1 Ikhaa jngó, gu̱ya̱á májánlaꞌ rí yumbée Krísto̱ ñajwanxo̱ꞌ. Ni̱ge̱ꞌe̱ inaxo̱ꞌ rí mu̱sngááxo̱ꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. 2 Jamí ndaꞌyóo rí xa̱bo̱ tsí waꞌxná-ngawúún mune̱ ñajun, ma̱nindxúu̱n xa̱bo̱ tsí jmbiin. 3 Xómáꞌ ikhúúnꞌ, tsíxná-gamiéjunꞌ guéño máꞌ xáne i̱ra̱jwa̱ꞌlaꞌ ga̱jma̱á numuꞌ, o xáne i̱ra̱jwa̱ꞌ numuꞌ xa̱bo̱ ñajun mbo̱ꞌ. Numuu rí ni máꞌ ikhúúnꞌ tsíra̱jwa̱ꞌ numuꞌ. 4 Maske máꞌ na̱nguá gíwa̱a̱n a̱kui̱nꞌ xí ne̱ne̱ rí ra̱máján, ra̱ꞌkhá máꞌ rúꞌkhue̱n iꞌthán rí nda̱a̱ aꞌkhúnꞌ. Tsí naxúdaa awan ga̱jma̱á numuꞌ ñajuun Táta̱ tsí naꞌthán-ñájun. 5 Ikhaa jngó, mu̱xúra̱jwa̱ꞌlaꞌ nacha̱ guéño ga̱jma̱á numuu nimbáa. Aguaꞌthi̱ínlaꞌ asndo ma̱ꞌkha̱a Táta̱. Ikhaa̱ ma̱gu̱wíi̱ ná pa̱jnu rí ríga̱ ngu̱ꞌwo̱o̱ ná mijína, jamí masngájmee̱ rí nandxaꞌwá-mina̱ꞌ mbámbáa xa̱bo̱. A̱ꞌkhue̱n rí Ana̱ꞌlóꞌ maꞌthán xáne jaꞌnii ñajun rí neꞌne mbámbáa.

6 A̱ngui̱nꞌ, na̱tha̱nꞌlaꞌ ríge̱ꞌ ga̱jma̱á numuꞌ ikhúúnꞌ jamí Apólo̱s numuu rí nandoꞌ ja̱ya̱ꞌlaꞌ. Kajngó ga̱jma̱á majña̱ꞌ ikháanꞌxo̱ꞌ gáma̱ñalaꞌ ríge̱ꞌ: «Mu̱xúndxa̱ꞌwa̱-mijnálaꞌ i̱tha̱án ñúꞌún ga̱jma̱á numuu rí ka̱ma naꞌthán». Ra̱ꞌkhá mu̱xu̱xí-mijnálaꞌ ga̱jma̱á numuu mbáa, jamí tsíyalaꞌ gúya̱á i̱mba̱a̱ꞌ gáꞌne. 7 Tsáa iꞌthán rí i̱wa̱á gíꞌdoo numalaꞌ ikháanꞌlaꞌ róꞌ. Dí guáꞌdáálaꞌ rí tájanálaꞌ róꞌ. Xí mbá xúgíí rí guáꞌdáálaꞌ, nijanálaꞌ ne̱, náá numuu kajngó nu̱xu̱xí-mijnálaꞌ asndo xómá rí tájanálaꞌ ne̱ xúꞌkhue̱n róꞌ.

8 Ni̱gi̱ꞌmalaꞌ máꞌ rá. Guáꞌdáálaꞌ mi̱ndaꞌkho máꞌ rá. Ninindxa̱ꞌlaꞌ máꞌ thúngaa rá, jamí táꞌyálaꞌ máꞌ rí mu̱mbáyálaꞌxo̱ꞌ. ¡Phú máján lá xí gakon rí thúngaa ñajwanlaꞌ, kajngó ma̱trigáanꞌxo̱ꞌ mu̱tha̱n-ñájunxo̱ꞌ ga̱jma̱á nindxa̱ꞌlaꞌ! 9 Xómáꞌ ikhúúnꞌ na̱ndxa̱ꞌwa̱-mína̱ꞌ rí tsáanꞌ waxúnguáanꞌxo̱ꞌ, asndo xómá tsu̱di̱í jayu niniñaxo̱ꞌ Ana̱ꞌlóꞌ jaꞌnii, xómá xa̱bo̱ tsí waꞌxná-máꞌíin máꞌ rí ma̱ja̱ñúú jaꞌnii. Numuu rí ninindxa̱ꞌxo̱ꞌ xa̱bo̱ tsí nitamindúún eꞌne numbaa, tsí nitanduꞌwájmii ene̱ ánje̱l jamí xa̱bo̱. 10 Ga̱jma̱á numuu Krísto̱, ikháanꞌxo̱ꞌ ñajwanxo̱ꞌ xa̱bo̱ tsí júgoo mbá jayu inúú, xómáꞌ ikháanꞌlaꞌ ñajwanlaꞌ xa̱bo̱ tsí na̱ma̱ñúú mi̱ndaꞌkho. Ikháanꞌxo̱ꞌ wabáanꞌxo̱ꞌ, xómáꞌ ikháanꞌlaꞌ guáꞌdáálaꞌ tsiakhe̱. Ikháanꞌlaꞌ na̱gu̱ma-mbáanꞌlaꞌ, xómáꞌ ikháanꞌxo̱ꞌ ndawa̱a̱ tsí iya-makuaxo̱ꞌ. 11 Asndo mbiꞌi ríge̱ꞌ mingínáaꞌxo̱ꞌ na̱xki̱dxa̱ꞌxo̱ꞌ, najándawaxo̱ꞌ, nda̱a̱ xtíñaxo̱ꞌ, na̱gu̱ma-ngínáaꞌxo̱ꞌ, jamí nda̱a̱ guꞌwá ná ma̱juwaxo̱ꞌ. 12 Jamí phú níꞌnga̱ꞌxo̱ꞌ numuu rí nu̱ñajunxo̱ꞌ mi̱ndaꞌkho ga̱jma̱á ñawánxo̱ꞌ. Nuthan-xkawia̱ꞌxo̱ꞌ xa̱bo̱, jamí ikháanꞌxo̱ꞌ nu̱ne̱-tsakun-rámii̱xo̱ꞌ. Nuxkaxo̱ꞌ xa̱bo̱, jamí ikháanꞌxo̱ꞌ na̱ꞌngo̱o̱ a̱kia̱nꞌxo̱ꞌ. 13 Ído̱ nune̱-xuxtaa xa̱bo̱ ga̱jma̱á numaxo̱ꞌ, ikháanꞌxo̱ꞌ nu̱tha̱nxo̱ꞌ rí máján ga̱jma̱á numúu̱. Asndo mbiꞌi ríge̱ꞌ nuña̱ꞌxo̱ꞌ xómá rí tsíjmaa mbá jayu ná numbaa, xómá náskúún xa̱bo̱ jaꞌñáaꞌxo̱ꞌ.

14 Ma̱xáju̱ma̱ꞌlaꞌ rí na̱tháán ríge̱ꞌ numuu rí nandoꞌ gáne̱-matiáanꞌlaꞌ, rí nandoꞌ gáxpríguálaꞌ xómá i̱ji̱nꞌ tsí phú nandoꞌ ja̱ñu̱ú. 15 Maske máꞌ phú mbaꞌiin mi̱ndaꞌkho xa̱bo̱ tsí nusngálaꞌ ajngóo Krísto̱, mbáwúún ikhúúnꞌ ñajunꞌ ana̱ꞌlaꞌ. Numuu rí nákhí ni̱tha̱nꞌlaꞌ ajngáa máján ga̱jma̱á numuu Krísto̱, mbiꞌi rúꞌkhue̱n ninindxu̱ꞌ ana̱ꞌlaꞌ. 16 Ikhaa jngó, na̱tha̱n-jáñalaꞌ rí gu̱ya̱ri̱dalaꞌ xkri̱doo rí na̱ne̱lo̱ꞌ. 17 Ikhaa máꞌ numuu rúꞌkhue̱n ni̱xu̱ꞌmáalo̱ꞌ Timotéo̱ rí ma̱ꞌga gáꞌyalaꞌ. Timotéo̱ jaꞌnii xómá a̱ꞌdéꞌ, tsí phú nandoꞌ ja̱yo̱o̱ jamí jmbii ná inuu Táta̱. Ikhaa̱ ma̱ꞌnii̱ rí ma̱rmáꞌáan a̱kia̱nꞌlaꞌ xáne i̱sngáálo̱ꞌ numuu Krísto̱ mbá xúgíí ná nakalo̱ꞌ jamí ná mbá xúgíí kuthuun tsí nanimbu̱únꞌ juyáá Jesús.

18 Mbá tikhuun tsí ikháanꞌlaꞌ maphú nu̱xu̱xí-mijná, asndo xómá rí ni miꞌtsú náxáꞌgá gáya̱ꞌlaꞌ jaꞌnii. 19 Xómáꞌ ikhúúnꞌ na̱ꞌgí-mina̱ꞌ rí ma̱ꞌgá máꞌ wapha gáya̱ꞌlaꞌ, xí Táta̱ nandoo. A̱ꞌkhue̱n mba̱yo̱o̱ dí na̱ꞌngu̱ún guéño nune̱ tsí nu̱xu̱xí-mijná a̱ꞌkhue̱n, ra̱ꞌkhá i̱ndo̱ó rí nuthee̱n. 20 Numuu rí xa̱bo̱ tsí nithán-ñájwíín eꞌne Ana̱ꞌlóꞌ, ra̱ꞌkhá i̱ndo̱ó naꞌthée̱n, rí naꞌnii̱ rí naꞌthée̱n ga̱jma̱á ski̱yu̱u̱ꞌ Ana̱ꞌlóꞌ. 21 Xáne iyalaꞌ xúꞌkhue̱n rá. Ma̱ꞌgá gáya̱ꞌlaꞌ ga̱jma̱á xkuíya̱ ráanꞌ, o ma̱ꞌgá ga̱jma̱á ajngáa waba jamí ma̱ꞌgá gáne̱-xkáꞌtsalaꞌ dxe̱ꞌ.