1 Ikhúúnꞌ ñajunꞌ Pédro̱, mbáa xa̱bo̱ tsí waxúngua̱a̱ꞌ neꞌne Jesukrísto̱.

Na̱xu̱ꞌmá i̱yi̱i̱ꞌ ríge̱ꞌ inúú xa̱bo̱ tsí na̱nguá júwa̱ꞌ ná xuajñúú, ikhiin máꞌ tsí júwa̱ꞌ mbá xúgíí numbaa Pónto̱, Galásia̱, Kapadósia̱, Ásia̱ jamí Bitínia̱. 2 Ga̱jma̱á numuu rí niꞌgí-mina̱ꞌ máꞌ Ana̱ꞌlóꞌ ma̱ꞌne, ikhaa̱ wapha máꞌ niraꞌwáa̱nꞌlaꞌ jamí ga̱jma̱á majñu̱u̱ Xu̱u̱ꞌ naꞌnii̱ rí ma̱nindxa̱ꞌlaꞌ xa̱bii̱, kajngó mu̱ne̱-mbáníílaꞌ rí naꞌthán Jesukrísto̱ jamí ma̱gu̱ma-jaꞌwáanꞌlaꞌ ga̱jma̱á iꞌdiuu̱.

Phú a̱gu̱ma-tsakun-rámáaꞌlaꞌ gáꞌne Ana̱ꞌlóꞌ jamí ga̱juwalaꞌ tsímáá mi̱ndaꞌkho.

3 A̱gu̱ma-mba̱a̱ Ana̱ꞌlóꞌ, Anu̱u̱ máꞌ Tátiálóꞌ Jesukrísto̱, numuu rí phú mba̱a̱ niñáwíin a̱kuii̱n jaꞌyalóꞌ jamí niꞌnii̱ rí ma̱gu̱ma-nuxáanꞌlóꞌ ga̱jma̱á majñu̱u̱ rí ndiyáa mbiꞌyuu Jesukrísto̱. Rúꞌkhue̱n naꞌne rí ga̱jma̱á mbá jañii a̱kia̱nꞌlóꞌ mu̱waꞌthi̱ínlóꞌ 4 rí mu̱drígúulóꞌ rí gíꞌdoo̱ mújúu̱n maxnálóꞌ ná mikhuíí. Rí maxnálóꞌ tsíguu, ni máꞌ tsíꞌchúu, ni máꞌ tsíyámba̱ ne̱. 5 Ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ, ikhaa̱ na̱ña̱wa̱nꞌlaꞌ ga̱jma̱á ski̱yu̱u̱ꞌ, kajngó ma̱goo ma̱jáwiáanꞌlaꞌ ído̱ gága̱nú mbiꞌi rí ndámba̱wóo.

6 Rúꞌkhue̱n naꞌne rí phú ma̱ꞌdxu a̱kia̱nꞌlaꞌ rí xúge̱ꞌ, maske máꞌ ndaꞌyóo rí ma̱nújngalaꞌ ná awúun mbaꞌa inii jamínu̱ꞌ mbá wátha̱ wáa mbiꞌi. 7 Rí ajwa̱nꞌ mo̱jmo̱ꞌ, nanújngoo ne̱ ná awúun agu kajngó ma̱gu̱ma-jaꞌwu̱u ne̱, maske máꞌ ma̱ga̱nú mbiꞌi rí ma̱mbáa ne̱. Xkuaꞌnii máꞌ rí wéje̱ a̱kia̱nꞌlaꞌ ná inuu Ana̱ꞌlóꞌ mangaa, rí phú i̱tha̱án gíꞌdoo numuu xó rí ajwa̱nꞌ mo̱jmo̱ꞌ, nanújngoo ne̱ ná awúun jamínu̱ꞌ kajngó mi̱ꞌthán rí máján ga̱jma̱á numuu ne̱, ma̱gu̱ma-mba̱a̱ ne̱ jamí mbi̱ꞌya-makuíí ne̱ ído̱ rí ma̱ꞌkha̱a Jesukrísto̱.

8 Ikháanꞌlaꞌ nandalaꞌ ju̱ya̱á Jesukrísto̱ maske máꞌ ni miꞌtsú túyáa̱laꞌ. Rí xúge̱ꞌ rá, nanimba̱ꞌlaꞌ ju̱yáa̱ maske máꞌ na̱nguá i̱yáa̱laꞌ, jamí asndo ni tsíꞌngo̱o̱ ajngáa rí mi̱ꞌthán ga̱jma̱á numuu gagi rí phú mba̱a̱ jamí mitsaan rí guáꞌdáálaꞌ. 9 Ikháanꞌlaꞌ phú nadxalaꞌ numuu rí najríñáaꞌlaꞌ máꞌ. Ikhaa rúꞌkhue̱n jaꞌyoo ma̱janálaꞌ ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ.

10 Ga̱jma̱á máꞌ numuu rí ma̱jáwiáanꞌlaꞌ, nene̱-gajma̱a̱ mújúún jamí ni̱ra̱xe̱-makúún tsí ni̱rawíjnga̱a ajngóo Ana̱ꞌlóꞌ wajyúú, jamí nithee̱n ga̱jma̱á numuu rí naꞌgí-mina̱ꞌ Ana̱ꞌlóꞌ rí maxnálaꞌ. 11 Xu̱u̱ꞌ Krísto̱ tsí xtáa̱ ná awúun a̱kui̱ín xa̱bo̱ tsúꞌkhue̱n, niꞌthán-múꞌúu̱n rí phú mamínu̱u̱ꞌ Krísto̱ rí ginii jamí nda̱wa̱á a̱ꞌkhue̱n ma̱ꞌkha̱ rí phú tsímáá, ikhaa jngó nune̱-gajma̱a̱ mújúu̱n kajngó mbuyáa̱ tsáa xa̱bi̱i̱ nithán numuu jamí nguáná gáríga̱ rúꞌkhue̱n. 12 A̱ꞌkhue̱n ni̱ma̱ꞌthoo inúu̱ neꞌne Ana̱ꞌlóꞌ kajngó ma̱fruꞌúu̱n rí ra̱ꞌkhá ga̱jma̱á numúu̱ ikhii̱n nuni̱i̱ rí nuthee̱n, rí ga̱jma̱á numalaꞌ ikháanꞌlaꞌ. Rí nithan tsí ni̱rawíjnga̱a ajngóo Ana̱ꞌlóꞌ wajyúú, ikhaa máꞌ rúꞌkhue̱n ñajuun rí nisngálaꞌ xa̱bo̱ tsí nithanlaꞌ ajngáa máján ga̱jma̱á majñu̱u̱ Xu̱u̱ꞌ Ana̱ꞌlóꞌ tsí ni̱ꞌkha̱ mikhuíí. Mbá xúgíí rúꞌkhue̱n, asndo ánje̱l naꞌne a̱kuíi̱n rí mbuyáá mangiin. 13 Ikhaa numuu rúꞌkhue̱n, ga̱juwalaꞌ xawi kajngó mu̱ne̱laꞌ rí nafraꞌa̱ꞌlaꞌ. Gu̱ndxa̱ꞌwa̱-mijná májánlaꞌ rí mu̱ne̱laꞌ. Mbá jañii a̱kia̱nꞌlaꞌ gáwaꞌthi̱ínlaꞌ rí maxnálaꞌ Ana̱ꞌlóꞌ ído̱ rí ma̱ꞌkha̱a Jesukrísto̱.

14 Nákhí rí júgoo inalaꞌ, ikháanꞌlaꞌ ne̱ne̱laꞌ mbá xúgíí inii rí xkawe̱ꞌ na̱ni̱gua̱ꞌlaꞌ rí mu̱ne̱laꞌ. Ikhaa jngó rí xúge̱ꞌ rá, gu̱ne̱laꞌ rí nandoo Ana̱ꞌlóꞌ, xómá ene̱ e̱je̱n tsí nune̱-mbáníí rí nithúún. 15 Ga̱kujma rí jaꞌwu a̱kia̱nꞌlaꞌ ga̱jma̱á majñu̱u̱ mbá xúgíí rí nu̱ne̱laꞌ, xómá rí jaꞌwu a̱kui̱in Ana̱ꞌlóꞌ tsí nindxaꞌwálaꞌ. 16 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ga̱nindxa̱ꞌlaꞌ xa̱bo̱ tsí jaꞌwu a̱kui̱ín, numuu rí ikhúúnꞌ jaꞌwu a̱kui̱nꞌ».*

17 Xí nu̱tha̱nlaꞌ rí Tátiálaꞌ ñajuun tsí na̱nguá iraꞌwíin xa̱bo̱ tsí ma̱ꞌne-nga̱ju̱ún ído̱ rí naxudaa̱ awan ga̱jma̱á numuu rí neꞌne mbámbáa, ga̱mi̱ꞌñálaꞌ ju̱ya̱á Ana̱ꞌlóꞌ awúun mbá xúgíí mbiꞌi rí juwalaꞌ mbégo ná tsu̱du̱u̱ numbaa ríge̱ꞌ. 18 Numuu rí ndu̱ya̱á máꞌ májánlaꞌ rí Ana̱ꞌlóꞌ neꞌtse̱-ri̱ñáaꞌlaꞌ ná awúun rí nda̱a̱ mbá jayu numuu nijuwalaꞌ, rí ni̱drígúulaꞌ ná ñawúún táta̱-xi̱ꞌñálaꞌ wajyúú. Jamí tágu̱ma-numáá rí me̱ꞌtse̱-ri̱ñáaꞌlaꞌ ga̱jma̱á mbá rí naꞌchúu, xómá ajwa̱nꞌ mo̱jmo̱ꞌ o ajwa̱nꞌ miꞌxá mbo̱ꞌ, 19 rí ni̱gu̱ma-numáá ne̱ ga̱jma̱á mbá rí phú i̱tha̱án gíꞌdoo numuu, iꞌdiuu Krísto̱, tsí ninindxu̱u̱ xómá a̱ꞌdá-mógó tsí phú mitsiꞌyáa jamí nda̱a̱ aꞌkhúun. 20 Ana̱ꞌlóꞌ niraꞌwíi Krísto̱ asndo nákhí xóó máꞌ táꞌne-ku̱maa̱ numbaa. Xómáꞌ xúge̱ꞌ rá, ná awúun mbiꞌi rí na̱ka̱-rayámba̱ numbaa, nikujmaa̱ ga̱jma̱á numalaꞌ ikháanꞌlaꞌ. 21 Ga̱jma̱á majñu̱u̱ máꞌ Krísto̱, ikháanꞌlaꞌ nanimba̱ꞌlaꞌ ju̱ya̱á Ana̱ꞌlóꞌ. Ana̱ꞌlóꞌ neꞌne rí mbayáa mbiꞌyuu Krísto̱ jamí niꞌnii̱ rí phú ma̱gi̱ꞌdoo numuu̱, kajngó ma̱we̱je̱ a̱kia̱nꞌlaꞌ ná inuu Ana̱ꞌlóꞌ jamí ga̱jma̱á mbá jañii a̱kia̱nꞌlaꞌ mu̱waꞌthi̱ínlaꞌ ná inuu̱.

22 Nákhí rí ikháanꞌlaꞌ ni̱drígúlaꞌ ajngáa rí gakon ga̱jma̱á majñu̱u̱ Xu̱u̱ꞌ Ana̱ꞌlóꞌ,* a̱ꞌkhue̱n neꞌne-jaꞌwu̱u a̱kia̱nꞌlaꞌ kajngó ma̱ꞌne gakon rí nandalaꞌ ju̱ñu̱ú a̱ngia̱nꞌlaꞌ. Ikhaa jngó, ga̱galaꞌ ju̱ya̱-mijnálaꞌ ga̱jma̱á mbá jañii a̱kia̱nꞌlaꞌ. 23 Numuu rí ikháanꞌlaꞌ ni̱gu̱ma-nuxáanꞌlaꞌ, ra̱ꞌkhá ga̱jma̱á majñu̱u̱ ri̱jyu̱u̱ꞌ xa̱bo̱ numbaa rí wéje̱ ma̱mbáa, rí ga̱jma̱á majñu̱u̱ ajngáa rawuun Ana̱ꞌlóꞌ tsí ndaꞌya jamí xtáa jámuu. 24 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Jámba̱a̱ xa̱bo̱ numbaa xómá iná jaꞌnii̱,

jamí mbá xúgíí rí gíꞌdoo numuu̱ xómá ri̱ꞌyu̱u̱ iná jaꞌnii ne̱.

Rí iná nojndoo ne̱, jamí rí ri̱ꞌyu̱u̱ iná na̱ráka ne̱,

25 xómáꞌ rí ajngáa rawuun Táta̱ rá, jámuu ríga̱ ne̱».*

Jamí ikhaa máꞌ ajngáa rúꞌkhue̱n ñajuun ajngáa máján rí waꞌthánlaꞌ.