1 A̱ngui̱nꞌ, jmínáaꞌlaꞌ máꞌ ikháanꞌlaꞌ ndu̱ya̱á májánlaꞌ rí táꞌne xúgi̱í rí nikuáxo̱ꞌ gúya̱ꞌlaꞌ. 2 Jamí ndu̱ya̱álaꞌ máꞌ mangaa rí wapha, phú ni̱gu̱ma-ngínáaꞌxo̱ꞌ jamí waꞌthán-xkawia̱ꞌxo̱ꞌ ná xuajen Filípo̱s. Maske máꞌ xúꞌkhue̱n, ná awúun mba̱a̱ jamínu̱ꞌ Ana̱ꞌlóꞌ niꞌnii̱ rí ma̱xámíñaxo̱ꞌ rí mu̱tha̱n-ráꞌalaꞌxo̱ꞌ ajngáa máján drígo̱o̱. 3 Numuu rí nákhí ni̱tha̱n-ráꞌalaꞌxo̱ꞌ, jámba̱ miꞌtsú ni̱tha̱nꞌlaꞌxo̱ꞌ rí gakon, nimbá miꞌtsú túꞌgí-mijnáxo̱ꞌ rí mu̱ña̱ꞌlaꞌ rí ra̱máján ni máꞌ rí mu̱ne̱-nduwaaxo̱ꞌ nimbáa. 4 A̱ꞌkhue̱n gakon, ikháanꞌxo̱ꞌ nu̱tha̱nxo̱ꞌ numuu rí Ana̱ꞌlóꞌ ñajuun tsí niꞌgiáanꞌxo̱ꞌ jamí nixnángawaxo̱ꞌ rí mu̱tha̱n-ráꞌaxo̱ꞌ ajngáa máján. Tsíꞌyáxo̱ꞌ rí ma̱ni̱gu̱únꞌ xa̱bo̱ gúne̱xo̱ꞌ, rí ndu̱ꞌyáxo̱ꞌ rí ma̱ni̱gu̱u̱ꞌ Ana̱ꞌlóꞌ gúne̱xo̱ꞌ, numuu rí ikhaa̱ ñajuu̱n tsí naꞌne-nuwii̱n a̱kia̱nꞌxo̱ꞌ. 5 Xómá ndu̱ya̱á májánlaꞌ ikháanꞌlaꞌ, rí ikháanꞌxo̱ꞌ ni miꞌtsú túne̱-rájáanꞌlaꞌxo̱ꞌ ga̱jma̱á ajngáa mi̱nduwa rí mitsaan iwán, ni máꞌ túne̱-ndúwáanꞌlaꞌxo̱ꞌ kajngó mu̱guaꞌdááxo̱ꞌ guéño mbúkha̱a̱. Ana̱ꞌlóꞌ ndaꞌyoo rí túne̱xo̱ꞌ rúꞌkhue̱n.

6 Tsíꞌyáxo̱ꞌ rí xa̱bo̱ numbaa mbuya̱-makuaxo̱ꞌ, ni máꞌ tsíꞌyáxo̱ꞌ rí ikháanꞌlaꞌ mbu̱ya̱-makuaxo̱ꞌ, ni máꞌ rí i̱ꞌwíin xa̱bo̱. Maske máꞌ ma̱goo mu̱xna̱-ñájwanlaꞌxo̱ꞌ rí mu̱mbáyáxo̱ꞌ numuu rí tsí waxúngui̱inꞌ drígo̱o̱ Krísto̱ ñajwanxo̱ꞌ,* 7 a̱ꞌkhue̱n gakon ne̱ne̱-xkáꞌtsalaꞌxo̱ꞌ, xómá eꞌne mbáa a̱ꞌgo̱ tsí na̱ña̱wu̱ún i̱ji̱in. 8 Xkuaꞌnii máꞌ mangáanꞌxo̱ꞌ, ra̱ꞌkhá tháán nandaxo̱ꞌ ju̱ya̱ꞌlaꞌ, rí ra̱ꞌkhá máꞌ i̱ndo̱ó ajngáa máján drígo̱o̱ Ana̱ꞌlóꞌ ndiyaxo̱ꞌ rí mu̱tha̱nꞌlaꞌ, rí asndo mangaa máꞌ nijuwaxo̱ꞌ xawi rí mu̱xna̱xálaꞌxo̱ꞌ mbá xúgíí máꞌ rí ñajwanxo̱ꞌ, numuu rí ra̱ꞌkhá tháán nandaxo̱ꞌ ju̱ya̱ꞌlaꞌ.

9 A̱ngui̱nꞌ, ikháanꞌlaꞌ na̱rmáꞌáan a̱kia̱nꞌlaꞌ xáne ni̱ñajunxo̱ꞌ jamí neꞌne níꞌnga̱ꞌxo̱ꞌ. Ni̱ñajunxo̱ꞌ mbiꞌíí mbruꞌwíín, kajngó mu̱xúne̱-gajmááxo̱ꞌ asndo nimbáa tsí ikháanꞌlaꞌ ga̱jma̱á numuu rí ndaꞌyáxo̱ꞌ, awúun máꞌ rí nu̱tha̱n-ráꞌalaꞌxo̱ꞌ ajngáa máján drígo̱o̱ Ana̱ꞌlóꞌ. 10 Ikháanꞌlaꞌ tsáanꞌ nanimba̱ꞌlaꞌ ju̱ya̱á Ana̱ꞌlóꞌ naꞌne inalaꞌ jamí naꞌne máꞌ inuu Ana̱ꞌlóꞌ mangaa, rí mbá jaꞌwu a̱kia̱nꞌxo̱ꞌ nijuwaxo̱ꞌ ga̱jma̱á nindxa̱ꞌlaꞌ. Ne̱ne̱xo̱ꞌ rí máján, jamí nda̱a̱ nimbá rí ra̱máján mi̱ꞌthán ga̱jma̱á numaxo̱ꞌ. 11 Xkuaꞌnii máꞌ mangaa ndu̱ya̱álaꞌ rí mbámbáa tsí ikháanꞌlaꞌ nu̱tha̱n-máꞌáánxo̱ꞌ jamí nu̱xna̱axo̱ꞌ tsiakhe̱ xómá eꞌne mbáa xa̱bo̱ nikhi̱i̱ gajmíí i̱ji̱in.* 12 Jamí nu̱xna̱-ngáwalaꞌxo̱ꞌ rí ma̱juwalaꞌ xómá gíꞌmaa rí ma̱ju̱wá tsí ñajúún i̱ji̱in Ana̱ꞌlóꞌ, tsí nindxaꞌwálaꞌ rí ma̱nindxa̱ꞌlaꞌ xa̱bo̱ tsí ikhaa̱ naꞌthán-ñájúu̱n jamí ma̱juwalaꞌ ná inuu̱.

13 Ikhaa numuu rúꞌkhue̱n, ikháanꞌ mangáanꞌxo̱ꞌ tsíni̱ꞌñááxo̱ꞌ rí nu̱rígu̱uxo̱ꞌ gamaku ná Ana̱ꞌlóꞌ, numuu rí nákhí ikháanꞌlaꞌ ni̱drígúlaꞌ ajngóo Ana̱ꞌlóꞌ rí ni̱tha̱n-ráꞌalaꞌxo̱ꞌ, ni̱drígúlaꞌ ne̱ xómá ajngóo Ana̱ꞌlóꞌ, ra̱ꞌkhá xómá ajngúún xa̱bo̱ numbaa. Jamí gakon máꞌ rí ajngóo Ana̱ꞌlóꞌ ñajuun ne̱, ikhaa ne̱ nambáyálaꞌ tsáanꞌ nanimba̱ꞌlaꞌ ju̱ya̱á Ana̱ꞌlóꞌ. 14 Numuu rí ikháanꞌlaꞌ a̱ngui̱nꞌ, ni̱míni̱ílaꞌ xómá ni̱míni̱í mbámbá kuthuun xa̱bi̱i Ana̱ꞌlóꞌ tsí nanimbu̱únꞌ juyáá Jesús ná numbaa Judéa̱. Numuu rí ikháanꞌlaꞌ ni̱míni̱ílaꞌ nene̱ xa̱bo̱ máꞌ xuajñalaꞌ, xómá nigíꞌníi̱ ikhii̱n ne̱ne̱ xa̱bo̱ judío̱. 15 Ikhiin máꞌ xa̱bo̱ tsúꞌkhue̱n ni̱xíya̱a̱ Táta̱ Jesús, jamí ni̱radíi̱n tsí ni̱rawíjnga̱a ajngóo Ana̱ꞌlóꞌ, xómáꞌ ikháanꞌxo̱ꞌ ni̱xkawiáanꞌxo̱ꞌ ná xuajñúu̱. Tsíni̱gu̱u̱ꞌ Ana̱ꞌlóꞌ ini̱i̱, jamí nawajún-ꞌthúu̱n mbá xúgíin xa̱bo̱. 16 Nu̱rikhaxo̱ꞌ kajngó mu̱xútha̱n-ráꞌaxo̱ꞌ ajngóo Ana̱ꞌlóꞌ ná inúú xa̱bo̱ tsí ra̱ꞌkháa judío̱ ñajúún, kajngó ma̱jáwíi̱n mangii̱n. Rí xkuaꞌnii ini̱i̱ nune̱-ra̱ꞌmáa̱ máꞌ xúꞌkhue̱n aꞌkhúu̱n, ikhaa jngó phú mba̱a̱ jamínu̱ꞌ rí nixuꞌma Ana̱ꞌlóꞌ ni̱dri̱guíi̱.

17 A̱ngui̱nꞌ, maske máꞌ xúge̱ꞌ juwaxo̱ꞌ tsíngua̱ꞌ ná inalaꞌ mbá wátha̱ wáa mbiꞌi , jámba̱ miꞌtsú gíwa̱a̱n a̱kia̱nꞌxo̱ꞌ e̱ne̱laꞌ, jamí phú naꞌne a̱kia̱nꞌxo̱ꞌ rí mu̱ꞌguáxo̱ꞌ gúya̱ꞌlaꞌ. 18 Ikhaa jngó ne̱ne̱xo̱ꞌ rí mu̱ꞌguáxo̱ꞌ gúya̱ꞌlaꞌ. Jamí ikhúúnꞌ, Páblo̱, mbaꞌa nothon ne̱ne̱ rí ma̱ꞌgálo̱ꞌ, i̱ndo̱ó máꞌ numuu rí Satanás ni̱we̱je̱-tha̱nꞌxo̱ꞌ. 19 Numuu rí ná inuu Tátiálóꞌ Jesukrísto̱ ído̱ rí ma̱ꞌkha̱a, náá lá rí ñajuun rí naꞌne jañii a̱kia̱nꞌxo̱ꞌ ga̱jma̱á numuu o rí naꞌne rí phú ma̱ꞌdxu a̱kia̱nꞌxo̱ꞌ, o gamaku rí ni̱drígúxo̱ꞌ rí phú nu̱xu̱xí-mijnáxo̱ꞌ ga̱jma̱á numuu rá. Á ra̱ꞌkhá ikháanꞌlaꞌ ñajwanlaꞌ rúꞌkhue̱n dxe̱ꞌ. 20 Gakon máꞌ rí ikháanꞌlaꞌ ñajwanlaꞌ tsí phú nu̱xu̱xí-mijnáxo̱ꞌ ga̱jma̱á numúú jamí tsí nune̱ rí phú ma̱ꞌdxu a̱kia̱nꞌxo̱ꞌ.