1 ¡Phú tsíndxa̱ꞌwa̱á idxa̱ꞌlaꞌ, xa̱bo̱ Galásia̱! Xáne kajngó ni̱ni̱ꞌñá-mijnálaꞌ rí ma̱gu̱ma-nduwáanꞌlaꞌ róꞌ, xí jmínu̱úꞌ máꞌ ikhúúnꞌ ni̱tha̱n-makalaꞌ rí Jesukrísto̱ waꞌdujmaa ná ixe̱ krúsi̱ rá. 2 Nandoꞌ rí mu̱riñuꞌlaꞌ mbóó graxe̱ ríge̱ꞌ: Á ni̱dríguíilaꞌ Xu̱u̱ꞌ Ana̱ꞌlóꞌ ga̱jma̱á numuu rí ne̱ne̱-mbáníílaꞌ xtángoo o ga̱jma̱á numuu rí ni̱dxawíínlaꞌ ajngáa máján jamí ninimba̱ꞌlaꞌ ne̱ dxe̱ꞌ. 3 Á phú júgoo inalaꞌ rá dxe̱ꞌ. Ni̱gíꞌdi̱ínlaꞌ máꞌ ga̱jma̱á majñu̱u̱ Xu̱u̱ꞌ Ana̱ꞌlóꞌ, jamí xúge̱ꞌ nandalaꞌ gúne̱-gáxi̱í ga̱jma̱á majñu̱u̱ ski̱ya̱ꞌlaꞌ ráanꞌ. 4 Á phú nda̱a̱ mbá jayu numuu mbá xúgíí rí nikua-ramíni̱ílaꞌ rá dxe̱ꞌ. Ikhúúnꞌ na̱ju̱mu̱ꞌ rí gíꞌdoo numuu mbá xúgíí rúꞌkhue̱n. 5 Ana̱ꞌlóꞌ naxnálaꞌ Xu̱u̱ꞌ jamí naꞌnii̱ rí phú wáá ná majña̱ꞌlaꞌ, ga̱jma̱á numuu rí ninimba̱ꞌlaꞌ ju̱ya̱á ajngáa rí ni̱dxawíínlaꞌ, ra̱ꞌkhá ga̱jma̱á numuu rí nu̱ne̱-mbáníílaꞌ xtángoo.

6 Xkuaꞌnii máꞌ mangaa Abraám, «ninimbo̱o̱ꞌ jaꞌyoo̱ Ana̱ꞌlóꞌ, rúꞌkhue̱n kajngó niꞌthán Ana̱ꞌlóꞌ rí xa̱bo̱ tsí májáan ñajuu̱n». 7 Ikhaa jngó, gu̱ya̱á májánlaꞌ ríge̱ꞌ: Tsí nanimbu̱únꞌ juyáá Ana̱ꞌlóꞌ, tsúꞌkhue̱n tsí gakon rí i̱ji̱in Abraám ñajúún. 8 Ná i̱yi̱i̱ꞌ ajngóo Ana̱ꞌlóꞌ nakujma rí wapha máꞌ niꞌgí-mina̱ꞌ Ana̱ꞌlóꞌ rí maꞌthée̱n rí nánda̱a̱ aꞌkhúún xa̱bo̱ tsí ra̱ꞌkháa judío̱ ñajúún ga̱jma̱á majñu̱u̱ rí nanimbúu̱n juyáa̱. Ikhaa jngó, nákhí xúꞌkhue̱n Ana̱ꞌlóꞌ niꞌthúun Abraám ajngáa máján ríge̱ꞌ: «Ga̱jma̱á majña̱a̱ꞌ ikháánꞌ ma̱ne̱-tsakun-rámii mbá xúgíin xa̱bo̱ numbaa».* 9 Ikhaa jngó, tsí nanimbu̱únꞌ juyáá Ana̱ꞌlóꞌ, na̱gu̱ma-tsakun-rámii̱ mangii̱n ga̱jma̱á nindxu̱u̱ Abraám tsí ninimbo̱o̱ꞌ jaꞌyoo Ana̱ꞌlóꞌ wajyúú.

10 Mbá xúgíin tsí nandúún rí ma̱ju̱wá mújúún ná inuu Ana̱ꞌlóꞌ ga̱jma̱á majñu̱u̱ rí nune̱-mbáníí rí naꞌthán xtángoo, waꞌxná-máꞌíi̱n, numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Waꞌxná-máꞌáan jámba̱a̱ tsí na̱nguá eꞌne-mbánuu mbá xúgíí rí naꞌthán ná i̱yi̱i̱ꞌ xtángoo».* 11 Gakon máꞌ rí Ana̱ꞌlóꞌ ma̱xáꞌthán rí nánda̱a̱ aꞌkhúun nimbáa xa̱bo̱ ga̱jma̱á numuu xtángoo. Numuu rí «xa̱bo̱ tsí nánda̱a̱ aꞌkhúun, ma̱xtáa̱ jámuu ga̱jma̱á numuu rí wéje̱ a̱kuii̱n ná inuu Ana̱ꞌlóꞌ». 12 Ra̱ꞌkhá ikhaa máꞌ ñajuun rí mu̱ꞌne̱-mbáníílóꞌ rí naꞌthán xtángoo ga̱jma̱á rí ma̱we̱je̱ a̱kia̱nꞌlóꞌ ná inuu Ana̱ꞌlóꞌ, numuu rí naꞌthán xtángoo: «Tsí naꞌne-mbánuu rí naꞌthán xtángoo, ma̱xtáa̱ ga̱jma̱á numuu ne̱».* 13 Xómáꞌ Krísto̱ neꞌne-jríñáa̱ꞌlóꞌ ná inuu rí naxná-máꞌáanꞌlóꞌ xtángoo, nákhí rí waꞌxná-máꞌáa̱n ga̱jma̱á numalóꞌ, numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Jámba̱a̱ tsí brákamaa ná ixe̱, waꞌxná-máꞌáa̱n».* 14 Xkuaꞌnii niríga̱ kajngó ga̱jma̱á majñu̱u̱ Krísto̱ Jesús ma̱gu̱ma-tsakun-rámii xa̱bo̱ tsí ra̱ꞌkháa judío̱ ñajúún, xómá rí ni̱gu̱ma-tsakun-rámaa Abraám. Jamí mu̱dríguíilóꞌ Xu̱u̱ꞌ Ana̱ꞌlóꞌ, tsí nixuda-mine̱e̱ꞌ máꞌ rí maxniálóꞌ ga̱jma̱á numuu rí wéje̱ a̱kia̱nꞌlóꞌ ná inuu Jesús.

15 A̱ngui̱nꞌ, ma̱tha̱nꞌlaꞌ mbá xkri̱da: Xí mbáa xa̱bo̱ naꞌne mbá awan ga̱jma̱á i̱mba̱a̱ꞌ xa̱bo̱, nimbáa tsíyoo rí marngudi̱i rí nixuda-mine̱e̱ꞌ, ni máꞌ rí ma̱ꞌne-ra̱ꞌmáa ne̱, xí nixnée̱ máꞌ ajngóo̱. 16 Gu̱dxawíínlaꞌ, Ana̱ꞌlóꞌ nixuda-mina̱ꞌ ga̱jma̱á nindxu̱u̱ Abraám jamí ga̱jma̱á nindxu̱u̱ xa̱bo̱ ri̱jyu̱u̱ꞌ. Ná i̱yi̱i̱ꞌ ajngáa rawuun Ana̱ꞌlóꞌ tsíꞌthán: «jamí ga̱jma̱á nindxu̱ún xa̱bo̱ ri̱jyu̱u̱ꞌ», kajngó ma̱xáfraꞌa̱ꞌlóꞌ rí mbaꞌii̱n, rí xáꞌnii iꞌthán ne̱: «jamí ga̱jma̱á nindxu̱u̱ xa̱bo̱ ri̱jyu̱u̱ꞌ», kajngó ma̱fraꞌa̱ꞌlóꞌ rí mbáwíi̱. Ikhaa̱ ñajuun Krísto̱. 17 Rí phú nandoꞌ gátha̱nꞌlaꞌ ñajuun ríge̱ꞌ: Ana̱ꞌlóꞌ neꞌne mbá awan ga̱jma̱á nindxu̱u̱ Abraám asndo nákhí wajyúú, jamí nixuda-mine̱e̱ꞌ rí ma̱ꞌne-mbánuu̱ ne̱ ga̱jma̱á majñu̱u̱ Krísto̱.* Asndo nda̱wa̱á guéño ni̱ꞌkha̱ xtángoo rí ni̱grui̱gú Moisés, ído̱ rí ninújngoo máꞌ mbá akho̱ siénto̱ i̱ꞌkha̱a la mbá skíñú gu̱wa̱ꞌ (430) tsigu. Jamí xtángoo rúꞌkhue̱n tsírngudi̱i ne̱ awan rí ni̱gu̱ma nákhí wapha ni máꞌ tsíꞌne ne̱ rí náxági̱ꞌdoo numuu rí nixuda-mina̱ꞌ Ana̱ꞌlóꞌ rí ma̱ꞌne. 18 Xí ga̱jma̱á numuu rí nu̱ꞌne̱-mbáníílóꞌ xtángoo najanálóꞌ rí nixuda-mina̱ꞌ Ana̱ꞌlóꞌ, nákha máꞌ ga̱jma̱á numuu rí nixuda-mine̱e̱ꞌ maxnálóꞌ ne̱ xúꞌkhue̱n rá. Xómáꞌ Ana̱ꞌlóꞌ, nixuda-mine̱e̱ꞌ rí maxnúu̱ ne̱ Abraám xkuaꞌnii jayu máꞌ.

19 Náá numuu ni̱ꞌkha̱ xtángoo xúꞌkhue̱n rá. Ni̱ꞌkha̱ ne̱ nda̱wa̱á kajngó ma̱kujma rí tsíne̱-mbáníí xa̱bo̱ rí nandoo Ana̱ꞌlóꞌ, asndo ága̱nú mbiꞌi rí ma̱ꞌkha̱ xa̱bo̱ ri̱jyu̱u̱ꞌ Abraám, tsí nixuda-mina̱ꞌ Ana̱ꞌlóꞌ ga̱jma̱á nindxu̱u̱. Moisés ni̱grui̱gú xtángoo ga̱jma̱á majñu̱ú ánje̱l kajngó ikhaa̱ ma̱gu̱wíjngaa̱ ne̱ ná inúú xa̱bo̱. 20 Mbáwíi máꞌ Ana̱ꞌlóꞌ nixuda-mina̱ꞌ ná inuu Abraám, i̱ndo̱ó máꞌ numuu rí táꞌyóo rí mbáa xa̱bo̱ maꞌthán ga̱jma̱á numuu̱, numuu rí mbáwíi̱ máꞌ rí ikhaa̱.

21 Á rúꞌkhue̱n iꞌthán rí narikhoo xtángoo rí ma̱ꞌne-mbánuu Ana̱ꞌlóꞌ rí nixuda-mina̱ꞌ rá dxe̱ꞌ. ¡Na̱nguá mbá jayu! Xí numuu rí na̱ꞌngo̱o̱ máꞌ xtángoo ma̱ꞌne rí ma̱juwalóꞌ jámuu, a̱ꞌkhue̱n rí Ana̱ꞌlóꞌ maꞌthán rí nánda̱a̱ máꞌ aꞌkhánlóꞌ ga̱jma̱á numuu rí nu̱ꞌne̱-mbáníílóꞌ xtángoo. 22 Xómáꞌ i̱yi̱i̱ꞌ ajngóo Ana̱ꞌlóꞌ naꞌthán rí mbá xúgíin xa̱bo̱ júgua-raꞌiin ná awúun aꞌkhán, kajngó tsí nanimbu̱únꞌ juyáá Jesukrísto̱ mu̱dri̱guíi̱ rí nixuda-mina̱ꞌ Ana̱ꞌlóꞌ.

23 Nákhí rí xóó tága̱nú mbiꞌi rí ma̱we̱je̱ a̱kia̱nꞌxo̱ꞌ ná inuu Jesús, rí xtángoo ninindxu̱u̱ xómá géjwa̱nꞌ ná nijúgua-raꞌáanꞌxo̱ꞌ, asndo ni̱ga̱nú mbiꞌi rí Ana̱ꞌlóꞌ nisngájma rí jaꞌyoo ma̱we̱je̱ a̱kia̱nꞌxo̱ꞌ ná inuu A̱dée̱. 24 Ikhaa jngó, rí xtángoo ninindxu̱u̱ xómá yumbáá tsí na̱ña̱wu̱ún e̱je̱n, rí mbayá ikhaxo̱ꞌ kajngó ma̱we̱je̱ a̱kia̱nꞌxo̱ꞌ ná inuu Krísto̱, a̱ꞌkhue̱n maꞌthán Ana̱ꞌlóꞌ rí nánda̱a̱ aꞌkhánxo̱ꞌ ga̱jma̱á numuu rí wéje̱ a̱kia̱nꞌxo̱ꞌ ná inuu̱. 25 Jamí xúge̱ꞌ rá, rí ni̱ga̱nú máꞌ mbiꞌi rí ma̱we̱je̱ a̱kia̱nꞌxo̱ꞌ ná inuu Krísto̱, nánguá máꞌ iꞌthán-ñájwanxo̱ꞌ xtángoo rí ninindxu̱u̱ xómá yumbáá tsí na̱ña̱wu̱ún e̱je̱n.

26 Mbá xúgiáanꞌ ikháanꞌlaꞌ ñajwanlaꞌ i̱ji̱in Ana̱ꞌlóꞌ ga̱jma̱á numuu rí wéje̱ a̱kia̱nꞌlaꞌ ná inuu Krísto̱ Jesús. 27 Nákhí rí waxúꞌdu-maꞌáanꞌlaꞌ ná awúun iya numuu rí nanimba̱ꞌlaꞌ ju̱ya̱á Krísto̱, ikháanꞌlaꞌ ninindxa̱ꞌlaꞌ xómá jaꞌnii Krísto̱, xómá tsí nijúwuun xtíin rí nuxe̱ꞌ. 28 Nánguá máꞌ iꞌyoo xí xa̱bo̱ judío̱ o xa̱bo̱ griégo̱ ñajwanlóꞌ, yumbáá tsí waꞌtsi̱i̱ o xa̱bo̱ tsí naꞌthán-ñájun-mina̱ꞌ máꞌ ikhaa mbo̱ꞌ, xí xa̱biya̱ o xí a̱ꞌgo̱ ñajwanlóꞌ mbo̱ꞌ. Numuu rí mbá xúgiáanꞌ ikháanꞌlaꞌ ñajwanlaꞌ mbáwíi máꞌ xa̱bo̱ ga̱jma̱á nindxu̱u̱ Krísto̱ Jesús. 29 Jamí xí xa̱bi̱i Krísto̱ ñajwanlaꞌ, gakon máꞌ rí i̱ji̱in Abraám ñajwanlaꞌ, jamí mu̱drígúlaꞌ rí nixuda-mina̱ꞌ Ana̱ꞌlóꞌ.