1 Sáu̱lo̱ ndiꞌyoo xáne nu̱xíya̱a̱ Estéba̱n, jamí máján máꞌ nene̱ xa̱bo̱ iꞌyoo̱. Asndo nákhí máꞌ mbiꞌi rúꞌkhue̱n phú gakhe̱ ni̱gi̱ꞌdu̱u̱n ni̱gu̱ma-ngíníi tsí nanimbu̱únꞌ juyáá Jesús ná Jerusalén. Jamí mbá xúgíi̱n ni̱drúꞌúu̱n ná mbayuu Judéa̱ ga̱jma̱á Samária̱, i̱ndo̱ó máꞌ tsí nixúngui̱inꞌ Jesús tágájnúú. 2 Mbá tikhuun xa̱bo̱ tsí májáan a̱kui̱ín nigóó gúdi̱i Estéba̱n, jamí phú ni̱mbi̱ye̱e̱ꞌ ga̱jma̱á numuu̱. 3 Xómáꞌ Sáu̱lo̱ naꞌne-ngíníi̱ mi̱ndaꞌkho tsí nanimbu̱únꞌ juyáá Jesús, jamí na̱to̱ꞌo̱o̱ mbámbá guꞌwá kajngó ma̱gu̱wíi̱n ga̱jma̱á tsiakhe̱ xa̱bekha jamí go̱ꞌo̱, xúꞌkhue̱n máꞌ naxudii̱n ná géjwa̱nꞌ.

4 Xómáꞌ tsí ni̱drúꞌúún, nuthan-raꞌee̱ ajngáa máján asndo náá máꞌ nagóo̱. 5 A̱ꞌkhue̱n Felípe̱, ni̱ga̱taa̱ ni̱ke̱e̱ ná xuajen Samária̱, jamí ikhín naꞌthán-rúꞌúu̱n xa̱bo̱ ga̱jma̱á numuu Krísto̱. 6 Mbá xúgíin xa̱bo̱ tsí nawi̱in nu̱ꞌgíi̱ ñaꞌwúu̱n kajngó mu̱dxawíi̱n ajngáa rí naꞌthán Felípe̱. Nu̱dxawíi̱n jamí nduyáa̱ rí phú wáá rí naꞌnii̱. 7 Numuu rí phú mbaꞌiin xa̱bo̱ tsí guáꞌdiin gíñá ꞌguéen, ído̱ nagájnáa̱ phú gakhe̱ nu̱ndxa̱ꞌwe̱e̱. Jamí phú mbaꞌiin xa̱bo̱ tsí nixtrigi̱in xúꞌkhue̱n máꞌ tsí réngu̱un naꞌni̱i a̱kui̱ín. 8 Ikhaa jngó phú gagi neꞌne a̱kui̱ín xa̱bo̱ tsí júwa̱ꞌ ná xuajen rúꞌkhue̱n.

9 I̱ndo̱ó máꞌ numuu rí xtáa mbáa xa̱bo̱ tsí mbiꞌyuu Simón ná xuajen rúꞌkhue̱n, tsí nákhí ginii naꞌne xawan, jamí neꞌne-nduwiin xa̱bo̱ Samária̱, numuu rí naꞌne-mine̱e̱ꞌ mbáa xa̱bo̱ tsí gíꞌdoo numuu. 10 Mbá xúgíin xa̱bo̱ nuꞌgí idxu̱ún rí naꞌthán xa̱bo̱ tsúꞌkhue̱n, asndo tsí ngínáa jamí asndo tsí phú gíꞌdoo numuu, jamí nuthee̱n: «Xa̱bo̱ tsíge̱ꞌ ñajuun tsí nutháa̱n "ski̱yu̱u̱ꞌ Ana̱ꞌlóꞌ rí phú mba̱a̱"».

11 Jamí phú namakúu̱n nu̱dxawíi̱n rí naꞌthán, numuu rí wajyúú máꞌ naꞌne-nduwii̱n ga̱jma̱á xawan rí naꞌnii̱. 12 I̱ndo̱ó máꞌ numuu rí ído̱ ninimbúu̱n juyáa̱ Felípe̱, tsí naꞌthán-ráꞌa ajngáa máján rí naꞌthán rí Ana̱ꞌlóꞌ naꞌthán-ñájúún xa̱bo̱, jamí ga̱jma̱á numuu Jesukrísto̱, a̱ꞌkhue̱n waxúꞌdu-maꞌíi̱n ná awúun iya, xa̱bekha jamí go̱ꞌo̱. 13 Asndo jmína̱a̱ꞌ máꞌ Simón mangaa ninimbo̱o̱ꞌ, jamí waxúꞌdu-maꞌáa̱n ná awúun iya, a̱ꞌkhue̱n nigíꞌdu̱u̱n ningrigo̱o̱ꞌ jayu ga̱jmáa̱ Felípe̱. Jamí ído̱ ndaꞌyoo̱ rí phú wáá rí naꞌne Felípe̱, phú namakuu̱.

14 Ído̱ tsí nixúngui̱inꞌ Jesús, tsí júwa̱ꞌ ná Jerusalén, ni̱dxawíín rí xa̱bo̱ Samária̱ ni̱dri̱gú ajngóo Ana̱ꞌlóꞌ, a̱ꞌkhue̱n ni̱xu̱ꞌmii̱ magóó ikhín Pédro̱ ga̱jma̱á Juáán. 15 Ído̱ niguáꞌníi̱ ikhín, a̱ꞌkhue̱n nithán-jáñíi̱ Ana̱ꞌlóꞌ ga̱jma̱á numúú xa̱bo̱ tsúꞌkhue̱n, kajngó mu̱dri̱guíi̱ Xu̱u̱ꞌ Ana̱ꞌlóꞌ. 16 Numuu rí nimbáa tsí ikhii̱n xóó túdri̱guíi̱ Xu̱u̱ꞌ Ana̱ꞌlóꞌ, rí i̱ndo̱ó máꞌ waxúꞌdu-maꞌíi̱n ná awúun iya ga̱jma̱á mbiꞌyuu Jesús. 17 A̱ꞌkhue̱n nu̱xkra̱mii̱ꞌ, jamí nu̱dri̱guíi̱ Xu̱u̱ꞌ Ana̱ꞌlóꞌ.

18 Ído̱ ndiꞌyoo Simón rí ni̱tri̱guíi Xu̱u̱ꞌ Ana̱ꞌlóꞌ ído̱ rí Pédro̱ ga̱jma̱á Juáán nu̱xkrámii̱ xa̱bo̱, a̱ꞌkhue̱n ndiyoo̱ maxnúu̱ mbúkha̱a̱ tsí nixúngui̱inꞌ Jesús, 19 jamí niꞌthúu̱n:

―Gu̱xnu̱ꞌlaꞌ mangúúnꞌ tsiakhe̱ rúꞌkhue̱n, kajngó asndo tsáa máꞌ tsí ikhúúnꞌ ma̱xkrámaa ma̱grui̱guíi̱ Xu̱u̱ꞌ Ana̱ꞌlóꞌ.

20 A̱ꞌkhue̱n Pédro̱ niꞌthúu̱n:

―Ga̱ja̱ñáaꞌ ga̱jma̱a̱ꞌ mbúkha̱a̱ꞌ, numuu rí ni̱ju̱ma̱a̱ꞌ rí ga̱jma̱á mbúkha̱a̱ ma̱goo ma̱ra̱tse̱ rí naxná Ana̱ꞌlóꞌ. 21 Na̱nguá jaꞌyaaꞌ ikháánꞌ ma̱tha̱ne̱ ñajun ríge̱ꞌ, numuu rí na̱nguá jañii a̱kia̱anꞌ ná inuu Ana̱ꞌlóꞌ. 22 Ga̱thanga̱a a̱kia̱anꞌ ná inuu Ana̱ꞌlóꞌ ga̱jma̱á numuu aꞌkhán ríge̱ꞌ, jamí arathán-jáñíí Ana̱ꞌlóꞌ, á gáꞌne xí ma̱ꞌne mba̱a̱ a̱kuii̱n jaꞌyaa̱ꞌ ga̱jma̱á numuu rí nitatsaꞌwá-mina̱ꞌ xkuaꞌnii. 23 Numuu rí nda̱yo̱o̱ rí ninújngoo ríga̱ tsixígu̱ꞌ ná awúun a̱kia̱anꞌ, jamí tsíyoo gáta̱tsi̱ꞌñáá rí nathane̱ aꞌkhán.

24 A̱ꞌkhue̱n niriꞌña Simón:

―Gu̱tha̱n-jáñíí ikháanꞌlaꞌ Táta̱ ga̱jma̱á numuꞌ, kajngó ma̱xáꞌkha̱ ná inuꞌ nimbá rí nu̱thu̱nꞌlaꞌ rí ma̱gíꞌnuꞌ.

25 Ído̱ rí Pédro̱ ga̱jma̱á Juáán wámbúu̱n nithee̱n rí nduyáa̱ ga̱jma̱á numuu Jesús jamí nithee̱n ajngóo Ana̱ꞌlóꞌ, a̱ꞌkhue̱n nithangii̱n ná Jerusalén. Awúun máꞌ rí nagúu̱n, nigóo̱-ranújngáa̱n mbaꞌa xuajen rí triga̱ ná numbaa Samária̱, jamí nithán-rúꞌúu̱n xa̱bo̱ ajngáa máján.

26 Mbáa ánje̱l tsí nixúngua̱a̱ꞌ Ana̱ꞌlóꞌ niꞌthúun Felípe̱: «A̱tu̱xa̱a̱ꞌ mi̱dxo̱ꞌ ná giaxu̱u̱ jawáá, ná jamba̱a̱ mbaa niníí rí nagájnuu ná xuajen Jerusalén jamí na̱ga̱taa na̱ka̱ ná xuajen Gása̱». 27 A̱ꞌkhue̱n ikhaa̱ ni̱tu̱xu̱u̱ꞌ ni̱ke̱e̱. Ikhín nixkamaa̱ mbáa xa̱bo̱ ñajun tsí phú gíꞌdoo numuu, tsí na̱ꞌkha̱ ná Etiopía̱. Ikhaa tsúꞌkhue̱n ñajuun tsí na̱gu̱xi̱i mbá xúgíí mbúkho̱o̱ a̱ꞌgo̱ Kandáse̱, tsí ñajuun a̱ꞌgo̱ thúngaa ná Etiopía̱. Xa̱bo̱ tsúꞌkhue̱n ni̱ka̱ gáꞌne-mba̱a̱ Ana̱ꞌlóꞌ ná Jerusalén. 28 Jamí rí xúge̱ꞌ rá, nathangaa̱ na̱kaa̱ ná xuajñuu̱, ꞌgíi̱ ná tsu̱du̱u̱ ixe̱ xkaraꞌndii rí nu̱xma̱taa xu̱kú, jamí na̱ka̱-ra̱gu̱xnuu̱ I̱yu̱u̱ꞌ Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú.

29 A̱ꞌkhue̱n rí Xu̱u̱ꞌ Ana̱ꞌlóꞌ niꞌthúun Felípe̱: «Ataxúꞌma-mina̱ꞌ mijngi ná na̱ka̱ ixe̱ xkaraꞌndii a̱ꞌkhue̱n». 30 Ído̱ ni̱tu̱muu Felípe̱ mijngi, nidxawuu̱n rí xa̱bo̱ tsúꞌkhue̱n na̱gu̱xnuu I̱yu̱u̱ꞌ Isaía̱s, a̱ꞌkhue̱n niꞌthúu̱n:

―Á nafraꞌa̱a̱ꞌ rí naraxnuu rá.

31 Xómáꞌ ikhaa̱ niꞌthée̱n:

―Xáne lá gáfroꞌo̱ꞌ, xí nimbáa na̱nguá iꞌsngéꞌ rá.

A̱ꞌkhue̱n ikhaa̱ niꞌthán-jáñuu̱ Felípe̱ rí ma̱tsimuu jamí ma̱ge̱ꞌe̱ ga̱jma̱á nindxu̱u̱. 32 Xáꞌnii iꞌthán i̱yi̱i̱ꞌ ajngóo Ana̱ꞌlóꞌ ná na̱gu̱xnuu̱:

«Ni̱ka̱ jiꞌyáa̱ xómá xu̱kú mogo̱ tsí na̱ka̱ jiꞌyáa rí ma̱ja̱ñúu.

Jamí xómá a̱ꞌdá-mógó tsí na̱nguá indxaꞌwá ná inuu tsí naꞌdo̱o̱,

xkuaꞌnii tándxaꞌwée̱ mangaa̱.

33 Nene̱-ngínáa̱, jamí túne̱-mbáníí-mújúu̱n ga̱jma̱á numuu̱.

I̱ndo̱ó máꞌ numuu rí tsí ñajúún xa̱bo̱ ri̱jyu̱u̱ꞌ, tsáa gáꞌngo̱o̱ maꞌthán ga̱jma̱á numúu̱ rá,

numuu rí nini̱i̱ rí ma̱mbáa mbá jayu mbiꞌyuu̱ ná numbaa ríge̱ꞌ».*

34 A̱ꞌkhue̱n xa̱bo̱ ñajun tsí phú gíꞌdoo numuu niꞌthúun Felípe̱: «Na̱tha̱n-jáñaaꞌ rí ma̱ra̱thu̱nꞌ, tsáa ga̱jma̱á numuu iꞌthán ríge̱ꞌ xa̱bo̱ tsí ni̱gu̱wíjnga̱a ajngóo Ana̱ꞌlóꞌ róꞌ. Á naꞌthée̱n ga̱jma̱á numuu̱ máꞌ ikhaa̱, o naꞌthée̱n ga̱jma̱á numuu i̱mba̱a̱ꞌ dxe̱ꞌ». 35 A̱ꞌkhue̱n Felípe̱ nigíꞌdu̱u̱n niꞌthán-makoo̱ asndo ná ka̱ma naꞌthán ajngáa rúꞌkhue̱n, jamí niꞌthúu̱n ajngáa máján ga̱jma̱á numuu Jesús.

36 Jamí awúun máꞌ rí nagóo̱ ná jamba̱a̱, a̱ꞌkhue̱n niguáꞌníi̱ ná ríga̱ iya, jamí niꞌthán xa̱bo̱ tsí phú gíꞌdoo numuu:

―Ge̱jyoꞌ ríga̱ iya. Dí ñajuun irikhoo rí mi̱xúꞌdu-muꞌúún ná awúun iya rá.

37 A̱ꞌkhue̱n Felípe̱ niꞌthúu̱n:

―Xí nanimba̱a̱ꞌ ga̱jma̱á mbá jañii a̱kia̱anꞌ, ma̱goo máꞌ xúꞌkhue̱n rá.

A̱ꞌkhue̱n ikhaa̱ niriꞌñee̱:

―Nanimbo̱ꞌ rí Jesukrísto̱ ñajuun A̱dée Ana̱ꞌlóꞌ.*

38 A̱ꞌkhue̱n nixná-ñájwii̱n rí ma̱we̱je̱ ixe̱ xkaraꞌndii rí nu̱xma̱taa xu̱kú, jamí mbá nájmii̱ niguátaa̱n ná ríga̱ iya. A̱ꞌkhue̱n Felípe̱ nixúꞌdu-maꞌáan xa̱bo̱ ñajun tsí phú gíꞌdoo numuu ná awúun iya. 39 Ído̱ nigájnáa̱ ná iya, a̱ꞌkhue̱n rí Xu̱u̱ꞌ Ana̱ꞌlóꞌ mbá nacha̱ ni̱ka̱ jayáa̱ Felípe̱. Jamí xa̱bo̱ ñajun tsí phú gíꞌdoo numuu, nánguá ndiꞌyoo̱ Felípe̱. A̱ꞌkhue̱n phú gagi a̱kuii̱n nigíꞌmaa̱ jambo̱o̱ ni̱ke̱e̱. 40 Xómáꞌ Felípe̱ nikujmaa̱ ná xuajen Asóto̱. Jamí ni̱ke̱e̱-raꞌthán-raꞌee̱ ajngáa máján mbá xúgíí xuajen ná ni̱ke̱e̱-ranújngoo̱, xkuaꞌnii asndo ni̱ga̱níi̱ ná xuajen Sesaréa̱.