1 A̱ngui̱nꞌ, xí ndi̱ya̱álaꞌ rí mbáa ni̱rákaa ná aꞌkhán, tsáanꞌ juwalaꞌ xómá rí nandoo Xu̱u̱ꞌ Ana̱ꞌlóꞌ, gu̱mbáyíi̱laꞌ kajngó ma̱ꞌkhaa̱ ná inuu Jesús. I̱ndo̱ó máꞌ numuu rí gu̱xrígú-mijnálaꞌ ído̱ rí nu̱mbáyíi̱laꞌ, jamí gu̱ña̱wa̱n-míjná máꞌ ikháanꞌlaꞌ, ra̱ꞌkhá ma̱rákáanꞌlaꞌ mangáanꞌlaꞌ gáꞌne. 2 Gu̱mbáyú-mijnálaꞌ ído̱ rí guáꞌdáálaꞌ gaꞌkho̱ rí phú gakhe̱, numuu rí xkuaꞌnii mu̱ne̱-mbáníílaꞌ rí niꞌsngáá Krísto̱. 3 Xí mbáa na̱ju̱mu̱u̱ rí phú gíꞌdoo numuu, jamí nda̱a̱ nitháan rí ñajuu̱n, naꞌne-nduwa-mine̱e̱ꞌ máꞌ ikhaa̱. 4 Mbámbáa gáyaxu̱u̱ mújúun rí naꞌne, jamí xí ríga̱ rí ma̱goo ma̱kúxe̱-mine̱e̱ꞌ ga̱jma̱á, gakúxe̱-mine̱e̱ꞌ máꞌ ná inuu̱ ikhaa̱, jamí ma̱xágiéwan-mine̱e̱ꞌ ga̱jma̱á rí nune̱ i̱ꞌwíin. 5 Numuu rí mbámbáa jaꞌyoo mariꞌña ná inuu Ana̱ꞌlóꞌ ga̱jma̱á numuu rí neꞌne.

6 Tsí nisngáá ajngáa rawuun Ana̱ꞌlóꞌ, gíꞌmaa̱ rí maxnúu̱ tháan tsí nisngáa̱ eꞌne mbá xúgíí inii rí máján gíꞌdoo̱.

7 Mu̱xúne̱-nduwa-mijnálaꞌ: ma̱xáju̱ma̱ꞌlaꞌ rí ma̱goo mu̱tsi̱jmáalaꞌ tsí Ana̱ꞌlóꞌ. Mbá xúgíí máꞌ rí naꞌdu xa̱bo̱, ikhaa máꞌ rúꞌkhue̱n ñajuun rí maguu̱. 8 Numuu rí xa̱bo̱ tsí naꞌne máꞌ xúꞌkhue̱n rí nandoo xuyuu, ikhaa máꞌ rúꞌkhue̱n ma̱ꞌne rí ma̱ja̱ñúu̱. Xómáꞌ tsí naꞌne máꞌ xúꞌkhue̱n rí nandoo Xu̱u̱ꞌ Ana̱ꞌlóꞌ rá, Xu̱u̱ꞌ Ana̱ꞌlóꞌ ma̱ꞌne rí ma̱xtáa̱ jámuu. 9 Ma̱xáꞌne níꞌnga̱ꞌlóꞌ rí mu̱ꞌne̱lóꞌ rí máján. Numuu rí ído̱ ága̱nú mbiꞌi, mbu̱ꞌyáálóꞌ rí máján, xí tsíꞌne níꞌnga̱ꞌlóꞌ. 10 Ikhaa jngó, jámba̱ miꞌtsú rí ma̱goo mu̱ꞌne̱lóꞌ, gu̱ꞌñu̱úlóꞌ rí máján mbá xúgíin xa̱bo̱, jamí i̱tha̱án máꞌ gu̱ꞌñu̱úlóꞌ rí máján a̱ngia̱nꞌlóꞌ tsí nanimba̱ꞌ gajmiálóꞌ juꞌyáá Jesús.

11 Jmínu̱úꞌ ikhúúnꞌ na̱tháán ríge̱ꞌ, jamí gu̱ya̱xe̱laꞌ rí phú mba̱ꞌwo̱ tsina e̱ne̱lo̱ꞌ ga̱jma̱á ñawúnꞌ.

12 Tsí nandúún gúne̱ ski̱ya̱ꞌlaꞌ rí mbu̱ya̱laꞌ tsina jndi, i̱ndo̱ó máꞌ nuni̱i̱ rúꞌkhue̱n numuu rí nandúu̱n rí mi̱ꞌtiamakúu̱n gúne̱ xa̱bo̱. Tsíñúu̱ rí ma̱gu̱ma-ngíníi̱ gúne̱ xa̱bo̱ ga̱jma̱á numuu Krísto̱, tsí nijáñuu ná ixe̱ krúsi̱. 13 Numuu rí ni máꞌ ikhii̱n, tsí juya̱ tsina jndi, na̱nguá ene̱-mbáníi̱ rí naꞌthán xtángoo. Xómáꞌ ikhii̱n nandúu̱n rí ikháanꞌlaꞌ mbu̱ya̱laꞌ tsina jndi, kajngó ma̱goo mune̱-tsiꞌyée̱ rí ni̱ꞌngúu̱n nene̱-rájáanꞌlaꞌ rí mbu̱ya̱laꞌ tsina rúꞌkhue̱n ná xuyalaꞌ. 14 Xómáꞌ ikhúúnꞌ rá, tsíyoꞌ gáne̱-tsiꞌyá ga̱jma̱á numuu i̱mba̱, rí i̱ndo̱ó máꞌ ga̱jma̱á numuu rí nijáñuu Tátiálóꞌ Jesukrísto̱ ná ixe̱ krúsi̱. Numuu rí ga̱jma̱á numuu Krísto̱, nijáñuu máꞌ numbaa ná inuꞌ ikhúúnꞌ, jamí ikhúúnꞌ nijáñuꞌ máꞌ ná inuu numbaa. 15 Numuu rí ná inuu Krísto̱ Jesús,* tsíꞌyoo máꞌ xí juꞌyálóꞌ tsina jndi o na̱nguá mbo̱ꞌ. Rí phú i̱tha̱án gíꞌdoo numuu ñajuun rí ni̱gu̱máaꞌlóꞌ nuxe̱ꞌ. 16 Ana̱ꞌlóꞌ gáꞌne rí ma̱ju̱wá tsímáá mbá xúgíin tsí nune̱-mbáníí awan ríge̱ꞌ, jamí ga̱ñáwíin a̱kui̱in Ana̱ꞌlóꞌ jaꞌñúu̱. Ikhii̱n ñajúu̱n xa̱bo̱ Israél tsí gakon rí xa̱bi̱i Ana̱ꞌlóꞌ ñajúún.

17 Rí xúge̱ꞌ rá, níyoꞌ rí ma̱ꞌñiꞌ xkujndu asndo nimbáa xa̱bo̱, numuu rí ikhúúnꞌ ja̱go̱ ná xuyuꞌ tsínu̱u̱ꞌ rí nijámbi̱yu̱ꞌ ga̱jma̱á numuu Táta̱ Jesús.

18 A̱ngui̱nꞌ, Tátiálóꞌ Jesukrísto̱ gáꞌne-tsakun-rámaa mbámbáa tsí ikháanꞌlaꞌ. Xkuaꞌnii gáꞌne.