Rí nene̱ 28

Rí neꞌne Páblo̱ ná Málta̱

1 Ído̱ nijáwiáanꞌ mbá xúgiáanꞌxo̱ꞌ, a̱ꞌkhue̱n ni̱ma̱ñaxo̱ꞌ rí mbaa rí kua̱ꞌa̱n ná awúun iya a̱pha̱ mbiꞌyuu Málta̱. 2 Xómáꞌ xa̱bo̱ tsí júwa̱ꞌ ikhín phú máján ni̱dríguáa̱nꞌxo̱ꞌ. Numuu rí naxnúu ruꞌwa jamí phú ngúwán eꞌne mangaa, ikhaa jngó ni̱ꞌgíi̱ agu ná mu̱tsiga-mijnáaxo̱ꞌ. 3 A̱ꞌkhue̱n Páblo̱ nigímbú mbá tikhu ixe̱ rí nijndoo, nigruíye̱e̱ꞌ ne̱ ná awúun agu mi̱kha. A̱ꞌkhue̱n ni̱ga̱ti̱ya̱a̱ꞌ-ragáyuu mbáa a̱bo̱ꞌ ná inuu rí mika, jamí ni̱gi̱ꞌmee̱ niꞌkhui̱i̱ ñawúun Páblo̱. 4 Ído̱ rí xa̱bo̱ tsí júwa̱ꞌ ikhín ndiyáá rí brákamaa a̱bo̱ꞌ ná ñawúun Páblo̱, a̱ꞌkhue̱n nithan-mijnée̱: «Phú gakon rí xa̱bo̱ tsí ni̱gu̱díin xa̱bo̱ ñajuun tsíge̱ꞌ. Maske máꞌ tájáñuu̱ neꞌne iya a̱pha̱, xómáꞌ ana̱ꞌlóꞌ tsíxnúu̱ rí ma̱xtáa̱».

5 I̱ndo̱ó máꞌ numuu rí Páblo̱ nixprígúu ñawúun ná awúun agu, a̱ꞌkhue̱n ni̱rákaa a̱bo̱ꞌ jamí nda̱a̱ máꞌ rí nigíꞌnuu̱. 6 Mbá xúgíin xa̱bo̱ ni̱ju̱mu̱ú rí mu̱ꞌwan ñawúu̱n, o nda̱a̱ ajngóo gángáxi̱i̱ ma̱ja̱ñúu̱ mbo̱ꞌ. I̱ndo̱ó máꞌ numuu rí ído̱ neꞌne mba̱yo̱ꞌ máꞌ rí niguáꞌthíi̱n, jamí ndiyáa̱ rí nda̱a̱ nimbá rí nigíꞌnuu Páblo̱, a̱ꞌkhue̱n ni̱riꞌkhuu̱ rí na̱ju̱múu̱ jamí nithee̱n rí ra̱ꞌkhá xa̱bo̱ numbaa ñajuu̱n.

7 Mijngi máꞌ ikhín ríga̱ mbayuu mbáa xa̱bo̱ tsí mbiꞌyuu Públio̱, tsí ñajuun xa̱bo̱ ede̱ ginii ná mbaa rí kua̱ꞌa̱n ná awúun iya. Ikhaa̱ phú máján ni̱grui̱guáa̱nꞌxo̱ꞌ jamí niwajúnxo̱ꞌ mbá atsú mbiꞌi ná guꞌwóo̱. 8 Jamí anu̱u̱ Públio̱ kra̱ꞌmáa ná xi̱yoo, najáñuu̱ eꞌne nandii mika jamí nandii tha̱a̱ iꞌdi. Xómáꞌ Páblo̱ ni̱to̱ꞌo̱o̱ gáꞌyoo̱, niꞌthán-jáñuu̱ Ana̱ꞌlóꞌ ga̱jma̱á numuu̱, nda̱wa̱á a̱ꞌkhue̱n nixkrámaa̱ jamí neꞌne-thanuu̱. 9 Ído̱ ni̱dxawíín xa̱bo̱ rúꞌkhue̱n, a̱ꞌkhue̱n niguwá i̱ꞌwíin tsí najáñúú tsí júwa̱ꞌ ná mbaa rúꞌkhue̱n, jamí ni̱gu̱ma-thanúu̱ mangii̱n. 10 Xa̱bo̱ tsúꞌkhue̱n phú máján ndiya-makuaxo̱ꞌ mangiin. Jamí ído̱ ni̱ga̱nú mbiꞌi rí ma̱ga̱jnáxo̱ꞌ, a̱ꞌkhue̱n nixnaxo̱ꞌ mbá xúgíí rí mba̱ꞌyáxo̱ꞌ ná nakuáxo̱ꞌ.

Na̱ga̱nú Páblo̱ ná Róma̱

11 Ído̱ ninújngoo atsúun go̱nꞌ rí juwaxo̱ꞌ ná mbaa rúꞌkhue̱n, a̱ꞌkhue̱n nijnguánxo̱ꞌ ná awúun mbá guꞌwá-rguwa rí na̱ꞌkha̱ ná Alejandría̱ rí ni̱we̱je̱ naꞌcho̱o̱ ikhín kajngó ma̱nújngoo go̱nꞌ rí naꞌne ngúwán. Guꞌwá-rguwa rúꞌkhue̱n jayá xtiꞌkhuu Kásto̱r ga̱jma̱á Pólu̱ks. 12 Ído̱ niguáꞌnúxo̱ꞌ ná Sirakúsa̱, niwajúnxo̱ꞌ mbá atsú mbiꞌi ikhín. 13 A̱ꞌkhue̱n nigájnaxo̱ꞌ nikuáxo̱ꞌ mbá nawa̱a̱ rawuun iya jamí niguáꞌnúxo̱ꞌ ná Réjio̱. Ído̱ watse rí i̱mba̱ mbiꞌi ni̱ga̱nú gíñá rí na̱ꞌkha̱ ná giaxu̱u̱ jawáá, ikhaa jngó ndiyoo nigájnaxo̱ꞌ, jamí mbiꞌi riajmu̱u̱ niguáꞌnúxo̱ꞌ ná Puteóli̱. 14 Ikhín ni̱xkamiixo̱ꞌ a̱ngia̱nꞌlóꞌ, jamí nithan-jáñaxo̱ꞌ rí ma̱nguanáxo̱ꞌ ga̱jma̱á nindxúu̱n mbá juwan mbiꞌi. Nda̱wa̱á a̱ꞌkhue̱n nikuáxo̱ꞌ ná Róma̱. 15 Ído̱ ni̱dxawíín a̱ngia̱nꞌlóꞌ tsí júwa̱ꞌ ná Róma̱ rí nakuáxo̱ꞌ ikhín, a̱ꞌkhue̱n niguwée̱ꞌ gútsijnaxo̱ꞌ ná Xuáá drígo̱o̱ Ápio̱, jamí ná mbiꞌyuu Atsú Guꞌwá ná nawájun xa̱bo̱. Ído̱ Páblo̱ ndiꞌñúú a̱ngia̱nꞌlóꞌ, a̱ꞌkhue̱n niríguu̱ la gamaku inuu Ana̱ꞌlóꞌ jamí ndiyáa la tsiakhe̱. 16 Ído̱ niguáꞌnúxo̱ꞌ ná Róma̱, a̱ꞌkhue̱n xa̱bo̱ tsí naꞌthán-ñájúún tsí ku̱ra̱tuun ajwa̱nꞌ nixnáxii̱n xa̱bo̱ tsí jaguu̱n magóó géjwa̱nꞌ ná ñawúun xa̱bo̱ tsí naꞌthán-ñájúún tsí nu̱ña̱wa̱án. Xómáꞌ*28.16 Ríga̱ mbá tikhu i̱yi̱i̱ꞌ griégo̱ rí wayuu rí tsíꞌthán: «a̱ꞌkhue̱n xa̱bo̱ tsí naꞌthán-ñájúún tsí ku̱ra̱tuun ajwa̱nꞌ nixnáxii̱n tsí jaguu̱n magóó géjwa̱nꞌ ná ñawúun xa̱bo̱ tsí naꞌthán-ñájúún tsí nu̱ña̱wa̱án. Xómáꞌ». Páblo̱ nijanáá rí ma̱xtáa mbá guꞌwá janíí jamí ni̱tia̱wáa̱n eꞌne mbáa xa̱bo̱ tsí jayá ajwa̱nꞌ.

Páblo̱ naꞌthán-ráꞌa ajngóo Ana̱ꞌlóꞌ ná Róma̱

17 Ído̱ ninújngoo máꞌ atsú mbiꞌi, a̱ꞌkhue̱n Páblo̱ nindxaꞌwúún xa̱bo̱ judío̱ tsí ñajúún xa̱bo̱ ede̱, tsí júwa̱ꞌ máꞌ ikhín. Ído̱ nijúwe̱e̱ꞌ mbá ꞌnduꞌ, a̱ꞌkhue̱n niꞌthúu̱n xáꞌnii:

—Xa̱bo̱ buanuu a̱ngui̱nꞌ, ikhúúnꞌ nda̱a̱ nitháan rí ra̱máján ni̱ñu̱úlo̱ꞌ xa̱bo̱ xuajñalóꞌ, ni máꞌ tátha̱n rí ra̱máján ga̱jma̱á numuu rí nene̱ jañúú táta̱-xi̱ꞌñálóꞌ wajyúú. Maske máꞌ xúꞌkhue̱n, asndo nákhí máꞌ ná Jerusalén ñúꞌún nikhúúnlo̱ꞌ jamí waxnáxu̱ún rí ma̱ꞌgá géjwa̱nꞌ ná ñawúún xa̱bo̱ Róma̱. 18 Ído̱ rí ikhii̱n wámbúu̱n niñi̱ꞌ mbaꞌa graxe̱, a̱ꞌkhue̱n ndiñúu̱ mune̱-jríñúu̱ꞌ, numuu rí na̱nguá ni̱xkamaa̱ nimbá aꞌkhúnꞌ rí asndo jaꞌyoo ma̱ja̱ñúꞌ. 19 Xómáꞌ xa̱bo̱ judío̱ niwajún-ꞌthíi̱n kajngó ma̱xáwaná-ti̱yo̱ꞌ, ikhaa jngó ni̱nda̱ꞌa̱lo̱ꞌ rí thúngaa Sésa̱r gáxudaa awan ga̱jma̱á numuꞌ, maske máꞌ na̱nguá gúꞌdo̱ꞌ rí ma̱ne̱ aꞌkhúún xa̱bo̱ xuajñuꞌ. 20 Ikhaa numuu ríge̱ꞌ ni̱ndxa̱ꞌwa̱ꞌlaꞌ ma̱guwalaꞌ, kajngó mba̱ya̱ꞌlaꞌ jamí ma̱tha̱nꞌlaꞌ. Nandoꞌ rí ma̱gi̱da̱ꞌ idxa̱ꞌlaꞌ rí ikhúúnꞌ xtoꞌóꞌ ga̱jma̱á ñuu ajwa̱nꞌ ríge̱ꞌ, ga̱jma̱á numuu rí guáꞌthi̱ínlóꞌ ga̱jma̱á mbá jañii a̱kia̱nꞌlóꞌ tsáanꞌ ñajwanlóꞌ xa̱bo̱ Israél.

21 A̱ꞌkhue̱n ikhii̱n nitháa̱n:

—Ikháanꞌ túdrígúxo̱ꞌ nimbá i̱yi̱i̱ꞌ rí na̱ꞌkha̱ ná Judéa̱ rí naꞌthán ga̱jma̱á numaaꞌ ikháánꞌ, ni máꞌ táꞌkha̱ nimbáa dxájwalóꞌ ñúꞌún tsí maꞌthánxo̱ꞌ rí ra̱máján ithane̱. 22 I̱ndo̱ó máꞌ numuu rí nandaxo̱ꞌ mu̱dxawíín rí natatsaꞌwá-mina̱ꞌ ikháánꞌ. Numuu nu̱dxawíínxo̱ꞌ rí asndo nguáa máꞌ nuthan xa̱bo̱ rí ra̱máján ga̱jma̱á numuu gisngáá mi̱nduwa ríge̱ꞌ.

23 A̱ꞌkhue̱n ni̱ꞌgíi̱ mbá mbiꞌi rí ma̱mba̱xíi̱n gajmíi̱ Páblo̱, jamí ído̱ ni̱ga̱nú mbiꞌi rúꞌkhue̱n rá, phú mbaꞌiin xa̱bo̱ niguáꞌnú ná guꞌwá rí xtáa̱. A̱ꞌkhue̱n asndo nákhí miꞌcha̱ jamí asndo wakhíí Páblo̱ niꞌthán-makúu̱n ga̱jma̱á numuu rí Ana̱ꞌlóꞌ ñajuun tsí naꞌthán-ñájúún xa̱bo̱. Naꞌnii̱ rí ma̱nimbúu̱n juyáa̱ Jesús ga̱jma̱á majñu̱u̱ xtángawoo Moisés jamí ga̱jma̱á majñu̱u̱ i̱ñu̱ú tsí ni̱rawíjnga̱a ajngóo Ana̱ꞌlóꞌ wajyúú. 24 Mbá tikhuun ninimbu̱únꞌ ajngáa rí niꞌthán Páblo̱, xómáꞌ tsí i̱ꞌwíin ra̱khúu̱n gánimbúu̱n. 25 Jamí ra̱khóo gúwa̱a ju̱múu̱, ikhaa jngó ni̱gíꞌdíi̱n nigúu̱n. A̱ꞌkhue̱n Páblo̱ niꞌthúu̱n ajngáa ríge̱ꞌ: «Áan, phú gakon máꞌ rí niꞌthán Xu̱u̱ꞌ Ana̱ꞌlóꞌ ga̱jma̱á majñu̱u̱ Isaía̱s tsí ni̱gu̱wíjnga̱a ajngóo Ana̱ꞌlóꞌ jno̱ꞌ, nákhí niꞌthúu̱n táta̱-xi̱ꞌñálóꞌ:

26 "Ayu gára̱thu̱ún xa̱bo̱ ná xuajen ríge̱ꞌ:

Maske máꞌ ikháanꞌlaꞌ nu̱dxawíínlaꞌ, ma̱xáfraꞌa̱ꞌlaꞌ.

Maske máꞌ ikháanꞌlaꞌ nu̱ya̱xe̱laꞌ, mu̱xúya̱álaꞌ rí ríga̱.

27 Numuu rí xa̱bo̱ tsíge̱ꞌ neꞌne gúkú a̱kui̱ín.

Nijúgoo ñaꞌwúu̱n,

xúꞌkhue̱n máꞌ nijúgoo idúu̱n.

Kajngó mu̱xúyáa̱ ga̱jma̱á idúu̱n,

ni máꞌ mu̱xúdxawíi̱n ga̱jma̱á ñaꞌwúu̱n,

ni máꞌ ma̱xáfruꞌúu̱n ga̱jma̱á a̱kuíi̱n,

ni máꞌ ma̱xáthangii̱n ná inuꞌ ikhúúnꞌ,

kajngó ma̱xáne̱-thanúu̱lo̱ꞌ".*28.26-27 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 6.9-10.

28 Ikhaa jngó gu̱ya̱álaꞌ rí ajngáa ríge̱ꞌ na̱ka̱ ná inúú xa̱bo̱ tsí ra̱ꞌkháa judío̱ ñajúún, rí ma̱jáwíi̱n gáꞌne Ana̱ꞌlóꞌ. Jamí ikhii̱n rí mu̱dxawíi̱n ne̱». 29 Jamí ído̱ wámbo̱o̱ Páblo̱ niꞌthán ajngáa rúꞌkhue̱n, a̱ꞌkhue̱n nigúun xa̱bo̱ judío̱ jamí phú mikoo nuthan-mijnée̱ awúun máꞌ rí nagúu̱n.*28.29 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngóo kíxnuu ríge̱ꞌ.

30 Xómáꞌ Páblo̱ nixtáa̱ mbá jañii rí a̱jma̱ tsigu ná awúun mbá guꞌwá rí naꞌne-numuu̱, jamí na̱grui̱gúu̱n mbá xúgíin xa̱bo̱ tsí nagóó gúyáa̱. 31 Naꞌthán-ráꞌee̱ a̱pha̱ ná inúú xa̱bo̱ rí Ana̱ꞌlóꞌ ñajuun tsí naꞌthán-ñájúún xa̱bo̱, xúꞌkhue̱n máꞌ naꞌsngáa̱ ga̱jma̱á numuu Táta̱ Jesukrísto̱, jamí nimbáa tsírikhoo rí maꞌthée̱n.