1 Xúꞌkhue̱n máꞌ ikháanꞌlaꞌ nána̱, tsáanꞌ ni̱nújúnlaꞌ, gu̱ni̱ꞌñá-mijnálaꞌ rí muthan-ñajwanlaꞌ a̱jmbiaꞌlaꞌ. Kajngó xí xtaa mbáa xa̱biya̱ tsí tsínimbo̱o̱ꞌ jaꞌyoo ajngóo Ana̱ꞌlóꞌ, ma̱nimbo̱o̱ꞌ ga̱jma̱á majñu̱u̱ xómá naꞌne a̱ꞌguii̱, maske máꞌ a̱ꞌguii̱ ma̱xáꞌthán nimbá ajngáa, 2 numuu mba̱ꞌyoo̱ rí mitsaan xtáa a̱ꞌguii̱ jamí gamakuii̱. 3 Ma̱xáxná-gamiéjwanlaꞌ rí mu̱ne̱-ratha-mijnálaꞌ guéño ga̱jma̱á xtíin rí phú numuu, ni máꞌ xábí ajwa̱nꞌ mo̱jmo̱ꞌ, ni máꞌ rí mu̱ne̱-ratháálaꞌ guéño xó rí nu̱xtígúu idxa̱ꞌlaꞌ. 4 I̱wa̱á máján rí ga̱ri̱gá rí mitsaan ná awúun a̱kia̱nꞌlaꞌ, rí ma̱xámangua̱ꞌlaꞌ jamí rí ma̱ꞌne gamakuáanꞌlaꞌ. Rúꞌkhue̱n rí phú i̱tha̱án gíꞌdoo numuu ná inuu Ana̱ꞌlóꞌ. 5 Numuu rí xkuaꞌnii máꞌ nene̱-karatha-mijná go̱ꞌo̱ tsí ninindxu̱ún xa̱bi̱i Ana̱ꞌlóꞌ wajyúú mbiꞌi mangaa. Ni̱we̱je̱ a̱kuíi̱n ná inuu Ana̱ꞌlóꞌ, ikhaa jngó ni̱ni̱ꞌñá-mijnée̱ rí mi̱ꞌthán-ñájúu̱n gúne̱ a̱jmbíi̱n. 6 Xkuaꞌnii neꞌne Sára̱, neꞌne-mbánuu̱ rí niꞌthán Abraám, jamí asndo niꞌthúu̱n «táta̱». Ikháanꞌlaꞌ nanindxa̱ꞌlaꞌ i̱ji̱in Sára̱, xí nu̱ne̱laꞌ rí máján jamí tsímíñuu a̱kia̱nꞌlaꞌ eꞌne nimbá.

7 Xúꞌkhue̱n máꞌ mangáanꞌlaꞌ táta̱, tsáanꞌ ni̱ni̱ꞌgúúnlaꞌ, ga̱ma̱ñalaꞌ rí ma̱juwalaꞌ gajmiálaꞌ gu̱ꞌwia̱ꞌlaꞌ. Gu̱ya̱-makúu̱nlaꞌ xómá rí jaꞌyoo. Ga̱fraꞌa̱ꞌlaꞌ rí na̱nguá gúkúu̱n xómá ikháanꞌlaꞌ jamí rí Ana̱ꞌlóꞌ nixuda-mina̱ꞌ ga̱jma̱á nindxúu̱n mangii̱n, rí ma̱ju̱wée̱ꞌ jámuu xómá rí ikháanꞌlaꞌ. Xkuaꞌnii gúne̱laꞌ kajngó nda̱a̱ rí gáwe̱je̱-ꞌthu̱u̱n rí mu̱tha̱n-jáñíílaꞌ Ana̱ꞌlóꞌ.

8 Rí nda̱wa̱á jayu rá, mbá xúgiáanꞌlaꞌ gu̱ru̱wa̱a ju̱ma̱ꞌlaꞌ. Gu̱mbáñúúlaꞌ tsí guáꞌdáá gajmá. Ga̱galaꞌ ju̱ya̱-mijnálaꞌ xómá nandúún juya-mijná mbá guꞌwíin xa̱bo̱. Ga̱ñáwíin a̱kia̱nꞌlaꞌ ju̱ya̱-mijnálaꞌ jamí gu̱xrígú-mijnálaꞌ. 9 Mu̱xúrthanga̱alaꞌ rí xkawe̱ꞌ ná inuu xa̱bo̱ tsí naꞌñalaꞌ rí xkawe̱ꞌ, ni máꞌ ma̱xáthangáanꞌlaꞌ rí mu̱tha̱n-xkawi̱íꞌlaꞌ xa̱bo̱ tsí naꞌthán-xkawia̱ꞌlaꞌ. A̱ꞌkhue̱n gakon, gu̱nda̱ꞌa̱álaꞌ Ana̱ꞌlóꞌ rí ma̱ꞌne-tsakun-rámii xa̱bo̱, numuu rí ikhaa máꞌ numuu rúꞌkhue̱n nindxaꞌwálaꞌ Ana̱ꞌlóꞌ, kajngó ma̱gu̱ma-tsakun-rámáaꞌlaꞌ. 10 Numuu rí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Tsí nandoo mba̱ꞌyoo mbiꞌi rí máján jamí ma̱xtáa̱ tsímáá,

ga̱ña̱wu̱u̱n rawuu̱n rí ma̱xáꞌthée̱n ajngáa xkawe̱ꞌ jamí ma̱xáꞌne-nduwee̱.

11 Ganiñuu̱-raꞌnii̱ rí xkawe̱ꞌ, jamí ga̱ꞌnii̱ rí máján.

Gaxná-mine̱e̱ꞌ tsiakhe̱ rí ma̱ju̱wá tsímáá xa̱bo̱ jamí ga̱xtáa̱ tsímáá gajmíi̱ xa̱bo̱.

12 Numuu rí Ana̱ꞌlóꞌ na̱ña̱wúun xa̱bo̱ tsí nune̱ rí máján,

jamí nadxawuu̱n rí nithán-jáñíi̱ ene̱ tsúꞌkhue̱n.

Xómáꞌ tsí nune̱ rí xkawe̱ꞌ rá, Ana̱ꞌlóꞌ na̱we̱je̱-ꞌthúu̱n».*

13 Xí ikháanꞌlaꞌ nu̱ne̱laꞌ i̱ndo̱ó máꞌ rí máján, tsáa lá gáꞌñalaꞌ mi̱ndaꞌkho xúꞌkhue̱n rá. 14 Jamí xí nu̱míni̱ílaꞌ ga̱jma̱á numuu rí nu̱ne̱laꞌ rí máján rá, phú gagi juwalaꞌ xúꞌkhue̱n rá. Ikhaa jngó ma̱xámíñalaꞌ gúne̱ xa̱bo̱ ni máꞌ ma̱xáxná-gamiéjwanlaꞌ gúni̱i̱. 15 A̱ꞌkhue̱n gakon, gu̱ne̱-mba̱a̱laꞌ Táta̱ Jesukrísto̱ ná awúun a̱kia̱nꞌlaꞌ. Ga̱juwalaꞌ xawi jámba̱ miꞌtsú rí mu̱riꞌñáálaꞌ asndo tsáa máꞌ tsí naraxa̱ꞌlaꞌ náá numuu kajngó rí ga̱jma̱á mbá jañii a̱kia̱nꞌlaꞌ guáꞌthi̱ínlaꞌ ná inuu Krísto̱. I̱ndo̱ó máꞌ numuu rí gu̱riꞌñáa̱ꞌlaꞌ ga̱jma̱á gamaku jamí gu̱xrígú-mijnálaꞌ. 16 Xkuaꞌnii kajngó mbu̱ya̱á májánlaꞌ rí túne̱laꞌ aꞌkhán jamí ma̱ti̱ñu̱úꞌ tsí nuthan rí xkawe̱ꞌ ga̱jma̱á numuu rí máján nu̱ne̱laꞌ, rí xa̱bi̱i Krísto̱ ñajwanlaꞌ. 17 I̱tha̱án máꞌ máján rí mu̱míni̱ílaꞌ ga̱jma̱á numuu rí nu̱ne̱laꞌ rí máján xí numuu rí xkuaꞌnii awuun Ana̱ꞌlóꞌ, xó rí mu̱míni̱ílaꞌ ga̱jma̱á numuu rí nu̱ne̱laꞌ rí xkawe̱ꞌ.

18 Numuu rí jmína̱a̱ꞌ máꞌ Krísto̱ nijáñuu mbóó miꞌtsú jamí asndo jámuu ga̱jma̱á numuu aꞌkhánlóꞌ mangaa. Tsí nda̱a̱ aꞌkhúun nijáñuu ga̱jma̱á numúú xa̱bo̱ aꞌkhán, kajngó ma̱ꞌga jaguáa̱nꞌlóꞌ ná inuu Ana̱ꞌlóꞌ. Xuyuu̱ ñajuun rí nijáñuu, xómáꞌ xu̱u̱ꞌ neꞌne rí mbayáa̱ mbiꞌyuu̱. 19 Jamí ga̱jma̱á majñu̱u̱ máꞌ xu̱u̱ꞌ ni̱ke̱e̱ gáꞌthán-raꞌee̱ inuu xu̱únꞌ xa̱bo̱ tsí júgua-raꞌiin ná géjwa̱nꞌ. 20 Ikhiin máꞌ xa̱bo̱ tsúꞌkhue̱n ñajúún tsí ra̱khúún gánimbu̱únꞌ juyáá Ana̱ꞌlóꞌ nákhí mbiꞌi rí nixtáa Noé. Phú mba̱yo̱ꞌ ni̱gi̱ꞌthu̱u̱n Ana̱ꞌlóꞌ rí ma̱thanga̱a a̱kuíi̱n, awúun mbiꞌi rí Noé xtáa naꞌne-mújúun guꞌwá-rguwa ná nijáwíin i̱ndo̱ó máꞌ mbá migiñuu xa̱bo̱ ga̱jma̱á majñu̱u̱ iya. 21 Iya rúꞌkhue̱n naꞌne xtiꞌkhuu iya ná nixúdu-maꞌáanꞌlóꞌ rí xúge̱ꞌ, rí naꞌne-jríñáaꞌlóꞌ ga̱jma̱á numuu rí ndiyáa mbiꞌyuu Jesukrísto̱. Nixúdu-maꞌáanꞌlóꞌ ná awúun iya, ra̱ꞌkhá numuu rí ndaꞌyóo ma̱gata̱a smboo xuyalóꞌ, rí numuu ndaꞌyóo rí ma̱ꞌne-jaꞌwu̱u a̱kia̱nꞌlóꞌ ná inuu Ana̱ꞌlóꞌ. 22 Numuu rí Jesukrísto̱ ni̱ka̱a mikhuíí jamí ni̱gi̱ꞌi̱i̱ ná ñawún mújúun Ana̱ꞌlóꞌ. Ikhaa̱ naꞌthán-ñájúu̱n mbá xúgíin ánje̱l, mbá xúgíí inii tsiakhe̱ jamí mbá xúgíí inii gíñá ꞌguéen.