1 Náá lá i̱ꞌkha̱ xkujndu jamí sia̱nꞌ rí guáꞌdáálaꞌ rá. Na̱ꞌkha̱ ne̱ ná awúun máꞌ a̱kia̱nꞌlaꞌ jamí ná awúun máꞌ rí phú na̱ni̱gua̱ꞌlaꞌ ma̱guaꞌdáálaꞌ. 2 Phú na̱ni̱gua̱ꞌlaꞌ rí ma̱guaꞌdáálaꞌ rí ríga̱ ná tsu̱du̱u̱ numbaa jamí tsíguaꞌdáálaꞌ ne̱. Ra̱ꞌkhá tháán naxígua̱ꞌlaꞌ rí asndo nu̱radíinlaꞌ xa̱bo̱, ni máꞌ xúꞌkhue̱n tsíguaꞌdáálaꞌ rí nandalaꞌ. Nu̱ne̱-xkujndulaꞌ jamí na̱tsa̱ña̱ꞌlaꞌ. Ra̱guáꞌdáálaꞌ numuu rí tsínda̱ꞌa̱álaꞌ Ana̱ꞌlóꞌ. 3 Jamí ído̱ rí nu̱nda̱ꞌa̱laꞌ, tsídrígúlaꞌ rí nandalaꞌ numuu rí tsínda̱ꞌa̱laꞌ ne̱ rí ma̱jmaa ná ndaꞌyóo, rí nu̱nda̱ꞌa̱laꞌ ne̱ mu̱tsi̱jmálaꞌ ná rí na̱ni̱gua̱ꞌlaꞌ ikháanꞌlaꞌ.

4 ¡Ra̱ꞌkhá xa̱bo̱ tsí nandúún juyáá i̱ndo̱ó máꞌ Ana̱ꞌlóꞌ ñajwanlaꞌ ikháanꞌlaꞌ! Á tsíya̱álaꞌ rí xa̱bo̱ tsí nandoo guéño jaꞌyoo rí ríga̱ ná numbaa, tsíyoo rí ma̱mbáxu̱u̱ꞌ ga̱jma̱á nindxu̱u̱ Ana̱ꞌlóꞌ rá dxe̱ꞌ. Ikhaa jngó, asndo tsáa máꞌ tsí nandoo guéño jaꞌyoo rí ríga̱ ná numbaa, naꞌne-mine̱e̱ꞌ xa̱bo̱ sia̱nꞌ ga̱jma̱á nindxu̱u̱ Ana̱ꞌlóꞌ. 5 O na̱ju̱ma̱ꞌlaꞌ rí nda̱a̱ numuu rí naꞌthán ná i̱yi̱i̱ꞌ ajngóo Ana̱ꞌlóꞌ dxe̱ꞌ. Rí phú nandoo Xu̱u̱ꞌ Ana̱ꞌlóꞌ jaꞌyalóꞌ, tsí Ana̱ꞌlóꞌ máꞌ nigíwa̱a̱nꞌ ná xo̱xta̱ꞌlóꞌ, jamí mbáwíi̱ máꞌ ikhaa̱ nandoo̱ rí ma̱galóꞌ juꞌyáa̱. 6 Xómáꞌ ikhaa̱ phú mba̱a̱ nambáyálóꞌ ga̱jma̱á rí máján. Ikhaa jngó ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ana̱ꞌlóꞌ na̱we̱je̱-ꞌthu̱ún xa̱bo̱ tsí nu̱xu̱xí-mijná,

xómáꞌ tsí nu̱xrígú-mijná rá, nambáñúu̱ ga̱jma̱á rí máján».*

7 Ikhaa jngó, gu̱ni̱ꞌñá-mijnálaꞌ rí maꞌthán-ñájwanlaꞌ Ana̱ꞌlóꞌ. Ga̱wajún-ꞌthi̱ínlaꞌ gixa̱a̱, a̱ꞌkhue̱n rí ikhaa̱ magáyuu̱ ma̱ꞌgee̱ i̱mba̱ janíí. 8 Gu̱xu̱ꞌmá-mijnálaꞌ ná inuu Ana̱ꞌlóꞌ, jamí ikhaa̱ maxuꞌma-mine̱e̱ꞌ ná inalaꞌ. Xa̱bo̱ aꞌkhán, gu̱ni̱ꞌñáá-ru̱ne̱laꞌ aꞌkhán. Tsáanꞌ a̱jma̱ a̱kia̱nꞌlaꞌ, ga̱ꞌne jañii a̱kia̱nꞌlaꞌ ná inuu Ana̱ꞌlóꞌ. 9 Ga̱juwalaꞌ gaꞌkho̱ ga̱jma̱á numuu aꞌkhánlaꞌ, gu̱mbi̱ya̱ꞌlaꞌ jamí ga̱tájwíin a̱kia̱nꞌlaꞌ. Gu̱ni̱ꞌñáá rí nu̱ndu̱ꞌwa̱laꞌ jamí rí juwalaꞌ gagi, gu̱mbi̱ya̱ꞌlaꞌ jamí ga̱juwa-jínálaꞌ. 10 Gu̱xrígú-mijnálaꞌ ná inuu Ana̱ꞌlóꞌ, jamí ikhaa̱ ma̱ꞌnii̱ rí ma̱gi̱ꞌdoo numalaꞌ.

11 A̱ngui̱nꞌ, mu̱xútha̱n-ri̱ga̱laꞌ ga̱jma̱á numa-mijnálaꞌ máꞌ ikháanꞌlaꞌ. Tsí naꞌthán-ri̱ga̱ numuu mbáa xa̱bo̱ o naꞌthée̱n rí ra̱máján iꞌnii̱ mbo̱ꞌ, naꞌthán-ri̱ge̱e̱ numuu xtángawoo Ana̱ꞌlóꞌ jamí tsíya-makuu̱ ne̱. Xí ikháánꞌ tsíthaya-makuíí xtángawoo Ana̱ꞌlóꞌ, tsíthane̱-mbáníí rí naꞌthán ne̱, rí nathane̱-mina̱ꞌ tsí naxúdaa awan ga̱jma̱á numuu ne̱. 12 I̱ndo̱ó máꞌ mbáwíi tsí nixná xtángoo ma̱goo ma̱ꞌne-jáwíi̱n o ma̱ꞌnii̱ rí mbuyamíni̱í xa̱bo̱. Xómáꞌ ikháánꞌ rá, tsáa i̱ju̱ma̱a̱ꞌ rí ñajwaanꞌ kajngó na̱tra̱jwa̱ꞌ ga̱jma̱á numuu xa̱bo̱ róꞌ.

13 Gu̱dxawíínlaꞌ ríge̱ꞌ, tsáanꞌ nu̱tha̱nlaꞌ: «Xúge̱ꞌ o gátsíí mu̱ꞌgua̱lóꞌ xuajen rúꞌkhue̱n o ríge̱ꞌ, ma̱juwalóꞌ mbá tsigu ikhín, mu̱ngu̱jwa̱ngaalóꞌ jamí mu̱ꞌdaalóꞌ mbúkha̱a̱». 14 Jamí ni tsíya̱álaꞌ dí gáríga̱ gátsíí, ni máꞌ tsíya̱álaꞌ xí xóó juwalaꞌ. Dí lá ñajuun mbiꞌyalaꞌ rá. Xómá ru̱jmba̱aꞌ rí nakujma mbégo jamí i̱mbrúma nánda̱a̱ ne̱, xkuaꞌnii jaꞌñáaꞌlaꞌ. 15 I̱wa̱á máján rí xáꞌnii gútha̱nlaꞌ: «Xí Ana̱ꞌlóꞌ nandoo, ma̱juwalóꞌ jamí mu̱ꞌne̱lóꞌ ríge̱ꞌ o mu̱ꞌne̱lóꞌ rí ñúꞌún». 16 Xómáꞌ ikháanꞌlaꞌ phú na̱ni̱gua̱ꞌlaꞌ rí mu̱tha̱n-tsiꞌyálaꞌ, asndo xómá rí ikháanꞌlaꞌ nu̱tha̱n-ñájwíínlaꞌ mbiꞌyalaꞌ jaꞌnii. Ra̱máján e̱ne̱laꞌ rí nu̱ne̱-tsiꞌyálaꞌ xkuaꞌnii. 17 Ikhaa jngó, tsí ndaꞌyoo máꞌ náá rí máján ma̱ꞌne, jamí tsíꞌnii̱ ne̱, aꞌkhán iꞌnii̱.