Rí nene̱ 6

Naxtaꞌwíin mbá juwiin xa̱bo̱ tsí mu̱mbáyí-jmáá

1 Nákhí mbiꞌi rí ñúꞌún, na̱ka̱-raꞌne mbaꞌiin máꞌ xúꞌkhue̱n tsí nanimbu̱únꞌ juyáá Jesús, a̱ꞌkhue̱n tsí nuthan ajngáa griégo̱ ni̱gíꞌdíi̱n nithan-ri̱ge̱e̱ ga̱jma̱á numúú tsí nuthan ajngáa ebréo̱, rí go̱ꞌóxuáꞌa drígu̱ún tsí nuthan griégo̱ na̱nguá ijanúu̱ rí nawiꞌtháa mbámbá mbiꞌi. 2 A̱ꞌkhue̱n tsí mbá gu̱wa̱ꞌ i̱jmi̱i (12) ni̱ru̱wii̱n mbá xúgíin tsí nanimbu̱únꞌ juyáá Jesús, jamí nithúu̱n: «Na̱nguá máján rí ikháanꞌxo̱ꞌ mu̱ni̱ꞌñááxo̱ꞌ rí nu̱tha̱n-ráꞌaxo̱ꞌ ajngóo Ana̱ꞌlóꞌ, kajngó mu̱strámaxo̱ꞌ xúba̱. 3 Ikhaa jngó, a̱ngui̱nꞌ, gu̱raꞌwíinlaꞌ ikháanꞌlaꞌ ná majña̱ꞌlaꞌ mbá juwiin xa̱bekha tsí ndu̱ya̱álaꞌ rí máján kri̱ga̱ ajngáa ga̱jma̱á numúú, jamí xtáa Xu̱u̱ꞌ Ana̱ꞌlóꞌ ná awúun a̱kui̱ín, xúꞌkhue̱n máꞌ nafruꞌu̱ún rí máján, kajngó mu̱ꞌxnúu̱lóꞌ ñajun ríge̱ꞌ muni̱i̱. 4 Xómáꞌ ikháanꞌxo̱ꞌ mu̱xúni̱ꞌñááxo̱ꞌ rí mu̱tha̱n-jáñííxo̱ꞌ Ana̱ꞌlóꞌ jamí rí mu̱tha̱n-ráꞌaxo̱ꞌ ajngóo̱».

5 A̱ꞌkhue̱n mbá xúgíi̱n ni̱ni̱gúu̱n ju̱ma̱ rúꞌkhue̱n. A̱ꞌkhue̱n ni̱ríya̱a̱ꞌ Estéba̱n, tsí phú wéje̱ a̱kui̱in ná inuu Ana̱ꞌlóꞌ jamí xtáa Xu̱u̱ꞌ Ana̱ꞌlóꞌ ná awúun a̱kui̱in. Mangaa máꞌ ni̱raꞌwíi̱n Felípe̱, Próko̱ro̱, Nikanór, Timón, Parména̱s, jamí Nikolás tsí na̱ꞌkha̱ ná Antiokía̱ jamí neꞌne-mina̱aꞌ xa̱bo̱ judío̱. 6 Ikhiin tsúꞌkhue̱n ni̱xna̱xíi̱n ná inúú tsí nixúngui̱inꞌ Jesús, xómáꞌ ikhii̱n nithán-jáñíi̱ Ana̱ꞌlóꞌ ga̱jma̱á numúú tsúꞌkhue̱n, a̱ꞌkhue̱n ni̱xkra̱mii̱ꞌ.

7 A̱ꞌkhue̱n rí i̱tha̱án máꞌ ni̱ka̱-ra̱dróꞌoo ajngóo Ana̱ꞌlóꞌ, jamí i̱tha̱án máꞌ ni̱ka̱-raꞌne mbaꞌiin tsí nanimbu̱únꞌ juyáá Jesús ná Jerusalén. Jamí asndo dxakuun máꞌ mangiin nanimbu̱únꞌ juyáá gisngáá ga̱jma̱á numuu Jesús.

Nu̱rtuwii̱n Estéba̱n

8 Xómáꞌ Estéba̱n, phú mba̱a̱ na̱gu̱ma-tsakun-rámaa̱ xúꞌkhue̱n máꞌ phú gíꞌdoo̱ ski̱yu̱u̱ꞌ Ana̱ꞌlóꞌ, jamí naꞌnii̱ rí phú wáá jamí rí phú namakúún xa̱bo̱ xuajen eꞌne. 9 A̱ꞌkhue̱n ni̱tu̱xu̱ún mbá tikhuun xa̱bo̱ tsí traꞌi̱in ná guꞌwá rí na̱gi̱mbíin xa̱bo̱ judío̱ rí jayá mbiꞌyuu Tsí Nijáwíin, ná na̱gi̱mbíin xa̱bo̱ judío̱ tsí naguwá ná Siréne̱, ná Alejandría̱, ná Silísia̱ jamí ná Ásia̱, ikhiin tsúꞌkhue̱n na̱tsa̱ñúu̱ gajmíi̱ Estéba̱n. 10 I̱ndo̱ó máꞌ numuu rí tsíꞌngúu̱n gúriꞌñáa̱ rí na̱ma̱ñuu̱ ni máꞌ Xu̱u̱ꞌ Ana̱ꞌlóꞌ tsí naꞌthán ga̱jma̱á majñu̱u̱ ikhaa̱. 11 A̱ꞌkhue̱n nene̱-numúu̱ mbá tikhuun xa̱bo̱ kajngó muthan rí ni̱dxawíín rí Estéba̱n naꞌthán ajngáa xkawe̱ꞌ ga̱jma̱á numuu Moisés jamí ga̱jma̱á numuu Ana̱ꞌlóꞌ. 12 Xúꞌkhue̱n máꞌ nene̱-rájíi̱n xa̱bo̱ xuajen, xa̱bo̱ buanuu jamí xa̱bo̱ tsí nusngáá xtángoo rí mu̱xu̱xíi̱ a̱ꞌwá. A̱ꞌkhue̱n ni̱dráꞌii̱n ni̱rtuwii̱n Estéba̱n, jamí nigóo̱ juya̱a̱ ná inúú xa̱bo̱ buanuu ede̱. 13 Xúꞌkhue̱n máꞌ ni̱xna̱xíi̱n xa̱bo̱ tsí na̱ka̱ma̱xu̱ún ajngáa. Ikhiin tsúꞌkhue̱n nithan: «Xa̱bo̱ tsíge̱ꞌ tsíniñuu-raꞌthán ajngáa xkawe̱ꞌ ga̱jma̱á numuu guꞌwá dxákuun rí jaꞌwu ge̱jyoꞌ, xúꞌkhue̱n máꞌ ga̱jma̱á numuu xtángawoo Moisés. 14 Jamí ni̱dxawíínxo̱ꞌ rí naꞌthée̱n rí Jesús tsí na̱ꞌkha̱ Nasarét ma̱ꞌne-gámba̱a la guꞌwá dxákuun ríge̱ꞌ, xúꞌkhue̱n máꞌ mariꞌkhuu̱ rí nu̱ꞌne̱ jayalóꞌ, rí nixnálóꞌ Moisés mu̱ꞌne̱, méꞌ».

15 A̱ꞌkhue̱n mbá xúgíin xa̱bo̱ tsí trigi̱in ná gachúún xa̱bo̱ buanuu ede̱, ni̱ya̱xíi̱ Estéba̱n, jamí ndiyáa̱ rí xómá jaꞌnii inuu mbáa ánje̱l jaꞌnii inuu̱.