1 Ído̱ nimbánuu rí mu̱ꞌguáxo̱ꞌ ga̱jma̱á guꞌwá-rguwa ná numbaa Itália̱, a̱ꞌkhue̱n waxnáxi̱i̱ Páblo̱ ná ñawúun Júlio̱ gajmíí i̱ꞌwíin xa̱bo̱ tsí traꞌi̱in géjwa̱nꞌ. Júlio̱ ñajuun mbáa xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, tsí ñajúún xa̱bi̱i Augústo̱. 2 A̱ꞌkhue̱n nijnguánxo̱ꞌ ná awúun mbá guꞌwá-rguwa rí na̱ꞌkha̱ ná Adramítio̱, rí ma̱ꞌga-ranújngoo ná xuajen rí triga̱ ná rawuun iya ná numbaa Ásia̱. A̱ꞌkhue̱n nigájnaxo̱ꞌ, jamí na̱ka̱ ga̱jma̱á nindxa̱ꞌxo̱ꞌ Aristárko̱, tsí na̱ꞌkha̱ ná xuajen Tesalóni̱ka̱ ná numbaa Masedónia̱. 3 Ído̱ watse rí i̱mba̱ mbiꞌi niguáꞌnúxo̱ꞌ ná xuajen Sidón. Jamí Júlio̱ neꞌne-nga̱jo̱o̱ Páblo̱, niniñuu̱ rí ma̱ꞌgee̱ gáꞌñúu̱ iyanga̱jwee̱, kajngó ma̱janáa̱ rí ndaꞌyóo̱. 4 Ikhín máꞌ nigájnaxo̱ꞌ, jamí nikuáxo̱ꞌ ná i̱mba̱ níjñúu Chípre̱, numuu rí ná inaxo̱ꞌ wéje̱ ikhoo gíñá. 5 Ído̱ wámba̱ ninújngaxo̱ꞌ ná iya a̱pha̱ ná kri̱doo numbaa Silísia̱ ga̱jma̱á Panfília̱, a̱ꞌkhue̱n niguáꞌnúxo̱ꞌ ná xuajen Míra̱, rí ꞌgí ná numbaa Lísia̱.

6 Ído̱ rí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ nixkamaa mbá guꞌwá-rguwa rí na̱ꞌkha̱ ná Alejandría̱, a̱ꞌkhue̱n niꞌnii̱ rí ma̱jnguánxo̱ꞌ ná awúun ne̱, numuu rí inu máꞌ nagájnuu ne̱ na̱ka̱ ná Itália̱. 7 Phú mbaꞌa mbiꞌi rí mañuu nikuáxo̱ꞌ ná inuu iya, jamí ga̱jma̱á kháan niguáꞌnúxo̱ꞌ ná kri̱doo xuajen Gnído̱. Numuu rí phú gakhe̱ narikhaxo̱ꞌ gíñá, ikhaa jngó ninújngaxo̱ꞌ ná kri̱doo Salmón, nikuáxo̱ꞌ ná i̱mba̱ níjñúu Kréta̱, mbaa rí kua̱ꞌa̱n ná awúun iya a̱pha̱. 8 Jamí ga̱jma̱á jamínu̱ꞌ nikuá-ranújngaxo̱ꞌ ná rawuun iya a̱pha̱, niguáꞌnúxo̱ꞌ ná mbiꞌyuu «Ná máján naguáꞌnú guꞌwá-rguwa», rí triga̱ ná mijngi xuajen Laséa̱.

9 Mbaꞌa guéño mbiꞌi ninújngoo, jamí naꞌne ngamí máꞌ rí magóó xa̱bo̱ ga̱jma̱á guꞌwá-rguwa ná inuu iya, numuu rí ninújngoo máꞌ mbiꞌi rí na̱gu̱ma-ri̱ya̱aꞌ ndxa̱a̱ rí nune̱-miꞌkhíí xa̱bo̱, ído̱ na̱gi̱ꞌdu̱u̱n go̱nꞌ rí naꞌne ngúwán, ikhaa jngó Páblo̱ niꞌthán-múꞌúún xa̱bo̱: 10 «Xa̱bo̱ buanuu, ikhúúnꞌ nda̱yo̱o̱ rí phú ngamí wáa gáꞌne ná inuu iya ná nakualóꞌ ge̱jyoꞌ. Phú mbaꞌa rí ma̱ndáti̱ga̱, ra̱ꞌkhá máꞌ i̱ndo̱ó guꞌwá-rguwa jamí rí jago̱ ne̱, rí asndo mangaa máꞌ ngamí rí ma̱ja̱ñálóꞌ ikháánꞌlóꞌ».

11 Xómáꞌ xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, tánimbo̱o̱ꞌ rí naꞌthán Páblo̱, rí i̱tha̱án máꞌ ninimbo̱o̱ꞌ rí naꞌthán tsí na̱ka̱ jayóo guꞌwá-rguwa jamí tsí drígo̱o̱ ñajuun ne̱. 12 Numuu rí «Ná máján naguáꞌnú guꞌwá-rguwa» na̱nguá máján rí ma̱nújngaxo̱ꞌ go̱nꞌ rí naꞌne ngúwán ikhín, ikhaa jngó i̱tha̱án mbaꞌiin xa̱bo̱ nithan rí ma̱ga̱jnáxo̱ꞌ mu̱ꞌguá. Á gáꞌne xí ma̱ꞌngo̱o̱ ma̱guáꞌnúxo̱ꞌ ná Feníse̱, ná naguáꞌnú guꞌwá-rguwa ná mbayuu máꞌ Kréta̱, rí giaxu̱u̱ ná níjñú xti̱yu̱u̱ꞌ ná najngúun a̱kha̱ꞌ jamí ná níjñú mújúun ná na̱ꞌkha̱ a̱kha̱ꞌ, kajngó ma̱nújngaxo̱ꞌ go̱nꞌ rí naꞌne ngúwán ikhín.

13 Ído̱ ni̱gi̱ꞌdu̱u̱n na̱ꞌkha̱ waba jayu gíñá ná giaxu̱u̱ jawáá, ni̱ju̱múu̱ rí ma̱goo máꞌ ma̱ga̱jnúu̱ magóo̱. A̱ꞌkhue̱n ni̱rawíi̱ ajwa̱nꞌ mixngaa rí wájun jayóo guꞌwá-rguwa, jamí nikuáxo̱ꞌ mbá kri̱go̱o̱ rawuun iya a̱pha̱ ná mbayuu Kréta̱. 14 I̱ndo̱ó máꞌ numuu rí tágajyúu máꞌ ído̱ rí ni̱ꞌkha̱ mbá gíñá rí phú gakhi̱i̱ nixpáthun ná tsu̱du̱u̱ guꞌwá-rguwa. Gíñá rúꞌkhue̱n mbiꞌyuu Euroklidón. 15 A̱ꞌkhue̱n warmajngua̱ꞌ guꞌwá-rguwa neꞌne gíñá, numuu rí nánguá ni̱ꞌnga̱ꞌxo̱ꞌ mu̱ne̱ rí ma̱ꞌga ne̱ ná na̱ꞌkha̱ gíñá, ikhaa jngó ni̱ni̱ꞌñá-mijnáxo̱ꞌ rí ma̱ꞌga jaguáanꞌxo̱ꞌ ne̱. 16 A̱ꞌkhue̱n ninújngaxo̱ꞌ ná i̱mba̱ níjñúu mbá mbaa lájwíin rí mbiꞌyuu Kláuda̱, rí kua̱ꞌa̱n ná awúun iya a̱pha̱, numuu rí na̱nguá ixnúu guéño gíñá ná mbíꞌthóo rúꞌkhue̱n. Ga̱jma̱á kháan ni̱ꞌnga̱ꞌxo̱ꞌ ni̱xma̱tráꞌáan ixe̱-rguwa lájwíin rí na̱ꞌkha̱ xawi rí ma̱jáwíin ga̱jma̱á xa̱bo̱. 17 Jamí ído̱ wámbúu̱n ni̱xma̱tráꞌáa̱n ne̱, a̱ꞌkhue̱n ni̱ru̱ꞌwáa̱ xa̱ꞌ smídúu guꞌwá-rguwa ga̱jma̱á ñuu kajngó ma̱gi̱ꞌdoo ski̱yu̱u̱ꞌ ne̱. Ni̱xrígúu̱ xtíin rí na̱ka̱ ga̱jma̱á guꞌwá-rguwa, numuu rí namíñúu̱ rí ma̱nguaꞌán ne̱ ná awúun we̱ꞌe̱ rí mbiꞌyuu Sírte̱, jamí ni̱ni̱ꞌñá-mijnée̱ rí ma̱ꞌga jiꞌdii̱n gáꞌne gíñá. 18 Ído̱ watse rí i̱mba̱ mbiꞌi, phú gakhe̱ igíꞌníi̱ eꞌne ruꞌwa gíñá, ikhaa jngó ni̱gíꞌdíi̱n ni̱stuáꞌée̱n ná awúun iya a̱pha̱ rí jago̱ guꞌwá-rguwa kajngó ma̱ꞌne wiphi ne̱. 19 Jamí ído̱ neꞌne tiriatsú mbiꞌi, a̱ꞌkhue̱n ga̱jma̱á máꞌ ñawánxo̱ꞌ ni̱stuáꞌánxo̱ꞌ* mangaa mbá xúgíí rí najmaa ná awúun guꞌwá-rguwa. 20 Phú mbaꞌa mbiꞌi ninújngoo rí nánguá nikujmaa a̱kha̱ꞌ ni máꞌ a̱ꞌgua̱án, jamí i̱tha̱án máꞌ gakhe̱ i̱ka̱-raxnúu ruꞌwa ga̱jma̱á gíñá, ikhaa jngó nánguá máꞌ guáꞌthi̱ínxo̱ꞌ rí ma̱jríñáaꞌxo̱ꞌ.

21 Numuu rí mbaꞌa máꞌ mbiꞌi ninújngoo rí nánguá iphóxo̱ꞌ guma, a̱ꞌkhue̱n Páblo̱ ni̱we̱je̱ ná majñu̱ú mbá xúgíin xa̱bo̱, jamí niꞌthúu̱n: «Xa̱bo̱ buanuu, i̱tha̱án máꞌ máján neꞌne xí ninimba̱ꞌlaꞌ ju̱ya̱á rí ni̱tha̱nꞌlaꞌ no rá, rí ma̱xágájnalóꞌ ná Kréta̱. I̱ndo̱ó máꞌ nigájnalóꞌ rí mu̱gíꞌníílóꞌ gakhe̱ ríge̱ꞌ jamí ma̱ndáti̱ga̱ꞌlóꞌ. 22 Xómáꞌ xúge̱ꞌ rá, na̱tha̱nꞌlaꞌ rí gu̱xna̱-míjnálaꞌ tsiakhe̱, numuu rí ma̱xájáñuu asndo nimbáa tsí ikháanꞌlaꞌ, rí i̱ndo̱ó máꞌ guꞌwá-rguwa ma̱mbáa. 23 Numuu rí nduꞌwíín nixtáa ga̱jma̱á nindxu̱ꞌ ánje̱l tsí nixúngua̱a̱ꞌ Ana̱ꞌlóꞌ tsí ñajunꞌ xa̱bi̱i jamí na̱ñajun ná inuu. 24 Xáꞌnii niꞌthínꞌ: "Páblo̱, ma̱xámíñaaꞌ, numuu ndaꞌyóo rí ma̱ta̱xna̱xí-mina̱ꞌ ná inuu Sésa̱r. Ga̱jma̱á numaaꞌ ikháánꞌ, Ana̱ꞌlóꞌ ma̱ꞌne-jáwíin mbá xúgíin xa̱bo̱ tsí nagóó ga̱jma̱á nindxa̱a̱ꞌ". 25 Ikhaa jngó, xa̱bo̱ buanuu, ¡gu̱xna̱-míjnálaꞌ tsiakhe̱! Numuu rí ikhúúnꞌ nanimbo̱ꞌ ja̱yo̱o̱ Ana̱ꞌlóꞌ rí ma̱ꞌne xómá rí niꞌthínꞌ ánje̱l. 26 I̱ndo̱ó máꞌ numuu rí ndaꞌyóo rí mu̱ꞌgua̱ gáwajúunlóꞌ ná mbá mbaa rí kua̱ꞌa̱n ná awúun iya a̱pha̱».

27 Mbá mbroꞌon, ído̱ ninújngoo máꞌ gu̱wa̱ꞌ i̱kho̱ (14) mbiꞌi rí nakuáxo̱ꞌ ga̱jma̱á guꞌwá-rguwa, juwaxo̱ꞌ ná inuu iya a̱pha̱ rí mbiꞌyuu Adriáti̱ko̱. Xó mbá tikhu mbroꞌon wáa eꞌne, a̱ꞌkhue̱n tsí nagóó juñu̱ú guꞌwá-rguwa ni̱ju̱mu̱ú rí nangiyuu máꞌ ma̱guáꞌnúxo̱ꞌ ná ju̱ba̱ꞌ. 28 A̱ꞌkhue̱n ni̱giéwee̱n kajngó mbuyáa̱ wátha̱ me̱jno̱ꞌ iya, jamí ndiyáa̱ rí mbá skíñú (20) xtawáán me̱jno̱ꞌ ne̱. Nigóo̱ i̱tha̱án xóó, a̱ꞌkhue̱n ni̱giéwee̱n mbu̱júu̱n, jamí ndiyáa̱ rí mbá gu̱wa̱ꞌ-nítsu (15) xtawáán rí me̱jno̱ꞌ ne̱. 29 Jamí namíñúu̱ rí ma̱ga̱ta̱ꞌmáa guꞌwá-rguwa ná tsu̱du̱u̱ itsí mba̱ꞌwo̱ ná awúun iya, ikhaa jngó ná xtuun guꞌwá-rguwa ni̱stuáꞌée̱n ná awúun iya akho̱ ajwa̱nꞌ mixngaa rí ma̱wa̱jún jayóo̱ ne̱, jamí ra̱ꞌkhá ma̱ꞌne nguáná naꞌne a̱kuíi̱n rí ma̱tse. 30 Xómáꞌ xa̱bo̱ tsí nagóó juñu̱ú guꞌwá-rguwa nini̱i̱ magáñúu̱ ngu̱ꞌwa̱, ikhaa jngó ni̱gíꞌdíi̱n ni̱xríguíi̱ ixe̱-rguwa lájwíin ná inuu iya a̱pha̱, jamí nini̱i̱ xó rí nandúu̱n mu̱stuáꞌée̱n ajwa̱nꞌ mixngaa rí ma̱wa̱jún jayóo guꞌwá-rguwa ná inuu ne̱. 31 A̱ꞌkhue̱n Páblo̱ niꞌthúun xa̱bo̱ tsí naꞌthán-ñájúún tsí ku̱ra̱tuun ajwa̱nꞌ gajmíí máꞌ xa̱bii̱: «Xí xa̱bo̱ tsíge̱ꞌ na̱nguá gatiin ná awúun guꞌwá-rguwa, ikháanꞌlaꞌ ma̱xáxóo ma̱jáwiáanꞌlaꞌ». 32 A̱ꞌkhue̱n xa̱bo̱ tsí ku̱ra̱tuun ajwa̱nꞌ ni̱ru̱thii̱n ñuu rí xtoꞌwóo ga̱jma̱á ixe̱-rguwa lájwíin, jamí ni̱ni̱ꞌñáa̱ rí ma̱ráka ne̱ ná awúun iya a̱pha̱.

33 Ído̱ rí na̱ꞌkha̱-ratse máꞌ, a̱ꞌkhue̱n Páblo̱ naxnúú tsiakhe̱ mbá xúgíin xa̱bo̱ rí mu̱pho̱ guma. Xáꞌnii niꞌthúu̱n: «Xúge̱ꞌ eꞌne gu̱wa̱ꞌ i̱kho̱ (14) mbiꞌi rí juwalaꞌ naxná-gamiéjwanlaꞌ dí gáríga̱, jamí nu̱ne̱-miꞌkhíílaꞌ, tsípholaꞌ nitháan. 34 Ikhaa jngó, na̱tha̱n-jáñalaꞌ rí mu̱peꞌtsolaꞌ kajngó ma̱guaꞌdáálaꞌ tsiakhe̱ rí ma̱juwalaꞌ, numuu rí ni máꞌ tsu̱u̱n idxa̱ꞌlaꞌ ma̱xándáti̱ga̱ asndo nimbá».

35 Jamí ído̱ wámbo̱o̱ niꞌthée̱n ajngáa rúꞌkhue̱n, a̱ꞌkhue̱n niwatuu̱n guma jamí niríguu̱ la gamaku inuu Ana̱ꞌlóꞌ ná inúú mbá xúgíin xa̱bo̱. Nixpíꞌthájngaa̱ guma jamí nigíꞌdu̱u̱n nikuiꞌtsii̱. 36 A̱ꞌkhue̱n mbá xúgíi̱n nixna-mijnáa̱ tsiakhe̱, jamí nipiꞌtsii̱ mangii̱n. 37 Rí mbá xúgiáanꞌxo̱ꞌ tsí gacháanꞌxo̱ꞌ ná awúun guꞌwá-rguwa, ñajwanxo̱ꞌ a̱jma̱ siénto̱ atsú skíñú gu̱wa̱ꞌ-nítsu i̱mba̱ (276). 38 Jamí ído̱ ni̱gi̱ꞌmúu̱ rí napiꞌtsii̱, a̱ꞌkhue̱n ni̱stuáꞌée̱n ixí iña ná awúun iya a̱pha̱ kajngó ma̱ꞌne wiphi guꞌwá-rguwa.

39 Ído̱ rí watse, xa̱bo̱ tsí nagóó juñu̱ú guꞌwá-rguwa na̱nguá nene̱-nuwii̱n mbaa rúꞌkhue̱n, i̱ndo̱ó máꞌ numuu rí ndiyáa̱ mbá ñawúun ná na̱ráꞌaa iya a̱pha̱, a̱ꞌkhue̱n ni̱ꞌgí-mijnée̱ rí muni̱i̱ magóo̱ juñúu̱ guꞌwá-rguwa ikhín. 40 A̱ꞌkhue̱n ni̱ru̱thii̱n ñawiin ajwa̱nꞌ mixngaa rí nawájun jayóo guꞌwá-rguwa, ni̱ni̱ꞌñáa̱ ne̱ ná awúun iya. Mangaa máꞌ nene̱-xawáa̱ ñawiin ixe̱ lájwíin rí jayá ikhoo guꞌwá-rguwa, a̱ꞌkhue̱n ni̱xma̱tráꞌée̱n ná inuu gíñá xtíin rí na̱ka̱ ga̱jma̱á ne̱ ná inuu ne̱, xómáꞌ guꞌwá-rguwa ni̱ka̱ jmbuu ná rawuun iya. 41 I̱ndo̱ó máꞌ numuu rí ni̱ka̱ gáwi̱ji̱i ne̱ ná nawa̱a a̱jma̱ itsu̱u̱ iya, a̱ꞌkhue̱n niꞌdumaꞌán idxu̱u̱ guꞌwá-rguwa ná we̱ꞌe̱, jamí ni̱we̱je̱ xa̱ꞌ mbá jayu ne̱. Xómáꞌ xtuun ne̱ na̱ka̱-ramigu eꞌne ski̱yu̱u̱ꞌ iya a̱pha̱ rí naxpátuma ná tsu̱du̱u̱ ne̱.

42 A̱ꞌkhue̱n xa̱bo̱ tsí ku̱ra̱tuun ajwa̱nꞌ niguáꞌdáá awan rí mu̱radíin xa̱bo̱ tsí na̱ka̱ jiꞌdiin géjwa̱nꞌ, kajngó nimbáa ma̱xáꞌngo̱o̱ magáyuu rí ma̱ꞌga ná inuu iya. 43 Xómáꞌ xa̱bo̱ tsí naꞌthán-ñájúún tsí ku̱ra̱tuun ajwa̱nꞌ ndiyoo̱ rí ma̱ꞌne-jríya̱a̱ꞌ Páblo̱, ikhaa jngó ni̱we̱je̱-ꞌthúu̱n rí mu̱xúni̱i̱ rúꞌkhue̱n. A̱ꞌkhue̱n nixná-ñájúu̱n tsí na̱ma̱ñúú nagóó ná inuu iya rí mu̱stuáꞌán-mijnée̱ ginuu̱, jamí magóo̱ ma̱díwíi̱n ná rawuun iya. 44 Jamí tsí i̱ꞌwíin, niꞌthée̱n rí magóó ga̱jma̱á ixe̱ xapa, o ga̱jma̱á xuíꞌthóo ixu̱u̱ guꞌwá-rguwa mbo̱ꞌ. Xkuaꞌnii neꞌne rí mbá xúgíi̱n nijáwíi̱n, ningujwíi̱n ná rawuun iya.