Rí nene̱ 11

Pédro̱ narígu̱u ajngáa ná inúú tsí nanimbu̱únꞌ juyáá Jesús ná Jerusalén

1 Ni̱dxawíín tsí nixúngui̱inꞌ Jesús jamí a̱ngia̱nꞌlóꞌ tsí júwa̱ꞌ ná numbaa Judéa̱, rí xa̱bo̱ tsí ra̱ꞌkháa judío̱ ñajúún ni̱dri̱gú ajngóo Ana̱ꞌlóꞌ mangiin. 2 Ído̱ nithanga̱a Pédro̱ ná Jerusalén, a̱ꞌkhue̱n xa̱bo̱ judío̱ tsí nanimbu̱únꞌ juyáá Jesús nitháa̱n rí ra̱máján niꞌnii̱:

3 —Náá numuu kajngó ni̱ta̱ꞌa̱a̱ꞌ guꞌwúún xa̱bo̱ tsí ra̱ꞌkháa judío̱ ñajúún, jamí nitseꞌtso ga̱jma̱á nindxúu̱n róꞌ.

4 A̱ꞌkhue̱n Pédro̱ nigíꞌdu̱u̱n niꞌthán-makúu̱n xáne phú niríga̱. Xáꞌnii niꞌthúu̱n:

5 —Nákhí xtáálo̱ꞌ ná xuajen Jópe̱ na̱tha̱n-jáñuu Ana̱ꞌlóꞌ, ndi̱yo̱o̱ inu-mbiꞌíí mbá rí xómá xtíin wapa jaꞌnii, xtoꞌwóo mbá nákho̱ rakhóo ne̱ jamí na̱ga̱taa ne̱ ná mikhuíí asndo ná inuꞌ. 6 Ído̱ ni̱ya̱xu̱u̱ mújúnꞌ ne̱ kajngó mba̱yo̱o̱ dí ñajuun gati ná awúun ne̱, a̱ꞌkhue̱n ndi̱ñu̱ú xu̱kú tsí akho̱ nakhúún, xu̱kú-xáná tsí phú namangu̱únꞌ, xu̱kú tsí nu̱xma̱ta-mijná jamí xu̱kú xna. 7 Jamí ni̱dxawuun mbá a̱ꞌwá rí niꞌthínꞌ: "Pédro̱, a̱tu̱xa̱a̱ꞌ, aradíin xu̱kú tsúꞌkhue̱n mi̱ꞌtsúún".

8 »Xómáꞌ ikhúúnꞌ ni̱thu̱u̱n: "Táta̱, ma̱xíꞌkhúu̱nlo̱ꞌ ikhúúnꞌ. Numuu rí nimbá miꞌtsú téꞌkholo̱ꞌ ganitsu rí xkawe̱ꞌ o rí ra̱jáꞌyoo me̱ꞌkholo̱ꞌ mbo̱ꞌ".

9 »A̱ꞌkhue̱n a̱ꞌwá rí na̱ꞌkha̱ ná mikhuíí niꞌthínꞌ rí riajma̱ nothon: "Rí Ana̱ꞌlóꞌ neꞌne-jaꞌwu̱u, ma̱xára̱tha̱n ikháánꞌ rí xkawe̱ꞌ ne̱". 10 Atsú nothon niríga̱ rúꞌkhue̱n, a̱ꞌkhue̱n ni̱ka̱ jiꞌyáa mbá xúgíí rúꞌkhue̱n ná mikhuíí.

11 »Awúun máꞌ rúꞌkhue̱n niguáꞌnú mbá atsúun xa̱bo̱ ná guꞌwá rí xtáálo̱ꞌ, tsí waxúꞌmii asndo ná Sesaréa̱ rí ma̱guwá gúñu̱ú. 12 Jamí Xu̱u̱ꞌ Ana̱ꞌlóꞌ niꞌthínꞌ rí ma̱ꞌgá ga̱jma̱á nindxúu̱n ga̱jma̱á mbá jañii a̱kui̱nꞌ. Mangaa máꞌ nigóó mbá majuun a̱ngia̱nꞌlóꞌ tsíge̱ꞌ ga̱jma̱á nindxu̱ꞌ, jamí ni̱ta̱ꞌa̱ꞌxo̱ꞌ ná guꞌwóo mbáa xa̱bo̱. 13 Ikhaa̱ niꞌthánxo̱ꞌ xáne ndiꞌyoo̱ mbáa ánje̱l tsí ni̱ꞌkha̱ gáwe̱je̱ ná guꞌwóo̱, jamí xáꞌnii waꞌtháa̱n neꞌne ánje̱l: "Ataxúꞌmii mbá tikhuun xa̱bo̱ magóó ná xuajen Jópe̱, kajngó mutháa̱n xa̱bo̱ tsí mbiꞌyuu Simón ma̱ꞌkha̱, tsí nutháa̱n Pédro̱. 14 Ikhaa̱ maꞌtháa̱nꞌ xáne ma̱goo ma̱jríñáaꞌ ikháánꞌ, jamí mbá xúgíin xa̱bo̱ guꞌwáaꞌ".

15 »Ído̱ ni̱gíꞌdu̱u̱n ni̱thúu̱nlo̱ꞌ, a̱ꞌkhue̱n ni̱dri̱guíi̱ Xu̱u̱ꞌ Ana̱ꞌlóꞌ mangii̱n, xómá rí ni̱dríguíi̱ ikháánꞌlóꞌ nákhí ginii. 16 A̱ꞌkhue̱n ni̱rmáꞌáan a̱kui̱nꞌ rí niꞌthán Táta̱: "Gakon máꞌ rí Juáán nixúꞌdu-maꞌíin xa̱bo̱ ná awúun iya, xómáꞌ Ana̱ꞌlóꞌ ma̱ꞌne rí ikháanꞌlaꞌ mu̱dríguíilaꞌ Xu̱u̱ꞌ". 17 Ikhaa jngó, xí Ana̱ꞌlóꞌ naxnúu̱ mangii̱n ikhaa máꞌ rí nixnálóꞌ ikháánꞌlóꞌ tsáanꞌ ninimba̱ꞌlóꞌ juꞌyáá Táta̱ Jesukrísto̱, tsáa lá ñajunꞌ ikhúúnꞌ kajngó ma̱wáju̱ꞌthu̱u̱n rí naꞌne Ana̱ꞌlóꞌ rá.

18 Ído̱ ni̱dxawíi̱n rúꞌkhue̱n, a̱ꞌkhue̱n neꞌne-wíyuu rawúu̱n, jamí ne̱ne̱-mba̱a̱ Ana̱ꞌlóꞌ, xúꞌkhue̱n máꞌ nithee̱n:

—¡Áan! ¡Asndo xa̱bo̱ tsí ra̱ꞌkháa judío̱ ñajúún neꞌne Ana̱ꞌlóꞌ rí ma̱thanga̱a a̱kui̱ín kajngó mbuya jámuu mangiin rá jno̱ꞌ!

Tsí nanimbu̱únꞌ juyáá Jesús ná Antiokía̱

19 Xómáꞌ tsí ni̱drúꞌúún ga̱jma̱á numuu rí na̱gu̱ma-ngíníi, rí ni̱gi̱ꞌdu̱u̱n nákhí nijáñuu Estéba̱n, niguáꞌníi̱ asndo ná Fenísia̱, ná Chípre̱, jamí ná xuajen Antiokía̱. Ikhín nithúu̱n ajngóo Ana̱ꞌlóꞌ i̱ndo̱ó máꞌ xa̱bo̱ judío̱. 20 I̱ndo̱ó máꞌ numuu rí ná majñu̱ú xa̱bo̱ tsí ni̱drúꞌúún júwa̱ꞌ mbá tikhuun xa̱bo̱ tsí naguwá ná Chípre̱ jamí xa̱bo̱ tsí naguwá ná Siréne̱. Ikhiin tsúꞌkhue̱n, ído̱ niguáꞌníi̱ ná xuajen Antiokía̱, nithúu̱n mangiin xa̱bo̱ griégo̱ ajngáa máján ga̱jma̱á numuu Táta̱ Jesús. 21 Jamí Táta̱ xtáa ga̱jma̱á nindxúu̱n, ikhaa jngó phú mbaꞌiin xa̱bo̱ ninimbu̱únꞌ jamí nithanga̱a a̱kui̱ín ná inuu Táta̱.

22 Ído̱ ni̱dxawíín ajngáa ríge̱ꞌ tsí nanimbu̱únꞌ juyáá Jesús ná Jerusalén, a̱ꞌkhue̱n ni̱xu̱ꞌmaa̱ Bernabé ma̱ꞌga ná Antiokía̱. 23 Ído̱ Bernabé ni̱ga̱nú, a̱ꞌkhue̱n ndiꞌyoo̱ rí Ana̱ꞌlóꞌ neꞌne-tsakun-rámii xa̱bo̱ tsúꞌkhue̱n. A̱ꞌkhue̱n nidxu a̱kuii̱n, jamí niꞌthán-múꞌúu̱n mbá xúgíi̱n rí mbóó máꞌ gúꞌgí-mijnée̱ rí ma̱ꞌne jañii a̱kuíi̱n ná inuu Ana̱ꞌlóꞌ. 24 Numuu rí ikhaa̱ ñajuu̱n mbáa xa̱bo̱ tsí májáan a̱kui̱in, jamí xtáa Xu̱u̱ꞌ Ana̱ꞌlóꞌ ga̱jma̱á nindxu̱u̱, xúꞌkhue̱n máꞌ phú wéje̱ a̱kuii̱n ná inuu Ana̱ꞌlóꞌ. A̱ꞌkhue̱n i̱tha̱án neꞌne mbaꞌiin xa̱bo̱ tsí nanimbu̱únꞌ juyáá Táta̱. 25 Nda̱wa̱á a̱ꞌkhue̱n ni̱ka̱ Bernabé ná Társo̱, kajngó mbaꞌyáa̱ Sáu̱lo̱. Jamí ído̱ nixkamaa̱, a̱ꞌkhue̱n ni̱ꞌkhaa̱ ga̱jmáa̱ ná Antiokía̱. 26 Ikhín máꞌ nijúwe̱e̱ꞌ mbá jañii tsigu gajmíi̱ tsí nanimbu̱únꞌ juyáá Jesús, jamí phú mbaꞌiin xa̱bo̱ nisngúu̱n. Ikhín máꞌ ná Antiokía̱ a̱ꞌkhue̱n nigo̱ ginii jayu mbiꞌñúú tsí nanimbu̱únꞌ juyáá Jesús «tsí nagóó tsu̱du̱u̱ Krísto̱».

27 Nákhí mbiꞌi rí ñúꞌún nigájnúú mbá tikhuun xa̱bo̱ tsí nu̱rawíjnga̱a ajngóo Ana̱ꞌlóꞌ ná Jerusalén, jamí niguáꞌníi̱ ná Antiokía̱. 28 A̱ꞌkhue̱n ni̱tu̱xu̱u̱ꞌ mbáa tsí ikhii̱n, tsí mbiꞌyuu Agábo̱, naꞌthée̱n ga̱jma̱á majñu̱u̱ Xu̱u̱ꞌ Ana̱ꞌlóꞌ rí phú gakhe̱ ma̱ri̱gá ewi ná inuu mbá xúgíí numbaa ná júwa̱ꞌ xa̱bo̱. Ikhaa ewi rúꞌkhue̱n niríga̱ nákhí niꞌthán-ñájun Kláudio̱. 29 A̱ꞌkhue̱n tsí nanimbu̱únꞌ juyáá Jesús ná Antiokía̱, niguáꞌdáa̱ awan rí mu̱mbáñúu̱ a̱ngia̱nꞌlóꞌ tsí júwa̱ꞌ ná numbaa Judéa̱. Mbámbáa nixná xómá rí ni̱ꞌngo̱o̱ nixná. 30 Xkuaꞌnii nini̱i̱, jamí ni̱xu̱ꞌmaa̱ Bernabé ga̱jma̱á Sáu̱lo̱ magóó juñu̱ú ne̱ ná inúú xa̱bo̱ buanuu tsí júwa̱ꞌ ná numbaa Judéa̱.