1 Gu̱dxawíínlaꞌ ríge̱ꞌ, tsáanꞌ phú guáꞌdáálaꞌ: gu̱mbi̱ya̱ꞌlaꞌ jamí gu̱ndxa̱ꞌwa̱-jínálaꞌ ga̱jma̱á numuu rí na̱ꞌkha̱ mu̱gíꞌníílaꞌ. 2 Naꞌga máꞌ mbá xúgíí rí mitsaan guáꞌdáálaꞌ, jamí naꞌpho̱ máꞌ ñu̱u̱ ruxi xtíñalaꞌ rí phú kuitsúun. 3 Na̱ꞌkha̱a máꞌ iyoo mbúkha̱a̱ ajwa̱nꞌ mo̱jmo̱ꞌ jamí mbúkha̱a̱ ajwa̱nꞌ miꞌxá rí phú guáꞌdáálaꞌ. Rúꞌkhue̱n maꞌthán rí ra̱máján ne̱ne̱laꞌ ído̱ gára̱jwa̱ꞌ Ana̱ꞌlóꞌ ga̱jma̱á numalaꞌ, jamí matsikháanꞌlaꞌ ne̱. Ne̱ne̱-matíílaꞌ rí ma̱guaꞌdáálaꞌ awúun mbiꞌi rí inu máꞌ ma̱mbá numbaa. 4 Ikhaa jngó, gu̱dxawíínlaꞌ, ikháanꞌlaꞌ tsí ra̱khálaꞌ gúne̱-numi̱ilaꞌ xa̱bo̱ ngíníi tsí ni̱ñajun ná mbayalaꞌ. Numuu rí mbúkha̱a̱ rúꞌkhue̱n nandxaꞌwá-raꞌa ná inuu Ana̱ꞌlóꞌ tsí gíꞌdoo mbá xúgíí tsiakhe̱, jamí ikhaa̱ nidxawuu̱n máꞌ a̱ꞌwúún yumbáá tsúꞌkhue̱n. 5 Ikháanꞌlaꞌ phú nijuwa-májánlaꞌ ná numbaa ríge̱ꞌ. Nitháan nda̱a̱ rí ndiꞌyálaꞌ, jamí ne̱ne̱laꞌ mbá xúgíí rí na̱ni̱gua̱ꞌlaꞌ. Ne̱ne̱-maꞌnga-mijnálaꞌ xómá xu̱kú tsí mu̱xíya̱a̱ xa̱bo̱ mbiꞌi rí ma̱ꞌne ndxa̱a̱. 6 Ni̱rígulaꞌ ajngáa waꞌa tsu̱du̱ún xa̱bo̱ tsí nda̱a̱ aꞌkhúún jamí ni̱radíi̱nlaꞌ, xómáꞌ ikhii̱n túxu̱da̱a̱ꞌ ñawúu̱n rí mu̱mbáyú-mijnée̱.

7 Ikhaa jngó, a̱ngui̱nꞌ, ga̱ꞌngo̱o̱ a̱kia̱nꞌlaꞌ asndo mbiꞌi rí ma̱ꞌkha̱a Táta̱. Gu̱ya̱xe̱laꞌ xómá eꞌne xa̱bo̱ tsí nañajun xanáá, gíꞌthu̱u̱n máꞌ xúꞌkhue̱n rí maguu̱ rí mitsaan ma̱jma̱a̱ ná tsu̱du̱u̱ ju̱ba̱ꞌ rí niꞌdii̱, jamí gíꞌthu̱u̱n máꞌ xúꞌkhue̱n rí ma̱ga̱nú mbiꞌi rí naxnúu ruꞌwa. 8 Xkuaꞌnii máꞌ gúne̱ mangáanꞌlaꞌ, gu̱ne̱ gakhe̱ a̱kia̱nꞌlaꞌ jamí ma̱xáꞌne níꞌnga̱ꞌlaꞌ rí mu̱waꞌthi̱ínlaꞌ, numuu rí inu máꞌ ma̱ꞌkha̱a Táta̱. 9 A̱ngui̱nꞌ, mu̱xúne̱ xkujndu numa-mijnálaꞌ, kajngó ma̱xáxúdaa awan Ana̱ꞌlóꞌ ga̱jma̱á numuu aꞌkhánlaꞌ. Gu̱ya̱álaꞌ rí inu máꞌ maxúdaa awan tsí ma̱ra̱jwa̱ꞌ numalaꞌ.

10 A̱ngui̱nꞌ, gu̱ya̱xi̱ílaꞌ xkri̱da xómá rí ni̱míni̱í jamí xómá rí ni̱ꞌngo̱o̱ a̱kui̱ín xa̱bo̱ tsí ni̱rawíjnga̱a ajngóo Táta̱ wajyúú. 11 Ikháánꞌlóꞌ na̱ju̱ma̱ꞌlóꞌ rí phú gagi júwa̱ꞌ xa̱bo̱ tsí na̱ꞌngo̱o̱ a̱kui̱ín rí mu̱míni̱í. Ikháanꞌlaꞌ ni̱dxawíínlaꞌ xáne ni̱ꞌngo̱o̱ a̱kui̱in Jób rí mamínu̱u̱ꞌ mi̱ndaꞌkho, jamí ndu̱ya̱álaꞌ máꞌ rí phú mba̱a̱ rí máján nijanáa̱ nda̱wa̱á neꞌne Táta̱. Numuu rí Táta̱ phú nañáwíin a̱kuii̱n jamí phú mba̱a̱ a̱kuii̱n.

12 A̱ngui̱nꞌ, rí phú i̱tha̱án na̱tha̱nꞌlaꞌ ñajuun ríge̱ꞌ: mu̱xúxu̱ꞌdá-mijnálaꞌ ga̱jma̱á numuu mikhu, ni máꞌ ga̱jma̱á numuu ju̱ba̱ꞌ, ni máꞌ mu̱xúxu̱ꞌdá-mijnálaꞌ ga̱jma̱á numuu asndo nimbá rí ríga̱ ná numbaa. Xí nu̱tha̱nlaꞌ «ma̱ne̱», gu̱ne̱laꞌ, jamí xí nu̱tha̱nlaꞌ «ma̱xáne̱», mu̱xúne̱laꞌ, kajngó ma̱xáxná-máꞌáanꞌlaꞌ Ana̱ꞌlóꞌ.

13 Xí xtáa mbáa tsí gíꞌdoo gajmá ná majña̱ꞌlaꞌ, gaꞌthán-jáñuu̱ Ana̱ꞌlóꞌ. Xí xtáa mbáa tsí nadxu a̱kui̱in, ga̱ꞌsiee̱n ajmúú ná inuu Ana̱ꞌlóꞌ. 14 Xí xtáa mbáa tsí najáñuu ná majña̱ꞌlaꞌ, gandxaꞌwúu̱n xa̱bo̱ buanuu tsí juya̱ idxu̱ún tsí nanimbu̱únꞌ juyáá Jesús. Tsúꞌkhue̱n muthán-jáñíí Ana̱ꞌlóꞌ ga̱jma̱á numuu̱, jamí mu̱tsuaꞌaa̱n yatsi̱i xndú olíbo̱ ga̱jma̱á numuu Táta̱. 15 Xí wéje̱ a̱kuíi̱n ná inuu Ana̱ꞌlóꞌ ído̱ rí nuthán-jáñíi̱, ma̱ꞌni̱i a̱kui̱in tsí najáñuu, jamí Ana̱ꞌlóꞌ ma̱ꞌne rí ma̱tu̱xii̱. Jamí xí niꞌnii̱ aꞌkhán rá, Ana̱ꞌlóꞌ ma̱ꞌne mba̱a̱ a̱kui̱in jaꞌyoo̱. 16 Ikhaa numuu rúꞌkhue̱n, gu̱ne̱-maphú-mijnálaꞌ aꞌkhánlaꞌ, jamí mbámbáa gáꞌthán-jáñuu Ana̱ꞌlóꞌ ga̱jma̱á numuu i̱mba̱a̱ꞌ, kajngó ma̱ꞌni̱i a̱kia̱nꞌlaꞌ. Phú gíꞌdoo tsiakhe̱ rí naꞌthán-jáñuu Ana̱ꞌlóꞌ mbáa xa̱bo̱ tsí jmbu a̱kui̱in.

17 Ga̱rmáꞌáan a̱kia̱nꞌlaꞌ ju̱ya̱á Elía̱s, tsí ni̱gu̱wíjnga̱a ajngóo Ana̱ꞌlóꞌ wajyúú, rí ikhaa̱ ninindxu̱u̱ mbáa xa̱bo̱ numbaa xómá ikháánꞌlóꞌ jayu. Jamí ído̱ niꞌthán-jáñuu̱ Ana̱ꞌlóꞌ ga̱jma̱á mbá jañii a̱kuii̱n rí ma̱xáxnúu ruꞌwa, táxnúu ruꞌwa ná tsu̱du̱u̱ ju̱ba̱ꞌ atsú tsigu i̱tikhu. 18 Nda̱wa̱á a̱ꞌkhue̱n niꞌthán-jáñuu̱ mbu̱júu̱ Ana̱ꞌlóꞌ rí maxnúu ruꞌwa, a̱ꞌkhue̱n nixnúu ruꞌwa neꞌne Ana̱ꞌlóꞌ, jamí nijma̱a̱ xndúu mbá xúgíí inii rí ndaꞌya ná inuu ju̱ba̱ꞌ.

19 A̱ngui̱nꞌ, xí mbáa tsí ikháanꞌlaꞌ niniñuu jamba̱a̱ rí gakon, jamí i̱mba̱a̱ꞌ naꞌne rí ma̱thangaa̱, 20 gu̱ya̱álaꞌ rí xa̱bo̱ tsí nambáyúu xa̱bo̱ aꞌkhán rí ma̱thanga̱a a̱kui̱in jamí maniñuu rí naꞌne aꞌkhán, naꞌnii̱ rí ma̱jríya̱a̱ꞌ rí ma̱ja̱ñúu̱ jamí naꞌnii̱ rí Ana̱ꞌlóꞌ ma̱ꞌne mba̱a̱ a̱kui̱in jaꞌyoo mbaꞌa aꞌkhán rí niꞌnii̱.