1 Ikhaa jngó, ído̱ rí nátáꞌngo̱o̱ a̱kia̱nꞌxo̱ꞌ numuu rí tsídxawíínxo̱ꞌ xáne juwalaꞌ, a̱ꞌkhue̱n niguáꞌdááxo̱ꞌ awan rí ma̱nguanáxo̱ꞌ i̱ndo̱ó máꞌ ikháanꞌxo̱ꞌ ná Aténa̱s, 2 jamí ni̱xu̱ꞌmáaxo̱ꞌ dxájwalóꞌ Timotéo̱ ma̱ꞌga gáꞌyalaꞌ. Ikhaa̱ ñajuu̱n yumbée Ana̱ꞌlóꞌ tsí nambáyáxo̱ꞌ rí nu̱tha̱n-ráꞌaxo̱ꞌ ajngáa máján ga̱jma̱á numuu Krísto̱. Nu̱xu̱ꞌmáa̱xo̱ꞌ kajngó ma̱ꞌnii̱ rí ma̱wajún-gúkuálaꞌ jamí maꞌthán-máꞌánlaꞌ ga̱jma̱á numuu rí wéje̱ máꞌ a̱kia̱nꞌlaꞌ ju̱ya̱á. 3 Kajngó nimbáa ma̱xáwabaa gáꞌne gajmá rí nakua-ranújngalaꞌ, numuu rí ikháanꞌlaꞌ máꞌ ndu̱ya̱álaꞌ rí wéje̱ máꞌ rí mu̱ꞌgua̱-ranújngalóꞌ gajmá rúꞌkhue̱n. 4 Nákhí juwaxo̱ꞌ ga̱jma̱á nindxa̱ꞌlaꞌ, wapha máꞌ ni̱tha̱nꞌlaꞌxo̱ꞌ rí ma̱nújngalóꞌ ná awúun gajmá. Jamí xkuaꞌnii máꞌ niríga̱, xómá rí gída̱ꞌ máꞌ idxa̱ꞌlaꞌ. 5 Ikhaa numuu rúꞌkhue̱n, ikhúúnꞌ mangúúnꞌ nátáꞌngo̱o̱ a̱kui̱nꞌ rí ma̱gúꞌthu̱u̱n xóó, ikhaa jngó ni̱xu̱ꞌmáa Timotéo̱ kajngó maraxi̱i̱ ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ. Ra̱ꞌkhá ma̱ꞌne rí tsí ra̱májáan ni̱ꞌngo̱o̱ neꞌne-rájáanꞌlaꞌ, jamí ñajun rí ne̱ne̱xo̱ꞌ ga̱jma̱á nindxa̱ꞌlaꞌ ma̱ꞌne rí nda̱a̱ mbá jayu numuu ne̱.

6 Jamí ído̱ ni̱ꞌkha̱a Timotéo̱ inaxo̱ꞌ rí ni̱ke̱e̱ gáꞌyalaꞌ, phú máján ajngáa rí niꞌthánxo̱ꞌ ga̱jma̱á numuu rí wéje̱ a̱kia̱nꞌlaꞌ ná inuu Ana̱ꞌlóꞌ jamí rí phú nandalaꞌ ju̱ya̱-mijnálaꞌ. Xúꞌkhue̱n máꞌ niꞌthánxo̱ꞌ rí jámba̱ miꞌtsú gíwa̱a̱n a̱kia̱nꞌlaꞌ e̱ne̱xo̱ꞌ, jamí rí phú naꞌne a̱kia̱nꞌlaꞌ rí mbu̱ya̱ꞌxo̱ꞌ, xómá rí ikháanꞌxo̱ꞌ phú naꞌne a̱kia̱nꞌxo̱ꞌ mbu̱ya̱ꞌlaꞌ. 7 Ikhaa numuu rúꞌkhue̱n, a̱ngui̱nꞌ, maske máꞌ juwaxo̱ꞌ nu̱míni̱í jamí juwaxo̱ꞌ gaꞌkho̱, ikháanꞌlaꞌ phú nu̱xna̱alaꞌ tsiakhe̱ a̱kia̱nꞌxo̱ꞌ numuu rí kuajún-gúkuálaꞌ ná inuu Ana̱ꞌlóꞌ ga̱jma̱á majñu̱u̱ rí wéje̱ a̱kia̱nꞌlaꞌ ná inuu̱. 8 Ído̱ ni̱dxawíínxo̱ꞌ rí kuajún-gúkuálaꞌ ná inuu Táta̱, asndo ndiyáa xu̱u̱ꞌ a̱kia̱nꞌxo̱ꞌ. 9 Ikhaa jngó, ído̱ naguáꞌnúxo̱ꞌ ná inuu Ana̱ꞌlóꞌ, ni tsíꞌngo̱o̱ ajngáxo̱ꞌ rí mu̱rígu̱uxo̱ꞌ gamaku ná inuu̱ ga̱jma̱á numalaꞌ, ga̱jma̱á numuu rí nadxu mi̱ndaꞌkho a̱kia̱nꞌxo̱ꞌ e̱ne̱laꞌ. 10 Mbiꞌíí mbruꞌwíín nu̱tha̱n-jáñííxo̱ꞌ Ana̱ꞌlóꞌ ga̱jma̱á numalaꞌ, rí ma̱ꞌnii̱ rí mbu̱ꞌya-mijnálóꞌ mbu̱júꞌ, kajngó mu̱ne̱-gáxi̱íxo̱ꞌ rí ndaꞌyóo ma̱ꞌne káxe̱ rí wéje̱ a̱kia̱nꞌlaꞌ ná inuu Ana̱ꞌlóꞌ.

11 Ana̱ꞌlóꞌ Mikhuíí jamí Tátiálóꞌ Jesukrísto̱ gúni̱i̱ rí mu̱ꞌguáxo̱ꞌ gúya̱ꞌlaꞌ. 12 Xúꞌkhue̱n máꞌ nu̱tha̱n-jáñííxo̱ꞌ Táta̱ rí ikhaa̱ gáꞌnii̱ rí ma̱gaja̱a̱ rí nandalaꞌ ju̱ya̱-mijnálaꞌ, jamí ma̱gaja̱a̱ rí nandalaꞌ ju̱ñu̱ú mbá xúgíin xa̱bo̱ mangaa, xómá rí ikháanꞌxo̱ꞌ nandaxo̱ꞌ ju̱ya̱ꞌlaꞌ ikháanꞌlaꞌ mangaa. 13 Mangaa máꞌ nu̱tha̱n-jáñííxo̱ꞌ Ana̱ꞌlóꞌ rí maxnálaꞌ tsiakhe̱ kajngó ma̱wajún-gúkuálaꞌ, xúꞌkhue̱n máꞌ rí ma̱xáríga̱ nimbá rí ra̱máján mi̱ꞌthán ga̱jma̱á numalaꞌ, jamí rí jaꞌwáanꞌlaꞌ gáꞌne ná inuu Ana̱ꞌlóꞌ Mikhuíí, ído̱ rí ma̱ꞌkha̱a Tátiálóꞌ Jesukrísto̱ gajmíí mbá xúgíin xa̱bi̱i.