1 A̱ngui̱nꞌ, tsáanꞌ wéje̱ a̱kia̱nꞌlaꞌ ná inuu Tátiálóꞌ Jesukrísto̱, tsí maphú gíꞌdoo numuu, ra̱gíꞌmaa rí mu̱raꞌwíinlaꞌ xa̱bo̱ tsí mu̱ne̱-nga̱ju̱únlaꞌ. 2 Ga̱ju̱ma̱ꞌlaꞌ rí ná na̱gi̱mbáanꞌlaꞌ a̱ꞌkhue̱n na̱ga̱nú mbáa xa̱bo̱ tsí phú gíꞌdoo, traꞌa̱ xábí ajwa̱nꞌ mo̱jmo̱ꞌ ná i̱ji̱in ñawúu̱n jamí phú mitsaan xtíñuu̱. Awúun máꞌ rúꞌkhue̱n na̱ga̱nú mbáa xa̱bo̱ tsí ngínáa mangaa, júwuu̱n xtíin ska rí wayuu mi̱ndaꞌkho. 3 Jamí ga̱ju̱ma̱ꞌlaꞌ rí phú máján nu̱ne̱-nga̱jwa̱álaꞌ tsí mitsaan xtíñuu jamí nu̱tháa̱nlaꞌ: «Táta̱, araꞌún ná xíle̱ rí máján wáa ge̱jyoꞌ». Xómáꞌ tsí ngínáa nu̱tha̱ánlaꞌ: «Ikháánꞌ, ariajún máꞌ a̱ꞌkhue̱n o araꞌún mbayíí ge̱jyoꞌ mbo̱ꞌ». 4 Xí xkuaꞌnii e̱ne̱laꞌ, nu̱raꞌwíinlaꞌ xa̱bo̱ tsí mu̱ne̱-nga̱ju̱únlaꞌ, jamí nu̱ne̱-mijnálaꞌ xómá xa̱bo̱ ñajun tsí tsíra̱jwa̱ꞌ mújúún ga̱jma̱á numúú xa̱bo̱.

5 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, gu̱dxawíínlaꞌ ríge̱ꞌ: Ana̱ꞌlóꞌ niraꞌwíin xa̱bo̱ tsí ngíníi ná numbaa ríge̱ꞌ, kajngó ma̱nindxúu̱n xa̱bo̱ tsí phú wéje̱ a̱kui̱ín ná inuu̱, jamí rí ma̱nindxúu̱n xa̱bo̱ tsí naꞌthán-ñájúún Ana̱ꞌlóꞌ, rí nixuda-mine̱e̱ꞌ máꞌ ga̱jma̱á numúú tsí nandúún juyáa̱. 6 Xómáꞌ ikháanꞌlaꞌ, nu̱ñu̱úlaꞌ tsí ngíníi asndo xómá rí nda̱a̱ mbá jayu numúu̱. Á ra̱ꞌkhá xa̱bo̱ tsí phú guáꞌdáá ñajúún tsí nune̱-ngínáaꞌlaꞌ jamí nagóo̱ judáa̱nꞌlaꞌ ga̱jma̱á tsiakhe̱ ná guꞌwá-ñajun rá dxe̱ꞌ. 7 Á ra̱ꞌkhá ikhii̱n ñajúu̱n tsí nuthan-xkawi̱i̱ꞌ ga̱jma̱á numuu Jesús tsí ñajuun ña̱ꞌñalaꞌ rá dxe̱ꞌ.

8 Phú máján máꞌ e̱ne̱laꞌ xí gakon rí nu̱ne̱-mbáníílaꞌ xtángoo rí phú i̱tha̱án gíꞌdoo numuu, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ga̱gaaꞌ xtayáá xa̱bo̱ numbaa ga̱jma̱a̱ꞌ xómá rí nandaaꞌ xtaya-mina̱ꞌ ikháánꞌ». 9 I̱ndo̱ó máꞌ numuu rí, xí nu̱raꞌwíinlaꞌ xa̱bo̱ tsí mu̱ne̱-nga̱ju̱únlaꞌ rá, gíꞌmáaꞌlaꞌ aꞌkhán ná inuu Ana̱ꞌlóꞌ, numuu rí tsíne̱-mbáníílaꞌ xtángoo rúꞌkhue̱n. 10 Numuu rí xa̱bo̱ tsí na̱ju̱mu̱u̱ rí naꞌne-mbánuu mbá xúgíí xtángawoo Ana̱ꞌlóꞌ jamí tsíꞌne-mbánuu̱ maske asndo mbóó rí naꞌthán ne̱, gíꞌmaa̱ aꞌkhán rí tsíꞌne-mbánuu̱ ne̱ mbá xúgíí. 11 Numuu rí Ana̱ꞌlóꞌ niꞌthán: «Ma̱xátha̱ba̱a̱ꞌ ga̱jma̱a̱ꞌ xa̱bo̱ tsí tíya̱a̱», jamí ikhaa̱ máꞌ niꞌthée̱n mangaa: «Ma̱xáta̱xíya̱a̱ xa̱bo̱». Ikhaa jngó, xí tsíthabáaꞌ ga̱jma̱a̱ꞌ xa̱bo̱ tsí tíya̱a̱, jamí nataxíya̱a̱ xa̱bo̱ rá, gíꞌmáá aꞌkhán rí tsíthane̱-mbáníí xtángawoo Ana̱ꞌlóꞌ.

12 Ikhaa jngó, gu̱tha̱nlaꞌ jamí ga̱juwalaꞌ xómá gíꞌmaa rí ma̱ju̱wá xa̱bo̱ tsí ma̱gu̱ma-mbáníí numúú ga̱jma̱á mbá xtángoo rí naꞌne-jáwíin xa̱bo̱ ná awúun aꞌkhán. 13 Numuu ído̱ rí Ana̱ꞌlóꞌ ma̱ꞌne-mbánuu ga̱jma̱á numúú xa̱bo̱, ma̱xáñáwíin a̱kuii̱n jaꞌyoo̱ xa̱bo̱ tsí táñáwíin a̱kui̱in jaꞌñúú xa̱bo̱. Tsí nañáwíin a̱kui̱in jaꞌñúú xa̱bo̱, ma̱ꞌngo̱o̱ ído̱ rí ma̱gu̱ma-mbáníí numuu̱.

14 A̱ngui̱nꞌ, xí mbáa naꞌthán: «Ikhúúnꞌ wéje̱ a̱kui̱nꞌ ná inuu Ana̱ꞌlóꞌ», jamí nda̱a̱ nitháan rí máján iꞌnii̱, nda̱a̱ mbá jayu rí gámbáyúu̱ rúꞌkhue̱n. Rí xkuaꞌnii wéje̱ a̱kuii̱n ná inuu Ana̱ꞌlóꞌ, ma̱xáꞌngo̱o̱ rúꞌkhue̱n ma̱ꞌne-jríya̱a̱ꞌ. 15 Ga̱ju̱ma̱ꞌlaꞌ rí mbáa dxájwalóꞌ, xa̱biya̱ o a̱ꞌgo̱, nda̱a̱ xtíñuu̱ jamí nda̱a̱ rí mi̱khui̱i̱, 16 jamí mbáa tsí ikháanꞌlaꞌ naꞌthúu̱n: «Ana̱ꞌlóꞌ gáꞌne-tsakun-rámááꞌ ná mi̱dxu̱uꞌ. Athúwaanꞌ xtíñaaꞌ rí mika jamí atseꞌtso ma̱gi̱ꞌmaaꞌ». Nda̱a̱ rí gámbáyúu̱ ajngáa rúꞌkhue̱n, xí tsíxnúu̱ rí ndaꞌyóo̱. 17 Xkuaꞌnii máꞌ mangaa xa̱bo̱ tsí i̱ndo̱ó máꞌ naꞌthán rí wéje̱ a̱kui̱in ná inuu Ana̱ꞌlóꞌ, jamí tsíꞌnii̱ nimbá rí máján, nda̱a̱ mbá jayu numuu naꞌthée̱n rí wéje̱ a̱kuii̱n ná inuu Ana̱ꞌlóꞌ.

18 Á gáꞌne xí mbáa maꞌthán: «Tikhuun wéje̱ a̱kui̱ín ná inuu Ana̱ꞌlóꞌ, xómáꞌ i̱ꞌwíin nune̱ rí máján». Xómáꞌ ikhúúnꞌ na̱thu̱u̱n xa̱bo̱ tsúꞌkhue̱n: «Ikháánꞌ ma̱xáxóo ma̱ta̱snga̱jmúꞌ rí wéje̱ a̱kia̱anꞌ ná inuu Ana̱ꞌlóꞌ xí na̱nguá ríga̱ rí máján nathane̱. Xómáꞌ ikhúúnꞌ ma̱goo ma̱snga̱jmáaꞌ rí wéje̱ a̱kui̱nꞌ ná inuu Ana̱ꞌlóꞌ ga̱jma̱á majñu̱u̱ rí máján na̱ne̱lo̱ꞌ».

19 Ikháánꞌ nanimba̱a̱ꞌ rí mbáwíi máꞌ tsí ñajuun Ana̱ꞌlóꞌ xtáa. ¡Phú máján máꞌ ithane̱ rí xkuaꞌnii! I̱ndo̱ó máꞌ numuu rí asndo gíñá ꞌguéen máꞌ nanimbu̱únꞌ rí xkuaꞌnii mangiin, jamí asndo naguaꞌii̱n rí namíñúu̱. 20 Ma̱xánindxa̱a̱ꞌ xa̱bo̱ tsí júgoo mbá jayu inuu. Á nandaaꞌ ma̱snga̱jmáaꞌ rí xa̱bo̱ tsí nda̱a̱ rí máján eꞌne, na̱nguá gíꞌdoo numuu rí wéje̱ a̱kuii̱n ná inuu Ana̱ꞌlóꞌ dxe̱ꞌ. 21 Ana̱ꞌlóꞌ niꞌthán rí xa̱bo̱ tsí nánda̱a̱ aꞌkhúun ñajuun táta̱-xi̱ꞌñálóꞌ Abraám ga̱jma̱á majñu̱u̱ rí niꞌnii̱, nákhí nixnáxi̱i̱ a̱dée̱ Isaák ma̱ja̱ñúu ná tsu̱du̱u̱ itsí ja̱rngo̱xe̱ ná nakha-ráma tsi̱gi̱jña̱ꞌ. 22 Nakujma nguáná máꞌ rí Abraám wéje̱ a̱kuii̱n ná inuu Ana̱ꞌlóꞌ ga̱jma̱á majñu̱u̱ rí niꞌnii̱. Jamí ga̱jma̱á majñu̱u̱ rí niꞌnii̱, nigaja̱a̱ asndo neꞌne káxe̱ rí wéje̱ a̱kuii̱n ná inuu Ana̱ꞌlóꞌ. 23 Xkuaꞌnii nimbánuu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ninimbo̱o̱ꞌ Abraám jaꞌyoo Ana̱ꞌlóꞌ, ikhaa jngó Ana̱ꞌlóꞌ niꞌthán rí nánda̱a̱ aꞌkhúu̱n».* Jamí neꞌne mbiꞌyuu̱ «Iyanga̱jwe̱e Ana̱ꞌlóꞌ». 24 Ikhaa jngó ga̱fraꞌa̱ꞌ májánlaꞌ ríge̱ꞌ: Ana̱ꞌlóꞌ naꞌthán rí nánda̱a̱ aꞌkhúun xa̱bo̱ ga̱jma̱á majñu̱u̱ rí máján naꞌnii̱, jamí ra̱ꞌkhá máꞌ i̱ndo̱ó ga̱jma̱á majñu̱u̱ rí wéje̱ a̱kuii̱n ná inuu Ana̱ꞌlóꞌ.

25 Xkuaꞌnii máꞌ Raáb mangaa, a̱ꞌgo̱ tsí na̱ngu̱jwa̱-mína̱ꞌ nákhí wajyúú, Ana̱ꞌlóꞌ niꞌthán rí nánda̱a̱ aꞌkhúu̱n ga̱jma̱á majñu̱u̱ rí máján niꞌnii̱: Ni̱grui̱gúu̱n ná guꞌwóo̱ xa̱bo̱ tsí nigóó gúña̱maa mbaa, jamí nimbáñúu̱ rí ma̱ga̱jnáa̱ ngu̱ꞌwa̱ ga̱jma̱á i̱mba̱ jamba̱a̱. 26 Xómá jaꞌnii xuyuu xa̱bo̱ tsí nijáñuu, nánda̱a̱ xu̱u̱ꞌ ne̱, xkuaꞌnii máꞌ jaꞌnii rí wéje̱ a̱kui̱in xa̱bo̱ ná inuu Ana̱ꞌlóꞌ mangaa, nijáñuu ne̱, xí nda̱a̱ rí máján iꞌnii̱.