Rí nene̱ 15

Na̱gi̱mbíin xa̱bo̱ buanuu ede̱ ná Jerusalén

1 A̱ꞌkhue̱n mbá tikhuun xa̱bo̱ tsí naguwá ná Judéa̱ nusngúu̱n a̱ngia̱nꞌlóꞌ xáꞌnii: «Xí tsíya̱laꞌ tsina jndi xómá naꞌthán ná xtángawoo Moisés, ma̱xáxóo ma̱jríñáaꞌlaꞌ». 2 A̱ꞌkhue̱n Páblo̱ ga̱jma̱á Bernabé phú mba̱a̱ ajngáa niguáꞌdáa̱ ga̱jma̱á nindxu̱ún xa̱bo̱ tsúꞌkhue̱n. Ikhaa jngó nimbánuu rí Páblo̱ ga̱jma̱á Bernabé magóo̱ ná Jerusalén, gajmíi̱ i̱ꞌwíin tsí nanimbu̱únꞌ juyáá Jesús, magóo̱ gúñúu̱ tsí nixúngui̱inꞌ Jesús jamí xa̱bo̱ buanuu tsí juya̱ idxu̱u̱ ikhín, kajngó muthan-mijnée̱ ga̱jma̱á numuu ajngáa rúꞌkhue̱n. 3 Ikhaa jngó waxúꞌmii̱ nene̱ tsí nanimbu̱únꞌ juyáá Jesús ná Antiokía̱. Ído̱ ninújngúu̱n ná numbaa Fenísia̱ ga̱jma̱á numbaa Samária̱, nithee̱n xáne nithangi̱in xa̱bo̱ tsí ra̱ꞌkháa judío̱ ñajúún ná inuu Ana̱ꞌlóꞌ. Jamí mbá xúgíin a̱ngia̱nꞌlóꞌ phú gagi a̱kuíi̱n neꞌne ído̱ ni̱dxawíi̱n ajngáa rúꞌkhue̱n. 4 Ído̱ niguáꞌníi̱ ná Jerusalén, a̱ꞌkhue̱n wa̱tri̱gúu̱n nene̱ tsí nanimbu̱únꞌ juyáá Jesús, xúꞌkhue̱n máꞌ tsí nixúngui̱inꞌ Jesús, jamí xa̱bo̱ buanuu tsí juya̱ idxu̱u̱. A̱ꞌkhue̱n Páblo̱ ga̱jma̱á Bernabé nithee̱n mbá xúgíí rí neꞌne Ana̱ꞌlóꞌ ga̱jma̱á majñúu̱ ikhii̱n. 5 I̱ndo̱ó máꞌ numuu rí mbá tikhuun tsí ninimbu̱únꞌ juyáá Jesús, ikhiin tsí ninindxu̱ún a̱ngui̱ín xa̱bo̱ fariséo̱, ni̱tu̱xúu̱n jamí nithee̱n: «Ndaꞌyóo rí xa̱bo̱ tsí ra̱ꞌkháa judío̱ ñajúún, tsí nathangi̱in ná inuu Ana̱ꞌlóꞌ, mbuye̱e̱ tsina jndi jamí mi̱ꞌxná-ñájúu̱n rí mune̱-mbáníi̱ xtángawoo Moisés».

6 A̱ꞌkhue̱n nimbáxi̱in tsí nixúngui̱inꞌ Jesús gajmíí xa̱bo̱ buanuu tsí juya̱ idxu̱u̱ kajngó muthan-mijnée̱ ga̱jma̱á numuu rúꞌkhue̱n. 7 Jamí ído̱ neꞌne mba̱yo̱ꞌ guéño máꞌ rí nuthan-mijnée̱ ga̱jma̱á numuu rúꞌkhue̱n, a̱ꞌkhue̱n ni̱tu̱xu̱u̱ꞌ Pédro̱ jamí niꞌthúu̱n: «Xa̱bo̱ buanuu a̱ngui̱nꞌ, ikháanꞌlaꞌ ndu̱ya̱á máꞌ rí nákhí neꞌne máwáa, Ana̱ꞌlóꞌ niraꞌwúún kajngó ma̱thu̱ún ajngáa máján xa̱bo̱ tsí ra̱ꞌkháa judío̱ ñajúún, kajngó ma̱nimbúu̱n juyáa̱ Ana̱ꞌlóꞌ. 8 Jamí Ana̱ꞌlóꞌ, tsí naꞌne-nuwiin a̱kui̱ín xa̱bo̱ numbaa, nisngájmee̱ rí na̱grui̱gúu̱n nákhí nixnúu̱ Xu̱u̱ꞌ xómá rí nixniálóꞌ ikháánꞌlóꞌ. 9 Jamí nda̱a̱ nimbá rí mixtiꞌkhu neꞌne Ana̱ꞌlóꞌ ga̱jma̱á numúu̱ ikhii̱n ga̱jma̱á ikháánꞌlóꞌ, numuu neꞌne-jaꞌwuu̱ a̱kui̱ín ído̱ rí ninimbúu̱n juyáa̱ ikhaa̱. 10 Ikhaa jngó xúge̱ꞌ rá, náá numuu kajngó nu̱jmaalaꞌ Ana̱ꞌlóꞌ, nu̱rígulaꞌ mbá eꞌda rí ji̱ñu̱u̱ ná tsu̱du̱ún tsí nanimbu̱únꞌ juyáá Jesús róꞌ. Asndo ni máꞌ táta̱-xi̱ꞌñálóꞌ wajyúú táꞌgu̱ún gágóó juñu̱ú rúꞌkhue̱n, ni máꞌ ikháánꞌlóꞌ táꞌnga̱ꞌlóꞌ gúꞌgua̱ juꞌyálóꞌ ne̱. 11 A̱ꞌkhue̱n gakon, ikháánꞌlóꞌ nanimba̱ꞌlóꞌ rí najríñáaꞌlóꞌ ga̱jma̱á numuu rí phú nandoo Táta̱ Jesús jaꞌyalóꞌ, xúꞌkhue̱n máꞌ ikhii̱n mangii̱n».

12 A̱ꞌkhue̱n mbá xúgíin xa̱bo̱ tsí mbaꞌiin neꞌne-wíyuu rawúún, jamí ni̱dxawíi̱n rí naꞌthán Bernabé ga̱jma̱á Páblo̱. Nuthee̱n rí phú wáá jamí nimakúún xa̱bo̱ neꞌne Ana̱ꞌlóꞌ ga̱jma̱á nindxúu̱n ikhii̱n ná majñu̱ú xa̱bo̱ tsí ra̱ꞌkháa judío̱ ñajúún. 13 Jamí ído̱ wámbúu̱n nithee̱n, a̱ꞌkhue̱n niꞌthán Santiágo̱:*15.13 Ná i̱yi̱i̱ꞌ griégo̱ rí wayuu naꞌthán «Jakóbo̱», rí nithán «Santiágo̱» ná ajngáa xtílo̱o̱. «Xa̱bo̱ buanuu a̱ngui̱nꞌ, gu̱dxawíínlaꞌ rí ma̱tha̱nꞌlaꞌ. 14 Simón*15.14 Simón ñajuun i̱mba̱ mbiꞌyuu Pédro̱. niꞌthánlóꞌ máꞌ rí asndo nákhí ginii, Ana̱ꞌlóꞌ nisngájma rí nandoo jaꞌñúú xa̱bo̱ tsí ra̱ꞌkháa judío̱ ñajúún, jamí niraꞌwíi̱n mangii̱n kajngó ma̱nindxúu̱n xa̱bo̱ xuajñuu̱ tsí nune̱-mba̱a̱ ikhaa̱. 15 Jamí ikhaa ríge̱ꞌ naꞌkho̱-mina̱aꞌ ga̱jma̱á rí nithan xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú, xómá ka̱ma naꞌthán:

16 "Ído̱ gánújngoo ríge̱ꞌ ma̱thangu̱únlo̱ꞌ

jamí ma̱ne̱ rí ma̱gua̱xúun xa̱bo̱ guꞌwóo Dabíd, tsí ningáxi̱in mbayíí.

Ma̱ni̱i guꞌwóo̱ rí ningudi-ri̱ga̱a la,

Jamí ma̱ku̱xíi ne̱ mbu̱júꞌ.

17 Ikhaa jngó tsí i̱ꞌwíin xa̱bo̱ mbuꞌyáa Táta̱,

jamí mbá xúgíin xa̱bo̱ tsí ra̱ꞌkháa judío̱ ñajúún,

tsí nu̱xri̱ga̱á mbiꞌyuꞌ.

18 Xkuaꞌnii iꞌthán Táta̱, tsí nasngájma mbá xúgíí ríge̱ꞌ

asndo nákhí máꞌ wajyúú mbiꞌi".*15.18 Ajngáa ríge̱ꞌ na̱ꞌkha̱ ná I̱yu̱u̱ꞌ Amós 9.11-12.

19 Ikhaa jngó, ikhúúnꞌ na̱tha̱nlo̱ꞌ rí mu̱xúꞌñu̱úlóꞌ ga̱jma̱á tsiakhe̱ rí mune̱-mbáníí xtángoo xa̱bo̱ tsí ra̱ꞌkháa judío̱ ñajúún, tsí nathangi̱in ná inuu Ana̱ꞌlóꞌ. 20 I̱ndo̱ó máꞌ gu̱ꞌtháánlóꞌ mbá i̱yi̱i̱ꞌ mu̱xu̱ꞌmálóꞌ inúu̱, ná nuꞌthúu̱nlóꞌ ríge̱ꞌ: rí gune̱-janíí-mijnée̱ inuu rí waxnáxe̱ ná inúú tsí ra̱ꞌkháa Ana̱ꞌlóꞌ ñajúún, rí mu̱xúbúu̱n gajmíi̱ xa̱bo̱ tsí túya̱a̱, rí mu̱xúphi̱i̱ xuñúú xu̱kú tsí nixngáwúun, ni máꞌ mu̱xúphi̱i̱ iꞌdi. 21 Numuu rí asndo nákhí máꞌ wajyúú mbiꞌi júwa̱ꞌ ná mbámbá xuajen tsí nusngáá xtángawoo Moisés ná awúun mbámbá guꞌwá rí na̱gi̱mbíin xa̱bo̱ judío̱, jamí na̱gi̱ꞌxnuu ne̱ mbámbá mbiꞌi rí nduya̱a xu̱únꞌ xa̱bo̱».

I̱yi̱i̱ꞌ rí nene̱ xa̱bo̱ buanuu ná Jerusalén

22 A̱ꞌkhue̱n tsí nixúngui̱inꞌ Jesús gajmíí xa̱bo̱ buanuu, xúꞌkhue̱n máꞌ mbá xúgíin tsí nanimbu̱únꞌ juyáá Jesús, niguáꞌdáa̱ awan rí mu̱raꞌwíi̱n mbá tikhuun tsí ikhii̱n, jamí mu̱xu̱ꞌmii̱ magóo̱ ná Antiokía̱ ga̱jma̱á nindxu̱u̱ Páblo̱ jamí Bernabé. A̱ꞌkhue̱n ni̱raꞌwíi̱ Júda̱s, tsí nutháa̱n Barsabás, jamí Síla̱s, tsí phú nitiamakúún ná majñu̱ú a̱ngia̱nꞌlóꞌ. 23 Jamí nijanúu̱ mbá i̱yi̱i̱ꞌ rí mbuye̱e̱ magóo̱ rí naꞌthán xáꞌnii:

«Ikháanꞌxo̱ꞌ, tsáanꞌ ñajwanxo̱ꞌ tsí nixúngui̱inꞌ Jesús, gajmiáxo̱ꞌ xa̱bo̱ buanuu jamí mbá xúgíin a̱ngia̱nꞌlóꞌ, nu̱xu̱ꞌmáxo̱ꞌ i̱yi̱i̱ꞌ ríge̱ꞌ inalaꞌ ikháanꞌlaꞌ, tsáanꞌ ñajwanlaꞌ a̱ngia̱nꞌxo̱ꞌ tsí ra̱ꞌkháa xa̱bo̱ judío̱ ñajúún, tsáanꞌ juwalaꞌ ná Antiokía̱, ga̱jma̱á Síria̱ jamí Silísia̱. Nu̱ra̱xáanꞌlaꞌxo̱ꞌ.

24 »Ni̱dxawíínxo̱ꞌ rí nigájnúú mbá tikhuun xa̱bo̱ ná majña̱ꞌxo̱ꞌ ge̱jyoꞌ, tsí túxna̱-ñájúúnxo̱ꞌ rí magóó. Ikhiin tsúꞌkhue̱n nuxnalaꞌ gaꞌkho̱ ga̱jma̱á ajngáa rí nuthanlaꞌ, jamí nune̱-ngra̱ꞌáa̱nꞌlaꞌ, numuu rí nuxna-ñajwanlaꞌ rí mbu̱ya̱laꞌ tsina jndi jamí mu̱ne̱-mbáníílaꞌ rí naꞌthán xtángawoo Moisés.*15.24 Ríga̱ mbá tikhu i̱yi̱i̱ꞌ griégo̱ rí wayuu ná tsíꞌkha̱ ajngáa ríge̱ꞌ: «numuu rí nuxna-ñajwanlaꞌ rí mbu̱ya̱laꞌ tsina jndi jamí mu̱ne̱-mbáníílaꞌ rí naꞌthán xtángawoo Moisés». 25 Ikhaa jngó niguáꞌdááxo̱ꞌ awan, rí mu̱raꞌwíinxo̱ꞌ xa̱bo̱ buanuu jamí mu̱xu̱ꞌmíi̱xo̱ꞌ magóo̱ inalaꞌ ga̱jma̱á nindxu̱u̱ dxájwalóꞌ Bernabé jamí Páblo̱. 26 A̱ngia̱nꞌlóꞌ tsúꞌkhue̱n asndo ngamí ma̱ja̱ñúu̱ ga̱jma̱á numuu rí nuni̱i̱ ñajuun Táta̱ Jesukrísto̱. 27 Ikhaa jngó nu̱xu̱ꞌmáaxo̱ꞌ Júda̱s ga̱jma̱á Síla̱s. Ikhii̱n mangii̱n muthanlaꞌ ikhaa máꞌ rí nu̱tha̱nxo̱ꞌ ge̱jyoꞌ.

28 »Numuu rí máján máꞌ iꞌyoo Xu̱u̱ꞌ Ana̱ꞌlóꞌ, jamí xúꞌkhue̱n máꞌ i̱ya̱á mangáanꞌxo̱ꞌ, rí mu̱xúríguxo̱ꞌ nimbá eꞌda rí ji̱ñu̱u̱ ná tsu̱da̱ꞌlaꞌ. I̱ndo̱ó máꞌ ríge̱ꞌ ñajuun rí ndaꞌyóo mu̱ne̱laꞌ: 29 gu̱ne̱-janíí-mijnálaꞌ inuu rí waxnáxe̱ ná inúú tsí ra̱ꞌkháa Ana̱ꞌlóꞌ ñajúún, mu̱xúpholaꞌ iꞌdi, ni máꞌ mu̱xúpholaꞌ xuñúú xu̱kú tsí nixngáwúun, jamí mu̱xúba̱ꞌ gajmiálaꞌ xa̱bo̱ tsí túya̱a̱laꞌ. Xí nu̱ña̱wa̱n-mijnálaꞌ rí mu̱xúne̱laꞌ rúꞌkhue̱n, máján máꞌ e̱ne̱laꞌ xúꞌkhue̱n rá. A̱juwa májánlaꞌ».

30 Ikhaa jngó ikhiin tsí waxúngui̱inꞌ nigóó ná xuajen Antiokía̱. Jamí ído̱ niguáꞌníi̱ ni̱ru̱wii̱n tsí nambáxi̱in ikhín, a̱ꞌkhue̱n ni̱xna̱xíi̱ i̱yi̱i̱ꞌ rí juye̱e̱. 31 Ído̱ wámbu̱ún a̱ngia̱nꞌlóꞌ ni̱raxnuu ne̱, a̱ꞌkhue̱n phú gagi a̱kuíi̱n neꞌne ga̱jma̱á numuu ajngáa tsiakhe̱ rí naꞌthán ne̱.

32 Xómáꞌ Júda̱s ga̱jma̱á Síla̱s, nithán-múꞌúu̱n guéño a̱ngia̱nꞌlóꞌ jamí nixnaa̱ la tsiakhe̱, numuu rí xa̱bo̱ tsí nu̱rawíjnga̱a ajngóo Ana̱ꞌlóꞌ ñajúu̱n mangii̱n. 33 Jamí ído̱ neꞌne mba̱yo̱ꞌ máꞌ rí júwe̱e̱ꞌ ikhín, a̱ꞌkhue̱n waꞌthán-ngawúu̱n ga̱jma̱á gagi nene̱ a̱ngia̱nꞌlóꞌ, kajngó ma̱thangii̱n ná inúú tsí waxúguii̱nꞌ nene̱. 34 Xómáꞌ Síla̱s ndiyoo rí ma̱nguanúu ikhín.*15.34 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa rí na̱ꞌkha̱ ná kíxnuu 34. 35 Jamí Páblo̱ ga̱jma̱á Bernabé ninguanúu̱ ná Antiokía̱. Ikhii̱n gajmíi̱ mbaꞌiin i̱ꞌwíin a̱ngia̱nꞌlóꞌ nisngáa̱ ajngóo Táta̱ jamí nithan-raꞌee̱ ajngáa máján.

Páblo̱ naniñuu Bernabé, jamí nagájnuu̱ rí riajma̱ miꞌtsú jayóo̱ ajngóo Ana̱ꞌlóꞌ

36 Nda̱wa̱á ído̱ ninújngoo mbá wátha̱ wáa mbiꞌi, a̱ꞌkhue̱n Páblo̱ niꞌthúun Bernabé: «Ga̱thanga̱ánꞌlóꞌ mu̱ꞌgua̱ gúꞌñúú a̱ngia̱nꞌlóꞌ mbá xúgíí xuajen ná niꞌthán-raꞌalóꞌ ajngóo Táta̱, kajngó mbu̱ꞌyáálóꞌ xáne júwe̱e̱ꞌ». 37 Jamí Bernabé nandoo rí ma̱ꞌga Juáán ga̱jma̱á nindxúu̱n, tsí nutháa̱n Márko̱s. 38 Xómáꞌ Páblo̱ táꞌne májáan a̱kuii̱n rí ma̱ꞌga ga̱jma̱á nindxúu̱n, numuu rí Márko̱s niniñúu̱ asndo ná numbaa Panfília̱, jamí táꞌgee̱ ga̱jma̱á nindxúu̱n ná ñajun rí nuni̱i̱. 39 Jamí Páblo̱ ga̱jma̱á Bernabé ra̱khóo mbá jayu gáwaꞌdáa̱ awan, rúꞌkhue̱n neꞌne rí mu̱ni̱ꞌñá-mijnée̱. A̱ꞌkhue̱n Bernabé ni̱ka̱ ga̱jma̱á Márko̱s, nijngúu̱n ná awúun guꞌwá-rguwa, nigóo̱ ná Chípre̱. 40 Xómáꞌ Páblo̱, niraꞌwíi̱ Síla̱s kajngó ma̱ꞌga ga̱jma̱á nindxu̱u̱. A̱ꞌkhue̱n a̱ngia̱nꞌlóꞌ ni̱xna̱xíi̱n ná ñawúun Táta̱, jamí nigájnúu̱ nigóo̱. 41 A̱ꞌkhue̱n Páblo̱ ga̱jma̱á Síla̱s ninújngúu̱n ná numbaa Síria̱ ga̱jma̱á Silísia̱, jamí nuxnaa̱ la tsiakhe̱ a̱kui̱ín mbámbá kuthuun tsí nanimbu̱únꞌ juyáá Jesús.