1 A̱ngui̱nꞌ, xómáꞌ ga̱jma̱á numuu mbiꞌi rí ma̱ꞌkha̱a Tátiálóꞌ Jesukrísto̱ rá, jamí xáne ma̱mba̱xíiꞌlóꞌ ga̱jma̱á nindxu̱u̱, phú nu̱tha̱n-jáñalaꞌxo̱ꞌ 2 rí mu̱xúni̱ꞌñá-mijnálaꞌ rí mbá nacha̱ jayu mune̱-ngra̱ꞌáanꞌlaꞌ xa̱bo̱, ni máꞌ ma̱xájuwalaꞌ gaꞌkho̱ gáꞌne rí nuthan xa̱bo̱, rí ni̱ga̱nú máꞌ mbiꞌi rí ma̱ꞌkha̱a Táta̱. Maske máꞌ nuthee̱n rí Xu̱u̱ꞌ Ana̱ꞌlóꞌ ni̱gu̱wíjnga̱a ajngáa ná inúu̱, o nuthee̱n rí xkuaꞌnii nu̱dxawíi̱n nuthan xa̱bo̱ mbo̱ꞌ, o nuthee̱n rí ni̱dri̱guíi̱ mbá i̱yi̱i̱ꞌ rí ikháanꞌxo̱ꞌ ni̱tháán mbo̱ꞌ, ma̱xánimba̱ꞌlaꞌ ju̱ñúu̱. 3 Asndo nimbáa ma̱xáꞌne-nduwáanꞌlaꞌ ga̱jma̱á nimbá rí nuthan xa̱bo̱. Numuu rí mbiꞌi rí ma̱ꞌkha̱a Táta̱, ma̱xága̱nú ne̱ asndo mbiꞌi rí ma̱ju̱wá xa̱bo̱ tsí tsíñúú mbá jayu gánimbu̱únꞌ juyáá Ana̱ꞌlóꞌ, jamí ma̱kujmaa xa̱bo̱ numbaa tsí ninújngoo naꞌne aꞌkhán,* tsí wéje̱ máꞌ rí ma̱mbáa jámuu. 4 Tsúꞌkhue̱n ñajuun xa̱bo̱ sia̱nꞌ ga̱jma̱á nindxu̱u̱ mbá xúgíí rí nuxna-mbiꞌíí xa̱bo̱ Ana̱ꞌlóꞌ o mbá xúgíí rí nune̱-mba̱a̱ xa̱bo̱ mbo̱ꞌ. Asndo maꞌgíi̱ xílii̱ ná guꞌwá dxákuiin Ana̱ꞌlóꞌ kajngó ma̱gi̱ꞌi̱i̱, jamí maꞌthée̱n rí ikhaa̱ ñajuu̱n Ana̱ꞌlóꞌ.

5 Á tsírmáꞌáan a̱kia̱nꞌlaꞌ rí ni̱tha̱nꞌlaꞌ máꞌ ríge̱ꞌ nákhí xóó xtáá ga̱jma̱á nindxa̱ꞌlaꞌ dxe̱ꞌ. 6 Jamí xúge̱ꞌ ikháanꞌlaꞌ ndu̱ya̱álaꞌ dí ñajuun rí narikhoo xa̱bo̱ aꞌkhán tsúꞌkhue̱n, kajngó ma̱kujmaa̱ asndo gága̱nú mbiꞌi rí jaꞌyoo ma̱kujmaa̱. 7 Numuu rí nañajun máꞌ ná numbaa awan ngu̱ꞌwa̱ drígo̱o̱ rí ra̱máján, i̱ndo̱ó numuu rí xúge̱ꞌ xtáa tsí narikhoo ne̱, asndo gága̱nú mbiꞌi rí ma̱ꞌga jiꞌyáa janíí tsí narikhoo ne̱ ná majñu̱ú xa̱bo̱. 8 A̱ꞌkhue̱n rí masngájma-mina̱ꞌ xa̱bo̱ tsúꞌkhue̱n tsí ninújngoo naꞌne aꞌkhán, tsí ma̱ja̱ñúu gáꞌne Táta̱ Jesús ga̱jma̱á xu̱u̱ꞌ rawuun, jamí ma̱ꞌne-gámbaa̱ ga̱jma̱á rí phú wáá nambiꞌi-taꞌaa̱ ído̱ gáꞌkhaa̱. 9 Jmína̱a̱ꞌ máꞌ Satanás ma̱ꞌne rí masngájma-mina̱ꞌ xa̱bo̱ aꞌkhán tsúꞌkhue̱n ga̱jma̱á phú mba̱a̱ tsiakhe̱, kajngó phú ma̱makúún xa̱bo̱ gáꞌnii̱ ga̱jma̱á rí phú wáá mi̱nduwa rí ma̱ꞌnii̱. 10 Ma̱jmuu̱ mbá xúgíí inii rí xkawe̱ꞌ kajngó ma̱ꞌne-nduwii̱n tsí na̱ka̱-rayámbi̱in, numuu rí ra̱khúu̱n gúdri̱guíi̱ ajngóo Ana̱ꞌlóꞌ, kajngó ma̱jáwíi̱n gáꞌne ne̱. 11 Ikhaa numuu rúꞌkhue̱n Ana̱ꞌlóꞌ naniñúu̱ rí ma̱gu̱ma-nduwii̱n, kajngó ma̱nimbúu̱n juyáa̱ rí mi̱nduwa rúꞌkhue̱n. 12 A̱ꞌkhue̱n rí mi̱ꞌxná-máꞌíin mbá xúgíin xa̱bo̱ tsí ra̱khúún gánimbu̱ún juyáá rí gakon, rí i̱wa̱á máꞌ ni̱ni̱gúu̱n eꞌne rí ra̱máján.

13 Xómáꞌ ikháanꞌlaꞌ rá, a̱ngui̱nꞌ, tsáanꞌ nandoo jaꞌyalaꞌ Táta̱, jámba̱ miꞌtsú jaꞌyaxo̱ꞌ rí mu̱rígu̱uxo̱ꞌ gamaku ná inuu Ana̱ꞌlóꞌ ga̱jma̱á numalaꞌ. Numuu rí asndo nákhí máꞌ ni̱gi̱ꞌdu̱u̱n-muu, Ana̱ꞌlóꞌ niraꞌwiáanꞌlaꞌ rí ma̱jáwiáanꞌlaꞌ ga̱jma̱á majñu̱u̱ rí na̱ka̱-ra̱gu̱ma-jaꞌwáanꞌlaꞌ eꞌne Xu̱u̱ꞌ Ana̱ꞌlóꞌ, jamí ga̱jma̱á numuu rí wéje̱ a̱kia̱nꞌlaꞌ ná inuu rí gakon. 14 Ikhaa máꞌ numuu rúꞌkhue̱n neꞌne-jáwiáanꞌlaꞌ Ana̱ꞌlóꞌ ga̱jma̱á majñu̱u̱ ajngáa máján rí nu̱tha̱n-ráꞌaxo̱ꞌ, kajngó ma̱nindxa̱ꞌlaꞌ xómá rí phú wáá jaꞌnii Tátiálóꞌ Jesukrísto̱. 15 Ikhaa jngó, a̱ngui̱nꞌ, ga̱wajúnlaꞌ xa̱ꞌ ná inuu Ana̱ꞌlóꞌ, jamí mu̱xúni̱ꞌñáá-ranimba̱ꞌlaꞌ gisngáá rí ni̱ma̱ñalaꞌ, ga̱jma̱á majñu̱u̱ ajngáa rí ni̱tha̱nxo̱ꞌ ná inalaꞌ, o ga̱jma̱á majñu̱u̱ mbá i̱yi̱i̱ꞌ rí ni̱xu̱ꞌmáxo̱ꞌ ná inalaꞌ mbo̱ꞌ.

16 Ana̱ꞌlóꞌ Mikhuíí ndiyoo jaꞌyalóꞌ jamí jámuu nixnáa̱ la tsiakhe̱ a̱kia̱nꞌlóꞌ, jamí naꞌnii̱ rí ga̱jma̱á mbá jañii a̱kia̱nꞌlóꞌ mu̱guáꞌthi̱ínlóꞌ rí ma̱jáwiáanꞌlóꞌ, numuu rí májáan a̱kuii̱n jaꞌyalóꞌ. Naꞌne a̱kui̱nꞌ rí jmína̱a̱ꞌ máꞌ Tátiálóꞌ Jesukrísto̱ jamí Ana̱ꞌlóꞌ Mikhuíí 17 muxnáa la tsiakhe̱ a̱kia̱nꞌlaꞌ, jamí muni̱i̱ rí ma̱wajún-gúkuálaꞌ kajngó mu̱tha̱nlaꞌ jamí mu̱ne̱laꞌ mbá xúgíí inii rí máján.