1 Ikhaa jngó, ikháánꞌlóꞌ tsáanꞌ wéje̱-gúkúu a̱kia̱nꞌlóꞌ ná inuu Ana̱ꞌlóꞌ, jaꞌyalóꞌ rí mu̱mbáñúúlóꞌ tsí wabiin, ra̱ꞌkhá máꞌ i̱ndo̱ó mu̱ꞌne̱lóꞌ rí na̱ni̱gua̱ꞌlóꞌ ikháánꞌlóꞌ. 2 Mbámbáa tsí ikháánꞌlóꞌ jaꞌyoo ma̱ꞌne rí na̱ni̱gu̱u̱ꞌ dxájuu, kajngó ma̱ꞌga-ragaja̱a̱ awúun rí máján. 3 Numuu rí asndo ni máꞌ Krísto̱ táꞌnii̱ rí na̱ni̱gu̱u̱ꞌ ikhaa̱, ikhaa jngó ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ído̱ rí nuthan-xkawia̱a̱ꞌ xa̱bo̱, asndo ikhúúnꞌ máꞌ nuthan-xkawi̱ꞌ».* 4 Mbá xúgíí rí waꞌtháán wajyúú, waꞌtháán ne̱ kajngó maꞌsngálóꞌ ne̱. Ikhaa jngó ga̱jma̱á majñu̱u̱ i̱yi̱i̱ꞌ ajngóo Ana̱ꞌlóꞌ ma̱ꞌne mba̱a̱ a̱kia̱nꞌlóꞌ jamí mu̱drígúlóꞌ tsiakhe̱, xkuaꞌnii kajngó ma̱mba̱núu rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ.

5 Ana̱ꞌlóꞌ tsí naꞌne rí ma̱ꞌngo̱o̱ a̱kia̱nꞌlóꞌ jamí naxnálóꞌ tsiakhe̱ gáꞌne rí mu̱wa̱a ju̱ma̱ꞌlaꞌ, xómá rí nandoo Krísto̱ Jesús. 6 Kajngó mbá xúgiáanꞌlaꞌ, mbóó a̱ꞌwálaꞌ gúne̱-mba̱a̱laꞌ Ana̱ꞌlóꞌ, tsí ñajuun Anu̱u̱ Tátiálóꞌ Jesukrísto̱.

7 Ikhaa numuu rúꞌkhue̱n, gu̱drígú-mijná májánlaꞌ xómá rí Krísto̱ ni̱grui̱guáanꞌlóꞌ, kajngó ma̱gu̱ma-mba̱a̱ Ana̱ꞌlóꞌ. 8 Numuu rí ikhúúnꞌ na̱tha̱nꞌlaꞌ rí Krísto̱ ni̱ꞌkha̱ gáꞌne-mba̱ꞌwu̱un xa̱bo̱ judío̱, kajngó ma̱ꞌne-mbánuu̱ rí nixuda-mina̱ꞌ Ana̱ꞌlóꞌ ga̱jma̱á nindxu̱ún táta̱-xi̱ꞌñáxo̱ꞌ wajyúú, jamí xkuaꞌnii nisngájmee̱ rí kuwiin Ana̱ꞌlóꞌ. 9 Xúꞌkhue̱n máꞌ mangaa, Krísto̱ ni̱ꞌkha̱ kajngó xa̱bo̱ tsí ra̱ꞌkháa judío̱ ñajúún mune̱-mba̱a̱ Ana̱ꞌlóꞌ ga̱jma̱á numuu rí nañáwíin a̱kuii̱n jaꞌñúu̱. Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ikhaa numuu rúꞌkhue̱n ma̱ne̱-mba̱ánꞌ ná majñu̱ú xa̱bo̱ tsí ra̱ꞌkháa judío̱ ñajúún,

jamí ma̱ne̱ ajmúú ga̱jma̱á numaaꞌ ikháánꞌ».*

10 Mangaa máꞌ ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ga̱ꞌdxu a̱kia̱nꞌlaꞌ, xa̱bo̱ tsí ra̱ꞌkháa judío̱ ñajwanlaꞌ,

ga̱jma̱á nindxu̱ún xa̱bi̱i Ana̱ꞌlóꞌ».*

11 Jamí i̱mba̱ janíí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Gu̱ne̱-mba̱a̱laꞌ Táta̱, mbá xúgiáanꞌlaꞌ xa̱bo̱ tsí ra̱ꞌkháa judío̱ ñajwanlaꞌ,

jamí mbá xúgiáanꞌlaꞌ gu̱tha̱nlaꞌ rí máján naꞌnii̱».*

12 Xúꞌkhue̱n máꞌ iꞌthán Isaía̱s mangaa:

«Ma̱gu̱maa mbáa a̱ꞌdá-ri̱jyu̱u̱ꞌ Isaí,

tsí ma̱ge̱ꞌe̱ maꞌthán-ñájuun mbá xúgíí xuajen numbaa.

Ná inuu̱ ikhaa̱ mu̱waꞌthi̱ín mbá xúgíin xa̱bo̱ tsí ra̱ꞌkháa judío̱ ñajúún».*

13 Ana̱ꞌlóꞌ tsí mbá jañii a̱kia̱nꞌlóꞌ guáꞌthi̱ínlóꞌ inuu gáꞌne rí ma̱juwalaꞌ gagi mi̱ndaꞌkho jamí tsímáá, awúun máꞌ rí nanimba̱ꞌlaꞌ ju̱yáa̱. Xkuaꞌnii kajngó asndo ma̱ga̱dí-rígúu rí ga̱jma̱á mbá jañii a̱kia̱nꞌlaꞌ guáꞌthi̱ínlaꞌ ga̱jma̱á majñu̱u̱ ski̱yu̱u̱ꞌ Xu̱u̱ꞌ Ana̱ꞌlóꞌ.

14 A̱ngui̱nꞌ, ikhúúnꞌ nda̱yo̱o̱ mújúnꞌ rí ikháanꞌlaꞌ phú májáan a̱kia̱nꞌlaꞌ, jamí phú na̱ma̱ñalaꞌ máꞌ, kajngó ma̱goo máꞌ mu̱tha̱n-máꞌán-mijnálaꞌ ikháanꞌlaꞌ. 15 Maske máꞌ xkuaꞌnii rá, a̱ngui̱nꞌ, ni̱ꞌngo̱o̱ a̱kui̱nꞌ ni̱tháán mu̱raxnuulaꞌ mbá tikhu rí na̱ma̱ñalaꞌ máꞌ, kajngó ma̱xámbumalaꞌ ne̱. Na̱ne̱ ríge̱ꞌ ga̱jma̱á numuu ñajun rí nixnángaweꞌ Ana̱ꞌlóꞌ rí ma̱ne̱, 16 rí ma̱nindxu̱ꞌ yumbée Jesukrísto̱ ná majñu̱ú xa̱bo̱ tsí ra̱ꞌkháa judío̱ ñajúún. Wéje̱ inuꞌ rí ma̱tha̱n-rúꞌúu̱n ajngáa máján drígo̱o̱ Ana̱ꞌlóꞌ, kajngó ikhii̱n ma̱nindxúu̱n xó mbá tsi̱gi̱jña̱ꞌ rí ndaa thawuun, tsí ñajúún i̱ndo̱ó máꞌ xa̱bi̱i Ana̱ꞌlóꞌ eꞌne Xu̱u̱ꞌ máꞌ ikhaa̱.

17 Ikhaa jngó, ríga̱ numuu rí ma̱ꞌdxu a̱kui̱nꞌ ga̱jma̱á numuu ñajun rí na̱ne̱ ná inuu Ana̱ꞌlóꞌ, numuu rí Krísto̱ Jesús xtáa ga̱jma̱á nindxu̱ꞌ. 18 Jamí tsíyoꞌ máꞌ gátha̱nꞌlaꞌ rí na̱ne̱ ikhúúnꞌ, rí nandoꞌ ma̱tha̱nꞌlaꞌ rí naꞌne Krísto̱ ga̱jma̱á majñu̱ꞌ ikhúúnꞌ, kajngó xa̱bo̱ tsí ra̱ꞌkháa judío̱ ñajúún ma̱nimbúu̱n juyáa̱ Ana̱ꞌlóꞌ. Ikhii̱n ninimbúu̱n ga̱jma̱á majñu̱u̱ ajngáa rí ni̱thúu̱n jamí ga̱jma̱á majñu̱u̱ ñajun rí na̱ne̱lo̱ꞌ, 19 ga̱jma̱á ski̱yu̱u̱ꞌ rí phú wáá jamí rí ma̱makualóꞌ, rí naꞌne ski̱yu̱u̱ꞌ Xu̱u̱ꞌ Ana̱ꞌlóꞌ. Xkuaꞌnii kajngó wámbo̱ꞌ ni̱tha̱n-ráꞌalo̱ꞌ ajngáa máján ga̱jma̱á numuu Krísto̱ asndo ná Jerusalén, jamí asndo mbá xúgíí xuajen rí triga̱ asndo ná numbaa Ilíri̱ko̱. 20 Jámba̱ mbiꞌi ni̱ꞌgí-mina̱ꞌ rí ma̱tha̱n-ráꞌa ajngáa máján ga̱jma̱á numuu Krísto̱ ná xuajen rí xóó tsígu̱ma-nuwii̱n, xkuaꞌnii kajngó ma̱xáne̱-ra̱múꞌ ná tsu̱du̱u̱ rí niꞌgí máꞌ i̱mba̱a̱ꞌ. 21 Ne̱ne̱ xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ikhiin tsí ni miꞌtsú táwaꞌthúún ga̱jma̱á numuu̱, mbuyáa̱.

Jamí ikhiin tsí túdxawíín ga̱jma̱á numuu̱, ma̱fruꞌúu̱n». *

22 Ikhaa numuu rúꞌkhue̱n, xóó máꞌ táyaphúún rí ma̱ꞌgá gáya̱ꞌlaꞌ. 23 I̱ndo̱ó máꞌ numuu rí xúge̱ꞌ rá, wámbo̱ꞌ máꞌ ni̱tha̱n-ráꞌalo̱ꞌ ná numbaa ríge̱ꞌ, jamí phú wajyúú máꞌ ni̱ꞌgí-mina̱ꞌ rí ma̱ꞌgá gáya̱ꞌlaꞌ, 24 ikhaa jngó ma̱ꞌgá gáya̱ꞌlaꞌ ído̱ gáꞌgálo̱ꞌ ná numbaa Espáña̱, jamí ma̱xtáá gagi mbá wátha̱ wáa mbiꞌi ga̱jma̱á nindxa̱ꞌlaꞌ. Wámba̱ rúꞌkhue̱n, nandoꞌ rí ikháanꞌlaꞌ mu̱mbáyúꞌlaꞌ rí ma̱gíꞌma̱alo̱ꞌ jamba̱a̱.

25 Rí xúge̱ꞌ rá, inu xtáá naka ja̱yo̱ꞌ ná Jerusalén rí mambáñúú a̱ngia̱nꞌlóꞌ tsí júwa̱ꞌ ikhín. 26 Numuu rí a̱ngia̱nꞌlóꞌ tsí júwa̱ꞌ ná numbaa Masedónia̱ jamí Akáya̱, nigájnuu ná awúun a̱kuíi̱n rí mu̱ru̱waa̱ tháan mbúkha̱a̱, kajngó mu̱xu̱ꞌmee̱ ne̱ mambáñúú a̱ngia̱nꞌlóꞌ tsí ngíníi júwa̱ꞌ ná Jerusalén. 27 Ikhii̱n ni̱ju̱múu̱ rí máján rí muni̱i̱ ríge̱ꞌ, jamí gakon máꞌ rí gíꞌmii̱ muni̱i̱ xkuaꞌnii mangaa. Numuu rí xa̱bo̱ judío̱ nixnee̱ rí mambáyúu ními̱í xa̱bo̱ tsí ra̱ꞌkháa judío̱ ñajúún, xkuaꞌnii máꞌ gíꞌmii̱ mangii̱n rí mu̱xpi̱ꞌtha̱a̱ rí guáꞌdáa̱ kajngó mambáyúu xuñúú xa̱bo̱ judío̱. 28 Ikhaa jngó, ído̱ gáne̱-mbánuu ñajun ríge̱ꞌ, jamí wámbo̱ꞌ ni̱xna̱xí mbúkha̱a̱ ríge̱ꞌ, a̱ꞌkhue̱n rí ma̱ga̱jnúꞌ ma̱ꞌgá Espáña̱ jamí ma̱nújngoꞌ gáya̱ꞌlaꞌ. 29 Nda̱yo̱o̱ mújúnꞌ máꞌ rí ído̱ ma̱gánú a̱ꞌkhue̱n, gúꞌdo̱ꞌ guéño rí ma̱tha̱nꞌlaꞌ ga̱jma̱á numuu rí naꞌne-tsakun-rámáaꞌlóꞌ ajngáa máján drígo̱o̱* Krísto̱.

30 A̱ngui̱nꞌ, ga̱jma̱á numuu Tátiálóꞌ Jesukrísto̱ jamí ga̱jma̱á máꞌ numuu rí Xu̱u̱ꞌ Ana̱ꞌlóꞌ naꞌne rí nandalaꞌ ju̱yo̱ꞌ, na̱nda̱ꞌa̱ꞌlaꞌ mu̱mbáyúꞌlaꞌ rí mu̱tha̱n-jáñíílaꞌ Ana̱ꞌlóꞌ ga̱jma̱á numuꞌ. 31 Gu̱nda̱ꞌa̱laꞌ rí ma̱jríñu̱úꞌ ná ñawúún tsí tsínimbu̱únꞌ juyáá Jesús ná numbaa Judéa̱, jamí rí ma̱ni̱gu̱únꞌ a̱ngia̱nꞌlóꞌ tsí júwa̱ꞌ ná Jerusalén rí mu̱dríguíi̱ mbúkha̱a̱ rí naka ja̱yo̱ꞌ mambáñúu̱. 32 Ikhaa jngó, xí Ana̱ꞌlóꞌ nandoo, gagi a̱kui̱nꞌ ma̱gánú ná juwalaꞌ a̱ꞌkhue̱n, jamí ma̱goo mba̱ya̱a xu̱ꞌ ga̱jma̱á nindxa̱ꞌlaꞌ. 33 Ana̱ꞌlóꞌ, tsí naꞌne rí ma̱juwalóꞌ tsímáá, gáxtáa ga̱jma̱á nindxa̱ꞌlaꞌ mbá xúgiáanꞌlaꞌ. Xkuaꞌnii gáꞌne.