaꞌ jamí ndiyoo nikhuáꞌáánꞌ ná ixe̱ olíbo̱ máján, i̱wa̱á máꞌ ra̱ngíjyúu rí xa̱bo̱ judío̱, tsí ñajúún ñawúun ixe̱ olíbo̱ máján, ma̱khuáꞌíi̱n ná ixe̱ rí phú jaꞌñúu̱.

25 A̱ngui̱nꞌ, nandoꞌ rí ma̱fraꞌa̱ꞌ májánlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, kajngó mu̱xúxu̱xí-mijnálaꞌ. Mbá tikhuun xa̱bo̱ Israél neꞌne gúkú a̱kuíi̱n, jamí xkuaꞌñúu̱ máꞌ gáꞌne asndo gátu̱ꞌu̱ún káxe̱ kíxnuu xa̱bo̱ tsí ra̱ꞌkháa judío̱ ñajúún, tsí wéje̱ máꞌ rí ma̱jáwíin. 26 A̱ꞌkhue̱n rí mbá xúgíin xa̱bo̱ Israél ma̱jáwíin, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Tsí naꞌne-jáwíin xa̱bo̱ ma̱ꞌkha̱ ná Sióón,

jamí ikhaa̱ ma̱ꞌnii̱ janíí aꞌkhúún xa̱bi̱i Jakób.*

27 Ikhaa awan ríge̱ꞌ ma̱ne̱ ga̱jma̱á nindxúu̱n,

ído̱ rí ikhúúnꞌ ma̱ne̱ mba̱a̱ a̱kui̱nꞌ ja̱yo̱o̱ aꞌkhúu̱n».*

28 Tsí xa̱bo̱ Israél túdri̱guíi̱ ajngáa máján ga̱jma̱á numuu Jesús, ga̱jma̱á numuu rúꞌkhue̱n ninindxúu̱n xa̱bo̱ sia̱nꞌ ná inuu Ana̱ꞌlóꞌ, jamí rúꞌkhue̱n nambáyálaꞌ, tsáanꞌ ra̱ꞌkháa xa̱bo̱ judío̱ ñajwanlaꞌ. Xómáꞌ ga̱jma̱á numuu rí wapha máꞌ watraꞌwíin xa̱bo̱ Israél rá, Ana̱ꞌlóꞌ nandoo jaꞌñúu̱ ga̱jma̱á numúú táta̱-xi̱ꞌñúu̱ wajyúú. 29 Numuu rí ma̱xáxóo ma̱thanga̱a a̱kui̱in Ana̱ꞌlóꞌ jaꞌyoo rí nixuda-mina̱ꞌ maxnúú xa̱bi̱i ni máꞌ rí nindxaꞌwúu̱n rí ma̱nindxúu̱n. 30 Xúꞌkhue̱n máꞌ mangáanꞌlaꞌ nákhí wajyúú, túne̱-mbáníílaꞌ rí naꞌthán Ana̱ꞌlóꞌ. Xómáꞌ xúge̱ꞌ rá, rí xa̱bo̱ Israél tsíne̱-mbáníí rí naꞌthán Ana̱ꞌlóꞌ, niñáwíin a̱kui̱in Ana̱ꞌlóꞌ jaꞌyalaꞌ ikháanꞌlaꞌ. 31 Xkuaꞌnii máꞌ tsíge̱ꞌ mangiin, maske máꞌ xúge̱ꞌ najñaguu̱n, ma̱ñáwíin a̱kui̱in Ana̱ꞌlóꞌ jaꞌñúu̱, xómá rí niñáwíin a̱kui̱in Ana̱ꞌlóꞌ jaꞌyalaꞌ ikháanꞌlaꞌ. 32 Numuu rí Ana̱ꞌlóꞌ neꞌne rí mbá xúgíin xa̱bo̱ ma̱jñaguun, kajngó ma̱ñáwíin a̱kuii̱n jaꞌñúu̱ mbá xúgíin.

33 ¡Maphú mba̱a̱ mi̱ndaꞌkho rí na̱ma̱ñuu jamí rí ndaꞌyoo Ana̱ꞌlóꞌ! Asndo nimbáa ma̱xáxóo maꞌthán-makoo rí na̱ma̱ñuu̱, ni máꞌ ma̱xáxóo ma̱froꞌo̱o̱ náá ndayée̱ idxu̱u̱ ga̱jma̱á numuu rí naꞌnii̱. 34 Á xtáa mbáa tsí ndaꞌyoo rí nandxaꞌwá-mina̱ꞌ Táta̱ rá, o xtáa mbáa tsí niꞌthán-múꞌúu̱n dxe̱ꞌ. 35 Tsáa ginii nixnátíꞌñuu Ana̱ꞌlóꞌ, kajngó jaꞌyoo ma̱gu̱ma-numa̱a gáꞌne Ana̱ꞌlóꞌ róꞌ. 36 Numuu rí Ana̱ꞌlóꞌ neꞌne-ku̱maa mbá xúgíí rí ríga̱. Ga̱jma̱á majñu̱u̱ ikhaa̱ ríga̱ ne̱, jamí drígo̱o̱ máꞌ ikhaa̱ ñajuun ne̱ mbá xúgíí. ¡A̱gu̱ma-mba̱a̱ Ana̱ꞌlóꞌ jámuu mbiꞌi! Xkuaꞌnii gáꞌne.