1 Gu̱drígúunlaꞌ tsí na̱nguá wéje̱-gúkúu a̱kui̱ín ná inuu Ana̱ꞌlóꞌ, i̱ndo̱ó máꞌ numuu rí ra̱ꞌkháa rí ma̱tsa̱ña̱ꞌlaꞌ gajmiálaꞌ ga̱jma̱á numuu rí kriꞌkhu rí na̱ju̱múu̱. 2 Numuu rí mbá tikhuun na̱ju̱mu̱ú rí ma̱goo mu̱pho̱ mbá xúgíí inii ganitsu. Xómáꞌ i̱ꞌwíin, tsí na̱nguá wéje̱-gúkúu a̱kui̱ín ná inuu Ana̱ꞌlóꞌ, i̱ndo̱ó máꞌ ya̱ꞌwo̱ iꞌphi̱i̱. 3 Tsí naꞌkho̱ mbá xúgíí inii ganitsu, ma̱xáꞌthée̱n rí ra̱gíꞌdoo numuu tsí tsíꞌkho̱ mbá xúgíí inii ganitsu. Xúꞌkhue̱n máꞌ tsí tsíꞌkho̱ mbá xúgíí inii ganitsu, ma̱xáꞌthée̱n rí ra̱gíꞌdoo numuu tsí naꞌkho̱ mbá xúgíí inii ganitsu, numuu rí Ana̱ꞌlóꞌ ni̱grui̱guíi̱ mangaa̱. 4 Tsáa ñajwaanꞌ ikháánꞌ kajngó ma̱ra̱tha̱n rí ra̱máján eꞌne yumbée xa̱bo̱ róꞌ. Á máján o ra̱máján iꞌnii̱, xa̱bo̱ tsí gíꞌdaa yumbée jaꞌyoo rí maꞌthán rúꞌkhue̱n. I̱ndo̱ó máꞌ numuu rí ma̱ga̱jnúu̱ mújúu̱n máꞌ, numuu rí Táta̱ tsí naꞌthán-ñájun gíꞌdoo tsiakhe̱ ma̱ꞌne rí ma̱ga̱jnúu̱ mújúu̱n.

5 Mbá tikhuun na̱ju̱mu̱ú rí i̱tha̱án gíꞌdoo numuu mbá tikhu mbiꞌi, xómáꞌ i̱ꞌwíin na̱ju̱mu̱ú rí mbéꞌtháán mbá xúgíí mbiꞌi. Mbámbáa gáwe̱je̱ gúkúu ga̱jma̱á rí na̱ju̱mu̱u̱. 6 Tsí na̱ju̱mu̱u̱ rí mbá tikhu mbiꞌi i̱wa̱á gíꞌdoo numuu, Táta̱ máꞌ eꞌne-mba̱a̱. Jamí tsí na̱ju̱mu̱u̱ rí mbéꞌtháán mbá xúgíí mbiꞌi rá, Táta̱ máꞌ eꞌne-mba̱a̱ mangaa̱. Xúꞌkhue̱n máꞌ tsí naꞌkho̱ mbá xúgíí inii ganitsu, Táta̱ máꞌ eꞌne-mba̱a̱, numuu rí naríguu̱ gamaku inuu Ana̱ꞌlóꞌ. Xkuaꞌnii máꞌ tsí tsíꞌkho̱ mbá xúgíí inii ganitsu mangaa, Táta̱ máꞌ eꞌne-mba̱a̱, jamí naríguu̱ gamaku inuu Ana̱ꞌlóꞌ mangaa̱.

7 Numuu rí nimbáa máꞌ tsí ikháánꞌlóꞌ na̱nguá xtáa i̱ndo̱ó máꞌ ga̱jma̱á numuu ikhaa, ni máꞌ tsíjáñuu i̱ndo̱ó máꞌ ga̱jma̱á numuu ikhaa. 8 Xí nduꞌyalóꞌ, juwalóꞌ ga̱jma̱á numuu Táta̱. Jamí xí nijáñalóꞌ, nijáñalóꞌ ga̱jma̱á numuu máꞌ Táta̱. Ikhaa jngó, xí nduꞌyalóꞌ o nijáñalóꞌ mbo̱ꞌ, xa̱bi̱i máꞌ Táta̱ ñajwanlóꞌ. 9 Ikhaa máꞌ numuu rúꞌkhue̱n nijáñuu jamí ndiyáa mbiꞌyuu Krísto̱, kajngó ma̱nindxu̱u̱ Táta̱ tsí naꞌthán-ñájúún tsí nduya jamí tsí nijáñúú.

10 Xómáꞌ ikháánꞌ, náá numuu kajngó narathán numuu dxájwaaꞌ róꞌ. Náá numuu kajngó na̱ju̱ma̱a̱ꞌ rí ra̱gíꞌdoo numuu dxájwaaꞌ róꞌ. Numuu rí xúgiáanꞌlóꞌ mu̱xna̱xí-mijnálóꞌ ná inuu Krísto̱,* kajngó ma̱ra̱jwe̱e̱ꞌ numalóꞌ. 11 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Xáꞌnii iꞌthán Táta̱: Na̱xu̱ꞌdá-mina̱ꞌ ga̱jma̱á numuꞌ máꞌ ikhúúnꞌ,

rí jámba̱a̱ xa̱bo̱ masmáti̱go̱o̱ ná inuꞌ,

jamí mbá xúgíin xa̱bo̱ tsí júwa̱ꞌ ná numbaa mune̱-mbu̱únꞌ ikhúúnꞌ».*

12 Ikhaa jngó, mbámbáa tsí ikháánꞌlóꞌ maꞌthán ná inuu Ana̱ꞌlóꞌ ga̱jma̱á numuu rí neꞌne.

13 Ikhaa numuu rúꞌkhue̱n, gu̱ni̱ꞌñáálóꞌ rí nuꞌthán numa-mijnálóꞌ. A̱ꞌkhue̱n gakon, gu̱ꞌgí-mijnálaꞌ rí mu̱xúne̱laꞌ rí ma̱ꞌne wabaa o ma̱ꞌne a̱jma̱ a̱kui̱in nimbáa dxájwalóꞌ. 14 Ikhúúnꞌ nanimbo̱ꞌ ja̱yo̱o̱ Táta̱ Jesús, jamí nda̱yo̱o̱ mújúnꞌ rí nda̱a̱ nimbá ganitsu rí tsúꞌkhaa mu̱ꞌpholóꞌ. Xómáꞌ tsí na̱ju̱mu̱u̱ rí mbá tikhu ganitsu tsúꞌkhaa rí mu̱ꞌpholóꞌ rá, tsúꞌkhaa ne̱ iꞌyoo̱ ikhaa̱. 15 Xí ga̱jma̱á numuu rí natso, nathane̱ rí ma̱ꞌne-ngíná a̱kui̱in dxájwaaꞌ, na̱nguá máꞌ itasngájma rí nandaaꞌ xtayáa̱ xúꞌkhue̱n rá. Ma̱xátha̱ne̱ rí ga̱jma̱á numuu rí natso, ma̱ndáti̱ga̱a̱ tsí nijáñuu Krísto̱ ga̱jma̱á numuu. 16 Mu̱xúne̱laꞌ rí muthan xkawe̱ꞌ xa̱bo̱ ga̱jma̱á numuu rí máján rí nandoo nu̱ne̱laꞌ ikháanꞌlaꞌ. 17 Numuu rí napholóꞌ o rí nawanlóꞌ mbo̱ꞌ, tsísngájma rúꞌkhue̱n xí Ana̱ꞌlóꞌ ñajuun tsí naꞌthán-ñájwanlóꞌ. Rí phú i̱tha̱án gíꞌdoo numuu ñajuun rí mu̱ꞌne̱lóꞌ rí máján, rí ma̱juwalóꞌ tsímáá jamí gagi ga̱jma̱á majñu̱u̱ Xu̱u̱ꞌ Ana̱ꞌlóꞌ. 18 Tsí xkuaꞌnii nayumbáá inuu Krísto̱, tsúꞌkhue̱n tsí na̱ni̱gu̱u̱ꞌ Ana̱ꞌlóꞌ jaꞌyoo, xúꞌkhue̱n máꞌ nuthan rí máján xa̱bo̱ ga̱jma̱á numuu̱.

19 Ikhaa jngó, gu̱ꞌxná-mijnálóꞌ tsiakhe̱ rí mu̱ꞌne̱lóꞌ rí nambáyúu rí ma̱juwalóꞌ tsímáá, jamí rí ma̱gajáanꞌlóꞌ mbá xúgiáanꞌlóꞌ. 20 Ma̱xátha̱ne̱ gámba̱a̱ꞌ ñajun rí naꞌne Ana̱ꞌlóꞌ ga̱jma̱á numuu rí natso. Gakon máꞌ rí mbá xúgíí inii ganitsu ma̱goo mu̱ꞌpholóꞌ. I̱ndo̱ó máꞌ numuu rí ra̱máján rí ma̱ꞌne-ngíná a̱kui̱ín i̱ꞌwíin a̱ngia̱nꞌlóꞌ ga̱jma̱á numuu rí napholóꞌ. 21 I̱wa̱á máꞌ máján rí mu̱xúꞌpholóꞌ xuwi, ni máꞌ mu̱xúꞌwa̱a̱nlóꞌ iyoo úba̱ rí ni̱ga̱yu̱u̱ꞌ, ni máꞌ mu̱xúꞌne̱lóꞌ nimbá rí ma̱ꞌne-ngra̱ꞌaa o ma̱ꞌne-ngíná a̱kui̱in o ma̱ꞌne wabaa* dxájwalóꞌ gáꞌne. 22 Rí nathayáá májáanꞌ máꞌ rí ma̱goo ma̱tha̱ne̱, ga̱nindxu̱u̱ ne̱ mbá rí nathayáá i̱ndo̱ó máꞌ ikháánꞌ ga̱jma̱á nindxu̱u̱ Ana̱ꞌlóꞌ. Phú gagi xtáa tsí ndaꞌyoo mújúun máꞌ rí na̱nguá eꞌne aꞌkhán ga̱jma̱á majñu̱u̱ rí naꞌne. 23 Xómáꞌ tsí a̱jma̱ a̱kui̱in jaꞌyoo rí naꞌkho̱ rá, naxuda-mine̱e̱ꞌ aꞌkhán, numuu na̱ju̱mu̱u̱ rí ma̱xáxóo mi̱khui̱i̱ ne̱. Mbá xúgíí rí naꞌne xa̱bo̱ ga̱jma̱á a̱jma̱ a̱kui̱in, aꞌkhán ñajuun ne̱.