1 Ído̱ neꞌne atsú mbiꞌi rí ni̱ga̱nú Fésto̱ ná xuajen Sesaréa̱ kajngó ma̱grui̱guíi̱ ñajun, a̱ꞌkhue̱n nigájnuu̱ ni̱ke̱e̱ ná xuajen Jerusalén. 2 Ikhín dxakuun tsí gíꞌdoo numúú xúꞌkhue̱n máꞌ xa̱bo̱ buanuu judío̱ tsí phú gíꞌdoo numúú, ni̱xna̱xí-mijná ná inuu Fésto̱ kajngó muthee̱n aꞌkhúun Páblo̱. 3 Nu̱nda̱ꞌáa̱ rí ma̱ꞌnii̱ mbá rí máján, rí ma̱ꞌnii̱ rí ma̱ꞌkha̱ jiꞌyáa Páblo̱ ná Jerusalén. Numuu rí ikhii̱n nuꞌgí-mijnée̱ rí mu̱xíya̱a̱ ná jamba̱a̱. 4 Xómáꞌ Fésto̱ niꞌthán rí Páblo̱ ni̱tia̱wa̱án májáán ná Sesaréa̱. Jamí niꞌthée̱n rí wapha máꞌ ma̱ꞌgaa̱ ikhín. 5 A̱ꞌkhue̱n niꞌthúu̱n: «Ikháanꞌlaꞌ tsáanꞌ ñajwanlaꞌ xa̱bo̱ ñajun, gaꞌgualaꞌ ga̱jma̱á nindxu̱ꞌ. Jamí xí xa̱bo̱ tsúꞌkhue̱n neꞌne mbá rí xkawe̱ꞌ, gu̱tha̱nlaꞌ aꞌkhúu̱n ñúꞌún».

6 Fésto̱ nixtáa̱ xó mbá migiñu o mbá gu̱wa̱ꞌ wáa mbiꞌi ná Jerusalén, a̱ꞌkhue̱n ni̱kaa̱ ná Sesaréa̱. Ído̱ watse rí i̱mba̱ mbiꞌi, a̱ꞌkhue̱n ni̱gi̱ꞌi̱i̱ ná xílii̱ kajngó maxudaa̱ awan, jamí nixná-ñájwii̱n rí ma̱ꞌkha̱ jiꞌyáa Páblo̱. 7 Ído̱ ni̱ga̱nú Páblo̱, a̱ꞌkhue̱n xa̱bo̱ judío̱ tsí niguwá ná Jerusalén mbá nawa̱a̱ niwájwii̱n ná inuu̱. Jamí nini̱i̱ aꞌkhúun, nithee̱n rí niꞌnii̱ mbaꞌa inii aꞌkhán rí phú gakhe̱, i̱ndo̱ó máꞌ numuu rí tsíꞌngúu̱n mu̱snga̱jmee̱ rí gakon ga̱jma̱á numuu rí nuthee̱n. 8 A̱ꞌkhue̱n Páblo̱ niꞌthán-mbáyú-mina̱ꞌ: «Ikhúúnꞌ táxu̱ꞌdá-mina̱ꞌ nimbá aꞌkhán ga̱jma̱á numuu xtángawúún xa̱bo̱ judío̱, ni máꞌ ga̱jma̱á numuu guꞌwá dxákuun, ni máꞌ ga̱jma̱á numuu thúngaa Sésa̱r».

9 Xómáꞌ Fésto̱ nandoo̱ ma̱nguanú-mújúu̱n gajmíi̱ xa̱bo̱ judío̱, ikhaa jngó niꞌthúu̱n Páblo̱:

―Á nandaaꞌ mi̱dxo̱ꞌ ná Jerusalén, kajngó ma̱xu̱ꞌdáa awan ga̱jma̱á numaaꞌ ikhín dxe̱ꞌ.

10 A̱ꞌkhue̱n Páblo̱ niꞌthán:

―Xtáá máꞌ ná inuu ꞌgí xíli̱i thúngaa Sésa̱r, ná jaꞌyoo ma̱to̱ꞌo̱o̱ awan ga̱jma̱á numuꞌ. Nathayáá máꞌ májáanꞌ ikháánꞌ rí táñu̱ú xa̱bo̱ judío̱ nimbá rí ra̱máján. 11 Xí numuu rí ríga̱ mbá rí ra̱máján ne̱ne̱ rí asndo jaꞌyoo rí ma̱ja̱ñúꞌ, tsítha̱n rí tsíyoꞌ ma̱ja̱ñúꞌ. I̱ndo̱ó máꞌ numuu rí na̱nguá gakon rí nuthan xa̱bo̱ tsíge̱ꞌ ga̱jma̱á numuꞌ, ikhaa jngó nimbáa ma̱xáxóo maxnáxu̱únꞌ ná ñawúu̱n ikhii̱n. Ikhúúnꞌ na̱nda̱ꞌa̱ rí thúngaa Sésa̱r gáxudaa awan ga̱jma̱á numuꞌ.

12 Fésto̱ niꞌthán-mina̱ꞌ gajmíí xa̱bo̱ buanuu ju̱ma̱ drígo̱o̱, jamí ído̱ wámbo̱o̱, a̱ꞌkhue̱n niꞌthúu̱n Páblo̱:

―Ikháánꞌ ni̱ta̱nda̱ꞌa̱ rí thúngaa Sésa̱r maxúdaa awan ga̱jma̱á numaaꞌ, ikhaa jngó ná inuu máꞌ Sésa̱r gídxú.

13 Ído̱ ninújngoo mbá wátha̱ wáa mbiꞌi, a̱ꞌkhue̱n ni̱ꞌkha̱ thúngaa Agrípa̱ ga̱jma̱á Bereníse̱ ná Sesaréa̱ kajngó mu̱ra̱xii̱ Fésto̱. 14 Jamí ikhii̱n nijúwe̱e̱ꞌ mbaꞌa mbiꞌi ikhín, a̱ꞌkhue̱n Fésto̱ niꞌthúun Agrípa̱ ga̱jma̱á numuu Páblo̱:

―Ge̱jyoꞌ xtáa mbáa xa̱bo̱ tsí Féli̱ks niniñuu ná géjwa̱nꞌ. 15 Ído̱ nika ná Jerusalén, a̱ꞌkhue̱n niguwá ná inuꞌ dxakuun tsí gíꞌdoo numúú, jamí xa̱bo̱ buanuu judío̱. Nini̱i̱ aꞌkhúun xa̱bo̱ tsúꞌkhue̱n jamí ni̱nda̱ꞌe̱ꞌ rí ma̱xna̱ ajngóꞌ rí ma̱ja̱ñúu̱. 16 A̱ꞌkhue̱n ni̱thu̱ún xa̱bo̱ tsúꞌkhue̱n rí tsíne̱ xkuaꞌnii xa̱bo̱ Róma̱, rí mu̱xna̱xíi̱ wapha xa̱bo̱ rí ma̱ja̱ñúu, xí na̱nguá wájun ná inuu̱ tsí nune̱ aꞌkhúu̱n, kajngó ma̱goo maꞌthán-mbáyú-mine̱e̱ꞌ ná inúú xa̱bo̱ tsúꞌkhue̱n. 17 Ikhaa jngó ído̱ niguáꞌníi̱ mbá ꞌnduꞌ ge̱jyoꞌ, táne̱-gajyúu máꞌ, a̱ꞌkhue̱n rí i̱mba̱ mbiꞌi niꞌgúnꞌ ná xíli̱ꞌ kajngó ma̱xu̱ꞌdáa awan, jamí ni̱xna̱-ñájun rí ma̱ꞌkha̱ jiꞌyáa xa̱bo̱ tsúꞌkhue̱n. 18 I̱ndo̱ó máꞌ numuu rí xa̱bo̱ tsí niguwá nune̱ aꞌkhúu̱n, na̱nguá máꞌ nithee̱n nimbá aꞌkhán rí phú mba̱a̱ ga̱jma̱á numuu̱, xó rí ni̱ju̱mu̱ꞌ ikhúúnꞌ rí muthee̱n. 19 I̱ndo̱ó máꞌ rí nuthee̱n ga̱jma̱á numuu̱ ñajuun xó rí nune̱-mba̱a̱ Ana̱ꞌlóꞌ ikhii̱n, jamí nuthee̱n ga̱jma̱á numuu mbáa xa̱bo̱ tsí mbiꞌyuu Jesús, tsí nijáñuu máꞌ, jamí Páblo̱ naꞌthán rí xtáa̱ ndaꞌyee̱. 20 Xómáꞌ ikhúúnꞌ rá, a̱jma̱ a̱kui̱nꞌ, tsíyo̱o̱ dí gáne̱ ga̱jma̱á numuu rí nuthee̱n, ikhaa jngó ni̱ra̱xu̱u̱ xí nandoo̱ ma̱ꞌgee̱ ná Jerusalén, kajngó ñúꞌún gáto̱ꞌo̱o̱ awan ga̱jma̱á numuu̱. 21 Xómáꞌ Páblo̱ ni̱nda̱ꞌa̱ rí thúngaa ginii Augústo̱ gáxudaa awan ga̱jma̱á numuu̱. Ikhaa jngó ni̱xna̱-ñájun rí ma̱gi̱de̱e̱ꞌ xóó ná géjwa̱nꞌ asndo gáyaphúún rí ma̱xu̱ꞌmáa̱ ná inuu thúngaa Sésa̱r.

22 A̱ꞌkhue̱n Agrípa̱ niꞌthúun Fésto̱:

―Nandoꞌ ma̱dxawuun mangúúnꞌ ajngóo xa̱bo̱ tsúꞌkhue̱n.

Xómáꞌ Fésto̱ niꞌthán:

―Gátsíí gáta̱dxawíín ajngóo̱.

23 Ído̱ watse rí i̱mba̱ mbiꞌi, a̱ꞌkhue̱n ni̱ꞌkha̱ thúngaa Agrípa̱ ga̱jma̱á Bereníse̱, jamí phú karathoo niguáꞌníi̱ gajmíi̱ mbaꞌiin xa̱bo̱. Ni̱tu̱ꞌúu̱n ná guꞌwá-ñajun gajmíi̱ xa̱bo̱ ede̱ drígu̱ún tsí ku̱ra̱tuun ajwa̱nꞌ, jamí xa̱bo̱ buanuu tsí i̱tha̱án gíꞌdoo numúú ná xuajen. A̱ꞌkhue̱n Fésto̱ nixná-ñájun rí ma̱ꞌkha̱ jiꞌyáa Páblo̱. 24 Jamí Fésto̱ nigíꞌdu̱u̱n niꞌthán xáꞌnii: «Táta̱ thúngaa Agrípa̱, jamí mbá xúgiáanꞌlaꞌ táta̱ tsáanꞌ juwalaꞌ ge̱jyoꞌ ga̱jma̱á nindxa̱ꞌxo̱ꞌ, ge̱jyoꞌ wéje̱ xa̱bo̱ tsíge̱ꞌ ná inalaꞌ. Ikhaa tsíge̱ꞌ ñajuun tsí mbá xúgíin xa̱bo̱ judío̱ nune̱ aꞌkhúun ná inuꞌ ná Jerusalén jamí ná Sesaréa̱ ge̱jyoꞌ, nu̱ndxa̱ꞌwe̱e̱ ná inuꞌ rí jaꞌyoo ma̱ja̱ñúu̱. 25 Xómáꞌ ikhúúnꞌ na̱nguá ni̱xkamaa nimbá aꞌkhúu̱n rí asndo jaꞌyoo rí ma̱ja̱ñúu̱. I̱ndo̱ó máꞌ numuu rí ikhaa̱ ni̱nda̱ꞌe̱e̱ rí thúngaa ginii Augústo̱ gáxudaa awan ga̱jma̱á numuu̱, ikhaa jngó ni̱ꞌgí-mina̱ꞌ rí ma̱xu̱ꞌmáa̱ ná inuu̱ ikhaa̱. 26 I̱ndo̱ó máꞌ numuu rí xóó tsíyo̱o̱ dí gátháán ná inuu i̱yi̱i̱ꞌ ga̱jma̱á numuu̱, rí ma̱ꞌga ná inuu táta̱ thúngaa. Ikhaa jngó naꞌkha ja̱ya̱a̱ ná inalaꞌ, jamí i̱tha̱án máꞌ ná inaaꞌ ikháánꞌ, thúngaa Agrípa̱, kajngó ma̱tra̱xíi̱. Jamí ído̱ wámba̱a̱ꞌ nitraxíi̱, a̱ꞌkhue̱n mba̱yo̱o̱ dí ñajuun ma̱tháán ná inuu i̱yi̱i̱ꞌ ga̱jma̱á numuu̱. 27 Numuu nda̱yo̱o̱ rí nda̱a̱ numuu rí ma̱xu̱ꞌmáa mbáa xa̱bo̱ tsí kra̱ꞌaa géjwa̱nꞌ, xí ma̱xátha̱n náá rí aꞌkhúu̱n».