1 A̱ngui̱nꞌ, ma̱xánindxa̱ꞌlaꞌ mbá xúgiáanꞌlaꞌ xa̱bo̱ tsí nusngáá, numuu rí ndu̱ya̱álaꞌ máꞌ rí phú i̱tha̱án gakhe̱ maxúdaa awan Ana̱ꞌlóꞌ ga̱jma̱á numa ikháanꞌxo̱ꞌ. 2 Numuu rí mbá xúgiáanꞌlóꞌ na̱ngra̱ꞌáanꞌlóꞌ mbaꞌa miꞌtsú. Xí xtáa mbáa tsí na̱nguá i̱ngra̱ꞌaa ído̱ rí naꞌthán, xa̱bo̱ tsí májáan mbá jayu máꞌ ñajuun tsúꞌkhue̱n, jamí na̱ꞌngo̱o̱ máꞌ rí naꞌthán-ñájun-mine̱e̱ꞌ mbá xúgíi̱ jayu mangaa.

3 Ído̱ rí nu̱xu̱ꞌdáalóꞌ ajwa̱nꞌ ná rawuun guáyo̱, na̱ꞌnga̱ꞌlóꞌ nu̱xu̱ꞌmáa̱ ma̱ꞌgee̱ ná nandalóꞌ rí ma̱ꞌgee̱, jamí na̱ꞌnga̱ꞌlóꞌ nu̱xma̱trígaa̱ mbá xúgíi̱. 4 Gu̱ya̱xi̱ílaꞌ guꞌwá-rguwa mangaa. Mbá ixe̱ lájwíin jayá ikhoo ne̱ rí na̱ka̱ ne̱ ná nandoo xa̱bo̱ tsí na̱ka̱ jayóo ne̱, maske máꞌ phú gakhe̱ narmajngua̱ꞌ ne̱ gíñá. 5 Xúꞌkhue̱n máꞌ jaꞌnii rí ra̱jwa̱nꞌlóꞌ mangaa, mbá xuwi lájwíin ñajuun ne̱, jamí phú mba̱a̱ rí na̱ꞌngo̱o̱ ne̱ naꞌne. ¡Ra̱ꞌkhá tháán mba̱a̱ júba̱ nakha eꞌne mbá lájwíin ri̱ꞌyu̱u̱ agu rí nakhati̱yo̱o̱ꞌ! 6 Rí ra̱jwa̱nꞌlóꞌ jaꞌnii xómá ri̱ꞌyu̱u̱ agu. Ka̱ma ne̱ ná xuyalóꞌ, jamí phú gíꞌdoo ne̱ tsiakhe̱ rí ma̱ꞌne ne̱ mbaꞌa inii rí ra̱máján, xúꞌkhue̱n máꞌ naꞌne-maꞌchúu ne̱ mbá xúgíí xuyalóꞌ. Ndayá ski̱yu̱u̱ꞌ ne̱ ná awúun agu rí nakha jámuu, jamí naꞌne-maꞌchúu ne̱ mbá xúgíí mbiꞌi rí juwalóꞌ.

7 Tsí xa̱bo̱ numbaa na̱ꞌngo̱o̱ naꞌne másuu̱n jamí naxná-ñájúu̱n mbá xúgíin inii xu̱kú-xáná tsí namangu̱únꞌ, xu̱kú xna, xu̱kú tsí nu̱xma̱ta-mijná jamí xu̱kú tsí gatiin ná awúun iya a̱pha̱. 8 Xómáꞌ rí ra̱jwa̱nꞌlóꞌ rá, nimbáa tsíꞌngo̱o̱ gáꞌthán-ñájuun ne̱. Mbá rí xkawe̱ꞌ rí nda̱a̱ xó ma̱wajún-ꞌthi̱ínlóꞌ ñajuun ne̱, jamí gajni̱í thana rí na̱gu̱díin xa̱bo̱ ná awúun ajngáa rí nagájnuu eꞌne ne̱.

9 Ga̱jma̱á ra̱jwa̱nꞌlóꞌ nagájnuu ajngáa ná rawanlóꞌ rí nu̱ꞌne̱-mba̱a̱lóꞌ Ana̱ꞌlóꞌ Mikhuíí, xúꞌkhue̱n máꞌ rí nu̱ꞌxná-máꞌíinlóꞌ xa̱bo̱ tsí ni̱gu̱ma-ku̱mii xómá jaꞌnii Ana̱ꞌlóꞌ. 10 Mbóó máꞌ ná rawanlóꞌ nagájnuu ajngáa rí nu̱ꞌne̱-tsakun-rámiilóꞌ xa̱bo̱ jamí ajngáa rí nu̱ꞌxná-máꞌíinlóꞌ xa̱bo̱. A̱ngui̱nꞌ, ra̱gíꞌmaa ma̱ꞌne rí xkuaꞌnii. 11 Á ma̱goo ma̱ga̱jnúu iya ríná ná iduu iya rí thawuun dxe̱ꞌ. Ma̱xáxóo. 12 Á ma̱goo maxná xndú rí mbiꞌyuu aseitúna̱ mbá ixu̱u̱ ígo̱ dxe̱ꞌ. Ma̱xáxóo. Á ma̱goo maxná xndú ígo̱ mbá ajmu̱u̱ úba̱ dxe̱ꞌ. Ma̱xáxóo a̱ngui̱nꞌ. Xkuaꞌnii máꞌ mangaa, ma̱xáxóo ma̱ga̱jnúu iya ríná ná iduu iya rí thawuun.

13 Á xtáa mbáa tsí gakon rí na̱ma̱ñuu jamí nafroꞌo̱o̱ náá rí máján ma̱ꞌne ná majña̱ꞌlaꞌ dxe̱ꞌ. Gasngájmee̱ ne̱ ga̱jma̱á majñu̱u̱ rí gamakuii̱ jamí rí tsíkúxe̱-mine̱e̱ꞌ ído̱ naꞌnii̱ rí máján. 14 I̱ndo̱ó máꞌ numuu rí, xí ríga̱ tsixígu̱ꞌ jamí sia̱nꞌ ná awúun a̱kia̱nꞌlaꞌ rá, mu̱xútha̱n tsiꞌyálaꞌ rí na̱ma̱ñalaꞌ jamí mu̱xúne̱-nduwalaꞌ rí nu̱ne̱-nuwiinlaꞌ rí gakon. 15 Numuu rí xa̱bo̱ tsí na̱ma̱ñúú xkuaꞌnii, ra̱ꞌkhá ná inuu Ana̱ꞌlóꞌ na̱ꞌkha̱ rí na̱ma̱ñúu̱, rí ná numbaa ríge̱ꞌ na̱ꞌkha̱ ne̱, ná ju̱mu̱ú máꞌ xa̱bo̱ numbaa, jamí ná inuu gixa̱a̱. 16 Ikhaa jngó, ná ríga̱ tsixígu̱ꞌ jamí sia̱nꞌ, ikhín máꞌ ríga̱ xkujndu jamí mbá xúgíí inii rí xkawe̱ꞌ mangaa.

17 Xómáꞌ xa̱bo̱ tsí na̱ma̱ñúú jamí nafruꞌu̱ún rí na̱ꞌkha̱ ná inuu Ana̱ꞌlóꞌ rá, rí ginii jayu tsíni̱i̱ rí xkawe̱ꞌ, tsítsa̱ñúu̱ꞌ gajmíi̱ xa̱bo̱, gamakuu̱n, májáan a̱kuíi̱n, phú nañáwíin a̱kuíi̱n juñúu̱ tsí ngíníi, gatíí rí máján nuni̱i̱, tsíraꞌwíi̱n xa̱bo̱ tsí mune̱-nga̱júu̱n jamí na̱nguá a̱jma̱ inúu̱. 18 Tsí nandúún rí ma̱ju̱wá tsímáá xa̱bo̱, nu̱mbáyíi̱ rí ma̱xátsa̱ñúu̱. Asndo xómá rí nudii̱ tsígoo rí máján jaꞌnii, kajngó mune̱ xa̱bo̱ rí nandoo Ana̱ꞌlóꞌ.