1 Ma̱tha̱nꞌlaꞌ i̱mba̱ xkri̱da: Ído̱ rí lájwíin xóó ada̱ tsí ma̱grui̱gúu rí gíꞌdoo tátée, mbéꞌtháa̱n máꞌ ga̱jmáa̱ yumbáá waꞌtsi̱i̱ tsí nañajun ná guꞌwóo̱, maske máꞌ ñawúu̱n ikhaa̱ ríga̱ mbá xúgíí. 2 Numuu ído̱ rí xóó lájwíi̱n, nithán-ñájwíi̱n ene̱ tsí nusngáa̱ jamí tsí nu̱ña̱wáa̱n asndo mbiꞌi rí maꞌthán tátée̱. 3 Xkuaꞌnii máꞌ mangáanꞌlóꞌ, nákhí rí ninindxa̱ꞌlóꞌ xómá jaꞌñúú e̱je̱n, waꞌxná-ñájwanlóꞌ neꞌne tsiakhe̱ rí ríga̱ ná tsu̱du̱u̱ numbaa ríge̱ꞌ. 4 Jamí ído̱ ni̱ga̱nú mbiꞌi rí niꞌgí Ana̱ꞌlóꞌ rá, a̱ꞌkhue̱n nixuꞌmaa̱ A̱dée̱ ná numbaa ríge̱ꞌ. Ni̱gu̱maa̱ neꞌne mbáa a̱ꞌgo̱, jamí nixtáa̱ xómá rí naꞌthán xtángoo. 5 Ikhaa jngó, ndiyoo neꞌtse̱-ri̱ñáaꞌlóꞌ tsáanꞌ nijuwa-ru̱ꞌne̱-mbáníílóꞌ xtángoo, kajngó maguáanꞌlóꞌ Ana̱ꞌlóꞌ rí ma̱nindxa̱ꞌlóꞌ i̱jii̱n. 6 Rí xúge̱ꞌ rá, i̱ji̱in Ana̱ꞌlóꞌ ñajwanlóꞌ, jamí ikhaa̱ nixuꞌmaa̱ Xu̱u̱ꞌ A̱dée̱ rí ma̱xtáa ná awúun a̱kia̱nꞌlóꞌ. Xe̱ꞌ tsúꞌkhue̱n naꞌne rí mu̱ꞌtháánlóꞌ Ana̱ꞌlóꞌ: «¡Táa, ikháánꞌ ñajwaanꞌ Ana̱ꞌxo̱ꞌ!». 7 Ikhaa jngó, nákha máꞌ yumbáá tsí waꞌtsi̱in ñajwanlaꞌ rí xúge̱ꞌ rá, rí i̱ji̱in Ana̱ꞌlóꞌ ñajwanlaꞌ, jamí mangaa máꞌ tsí mu̱drígúu rí gíꞌdoo Ana̱ꞌlóꞌ ñajwanlaꞌ ga̱jma̱á majñu̱u̱ Krísto̱.*

8 Nákhí wajyúú rí xóó tsíne̱-nuwiinlaꞌ Ana̱ꞌlóꞌ, ninindxa̱ꞌlaꞌ xómá yumbáá waꞌtsi̱in drígu̱ún tsí ra̱ꞌkháa Ana̱ꞌlóꞌ ñajúún. 9 Xómáꞌ xúge̱ꞌ rá, nu̱ne̱-nuwiinlaꞌ máꞌ Ana̱ꞌlóꞌ, o i̱tha̱án máján mu̱ꞌthánlóꞌ rí ikhaa̱ naꞌne-nuwáa̱nꞌlaꞌ. Náá numuu kajngó nathangáanꞌlaꞌ mbu̱júꞌ ná inuu tsiakhe̱ rí tsíjmaa jamí nda̱a̱ mbá jayu numuu róꞌ. Á nandalaꞌ gánindxa̱ꞌlaꞌ mbu̱júꞌ yumbáá tsí waꞌtsi̱in ná ñawúun ne̱ dxe̱ꞌ. 10 Ikháanꞌlaꞌ nu̱ne̱laꞌ máꞌ xúꞌkhue̱n ndxa̱a̱ rí nagájnuu mbámbá mbiꞌi, mbámbáa go̱nꞌ jamí mbámbá tsigu. 11 Maphú naxná-gamiéjunꞌ e̱ne̱laꞌ, xí tági̱ꞌdoo mbá jayu numuu ñajun rí ne̱ne̱lo̱ꞌ ga̱jma̱á numalaꞌ.

12 A̱ngui̱nꞌ, na̱tha̱n-jáñalaꞌ rí gu̱ne̱-mijnálaꞌ xómá jaꞌñúú ikhúúnꞌ, numuu rí ikhúúnꞌ mangúúnꞌ ne̱ne̱-mina̱ꞌlo̱ꞌ xómá jaꞌñáaꞌ ikháanꞌlaꞌ. Túñu̱ꞌlaꞌ máꞌ nimbá rí ra̱máján. 13 Ga̱rmáꞌáan a̱kia̱nꞌlaꞌ rí nákhí ginii, ni̱tha̱n-ráꞌalaꞌ ajngáa máján awúun máꞌ rí naꞌñiꞌ mbá nandii. 14 Maske máꞌ phú mba̱a̱ gajmá ni̱xna̱ꞌlaꞌ ga̱jma̱á nandiuꞌ, túni̱ꞌñúꞌlaꞌ ni máꞌ táxúwa̱nꞌlaꞌ ne̱ne̱lo̱ꞌ. A̱ꞌkhue̱n gakon, ni̱drígúúnlaꞌ asndo xómá mbáa ánje̱l tsí nixúngua̱a̱ꞌ Ana̱ꞌlóꞌ, asndo xó rí jmína̱a̱ꞌ máꞌ Krísto̱ Jesús. 15 Ikhaa jngó na̱ra̱xa̱ꞌlaꞌ, náá ni̱ka̱ gagi rí guáꞌdáálaꞌ nákhí xúꞌkhue̱n rá. Numuu rí ikhúúnꞌ ndi̱yo̱o̱ mújúnꞌ rí ikháanꞌlaꞌ ni̱rawíilaꞌ asndo idalaꞌ mu̱xnu̱ꞌlaꞌ, xí numuu rí ndiyoo. 16 Á niꞌni̱i xa̱bo̱ sia̱nꞌ gajmiálaꞌ ñajunꞌ rí xúge̱ꞌ, numuu na̱tha̱nꞌlaꞌ rí gakon rá dxe̱ꞌ.

17 Maphú naxná-gamiéjúún xa̱bo̱ tsúꞌkhue̱n e̱ne̱laꞌ rí xúge̱ꞌ, i̱ndo̱ó máꞌ numuu rí rígu-jnuu rí nuni̱i̱. Nandúu̱n rí ma̱mbumalaꞌ ju̱yo̱ꞌ ikhúúnꞌ jamí rí ma̱xná-gamiéjwanlaꞌ gúni̱i̱ i̱ndo̱ó máꞌ ikhii̱n. 18 Máján máꞌ rí naxná-gamiéjúún xa̱bo̱ e̱ne̱laꞌ, xí numuu nduꞌyée̱ rí ma̱juwa-májánlaꞌ jamí naxná-gamiéjúu̱n jámba̱ miꞌtsú mangaa, ra̱ꞌkhá i̱ndo̱ó ído̱ rí xtáá ikhúúnꞌ ga̱jma̱á nindxa̱ꞌlaꞌ. 19 I̱ji̱nꞌ, phú nandoꞌ ja̱ya̱ꞌlaꞌ. Ga̱jma̱á numalaꞌ ikháanꞌ na̱mínu̱u̱ꞌ mbu̱júꞌ xómá a̱ꞌgo̱ tsí inu ma̱ꞌne-xuajen. Xkuaꞌnii ma̱ꞌgá-ra̱mínu̱u̱ꞌ asndo mbiꞌi rí ma̱nindxa̱ꞌlaꞌ xómá jaꞌnii Krísto̱. 20 Maphú naꞌne a̱kui̱nꞌ rí ma̱xtáá ga̱jma̱á nindxa̱ꞌlaꞌ núkho̱ máꞌ xúge̱ꞌ kajngó ma̱riꞌkhuu wáa xó rí na̱tha̱nꞌlaꞌ, numuu rí nánguá i̱yo̱o̱ dí gáne̱ ga̱jma̱á nindxa̱ꞌlaꞌ.

21 Gu̱riꞌñuꞌlaꞌ ríge̱ꞌ, ikháanꞌlaꞌ tsáanꞌ nandalaꞌ gúne̱-mbáníí xtángawoo Moisés: Á gakon rí nafraꞌa̱ꞌlaꞌ rí naꞌthán ne̱ rá. 22 Ikhín ka̱ma naꞌthán rí Abraám ni̱gi̱ꞌdiin a̱jmi̱i e̱je̱n. Mbáa̱ niꞌnii a̱ꞌgo̱ yumbáá tsí waꞌtsi̱i̱, jamí i̱mba̱a̱ꞌ niꞌnii a̱ꞌgo̱ tsí naꞌthán-ñájun-mina̱ꞌ máꞌ ikhaa. 23 A̱dée a̱ꞌgo̱ yumbáá tsí waꞌtsi̱i̱, ni̱gu̱maa̱ xómá na̱gu̱mii jañúú xa̱bo̱ numbaa. Xómáꞌ a̱dée a̱ꞌgo̱ tsí naꞌthán-ñájun-mina̱ꞌ máꞌ ikhaa rá, ni̱gu̱maa̱ ga̱jma̱á numuu rí nixuda-mina̱ꞌ Ana̱ꞌlóꞌ ma̱ꞌne.

24 Mbá xkri̱da ñajuun rí na̱tha̱nꞌlaꞌ ge̱jyoꞌ: A̱jmi̱i go̱ꞌo̱ tsíge̱ꞌ ñajúún asndo xó xtiꞌkhuu a̱jma̱ awan rí niꞌgí Ana̱ꞌlóꞌ. Mbá ne̱ ñajuun rí niꞌgí Ana̱ꞌlóꞌ ná júba̱ Sinaí. Ikhaa naꞌne xkri̱doo Agáár, tsí naꞌnii e̱je̱n tsí ma̱nindxu̱ún yumbáá waꞌtsi̱in. 25 Agáár naꞌne xkri̱doo júba̱ Sinaí rí ꞌgí ná numbaa Arábia̱, jamí ikhaa̱ máꞌ naꞌne xtiꞌkhuu xuajen Jerusalén rí ꞌgí xúge̱ꞌ, numuu rí xúge̱ꞌ ikhaa̱ gajmíi̱ i̱jii̱n ñajúu̱n yumbáá waꞌtsi̱in drígo̱o̱ xtángoo. 26 Xómáꞌ Jerusalén rí ríga̱ mikhuíí rá, tsí ñajuun xómá nániálóꞌ, ra̱ꞌkhá yumbáá tsí waꞌtsi̱in ñajúún i̱jii̱n ikhaa̱. 27 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ikháánꞌ nána̱, tsáánꞌ na̱nguá iyoo ma̱tha̱ni̱i e̱je̱n,

ga̱ꞌdxu a̱kia̱anꞌ.

Ikháánꞌ, tsáánꞌ ni miꞌtsú tátha̱ne̱ xuajen,

atandxaꞌwá numuu rí gagi xtaa.

Numuu rí i̱tha̱án mbaꞌiin e̱je̱n ma̱gi̱ꞌdiin a̱ꞌgo̱ tsí ninguaná-ti̱go̱o̱

xó rí a̱ꞌgo̱ tsí ninújún».*

28 A̱ngui̱nꞌ, ikháánꞌlóꞌ* ni̱gu̱máaꞌlóꞌ xómá ni̱gu̱maa Isaák. Ni̱gu̱máaꞌlóꞌ ga̱jma̱á numuu rí nixuda-mina̱ꞌ Ana̱ꞌlóꞌ ga̱jma̱á nindxu̱u̱ Abraám. 29 Jamí xúge̱ꞌ naríga̱ xómá niríga̱ nákhí wajyúú, rí ada̱ tsí ni̱gu̱maa xómá na̱gu̱mii jañúú xa̱bo̱ numbaa, naꞌne-ngínáa̱ tsí ni̱gu̱maa ga̱jma̱á ski̱yu̱u̱ꞌ Xu̱u̱ꞌ Ana̱ꞌlóꞌ. 30 Xómáꞌ i̱yi̱i̱ꞌ ajngóo Ana̱ꞌlóꞌ, dí iꞌthán ne̱ ga̱jma̱á numuu rúꞌkhue̱n rá. Xáꞌnii iꞌthán ne̱: «Ataxkriya̱a̱ꞌ a̱ꞌgo̱ yumbáá tsí waꞌtsi̱i̱ ma̱ꞌga janíí ga̱jma̱á a̱dée. Numuu rí ra̱jáꞌyoo a̱dée̱ rí ma̱janáá mangaa rí jaꞌyoo i̱ndo̱ó máꞌ a̱dée a̱ꞌgo̱ tsí naꞌthán-ñájun-mina̱ꞌ máꞌ ikhaa». 31 Ikhaa jngó, a̱ngui̱nꞌ, ra̱ꞌkhá i̱ji̱in a̱ꞌgo̱ yumbáá tsí waꞌtsi̱i̱ ñajwanlóꞌ ikháánꞌlóꞌ, rí i̱ji̱in a̱ꞌgo̱ tsí naꞌthán-ñájun-mina̱ꞌ máꞌ ikhaa ñajwanlóꞌ.