1 Ikhúúnꞌ ñajunꞌ Páblo̱, yumbée Jesukrísto̱. Watsaꞌwóꞌ rí ma̱nindxu̱ꞌ mbáa xa̱bo̱ tsí waxúngua̱a̱ꞌ, watraꞌwúún rí ma̱tha̱n-ráꞌa ajngáa máján drígo̱o̱ Ana̱ꞌlóꞌ. 2 Nixuda-mine̱e̱ꞌ máꞌ ajngáa rúꞌkhue̱n asndo nákhí wajyúú mbiꞌi ga̱jma̱á majñu̱ú tsí ni̱rawíjnga̱a ajngóo̱, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ. 3 Xa̱bo̱ tsúꞌkhue̱n nithan ga̱jma̱á numuu A̱dée Ana̱ꞌlóꞌ, Tátiálóꞌ Jesukrísto̱, tsí ni̱gu̱maa xómá xa̱bo̱ numbaa ná ri̱jyu̱u̱ꞌ thúngaa Dabíd. 4 Xómáꞌ Xu̱u̱ꞌ Ana̱ꞌlóꞌ nasngájma ga̱jma̱á mbá xúgíí tsiakhe̱ rí Jesukrísto̱ ñajuun A̱dée Ana̱ꞌlóꞌ, numuu rí ndiyáa̱ mbiꞌyuu̱. 5 Ga̱jma̱á majñu̱u̱ máꞌ Jesukrísto̱ nijanúꞌ rí ma̱nindxu̱ꞌ mbáa tsí waxúngua̱a̱ꞌ, kajngó ma̱thu̱ún xa̱bo̱ ná mbá xúgíí xuajen numbaa rí ga̱nimbúu̱n juyáa̱ jamí guni̱i̱ rí nandoo̱. Na̱ne̱ ñajun ríge̱ꞌ numuu rí nandoꞌ ja̱yo̱o̱ Krísto̱. 6 Ná majñu̱ú máꞌ xa̱bo̱ tsúꞌkhue̱n juwa mangáanꞌlaꞌ, jamí watsaꞌwálaꞌ rí ma̱nindxa̱ꞌlaꞌ xa̱bi̱i Jesukrísto̱. 7 Na̱xu̱ꞌmá i̱yi̱i̱ꞌ ríge̱ꞌ inalaꞌ mbá xúgiáanꞌlaꞌ tsáanꞌ juwalaꞌ ná xuajen Róma̱, tsáanꞌ nandoo Ana̱ꞌlóꞌ jaꞌyalaꞌ jamí watsaꞌwálaꞌ rí ma̱gu̱ma-jaꞌwáanꞌlaꞌ. Ana̱ꞌlóꞌ Mikhuíí jamí Táta̱ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.

8 Rí ginii jayu, na̱rígu̱u gamaku ná inuu Anu̱ꞌ Mikhuíí ga̱jma̱á numalaꞌ mbá xúgiáanꞌlaꞌ ga̱jma̱á majñu̱u̱ Jesukrísto̱. Numuu rí mbá xúgíí numbaa nuthan xa̱bo̱ ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ. 9 Ikhúúnꞌ na̱yumbáá ga̱jma̱á mbá jañii a̱kui̱nꞌ ná inuu Ana̱ꞌlóꞌ rí na̱tha̱n-ráꞌa ajngáa máján ga̱jma̱á numuu A̱dée̱. Ana̱ꞌlóꞌ ndaꞌyoo rí jámba̱ miꞌtsú gíwa̱a̱n a̱kui̱nꞌ ja̱ya̱ꞌlaꞌ ído̱ rí na̱tha̱n-jáñuu̱. 10 Mbámbá mbiꞌi na̱ndo̱ꞌo̱o̱ Ana̱ꞌlóꞌ rí marmáꞌthoo̱ jamba̱a̱ kajngó ma̱ꞌgá gáya̱ꞌlaꞌ, xí ikhaa̱ nandoo̱. 11 Numuu rí phú naꞌne a̱kui̱nꞌ rí mba̱ya̱ꞌlaꞌ kajngó ma̱xna̱ꞌlaꞌ mbá xtambáyú rí naxná Xu̱u̱ꞌ Ana̱ꞌlóꞌ, kajngó ma̱wajún-gúkuálaꞌ. 12 A̱ꞌkhue̱n rí mu̱ꞌxná-mijnálóꞌ tsiakhe̱ ga̱jma̱á numuu rí ikhaa máꞌ rí nanimba̱ꞌlóꞌ juꞌyáá, ikháanꞌlaꞌ jamí ikhúúnꞌ.

13 A̱ngui̱nꞌ, nandoꞌ rí ma̱gi̱da̱ꞌ idxa̱ꞌlaꞌ ríge̱ꞌ: asndo xúge̱ꞌ na̱nguá ndiyoo rí ma̱ꞌgá ná juwalaꞌ, maske máꞌ phú mbaꞌa nothon ni̱ꞌgí-mina̱ꞌ rí ma̱ꞌgá gáya̱ꞌlaꞌ. Numuu rí nandoꞌ ma̱ꞌgá gágu̱u tháan rí máján najma̱a̱ ná majña̱ꞌlaꞌ ikháanꞌlaꞌ, xómá rí na̱gu̱u ne̱ ná majñu̱ú i̱ꞌwíin xa̱bo̱ tsí ra̱ꞌkháa judío̱ ñajúún. 14 Mbá xúgíin xa̱bo̱ gíꞌmúú inúú: xa̱bo̱ tsí na̱ju̱mu̱ú rí maphú gíꞌdoo numúú jamí xa̱bo̱ tsí ngíníi, xa̱bo̱ tsí phú na̱ma̱ñúú jamí xa̱bo̱ tsí tsíma̱ñúú mbá jayu. 15 Ikhaa jngó, naꞌne a̱kui̱nꞌ rí ma̱ꞌgá máꞌ wapha gátha̱n-ráꞌalaꞌ ajngáa máján mangáanꞌlaꞌ, tsáanꞌ juwalaꞌ ná xuajen Róma̱.

16 Ikhúúnꞌ tsíti̱yu̱ꞌ eꞌne ajngáa máján, numuu rí ikhaa ne̱ ñajuun ski̱yu̱u̱ꞌ Ana̱ꞌlóꞌ rí ma̱ꞌne-jríya̱a̱ꞌ jámba̱a̱ tsí nanimbo̱o̱ꞌ jaꞌyoo ne̱, xa̱bo̱ judío̱ ginii jayu, jamí xa̱bo̱ tsí ra̱ꞌkháa judío̱ ñajúún mangaa. 17 Numuu rí ga̱jma̱á majñu̱u̱ ajngáa máján Ana̱ꞌlóꞌ nasngájma xáne iꞌnii̱ rí ma̱nindxa̱ꞌlóꞌ xa̱bo̱ tsí nánda̱a̱ aꞌkhúún, i̱ndo̱ó máꞌ ga̱jma̱á majñu̱u̱ rí wéje̱ a̱kia̱nꞌlóꞌ ná inuu̱ ikhaa̱, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Xómáꞌ xa̱bo̱ tsí nánda̱a̱ aꞌkhúun, ma̱xtáa̱ jámuu ga̱jma̱á numuu rí wéje̱ a̱kuii̱n ná inuu Ana̱ꞌlóꞌ».*

18 Numuu rí Ana̱ꞌlóꞌ nasngájma asndo ná mikhuíí rí najiꞌnáa̱ jaꞌyoo̱ rí tsíñúú xa̱bo̱ numbaa ágúyáá rí xtáa̱ jamí rí xkawe̱ꞌ nuni̱i̱, numuu rí nawajún-ꞌthíi̱n ñajúu̱n rí gakon ga̱jma̱á rí xkawe̱ꞌ nuni̱i̱. 19 Nduyáa̱ máꞌ xúgíí rí nasngájma rí xtáa Ana̱ꞌlóꞌ, numuu rí jmína̱a̱ꞌ máꞌ Ana̱ꞌlóꞌ nisngájmúu̱ ne̱. 20 Tsí Ana̱ꞌlóꞌ, tsíyoo mbu̱ꞌyáa̱lóꞌ ga̱jma̱á idalóꞌ, i̱ndo̱ó máꞌ nandoo nduꞌyáálóꞌ rí jámuu gíꞌdoo̱ tsiakhe̱ jamí jámuu ñajuu̱n Ana̱ꞌlóꞌ asndo nákhí máꞌ ni̱gu̱ma-ku̱maa numbaa. Ikhaa jngó, rí ni̱gu̱ma-ku̱maa nasngájma ne̱ rí xtáa Ana̱ꞌlóꞌ. Rúꞌkhue̱n iꞌthán rí nda̱a̱ rí mune̱-tsu̱díi̱. 21 Maske máꞌ xa̱bo̱ numbaa nene̱-nuwii̱n Ana̱ꞌlóꞌ, túne̱-mba̱a̱ xómá Ana̱ꞌlóꞌ, ni máꞌ túríguu̱ la gamaku inuu̱. A̱ꞌkhue̱n gakon, i̱wa̱á máꞌ ni̱ndxa̱ꞌwa̱-mijnée̱ rí tsíjmaa mbá jayu, jamí nijúgoo inúu̱ numuu rí najñaguu̱n. 22 Awúun máꞌ rí ikhii̱n na̱ju̱múu̱ rí phú i̱tha̱án na̱ma̱ñúu̱, a̱ꞌkhue̱n nene̱-mijnée̱ tsí na̱nguá i̱ma̱ñúú mbá jayu. 23 Ni̱riꞌkhu-raꞌáa̱ rí mune̱-mba̱a̱ Ana̱ꞌlóꞌ tsí phú wáá ñajuun jamí jámuu xtáa, ga̱jma̱á numuu rí mune̱-mba̱a̱ xtiꞌkhuu xa̱bo̱ numbaa tsí wéje̱ máꞌ rí ma̱ja̱ñúu, xtiꞌkhúún xu̱kú xna, xtiꞌkhúún xu̱kú tsí akho̱ nakhúún jamí xtiꞌkhúún xu̱kú tsí nu̱xma̱ta-mijná.

24 Ikhaa numuu rúꞌkhue̱n, niniñúu̱ máꞌ Ana̱ꞌlóꞌ ná awúun aꞌkhán, kajngó muni̱i̱ máꞌ rí phú xkawe̱ꞌ naꞌne a̱kuíi̱n muni̱i̱. Ikhaa jngó, nene̱-mijnée̱ rí phú mate̱ꞌ mi̱ndaꞌkho ga̱jma̱á xuñúu̱. 25 Rí gakon drígo̱o̱ Ana̱ꞌlóꞌ rí wasngájmúu̱, ni̱riꞌkhu-raꞌáa̱ ne̱ ga̱jma̱á rí mi̱nduwa. Xkuaꞌnii túya̱-makuíi̱ ni máꞌ túne̱-mba̱a̱ tsí neꞌne-ku̱maa numbaa, rí i̱wa̱á máꞌ ndiya-makúu̱n jamí nene̱-mbii̱n tsí ni̱gu̱ma-ku̱mii. Xómáꞌ tsí neꞌne-ku̱maa numbaa, jámuu mbiꞌi jaꞌyoo rí ma̱gu̱ma-mba̱a̱. Xkuaꞌnii gáꞌne.

26 Ikhaa numuu rúꞌkhue̱n Ana̱ꞌlóꞌ niniñúu̱ rí muni̱i̱ máꞌ rí phú mate̱ꞌ mi̱ndaꞌkho naꞌne a̱kuíi̱n muni̱i̱. Asndo go̱ꞌo̱ máꞌ mangiin nánguá ibúún gajmíí xa̱bekha, xómá rí phú jaꞌyoo, rí mbáko máꞌ ikhii̱n nubúu̱n. 27 Xúꞌkhue̱n máꞌ xa̱bekha mangiin, ni̱ni̱ꞌñáa̱ rí nubúu̱n gajmíi̱ go̱ꞌo̱, jamí ni̱gíꞌdíi̱n na̱ni̱gúu̱nꞌ juya-mijnée̱ mbáko máꞌ ikhii̱n. Xa̱bekha jamí xa̱bekha nune̱-mijná rí mate̱ꞌ mi̱ndaꞌkho, a̱ꞌkhue̱n nu̱dri̱guíi̱ jamínu̱ꞌ rí jaꞌyoo mu̱dri̱guíi̱ ná xuñúu̱ ga̱jma̱á numuu rí nene̱-maꞌkhí-mijnée̱.

28 Ga̱jma̱á numuu rí ikhii̱n ni̱ju̱múu̱ rí ra̱gíꞌdoo máꞌ numuu rí naꞌthán Ana̱ꞌlóꞌ, ikhaa jngó Ana̱ꞌlóꞌ mangaa niniñúu̱ rí mu̱ndxa̱ꞌwa̱-mijnée̱ máꞌ rí tsíjmaa mbá jayu, kajngó muni̱i̱ rí ra̱jáꞌyoo muni̱i̱. 29 Gatíí mbá xúgíí inii rí ra̱máján nuni̱i̱: nuni̱i̱ mbaꞌa inii aꞌkhán, na̱ni̱gúu̱nꞌ rí ma̱guáꞌdáa̱ mi̱ndaꞌkho, nda̱a̱ gamakúu̱n. Phú naxígúu̱n juñúu̱ xa̱bo̱, nu̱radíi̱n xa̱bo̱, na̱tsa̱ñúu̱ gajmíi̱ xa̱bo̱, nune̱-nduwee̱ jamí mbáko máꞌ nuꞌgí-mijnée̱ muni̱i̱ rí xkawe̱ꞌ. 30 Nune̱-xtutaa̱ ga̱jma̱á numúú xa̱bo̱, nuthan-xkawi̱i̱ꞌ numúú xa̱bo̱, tsíñúu̱ juyáa̱ Ana̱ꞌlóꞌ, nune̱-ku̱maa̱ ajngáa numúú xa̱bo̱, nu̱xu̱xí-mijnée̱, na̱ga̱níi̱ a̱kuíi̱n, nune̱-ku̱maa̱ rí xkawe̱ꞌ, tsíne̱-mbáníi̱ rí nuthan anúu̱. 31 Tsíñúu̱ gánimbúu̱n rí gakon, tsíne̱-mbáníi̱ rí nuthee̱n, tsíñúu̱ juñúu̱ xa̱bo̱, tsíne̱ mba̱a̱ a̱kuíi̱n, ni máꞌ tsíñáwíin a̱kuíi̱n ene̱ xa̱bo̱. 32 Nduyáa̱ mújúu̱n máꞌ awan rí gíꞌdoo Ana̱ꞌlóꞌ ga̱jma̱á numúú xa̱bo̱ tsí nune̱ mbá xúgíí rúꞌkhue̱n: gíꞌmaa rí ma̱ja̱ñúu̱. Maske máꞌ nduyáa̱ rúꞌkhue̱n, nuni̱i̱ máꞌ ne̱ tsiakhe̱, jamí ra̱ꞌkhá i̱ndo̱ó rúꞌkhue̱n, rí asndo nadxu a̱kuíi̱n ído̱ rí i̱ꞌwíin xa̱bo̱ nune̱ ne̱.